Balaan ng mga Kasulatan
2 Nefi 9


Kapitulo 9

Si Jacob nagapaathag nga ang mga Judio pagatiponon sang Ginuo sa tanan nila nga duta sang panaad—Ang Pagbayad-Sala nagagawad sang tawo halin sa Pagkahulog—Ang mga lawas sang mga minatay magagwa halin sa lulubngan, kag ang ila mga espiritu halin sa impiyerno kag halin sa paraiso—Pagahukman sila—Ang Pagbayad-Sala nagaluwas halin sa kamatayon, impiyerno, sa yawa, kag nagapadayon nga pagpaantos—Ang mga matarong pagaluwason sa ginharian sang Dios—Mga silot sa mga sala ginapahamtang—Ang Balaan sang Israel amo ang manugbantay sang ganhaan. Mga 559–545 B.C.

1 Kag karon, pinalangga kong mga kauturan, ginbasa ko ining mga butang agud nga inyo mahibal-an ang parte sa mga kasugtanan sang Ginuo nga iya ginpakighisugot sa bug-os nga panimalay ni Israel—

2 Nga naghambal sia sa mga Judio, paagi sa baba sang iya balaan nga mga propeta, bisan halin pa sa ginsuguran, sa tagsa ka henerasyon, tubtob mag-abot ang tion nga mapanumbalik sila sa matuod nga simbahan kag panong sang Dios; kon san-o sila pagatiponon pauli sa mga duta nga ila palanublion, kag mapahamtang sa tanan nila nga duta sang panaad.

3 Tan-awa, pinalangga kong mga kauturan, ginahambal ko sa inyo ining mga butang agud nga magkasadya kamo, kag ibayaw ang inyo mga ulo sa wala’y katapusan tungod sang mga bugay nga ihatag sang Ginuong Dios sa inyo mga anak.

4 Kay nahibal-an ko nga nagpangusisa kamo sing maayo, ang madamo sa inyo, agud mahibal-an ang mga butang nga magaabot; gani nahibal-an ko nga nahibal-an ninyo nga ang aton unod pat-od gid nga magaluya kag mapatay; bisan pa amo sini, sa aton mga lawas makita naton ang Dios.

5 Huo, nahibal-an ko nga nahibal-an ninyo nga sa lawas ipakita niya ang iya kaugalingon sa ila nga didto sa Jerusalem, nga sa diin kita naghalin; kay ginakinahanglan nga mangin amo sini sa tunga nila; kay pagbuot sang dako nga Tagtuga nga gintugot niya ang iya kaugalingon nga mangin sakop sang tawo sa unod, kag magpakamatay para sa tanan nga tawo agud nga ang tanan nga tawo mangin sakop niya.

6 Kay pareho nga ang kamatayon nag-abot sa tanan nga tawo, sa pagtuman sang maluluy-on nga plano sang dako nga Tagtuga, may ginakinahanglan gid nga isa ka gahum sang pagkabanhaw, kag ang pagkabanhaw ginakinahanglan gid nga mag-abot sa tawo tungod sang pagkahulog; kag ang pagkahulog nag-abot tungod sang paglapas; kag bangod ang tawo nahulog ginsikway sila sa presensya sang Ginuo.

7 Gani, kinahanglan gid nga ini mangin wala’y dulonan nga pagbayad-sala—luwas lamang kon ini mangin wala’y dulonan nga pagbayad-sala ining madunot indi makasul-ob sang indi madunot. Gani, ang una nga paghukom nga natabo sa tawo nagpabilin kuntani nga wala katapusan ang kalawigon sang tion. Kag kon amo, ini nga unod pat-od gid nga malubong agud madunot kag magkalapudpod sa iya sini iloy nga duta agud indi na magbangon pa.

8 O ang kaalam sang Dios, ang iya kaluoy kag grasya! Kay tan-awa, kon ang unod indi na magbangon ang aton mga espiritu pat-od gid nga mangin sakop sinang anghel nga nalaglag halin sa presensya sang Wala’y Katapusan nga Dios, kag nangin yawa, agud indi na magbangon.

9 Kag ang aton mga espiritu pat-od gid nga mangin pareho sa iya, kag kita mangin mga yawa, mga anghel sang yawa, nga ipapalayo halin sa presensya sang aton Dios, kag magapabilin upod sa amay sang mga kabutigan, sa kalisud, nga pareho sa iya kaugalingon; huo, sa sinang persona nga nagsulay sang aton unang mga ginikanan, nga nagabalhin sang iya kaugalingon nga daw isa ka anghel sang kasanag, kag nagasugyot sang mga anak sang katawhan sa sekreto nga mga padihot sang pagpamatay kag tanan nga klase sang sekreto nga mga buhat sang kadulom.

