1 Na afei ɔbaa dɛ ber a Jesus dze ne kasaa yi baa ewiei no, ɔdze n’enyiwa kɔr aprɔw wɔ nyimpadodow no do, na ɔsee hɔn dɛ: Hwɛ hom atse ndzɛmba a mekyerɛkyerɛe ansaana morofow akɔ m’Egya nkyɛn; dɛm ntsi nyia ɔbɛkaa dɛm nsɛm yi na ^aɔayɛ no, ɔno na ^bmebɛma no do wɔ da a odzi ewiei no mu.

2 Na ɔbaa dɛ ber a Jesus kãa dɛm nsɛm yi wiei no, ohun dɛ binom wɔ hɔn mu a hɔnho nwanwa hɔn na wɔrodwen dza ɔbɛyɛ wɔ ^aMoses mbra no ho; osiandɛ wɔanntse dza ɔkãa dɛ ndzɛmba adadaw etwa mu kɔ, na ndzɛmba nyina abɛyɛ fofor no ase.

3 Na ɔsee hɔn dɛ: Mma ɔnnyɛ hom nwanwa dɛ mesee hom dɛ ndzɛmba adadaw etwa mu kɔ, na dɛ ndzɛmba nyina abɛyɛ fofor.

4 Hwɛ, mese hom dɛ ^ambra a wɔdze maa Moses no ahyɛ mã.

5 Hwɛ, ^aEmi nye nyia ɔdze mbra no mae, na Emi nye nyia menye mo nkorɔfo Israelmba dzii ahyɛmu; dɛm ntsi, mbra no ahyɛ mã wɔ mo mu, na maba ^brebɛhyɛ mbra no mã; dɛm ntsi ɔwɔ ewiei.

6 Hwɛ, ^amerennsɛɛ nkɔnhyɛfo no, na mbom dodowara a ɔnnhyɛɛ mã wɔ mo mu no, nokwar mese hom dɛ, ne nyina bɛhyɛ mã.

7 Na osiandɛ mesee hom dɛ ndzɛmba adadaw etwa mu kɔ no nnkyerɛ dɛ meresɛɛ dza wɔakã a ɔfa ndzɛmba a ɔrebɛba no ho.

8 Na hwɛ, ^aahyɛmu a menye mo nkorɔfo dzii no ne nyina nnhyɛɛ mã; na mbom mbra a wɔdze maa Moses no aba ewiei wɔ mo mu.

9 Hwɛ, Emi nye ^ambra no, nye ^bkan no. Hom nhwɛ me, na hom ntsim nkodu ewiei, na hom ^cbɛtsena nkwa mu, na nyia ^dotsim kodu ewiei no mebɛma no onnyiewiei nkwa.

10 Hwɛ, medze ^ambrasɛm no ama hom; dɛm ntsi hom ndzi me mbrasɛm do. Na iyi nye mbra no nye nkɔnhyɛfo no, osiandɛ ^bwodzii mo ho dase nokwar mu.

11 Na afei ɔbaa dɛ ber a Jesus kãa dɛm nsɛm yi no, ɔsee duebien no a ɔsaan mu yii hɔn no dɛ:

12 Hom yɛ m’esuafo; na hom yɛ kandzea dze ma dɛm nkorɔfo yi, hɔn a wɔyɛ ^aJoseph fifo asefo nkaa.

13 Na hwɛ, iyi nye hom ^aegyapadze asaase; na Egya no dze ama hom.

14 Na ber biara nnyi hɔ a Egya no ama me mbrasɛm dɛ ^amenkã nkyerɛ hom enuanom a wɔwɔ Jerusalem no.

15 Nna ber biara nnyi hɔ a Egya no ama me mbrasɛm dɛ menkã nkyerɛ Israel ^aebusuakuw nkaa no a Egya no eyi hɔn efi asaase no do no.

16 Na iyi dze Egya no hyɛ me dɛ menkã nkyerɛ hɔn.

17 Dɛ nguan binom so wɔ hɔ a mowɔ a wonnyi nguanbuw yi mu; hɔn so ɔwɔ dɛ medze hɔn ba, na wɔbɛtse me ndze; na wɔbɛyɛ nguanbuw kor, nye ^aoguanhwɛfo kor.

18 Na afei, osian hɔn akɔnkye na hɔn ekyingye ntsi ^awɔanntse m’asɛm no ase; dɛm ntsi wɔhyɛɛ me dɛ mma mennkã biribiara bio wɔ Egya no ho a ɔfa dɛm adze yi ho no nnkyerɛ hɔn.

19 Mbom, nokwar, mese hom dɛ Egya no ahyɛ me, na mese hom dɛ wɔtseew hom fii hɔnho osian hɔn emumuyɛ ntsi; dɛm ntsi osian hɔn emumuyɛ ntsi na wonnyim hom no.

20 Na nokwar, mese hom bio dɛ Egya no eyi mbusuakuw bi so efi hɔn mu; na osian hɔn emumuyɛ ntsi wonnyim hɔn.

21 Na nokwar, mese hom dɛ hom nye hɔn a mekãa dɛ: Nguan ^abinom so wɔ hɔ a mowɔ a wonnyi nguanbuw yi mu no; hɔn so ɔwɔ dɛ medze hɔn ba, na wɔbɛtse me ndze; na wɔbɛyɛ nguanbuw kor nye oguanhwɛfo kor.

22 Na wɔanntse me ase, na wosusuu dɛ ɔbɛyɛ ^aAmanamamfo no; osiandɛ wɔanntse ase dɛ wɔnam hɔn nsɛmpa kã do ^bbɛsakyer Amanamamfo no.

23 Na wɔanntse me ase dɛ mekãa dɛ wɔbɛtse me ndze; na wɔanntse me ase dɛ ^aAmanamamfo no nnsɛ dɛ wɔtse me ndze dabiarada—na merennda mo ho edzi so nnkyerɛ hɔn gyedɛ ɔnam ^bSunsum Krɔnkrɔn no do.

24 Mbom hwɛ, hom atse ^ame ndze, na hom ehu me; na hom yɛ mo nguan, na wɔdze hom akã hɔn a Egya no ^bdze ama me no ho.