7 Capítulo
Ricushpa chasquichijcunapaj yali mandaj huañuchishca can, gobierno tucurishca can, llactapuracuna chaupirin tribucunapi—Jacob, shuj anti-Cristo, shuj pacalla tandanajunacunapaj jatun mandaj tigran—Nefi yachachin arrepentimientota, Cristopi fetapash—Ángelcuna paiman achil yachachin punllan punllan, jatarichinbash paipaj huauquita huañuimanda—Tauca arrepentirin, bautizarinbash. Nara C.H. 30–33.
1 Cunan riqui, ñuca canman ricuchisha paicuna na churarca shuj jatun mandajta pambapa; ashtahuangari cai huatallata, ari, quimsa chunga huatapi, tucuchirca ricushpa chasquichina jatun tiarinapi, ari, pambapaj ricushpa chasquichijcunapaj yali mandajta huañuchirca.
2 Llactapuracuna chaupirishcacuna carca shujmanda cutishujpaj contra; shujmanda cutishujman tribucunapi chaupirirca, tucui runa paipaj aillucunahuan, paipaj aillupuracunahuan, ali rijsicunapash; shina paicuna pambapaj gobiernota tucuchirca.
3 Tucui tribu shuj yali mandajta ajllarca, nacashpa paicunapaj shuj pushajta; shina tribucunaman tigrarca, tribucunapaj pushajcunapash.
4 Cunan riqui, paipuracunapi na tiarca maijan runapash ashtahuangari maijan ashtaca ailluta charij, tauca aillupuracuna, ali rijsicunapash; chaimanda paicunapaj tribucuna ninan jatun cai callarirca.
5 Cunan tucui cai rurashca carca, cunangaman paipuracunapi nara macanajuicuna tiarca; tucui cai na ali ruraicuna llactapuracunapaman shamushca carca paicunamandallata Satanáspaj ushaiman saquirishcamanda.
6 Gobiernopaj regulaciónguna tucuchishca carca, pacalla tandanajunacunamanda ali rijsicunapaj, aillupuracunamandapash tucui maijangunapaj achil villachijcunata huañuchirca.
7 Paicuna shuj jatun randimanda plituri tiachun rurarca pambapi, shinashpa llactapuracunamanda ñalla tucuilla alita rurajcuna na alicunaman tigrarca; ari, ashtahuangari tiarca paicunapurapi huaquinlla ali ruraj runacuna.
8 Shina sujta huatacunallapash nara yalishca carca ñalla tucuimanda yalishca llactapuracunamanda na ali rurajcunamanda tigrashca carca, alcu paipaj shungu tigrachishcata micuj laya, nacashpa cuchi turupi tigrai shitarin laya.
9 Cunan cai pacalla tandanajunacuna, cai apamushca carca shina jatun na ali ruraicunata llactapuracunapaj jahuaman, paicuna tandanajurca paipura, paicunapaj umapi cachun shuj runata churarca paita shutichirca Jacob;
10 Paita shutichirca paicunapaj jatun mandaj; chaimanda pai shuj jatun mandajman tigrarca cai na alicuna tandanajushcacunapaj jahuapi; pai carca shuj yalishpa mandajcunamanda pimi paipaj shimita cushca carca achil villachijcunapaj contra maijan Jesúsmanda testificarca.
11 Yalishca jipa yupanapi na shina shinllicuna carca imashna llactapuracunapaj tribucunashna, maijan tandanajushca paipura carca ashtahuangari paicunapaj pushajcuna catichunbacha saquishcacunata rurashca caimandalla na, shujllangaman paipaj tribumanda; shina cashpapash napacha ricunayachijcuna carca; masqui na ali ruraj llactapuracuna carca, shina cashpapash tandanajushcacuna carca napacha ricunayachipi maijan shuj convenioman yaicushcacunahuan tucuchingapa gobiernota.
12 Chaimanda, Jacob ricushpa paicunata napacha ricunayachijcuna carca ashtahuanbacha paicunata yali, tandanajushcapaj jatun mandaj cashpa, chaimanda paipaj llactapuracunata mandarca pacajushca calpachun pambapaj carupacha pushtuman, paicunapurapaj shuj reinota shayachichun, shicanyarishcacunahuan tandanajushca cangacaman, (paicunata uyanayaita nirca tauca shicanyashcacuna tianga nishpa) alipacha shinlli carca macanajungapa llactapuracunapaj tribucunahuan; paicuna rurarca shina.
13 Shina ñapash carca paicunapaj purishpa rina cai na jarcashca caita usharca imaura llujshishca rishca carca llactapuracunapaj japingamanda. Shina tucurirca quimsa chunga huata; shina carca Nefipaj llactapuracunapaj ruranacuna.
