1 Ket napasamak nga idi naibaga ni Jesus dagitoy a balikas ken ni Nephi, ken kadakuada a naawagan (sangapulo-ket-dua ita ti bilang dagiti naawagan, ken immawat iti pannakabalin ken turay a mangbuniag) ket adtoy, inyunnatna dagiti takiagna iti ummong, ket imbagana kadakuada, a kinunana: Nagasatkayo no ipategyo dagiti sao dagitoy sangapulo-ket-dua a pinilik manipud iti ummongyo nga agserbi kadakayo, ken agbalin a babaonenyo; ket inikkak ida iti pannakabalin a mangbuniag kadakayo iti danum; ket kalpasan ti pannakabuniagyo iti danum, adtoy, buniagankayo iti apuy ken iti Espiritu Santo; ngarud, nagasatkayo no mamatikayo kaniak ken mabuniagankayo, kalpasan ti pannakakitayo kaniak ket naammuanyo a Siak.

2 Ket manen, nagasgasatto pay dagiti mamati iti saoyo gapu ta paneknekanyonto a dakayo ti nakakita kaniak, ken ammoyo a Siak. Wen, nagasat dagiti mamatinto iti saoyo, ken agpakumbaba ken mabuniagan, agsipud ta isudanto ti papanan ti apuy ken ti Espiritu Santo, ket awatendanto ti pannakaugas dagiti basolda.

3 Wen, nagasat dagiti napanglaw iti espiritu a kumamang kaniak, ta kukuadanto ti pagarian ti langit.

4 Ket manen, nagasat dagiti agladingit, ta maliwliwadanto.

5 Ken nagasat dagiti naemma, ta tawidendanto ti daga.

6 Ken nagasat dagiti mabisin ken mawaw iti kinalinteg, ta mapnodanto iti Espiritu Santo.

7 Ken nagasat dagiti manangngaasi, ta lak-amendanto ti asi.

8 Ken nagasat dagiti nadalus ti pusona, ta makitadanto ti Dios.

9 Ken nagasat amin dagiti mamagkakappia, ta managanandanto nga annak ti Dios.

10 Ken nagasat dagiti maidadanes gapu iti naganko, ta kukuada ti pagarian ti langit.

11 Ken nagasatkayo no lalaisendakayo ken idadanesdakayo, ket pagsasawandakayo iti amin a kita ti pammadakes gapu kaniak.

12 Ta maaddaankayonto iti aglaplapusanan a ragsak ken kasta unay a rag-o, gapu ta nalabon ti gunggonayo sadi langit; ta kasta met ti panangidadanesda kadagiti propeta nga immun-una ngem dakayo.

13 Pudno, pudno, kunak kadakayo, intedkayo nga asin ti daga; ngem no timmamnayen ti asin pangalaan pay ti daga ti asinna? Awanen ti kapapayan ti asin, ngem maibelleng ket baddebaddeken laengen dagiti tao.

14 Pudno, pudno, kunak kadakayo, itedkayo nga agbalin a silaw dagitoy a tao. Saan a mailinged ti siudad a naisaad iti turod.

15 Adtoy, sindian kadi ti tao ti kandela sana ikabil iti sirok ti salop? Saan, ngem iti kandelero, ket mangted iti lawag kadagiti amin nga adda iti balay;

16 Ngarud bay-anyo nga agraniag ti silawyo iti sango dagitoy a tao, tapno makitada ti nasayaat nga aramidyo ket dayawenda ti Amayo nga adda sadi langit.

17 Saanyo a panunoten nga immayak a mangdadael iti paglintegan dagiti propeta. Saanak nga immay a mangdadael ngem mangtungpal.

18 Ta pudno kunak kadakayo, saan a naisiasi iti paglintegan ti maysa a tuldek wenno maysa a paulo, ngem natungpalda amin kaniak.

19 Ket adtoy, intedko kadakayo ti paglintegan ken bilbilin ti Amak, tapno mamatikayo kaniak, ket agbabawikayo iti basbasolyo, ket umaykayo kaniak nga addaan nasneban a puso ken napnuan babawi nga espiritu. Adtoy, adda dagiti bilin iti sangoyo, ket natungpal ti paglintegan.

20 Ngarud umaykayo kaniak ket maisalakankayo; ta pudno kunak kadakayo, a malaksid no tungpalenyo dagiti imbilinko kadakayo iti daytoy a kanito, saanyo a mabalin ti sumrek iti pagarian ti langit.

