Achil quilcashcacuna
Helamán 16


16 Capítulo

Nefi bautizan Nefitacunata maijan Samuelta crijcunata—Na arrepentirishca Nefitacunapaj flechacuna, rumicuna Samuelta na huañuchin—Huaquinguna paicunapaj shungucunata shinlliyachin, cutishujcuna ángelcunata ricun—Na crijcuna nin Cristopi na crinayai can, paipaj shamuita Jerusalénpi. Nara 6–1 C.Ñ.

1 Cunan, yalishca jipa taucacuna tiarca maijan Samuel shuj Lamanitapaj shimicunata uyarca, imata pai parlarca llactapaj pirca jahuapi. Tauca mashna paipaj shimipi crishcacuna rirca Nefita mascashpa; rishpa tupashpa paicuna villarca paicunapaj juchacunata, na negarca, munashpa Apunchijpi paicuna bautizarishca cangapa.

2 Ashtahuangari taucacuna tiarca maijan na crijcuna Samuelpaj shimicunapi paihuan fiñashcuna carca; paicuna rumicunata shitarca pirca jahuaman, tauca flechacunatapash pai pircapi shayajujpi; ashtahuangari Apunchijpaj Espíritu paihuan carca, shinashpa paicuna na chugrichirca paicunapaj rumicunahuan, paicunapaj flechacunahuanbash.

3 Cunan imaura ricushpa paicuna na chugrichi ushaita, ashtahuan taucacuna tiarca paipaj shimicunapi crijcuna, shinashpa paicuna Nefipaman rirca bautizarishca cangapa.

4 Riqui, Nefi bautizajurca, achil villachijurca, yachachijurcapash, yachachijurca arrepentimientota llactapuracunaman, ricuchishpa señalcunata, juyailla ricurinacunapash, llactapuracunaman juyailla ruraita ricuchinacunata rurashpa, paicuna yachachun Cristo ñapacha shamuna can—

5 Paicunaman villashpa cuzascunata ima ñapacha yalina can, paicuna yachachun, yarichunbash imaura caicunapaj yalinapi, paicunaman pundata yachaj chayachishcata, munashca paicuna crichun; chaimanda tauca crishcacuna Samuelpaj shimicunapi paipaman rirca bautizaringapa, paicuna shamurca arrepentirishpa, paicunapaj juchacunata villashpa.

6 Ashtahuangari paicunapamanda tucuimanda yalishca na crirca Samuelpaj shimicunapi; chaimanda imaura ricurca paita na chugrichi ushaita paicunapaj rumicunahuan, paicunapaj flechacunahuan, paicuna caparirca paicunapaj capitángunata, nishpa: Japi cai runata paita huataichipash, riqui shuj ayata charin; ayapaj ushaimanda imami paipi can ñucanchi paita na chugrichi ushanchi ñucanchipa rumicunahuan, ñucanchipa flechacunahuan; chaimanda paita japi paita huataichipash, paita apaichipash.

7 Paita japingapa rinajujpi, riqui, paillata pircamanda fahuarca, paicunapaj alpacunamanda calparca, ari, paipaj propio llactaman yachachi callarirca, paipaj propio llactapuracunaman achil villarca.

8 Riqui, pai nimaura ashtahuan na uyarirca Nefitacunapapi; shina carca llactapuracunapaj ruranacuna.

9 Shina tucurirca ricushpa chasquichijcunapaj reinado pusaj chunga sujta huata Nefipaj llactapuracunapa jahuapi.

10 Shina tucurirca ricushpa chasquichijcunapaj reinado pusaj chunga canchis huatapash, llactapuracunapaj tucuimanda yalishca catirca paicunapaj jariyaipi, na ali ruraicunapi, huaquinlla Diospaj ñaupapi aliguta purishpa.

11 Cai carca canacunapash, ricushpa chasquichijcunapaj reinado pusaj chunga pusaj huatapi.

12 Tiarca ashalla cambio llactapuracunapaj ruranacunapi, ashtahuangari cai carca llactapuracuna ashtahuan shinlli cai callarirca na ali ruraicunapi, ashtahuan ashtahuan ruran Diospaj rurachunbacha saquishcacunapaj contra cajta, ricushpa chasquijcunapaj reinado pusaj chunga iscun huatapi.

