1 Issa ġara li s‑sena wieħed u disgħin ġiet fi tmiemha u dan kien sitt mitt sena minn meta Leħi ħalla Ġerusalemm; u kien fis‑sena li fiha Lakonew kien il‑prim imħallef u l‑gvernatur tal‑pajjiż.

2 U Nefi, bin Ħelaman, kien telaq mill‑art ta’ Żaraħemla, u għadda f’idejn ibnu Nefi, li kien ibnu l‑kbir, il‑pjanċi tal‑bronż, u l‑annali kollha li kienu baqgħu jinżammu, kif ukoll dak kollu li baqa’ jinżamm b’mod sagru, sa minn meta Leħi telaq ’il barra minn Ġerusalemm.

3 Imbagħad huwa telaq ’il barra mill‑pajjiż, u fejn mar ħadd ma jaf; u ibnu Nefi beda jżomm l‑annali għandu minfloku, iva, l‑istorja ta’ dan il‑poplu.

4 U ġara li fil‑bidu tas‑sena tnejn u disgħin, araw, il‑profeziji tal‑profeti aktar ma jmur aktar bdew jiġu fis‑seħħ; għax bdew jingħataw sinjali akbar u jitwettqu mirakli akbar fost il‑poplu.

5 Iżda kien hemm xi wħud li bdew jgħidu li ż‑żmien li fih kellu jiġi fis‑seħħ dak li kien qal Samwel il‑Lamanita kien ġie u għadda.

6 U huma bdew jifirħu u jgħidu lil ħuthom: Araw iż‑żmien ġie u għadda, u kliem Samwel ma ġiex fis‑seħħ; għalhekk, l‑hena tagħkom u l‑fidi tagħkom minħabba din il‑ħaġa kienu kollha ta’ xejn.

7 U ġara li huma qajmu rewwixta kbira mal‑pajjiż kollu; u n‑nies li emmnu bdew isewdu qalbhom ħafna, ma jmurx dak li ntqal ma jiġix fis‑seħħ.

8 Iżda araw, huma baqgħu jishru bla heda matul dak il‑jum u dak il‑lejl u dak il‑jum, li flimkien kienu dehru bħallikieku jum wieħed mingħajr ebda lejl, biex huma jkunu jafu li l‑fidi tagħhom ma kenitx għalxejn.

9 Issa ġara li dawk li ma kinux jemmnu għażlu ġurnata biex fiha dawk kollha li kienu jemmnu f’dawk id‑drawwiet kellhom jingħataw il‑mewt jekk is‑sinjal li kien ħabbrilhom il‑profeta Samwel ma kienx se joħroġ fid‑deher.

10 Issa ġara li meta Nefi, bin Nefi, ra dan il‑ħażen kollu fost il‑poplu tiegħu, huwa sewwed qalbu bil‑kbir.

11 U ġara li huwa ħareġ barra u niżel għarkupptejh mal‑art, u talab bil‑ħniena lil Alla tiegħu f’isem il‑poplu tiegħu, iva, f’isem dawk li kienu għoddhom se jinqerdu minħabba l‑fidi tagħhom fit‑twemmin ta’ missirijiethom.

12 U ġara li huwa għadda l‑jum kollu jitlob bil‑ħniena lill‑Mulej; u araw, huwa sama’ leħen il‑Mulej jgħidlu:

13 Erfa’ rasek u agħmel il‑qalb; għax ara, is‑siegħa waslet, u l‑lejla stess se jingħata sinjal, u għada jiena se niġi fid‑dinja, biex nuri lid‑dinja li jiena se nġib fis‑seħħ dak kollu li jien ordnajt li għandu jingħad minn fomm il‑profeti qaddisa tiegħi.

14 Ara, jiena se niġi fost niesi, biex inġib fis‑seħħ dak kollu li jiena żvelajt lill‑ulied il‑bnedmin sa mill‑ħolqien tad‑dinja, u biex nagħmel ir‑rieda, kemm tal‑Missier kif ukoll tal‑Iben—tal‑Missier minħabba fija, u tal‑Iben minħabba ġismi. U ara, is‑siegħa waslet, u dan il‑lejl se jingħata s‑sinjal.

15 U ġara li l‑kliem li ntqal lil Nefi ġie fis‑seħħ, sewwasew kif intqal lilu; għax araw, ma’ nżul ix‑xemx baqa’ ma dalamx; u n‑nies bdew jistagħġbu bil‑kbir għax meta wasal il‑lejl baqa’ ma dalamx.

16 U kien hemm ħafna, li ma kinux emmnu kliem il‑profeti, li waqgħu mal‑art bħallikieku mejtin, għax huma kienu jafu li l‑pjan kbir ta’ qerda li huma kienu fasslu għal dawk li emmnu fi kliem il‑profeti kien ġie fix‑xejn; għax is‑sinjal li ngħata diġà kien ħareġ fid‑deher.

