1 Mo i tru, i tru, mi talem long yufala se mi mi gat ol narafala sipsip, we oli no blong graon ia, o oli no blong graon blong Jerusalem, o long eni pat long graon ia we i stap raonabaot, we mi bin go long hem blong givhan.

2 From olgeta we mi stap tokbaot, oli olgeta we, long taem ia, oli no bin harem voes blong mi; o mi no bin soemaot miwan long olgeta long eni taem.

3 Be mi kasem wan oda long Papa se mi mas go long olgeta, mo se bae oli harem voes blong mi, mo bae mi kaontem olgeta wetem ol sipsip blong mi, blong mekem se oli save stap long wan yad mo wetem wan man blong lukaotem ol sipsip; from hemia, mi mi go blong soemaot miwan long olgeta.

4 Mo mi givim oda long yufala se yufala i mas raetem ol toktok ia afta we mi go, blong mekem se sapos ol pipol blong mi long Jerusalem, olgeta ia we oli bin luk mi mo oli bin stap wetem mi long seves blong mi, oli no askem Papa long nem blong mi, blong oli save kasem wan save long saed blong yufala tru long Tabu Spirit, mo tu, long saed blong ol narafala laen we oli no save long saed blong olgeta, blong mekem se ol toktok ia we bae yufala i raetem bae oli stap gud mo bae oli kamaot long Ol Jentael, blong mekem se tru long gospel we i fulwan we Ol Jentael oli gat, ol man blong ol laen blong olgeta, we bae oli seraot olbaot long fes blong wol from oli no gat bilif, oli save kam insaed, o blong oli save kam blong save long saed blong mi, Ridima blong olgeta.

5 Mo afta, bae mi karem olgeta oli kam tugeta, aot long ol fo pat blong wol; mo afta, bae mi mekem kavenan ia we Papa i bin mekem wetem evri pipol blong laen blong Isrel i hapen.

6 Mo Ol Jentael oli kasem blesing from bilif blong olgeta long mi, tru mo long Tabu Spirit, we i witnes long olgeta long saed blong mi, mo long saed blong Papa.

7 Luk, from bilif blong olgeta long mi, Papa i talem, mo from we yufala i no biliv, O laen blong Isrel, long ol lata dei bae trutok i go long Ol Jentael, blong mekem se bae oli kam blong save, fulwan ol samting ia.

8 Be sore tumas, Papa i talem, long Ol Jentael we oli no biliv—from i nomata se oli bin kam long fes blong graon ia, mo oli bin seraotem ol pipol blong mi we oli blong laen blong Isrel; mo ol pipol blong mi we oli blong laen blong Isrel oli bin sakem olgeta aot long olgeta, mo oli bin purumbut long olgeta andanit long ol leg blong olgeta;

9 Mo from ol sore blong Papa long Ol Jentael, mo tu, ol jajmen blong Papa long ol pipol blong mi we oli blong laen blong Isrel, i tru, i tru, mi talem long yufala, se afta evri samting ia, mo mi mekem se ol pipol blong mi, we oli blong laen blong Isrel, blong oli harem nogud, mo blong gat ol hadtaem, mo Ol Jentael oli kilimded olgeta, mo oli sakem olgeta aot long olgeta, mo blong oli no laekem olgeta, mo blong kam olsem wan wesil mo wan toktok we plante man i save long medel blong olgeta—

10 Mo olsem ia nao Papa i givim oda se mi mas talem long yufala se: ‘Long dei ia, taem we Ol Jentael bae oli sin agensem gospel blong mi, mo bae oli sakemaot gospel blong mi we i fulwan, mo bae oli leftemap olgeta long ol hae tingting blong hat blong olgeta antap long evri kantri, mo antap long evri pipol blong ful wol, mo bae oli kam fulap wetem evri kaen giaman, mo ol trik, mo ol fasin blong smasem gud man, mo evri kaen fasin blong tufes, mo ol fasin blong kilimded man, mo ol fasin blong giaman pris, mo ol fasin blong slip olbaot, mo ol sikret rabis fasin; mo sapos oli mekem ol samting ia, mo bae oli sakemaot gospel blong mi we i fulwan, luk, Papa i talem, bae mi tekemaot gospel blong mi we i fulwan aot long olgeta.

11 Mo afta, bae mi tingbaot kavenan blong mi we mi bin mekem long ol pipol blong mi, O laen blong Isrel, mo bae mi karem gospel blong mi i go long olgeta.

12 Mo bae mi soem long yu, O laen blong Isrel, se Ol Jentael bae oli no gat paoa ova long yufala, be bae mi tingbaot kavenan blong mi long yufala, O laen blong Isrel, mo bae yufala i kam blong save long saed blong gospel blong mi we i fulwan.

13 Be sapos Ol Jentael bae oli sakem sin mo kambak long mi, Papa i talem, luk bae oli kaontem olgeta wetem ol pipol blong mi, O laen blong Isrel.

14 Mo bae mi no letem ol pipol blong mi, we oli blong laen blong Isrel, blong go tru long medel blong olgeta mo purumbut antap long olgeta, Papa i talem.

15 Be sapos oli no tanem olgeta oli kam long mi, mo lisin gud long voes blong mi, bae mi letem olgeta, yes, bae mi letem ol pipol blong mi, O laen blong Isrel, blong bae oli go tru long medel blong olgeta, mo bae oli purumbut long olgeta, mo bae oli stap olsem sol we i bin lusum tes blong hem, we stat long taem ia i gud blong nating be blong sakemaot, mo blong ol pipol blong mi i purumbut antap long hem, O laen blong Isrel.’

16 I tru, i tru, mi talem long yufala, olsem ia nao Papa i bin givim oda long mi—se mi mas givim long ol pipol ia, graon ia blong graon blong olgeta we i kam long ol papa.

17 Mo afta, ol toktok blong profet Aesea bae oli hapen, we i talem:

18 ‘Ol wajman bae i leftemap voes blong olgeta; long wan voes bae oli singsing, from bae oli luk wetem ae blong olgeta taem we Lod i karembak Saeon.

19 Girap wetem glad, singsing tugeta, yufala ol emti ples blong Jerusalem; from Lod i bin leftemap tingting blong ol pipol blong hem, hem i bin pemaot Jerusalem.

20 Lod i bin soemaot tabu han blong hem long ol ae blong evri kantri; mo evri en blong wol bae i luk fasin blong sevem man blong God.’”