13 Ashtahuangari yalishca jipa ricushpa chasquichijcunapaj reinado iscun chunga huatapi, tiarca jatun señalcuna llactapuracunaman cushca, juyailla ricurinacuna; achil villachijcunapaj shimicuna pactai callarirca.

14 Ángelcuna runacunapaman ricurirca, yachai runacuna, villarca paicunaman mushuj cushijunacunata jatun cushijuipaj; shina cai huatapi achil quilcashcacuna pactai callarirca.

15 Shina cajpipash, llactapuracuna paicunapaj shungucunata shinlliyai callarirca, tucuilla ashtahuangari paicunapamanda ashtahuan crijcunalla na, Nefitacuna, Lamanitacunapash, paicunapaj propio ushaipi confiai callarirca paicunapaj propio yachaipipash, nishpa:

16 Huaquin cuzascuna paicuna ali adivinaita ushashcanga, shina taucamanda; ashtahuangari, ñucanchi yachanchi tucui cai jatun, juyailla ruraicuna na yali ushanga, imamanda parlashca can.

17 Paicuna ali tapuri callarirca paipuracuna fiñanajungapa, nishpa:

18 Cai na can ali tapurina shuj causaj shuj Cristo shamuna; shina cajpi, pai can Diospaj Churi, jahua pachapaj, cai pachapapash Taita, imashpata pai na ricurimun ñucanchipaman paicunamanshna maijan Jerusalénpi cajcunamanshna?

19 Ari, imashpata pai na ricurimun ñucanchipaman cai alpapi imashna Jerusalénpaj alpapi laya?

20 Ashtahuangari riqui, ñucanchi yachanchi cai can shuj na ali punda rurai, imata ñucanchiman maquin maquin yalichishca ñucanchi taitacuna, ñucanchita crichingapa tauca jatun, juyailla cuzascunapi imacuna yalinata, ashtahuangari na ñucanchihuan, ashtahuangari shuj alpapi cai carupi can, shuj alpa imata ñucanchi na yachanchi; chaimanda paicuna ñucanchita chari ushanga nimata na yachaipi, ñucanchi na feta cui ushanchi ñucanchi propio ñavicunahuan caicuna ciertopacha cajta.

21 Paicuna munan, na alipa yachashca ruraihuan, ayapaj na yachashcacunahuan, ruran huaquin jatun na villashcata imata ñucanchi na yachai ushanchi, ima ñucanchita na yachaipi charinga paicunapaj shimicunapaj sirvij runacuna cachun, paicunapaj sirvij runacuna cachunbash, paicunata shuyachun yachachichun achil shimicunata; shina ñucanchita nimata yachaipi charingapa ñucanchimandallata paicunapaman curij laya, tucui ñucanchipaj causai punllacunata.

22 Tauca ashtahuan cuzascunata llactapuracuna paicunapaj shungucunapi yuyarca, ima carca juizu illa, yangapash; paicuna carca ashtaca fiñarishca, imashpa Satanás punllan punllan tangachijurca na ali ruraicunata rurachun; ari, pai rirca caiman chaiman rimashpa, randimanda pliturishpa tucui alpa jahuallaman, pai shinlliyachingapa llactapuracunapaj shungucunata imami ali carca ima shamunapaj contra.

23 Masqui señalcuna, juyailla ricurinacunapash imacunata rurashca carca Apunchijpaj llactapuracunapi, tauca juyailla ruraita ricuchinacuna imata paicuna rurajpipash, Satanás misharca jatun ushaita llactapuracunapaj shungucunapi tucui alpa jahuallapi.

24 Shina tucurirca ricushpa chasquichijcunapaj reinado iscun chunga huata Nefipaj llactapuracunapa jahuapi.

25 Shina tucurin Helamánpaj quilcashca, Helamánpaj tandachishpa quilcashcacunamanda, paipaj churipapash.