17 U huma bdew isiru konxji li bin Alla kien sejjer juri lilu nnifsu dalwaqt; iva, f’kelma waħda, in‑nies kollha fuq il‑wiċċ kollu tal‑art, mill‑punent sal‑lvant, kemm fl‑art tat‑tramuntana kif ukoll fl‑art tan‑nofsinhar, stagħġbu bil‑kbir tant li waqgħu mal‑art.

18 Għax huma kienu jafu li l‑profeti kienu ilhom bosta snin jixhdu dwar dawn il‑ħwejjeġ, u s‑sinjal li ngħata diġa kien ħareġ fid‑deher; u huma bdew jibżgħu minħabba ħżunithom u n‑nuqqas ta’ fidi tagħhom.

19 U ġara li tul dak il‑lejl kollu baqa’ ma dalamx, iżda d‑dawl beda jiddi daqs id‑dawl ta’ nofsinhar. U ġara li filgħodu reġgħet telgħet ix‑xemx, kif dejjem għamlet qabel; u huma kienu jafu li kien wasal il‑jum li fih jitwieled il‑Mulej, minħabba s‑sinjal li ngħata.

20 U kollox seħħ, iva, sal‑iċken dettall, skont kliem il‑profeti.

21 U ġara wkoll li dehret kewkba ġdida, skont kif kien imbassar.

22 U ġara li minn dak iż‑żmien ’il quddiem beda jiġi mxandar bosta gideb fost il‑poplu, minn Satana, biex iwebbes qalbhom, bil‑għan li huma ma jemmnux f’dawk is‑sinjali u l‑għeġubijiet li huma raw; iżda minkejja dan il‑gideb u l‑qerq kollu l‑biċċa l‑kbira tan‑nies emmnu, u kkonvertew għall‑Mulej.

23 U ġara li Nefi mar fost il‑poplu, u l‑istess għamlu ħafna oħrajn, jgħammdu għall‑Indiema, liema ndiema wasslet għal maħfra kbira tad‑dnubiet. U b’hekk in‑nies reġa’ għal darb’oħra beda jkollhom il‑paċi fil‑pajjiż.

24 U ma nqala’ l‑ebda tilwim, għajr għal xi ftit li bdew ixandru u jippruvaw juru permezz tal‑iskrittura li ma kienx għad hemm il‑ħtieġa li huma josservaw il‑liġi ta’ Mosè. Issa f’din il‑ħaġa huma kienu żbaljati, għax ma fehmux l‑iskrittura.

25 Iżda ġara li huma ma damux wisq ma kkonvertew, u spiċċaw ikkonvinċew ruħhom li kienu żbaljati, għax ġie żvelat lilhom li l‑liġi kienet għadha ma ġietx fis‑seħħ, u kien jeħtieġ li tiġi fis‑seħħ sal‑iċken dettall; iva, huma ġew mgħarrfin li jeħtieġ li tiġi fis‑seħħ; iva, li anqas l‑iċken ittra jew tikka ma tgħaddi sa ma jkun seħħ kollox; għalhekk f’din l‑istess sena huma bdew jagħrfu l‑iżball tagħhom u stqarrew in‑nuqqasijiet tagħhom.

26 U b’hekk ġiet fi tmiemha s‑sena tnejn u disgħin, liema sena ġabet magħha l‑bxara t‑tajba lill‑poplu minħabba li s‑sinjali kienu ġew fis‑seħħ, skont il‑kliem tal‑profezija tal‑profeti qaddisa kollha.

27 U ġara li s‑sena tlieta u disgħin intemmet ukoll fil‑paċi, għajr għall‑ħallelin Gadjantuni, li kienu jgħammru fuq il‑muntanji, li spiċċaw infestaw il‑pajjiż; għax il‑fortizzi tagħhom u l‑moħbiet tagħhom tant kienu protetti b’mod tajjeb li n‑nies ma setgħux jegħlbuhom; għalhekk huma qatlu lil bosta, u għamlu massakru sħiħ fost il‑poplu.

28 U ġara li fis‑sena erbgħa u disgħin huma bdew joktru bil‑kbir, għax kien hemm bosta dissidenti minn fost in‑Nefiti li spiċċaw ħarbu u ngħaqdu magħhom, u dan wassal lil dawk in‑Nefiti li baqgħu fil‑pajjiż biex jitnikktu bil‑kbir.

29 U dan wassal biex il‑Lamaniti wkoll jitnikktu bil‑kbir; għax araw, huma kellhom bosta wlied li ma kinux aktar tfal u bdew jikbru fis‑snin, u kienu saru indipendenti, u li kienu ġew imħajrin minn xi wħud li kienu Żoramiti, permezz tal‑gideb tagħhom u l‑kliem ħelu tagħhom, biex jingħaqdu ma’ dawk il‑ħallelin Gadjantuni.

30 U l‑Lamaniti wkoll bdew jgħaddu minn tbatija, u bdew jonqsu fil‑fidi u fit‑tjieba tagħhom, minħabba l‑ħażen tal‑ġenerazzjoni li tielgħa.