1 Yalishca jipa picha chunga chuscu huatapi iglesiapi tauca ninanda fiñarishpa rimarinacuna tiarca, llactapuracunapi randimanda plituripash tiarca, shinashpa ashtaca yahuar jichaicunapash tiarca.

2 Na cazujcuna huañuchishca carca alpamanda calpachi tucushcapash, Lamanitacunapaj jatun mandajpaman rirca.

3 Yalishca jipa Lamanitacunata tangachingapa munarca Nefitacunahuan macanajuchun; ashtahuangari riqui, Lamanitacuna ninanda manllarca, shinashpa na uyangapa munarca chaupirishcacunapa shimicunata.

4 Ashtahuangari yalishca jipa ricushpa chasquichijcunapaj reinado picha chunga sujta huatapi, chaupirishcacuna tiarca Nefitacunamanda Lamanitacunapaman yalishca; cutishujcunahuan fiñanajuiman tangachirca Nefitacunapaj contra; tucui chai huata macanajungapa prepararinajurca.

5 Picha chunga canchis huatapi Nefitacunahuan macanajungapa shamurca, paicuna huañuichinata callarirca; ari, shinashpa ricushpa chasquichijcunapaj reinado picha chunga pusaj huatapi Zarahemla alpata japi usharca; ari, tucui alpacunatapash, maijanguna Ashtacapacha Tiaj alpa ladopi cajcunatapash.

6 Nefitacuna, Moroníahpaj macanajuj runacunapash Ashtacapacha Tiaj alpacaman calpachishca carca;

7 Chaipi paicuna Lamanitacunapaj contra shinlliyarirca, indi huashajuj lado jatun mama cochamanda, indi llujshij ladocaman; cai carca Nefitapaj shuj punlla puri, muyunbi maipi paicuna shinlliyarishca carca, paicunapaj macanajuj runacunapash shayarishca vichai llactata huacaichingapa.

8 Shina Nefitacunamanda chaupirishcacuna, Lamanitacunapaj macanajuj runacunapa ashtacapacha ayudahuan, Nefitacunapaj tucui charishcacunata japirca imami carca urai alpapi. Tucui cai rurashca carca ricushpa chasquichijcunapaj reinadopaj picha chunga pusaj, picha chunga iscun huatacunapi.

9 Yalishca jipa ricushpa chasquichijcunapaj reinado sujta chunga huatapi, Moroníah paipaj macanajuj runacunahuan tauca alpa pushtucunata japi usharca; ari, tauca llactacunata cutin misharca Lamanitacunapaj maquicunapi urmashcacunata.

10 Yalishca jipa ricushpa chasquichijcunapaj reinado sujta chunga shuj huatapi tucui paicunapaj charishcacunamanda chaupicaman cutin mishai usharca.

11 Cunan cai jatun Nefitacunapaj chingachicuna, jatun huañuchicunapash paipuracunapi tiarca, na shina canman carca ashtahuangari cai carca paicunapaj na ali ruraicunamanda, paicunapaj millanayaicunamandapash; ari, cai tiarca maijan Diospaj iglesiaman tandanajunchi nijcunapipash.

12 Cai carca paicunapaj shungucunapaj jariyaimanda ninan charijyaicunamandapash, ari, huajchacunata llaquichimanda, yarjaicunaman micunata na nishpa, churajuna illacunaman churajunata na nishpa, paicunapaj humilde huauquicunapaj ñavicunapi huajtashpa, achil cuzascunata asishpa, achil villachinapaj espírituta negashpa, achilricuchinapajpash, huañuchishpa, shuhuashpa, llullashpa, shujpata japishpa, adulteriota rurashpa, jatun chaupiricunapi jatarishpa, Nefipaj alpaman chaupirishpa rishpa, Lamanitacunapaman—

13 Paicunapaj jatun na ali ruraicunamanda, paicunapaj propio ushaipi ninanda jariyaimanda, paicunapaj propio ushaipi saqui tucurca; chaimanda na ali mirarca, ashtahuangari llaquichishca carca, chugrichishcapash, Lamanitacunapaj ñaupamanda calpachishca, tucui paicunapaj alpacunata ñalla chingachingacaman.