14 Yalishca jipa quimsa chunga shuj huatapi paicuna tribucunapi chaupirishca carca, tucui runa paipaj aillupa, aillupuracuna, ali rijsicuna; shina cashpapash paicuna shuj pactachinata rurashca carca na macanajungapa ringapa caishuhuan chaishuhuan; ashtahuangari na tandanajushca carca paicunapaj catichunbacha saquishcacunapi, gobiernopaj layacunapi, imashpa caicuna rurashca carca maijan yali mandajcunapaj, paicunapaj pushajcunapaj munaicunahuan. Ashtahuangari paicuna churarca catichunbacha saquishcacunata rurachunbacha shuj tribu cutishuj tribupaj contra na alita na rurana, shina cashpapash asha canapi sumaj causaita pambapi charirca; ashtahuangari, paicunapaj shungucuna caruyashca carca Apunchij paicunapaj Diospamanda, achil villachijcunata rumihuan macarca paicunapamanda llujchishpa calpachircapash.
15 Yalishca jipa Nefi—ángelcunahuan ricui tucushca caimanda Apunchijpaj shimihuanbash, chaimanda ángelcunata ricushca cashpa, ñavi ñavi testigo cashpa, paiman cushca ushaita charimanda yachangapa Cristopaj achil yachachishcacunamanda, ñavi ñavi testigopash cashpa ñapash caruyaita ali ruraimanda paicunapaj na ali ruraicunaman, millanayaicunapash;
16 Chaimanda, llaquirishca cashpa paicunapaj shinlli shungucunamanda, paicunapaj ñausa yuyaicunamanda—paicunapaman llujshirca chai huatallata, testificai callarirca, na manllaihuan, arrepentimientota, juchacunapaj anchuchinatapash Apunchij Jesucristopi femanda.
17 Pai paicunaman tauca cuzascunata achil yachachirca; caicunamanda tucuilla na quilcashca cai ushan, ashalla ali can, chaimanda cai quilcashcapi chaicuna na quilcashcacuna can. Nefi achil yachachirca ushaihuan, jatun autoridadhuanbash.
18 Yalishca jipa paihuan fiñashca carca, paicunata yali jatun ushaita charijpi, imashpa cai na ushanalla carca paipaj shimicunata na crina, imashpa shina jatun carca paipaj fe Apunchij Jesucristopi, ángelcuna achil yachachirca paita punllan punllan.
19 Jesúspaj shutipi pai ayacunata llujchishpa cacharca, mapa espíritucunatapash; paipaj huauquitapash jatarichirca huañuimanda, llactapuracuna rumihuan macashpa huañuchishca jipa.
20 Llactapuracuna caita ricurca, caipaj ricuj carca, paihuan fiñashca carca paipaj ushaimanda; pai rurarcapash ashtahuan tauca juyailla ruraita ricuchinacunata, llactapuracunapaj ricujta, Jesúspaj shutipi.
21 Yalishca jipa quimsa chunga shuj huata yalishca carca, tiarca ashtahuangari ashallacuna Apunchijman tigrarishca carca; ashtahuangari maijan crijman tigrashcacuna ciertopacha ricuchirca llactapuracunaman paicunata ricuj shamushca cajta ushaihuan, Diospaj Espíritupash, imacuna carca Jesucristopi, paipi paicuna crirca.
22 Maijan paicunapamanda ayacunata llujchishpa cachashcacuna, jambishca carca paicunapaj unguicunata, paicunapaj nanaicunapash, ciertopacha ricuchirca llactapuracunaman Diospaj Espíritu shina rurashca cashcata, jambishca cashcatapash; paicuna ricuchircapash señalcunata tauca juyailla ruraita ricuchinacunata llactapuracunapi rurarca.
23 Shina yalirca quimsa chunga ishcai huatapash. Nefi llactapuracunata caparirca quimsa chunga quimsa huata callaripi; yachachirca paicunaman arrepentimientota, juchacunapaj anchuchinatapash.
24 Cunan ñuca yarichingapapash munani, na tiarca maijanllapash arrepentimietoman shamushcacuna na bautizarishca yacuhuan.
25 Chaimanda, Nefi ordenarca runacunata, cai achil yachachinaman, tucui maijan paicunapaman shamujcuna bautizarichun yacuhuan, cai shuj ricuchi, shuj testimonio Diospaj ñaupapi, llactapuracunapa, paicuna arrepentirishca cajta, chasquishcapash paicunapaj juchacunamanda anchuchita.
26 Tauca tiarca cai huata callaripi bautizarishca arrepentimientopa; shina yalirca huatapaj tucuimanda yalishca punllacuna.