10 O sa pagkadako sang kaayo sang aton Dios, nga naghanda sing isa ka alagyan para sa aton sa pagpalagyo halin sa hugot nga pag-uyat sining makahaladlok nga halimaw; huo, inang halimaw, kamatayon kag impiyerno, nga akon ginatawag nga kamatayon sang lawas, kag kamatayon man sang espiritu.

11 Kag tungod sang paagi sang pagluwas sang aton Dios, ang Balaan sang Israel, ining kamatayon, nga akon ginahambal, nga amo ang dutan-on, magahilway sang iya sini mga minatay; nga ang amo nga kamatayon amo ang lulubngan.

12 Kag ining kamatayon nga akon ginahambal, nga amo ang espirituhanon nga kamatayon, magahilway sang iya sini mga minatay; nga ang amo nga espirituhanon nga kamatayon amo ang impiyerno; gani, ang kamatayon kag impiyerno kinahanglan gid nga magahilway sang ila sini mga minatay, kag ang impiyerno kinahanglan gid nga maghilway sang iya sini bihag nga mga espiritu, kag ang lulubngan kinahanglan gid nga magahilway sang iya sini bihag nga mga lawas, kag ang mga lawas kag ang mga espiritu sang tawo mapanumbalik sa isa kag isa; kag ini paagi sa gahum sang pagkabanhaw sang Balaan sang Israel.

13 O daw ano kadako ang plano sang aton Dios! Kay sa pihak nga bahin, ang paraiso sang Dios kinahanglan gid nga magahilway sang mga espiritu sang mga matarong, kag ang lulubngan magahilway sang lawas sang mga matarong; kag ang espiritu kag ang lawas ipanumbalik liwat sa iya kaugalingon, kag ang tanan nga tawo mangin indi na madunot, kag wala’y kamatayon, kag buhi sila nga mga kalag nga may perpekto nga ihibalo pareho sa aton sa unod, luwas lang nga ang aton ihibalo mangin perpekto.

14 Gani, makaangkon kita sing perpekto nga ihibalo sang tanan naton nga kabasulanan, kag sang aton pagkadi-matinlo, kag sang aton pagkahublas; kag ang mga matarong makaangkon sing perpekto nga ihibalo sang ila kalipayan, kag sang ila pagkamatarong, nga nasul-oban sang kaputli, huo, bisan sang panapton sang pagkamatarong.

15 Kag matabo ini nga kon ang tanan nga tawo makalabay na halin sa sining una nga kamatayon padulong sa kabuhi, sa bagay nga sila nangin wala’y kamatayon, kinahanglan gid sila nga magpakita sa atubang sang hukom-lingkuranan sang Balaan sang Israel; kag dayon magaabot ang paghukom, kag dayon pagahukman sila suno sa balaan nga paghukom sang Dios.

16 Kag pat-od gid nga pareho nga buhi ang Ginuo, kay ang Ginuong Dios naghambal sini, kag iya ini wala’y katapusan nga pulong, nga indi gid magtaliwan, nga sila nga matarong mangin matarong gihapon, kag sila nga mahigko mangin mahigko gihapon; gani, sila nga mahigko amo ang yawa kag ang iya mga anghel; kag magakadto sila sa kalayo nga wala’y katubtuban, nga ginhanda para sa ila; kag ang mga pagpaantos sa ila mangin pareho sang linaw nga kalayo kag asupre, nga ang iya dabadaba nagapasaka sa gihapon kag sa gihapon kag wala sing katapusan.

17 O ang pagkawala’y tupong kag hustisya sang aton Dios! Kay iya ginapatuman ang tanan niya nga mga pulong, kag naggwa ang mga ini sa iya baba, kag ang iya layi kinahanglan gid nga matuman.

18 Apang, tan-awa, ang mga matarong, ang mga santos sang Balaan sang Israel, sila nga nagpati sa Balaan sang Israel, sila nga nagbatas sang mga krus sang kalibutan, kag wala nagsapak sang kahuluy-an sini, magapanubli sila sang ginharian sang Dios nga ginhanda para sa ila halin pa sa pagtuga sang kalibutan, kag ang ila kalipay mangin lubos tubtob sa wala’y katapusan.

19 O ang pagkawala’y tupong sang kaluoy sang aton Dios, ang Balaan sang Israel! Kay ginaluwas niya ang iya mga santos halin sa sinang makahaladlok nga halimaw nga yawa, kag kamatayon, kag impiyerno, kag sa sinang linaw nga kalayo kag asupre nga amo ang nagapadayon nga pagpaantos.