14 Ashtahuangari riqui, Moroníah tauca cuzascunata llactapuracunaman paicunapaj na ali ruraicunamanda yachachirca, Nefipash, Lehipash, picuna Helamánpaj churicuna carca, llactapuracunaman tauca cuzascunata yachachirca, ari, tauca cuzascunata paicunapaj na ali ruraicunamanda achil villachirca, ima paicunapaman shamunata paicunapaj juchacunamanda na arrepentirijpica.

15 Yalishca jipa paicuna arrepentirirca, shinashpa imashna paicuna arrepentirijpica ali mirai callarirca.

16 Imaura Moroníah ricurca paicuna arrepentirijpi pushangapa shayarirca pushtumanda cutishuj pushtuman, shuj llactamanda cutishuj llactaman, imaura paicunapaj charishcacunata chaupicaman cutin cutin mishashpa, chaupi tucui paicunapaj alpacunatapash.

17 Shina ricushpa chasquichijcunapaj reinado sujta chunga shuj huata tucurirca.

18 Yalishca jipa ricushpa chasquichijcunapaj reinado sujta chunga ishcai huatapi, Moroníah Lamanitacunapaj charishcacunata ashtahuan na japi usharca.

19 Chaimanda paicuna jichushpa saquirca paicunapaj alpa puchushcacunata japingapa munaita, shina Lamanitacuna na yupai ushai carca, Nefitacuna ashtahuan ushaita paicunapa jahuapi charita na ushanaman tigrarca; chaimanda Moroníah tucui paipaj macanajuj runacunata pai japishca pushtucunata huacaichichun churarca.

20 Yalishca jipa, Lamanitacuna na yupai ushanacuna cajpi Nefitacuna jatun manllaipi carca, mishai tucushca, sarui tucushcapash, huañuchishca, tucuchishcapash canamanda.

21 Ari, Almapaj achil villaicunata yari callarirca, Mosíahpaj shimicunatapash; paicuna ricurca paicuna na cazuj llactapuracuna cashcata, Diospaj rurachunbacha saquishcacunata imapash na valijpi churashca;

22 Shujman tigrachirca, paicunapaj chaquicunahuan Mosíahpaj catichunbacha saquishcacunata sarushca, nacashpa imata Apunchij mandashca llactapuracunaman cuchun; paicuna ricurca paicunapaj catichunbacha saquishcacuna huagliman tigrashca cajta, paicunapash na alita ruraj llactapuracunaman tigrashca cajtapash, shinashpa paicuna na alita rurajcuna carca Lamanitacuna laya.

23 Paicunapaj na ali ruraicunamanda iglesia ashallayai callarirca; achil villachinapaj espírituta, achil ricuchinapaj espírituta na cri callarirca; Diospaj ricushpa chasquichinacunatapash paicunapaj ñavipi carca.

24 Paicuna ricurca ushai illacuna cajta, paicunapaj huauqui Lamanitacuna laya, Apunchijpaj Espíritu paicunata ashtahuan ñana alchishpa charirca; ari, paicunapamanda anchurishcarca imashpa Apunchijpaj Espíritu na causanllu mapa huasicunapi—

25 Chaimanda Apunchij paicunata saquin alchishpa charita paipaj juyaillapacha ricuchinacunahuan, pihuanbash na pajtaj ushaihuanbash, paicuna cai na crina canaman urmaimanda, manllanayai na ali ruraicunamanbash; ricurca Lamanitacuna paicunata yali ninan ashtacapacha cajta, imashpapash paicuna Apunchij paicunapaj Diospaman quimirishpalla maimanda tucurina canga.

26 Riqui, ricurca Lamanitacunapaj macanajujcunaca shina jatun cajta paicunapata yali, shuj runa cutishujhuambash. Shina paicuna cai jatun na alita ruraipi urmarca; ari, shina na shinllicunaman tigrarca, paicunapaj na alita ruraimanda, na tauca huatacunapi.