21 Nangngeganyo nga imbagada idi un-unana a panawen, ket naisurat met iti sangoyo, a saanka a mamapatay, ket siasino man a mamapatay agpeggadto iti panangukom ti Dios.

22 Ngem kunak kadakayo, a siasino man a gumura iti kabsatna agpeggadto iti pannakaukomna. Ket siasino man nga agkunanto iti kabsatna, Ong-ong, agpeggadto iti sanhedrin; ket siasino man nga agkunanto, Awan nakemmo, agpeggadto iti impierno nga apuy.

23 Ngarud, no umayka kaniak, wenno tarigagayam ti umay kaniak, ket lagipem a nasakit ti nakem ti kabsatmo kenka—

24 Mapanka iti kabsatmo, ket umuna a makikappiaka kenkuana, sakanto umay kaniak a naipapuso ti panggepmo, ket awatenkanto.

25 Makikappiaka a dagus iti kabusormo bayat ti pannakikuyogmo kenkuana iti dalan, amangan ta alaennaka iti uray ania a kanito, ket ikabilnaka iti pagbaludan.

26 Pudno, pudno kunak kenka, dikanto rummuar sadiay, agingga a saanmo a mabayadan ti kaudian a senine. Ket bayat ti pannakabaludmo mabayadam kadi uray maysa a senine? Pudno, pudno kunak kenka, Saan.

27 Adtoy, insuratda kadagidi nagkauna a panawen, a dika makiabig;

28 Ngem kunak kadakayo, nga uray siasino a mangmatmat iti maysa a babai, tapno gartemanna, nakiabigen kenkuana iti pusona.

29 Adtoy, ikkankayo iti bilin, a saanyo a palubosan ti uray ania kadagitoy a banag a sumrek iti pusoyo.

30 Ta naim-imbag nga ipaidamyo iti bagbagiyo dagitoy a banag, a pangawitanyo iti krusyo, ngem ti maitappuakkayonto iti impierno.

31 Naisurat, a siasino man a mamagtalaw iti asawana a babai, maited kenkuana ti surat ti panagsina.

32 Pudno, pudno, kunak kadakayo, a siasino man a mamagtalaw iti asawana, gapu iti panagdederrep, aramidenna a mannakiabig a babai; ket siasino man a mangasawanto iti napagtalaw a babai makabasol iti pannakiabig.

33 Ket manen naisurat, saanka nga agsapata, ngem aramidem dagiti sapatam iti Apo.

34 Ngem pudno, pudno, kunak kadakayo, saankayo nga agsapata a pulos; uray iti langit, gapu ta isu ti trono ti Dios;

35 Wenno iti daga, ta isu ti pagsaadan ti sakana.

36 Wenno isapatayo ti uloyo, agsipud ta saanyo a mabalin ti agaramid iti buok a nangisit wenno puraw.

37 Ngem bay-anyo a kastoy ti panagsasaoyo Wen, wen; Saan, saan; ta dakes ti ania man a maisawang a surok dagitoy.

38 Ket adtoy, naisurat, mata iti mata, ket ngipen iti ngipen.

39 Ngem kunak kadakayo, a diyo sarangten ti dakes, ngem siasino man a mangtungpa iti makanawan a pingpingmo, isangom met kenkuana ti bangirna;

40 Ket no adda man tao a mangidarum kenka iti linteg ket alaenna ti kawesmo, bay-am nga alaenna pay ti kagaymo.

41 Ket siasino man a mangpilit kenka a magna iti maysa a milia, kumuyogka kenkuana iti dua.

42 Mangtedka iti siasino man a dumawat kenka, ket dimo tallikudan ti siasino man a bumulod kenka.

43 Ket adtoy naisurat met, a rumbeng nga ayatem ti kaarrubam ket guraem ti kabusormo;

44 Ngem adtoy kunak kadakayo, ayatenyo ti kabusoryo, ket bendisionanyo ti mangilunod kadakayo, agaramidkayo iti nasayaat kadagiti gumura kadakayo, ket ikararaganyo dagiti manguy-uyaw ken mangidadanes kadakayo;

45 Tapno agbalinkayo nga annak ti Amayo nga adda sadi langit; agsipud ta aramidenna ti init a lumgak kadagiti dakes ken kadagiti naimbag.

46 Ngarud dagiti banag idi un-unana a panawen, nga adda iti paglintegan, natungpal amin kaniak.

47 Awanen dagiti daan a banag, ket nagbalin amin a banag a baro.

48 Ngarud kayatko a naan-anaykayo a kas kaniak, wenno kas iti kinaan-anay ti Amayo nga adda sadi langit.