20 O sa pagkadako sang pagkabalaan sang aton Dios! Kay nahibal-an niya ang tanan nga butang, kag wala sang bisan ano nga butang nga wala niya mahibal-i.

21 Kag magakari sia sa kalibutan agud nga maluwas niya ang tanan nga tawo kon magpamati sila sa iya tingug; kay tan-awa, pagaantoson niya ang mga kasakit sang tanan nga tawo, huo, ang mga kasakit sang tagsa ka nagakabuhi nga tinuga, nga mga lalaki, mga babayi, kag mga kabataan nga miyembro sang panimalay ni Adan.

22 Kag antoson niya ini agud nga ang pagkabanhaw magaabot sa tanan nga tawo, agud nga ang tanan makatindog sa iya atubang sa dako kag adlaw sang paghukom.

23 Kag ginasugo niya ang tanan nga tawo nga kinahanglan gid sila nga maghinulsol, kag magpabunyag sa iya ngalan nga may perpekto nga pagtuo sa Balaan sang Israel, ukon indi sila maluwas sa ginharian sang Dios.

24 Kag kon indi sila maghinulsol kag magpati sa iya ngalan, kag magpabunyag sa iya ngalan, kag magpadayon tubtob sa katapusan, pat-od gid nga pagasilotan sila; kay ang Ginuong Dios, ang Balaan sang Israel, ang naghambal sini.

25 Gani, naghatag sia sing isa ka layi; kag kon diin wala sing layi nga ginhatag wala sing silot; kag kon diin wala sing silot wala sing pagkondenar; kag kon diin wala sing pagkondenar ang mga kaluoy sang Balaan sang Israel ang magaangkon sa ila tungod sang pagbayad-sala; kay ginluwas sila paagi sa gahum niya.

26 Kay ang pagbayad-sala nagasabat sang mga ginapangayo sang iya hustisya sa tanan sinang wala sing layi nga ginhatag sa ila, nga ginluwas sila sa sinang makahaladlok nga halimaw, kamatayon kag impiyerno, kag sa yawa, kag sa linaw nga kalayo kag asupre nga amo ang nagapadayon nga pagpaantos; kag ginapanumbalik sila sa sinang Dios nga naghatag sa ila sing ginhawa, nga amo ang Balaan sang Israel.

27 Apang kalisud sa iya nga may layi nga ginhatag, huo, nga yara ang tanan nga kasugoan sang Dios, pareho sa aton, kag nga magalapas sang mga ini, kag nga magauyang sang mga adlaw sang iya pagtilaw kay makahaladlok ang iya kahimtangan!

28 O inang tuso nga plano sing isa nga malain! O ang pagkabugalon, kag ang mga kahuyangan, kag ang kabuangan sang mga tawo! Kon sila may tinun-an nagahunahuna sila nga sila maalam, kag wala sila nagapamati sa laygay sang Dios, kay ila ini ginabale-wala nga nagahunahuna nga nakahibalo na sila sa ila kaugalingon, gani, ang ila kaalam kabuangan kag wala ini sing kapuslanan sa ila. Kag mawala sila.

29 Apang ang mangin may tinun-an maayo kon mamati sila sa mga laygay sang Dios.

30 Apang kalisud sa mga manggaranon, nga mga manggaranon sa mga butang sang kalibutan. Kay bangod sila mga manggaranon ginakaugtan nila ang mga imol, kag ginahingabot nila ang mga malulo, kag ang ila mga tagipusuon yara sa ila mga manggad; gani, ang ila manggad amo ang ila dios. Kag tan-awa, ang ila manggad madula man upod sa ila.

31 Kag kalisud sa mga bungol nga indi mamati; kay mawala sila.

32 Kalisud sa mga bulag nga indi maluyag nga makakita; kay sila man mawala.

33 Kalisud sa mga matig-a sing tagipusuon, kay ang ihibalo sang ila mga kalainan magasakit sa ila sa katapusan nga adlaw.

34 Kalisud sa butigon, kay idap-ong sia sa impiyerno.

35 Kalisud sa manugpatay-tawo nga nagapamatay sing hungod, kay mapatay sia.

36 Kalisud sa ila nga nagapanghilawas, kay idap-ong sila sa impiyerno.

37 Huo, kalisud sa ila nga nagasimba sang mga dios-dios, kay ang yawa sang tanan nga yawa nagakalipay sa ila.

38 Kag, sa malip-ot nga pulong, kalisud sa tanan sinang magakalamatay sa ila mga sala; kay magabalik sila sa Dios, kag makita ang iya nawong, kag magapabilin sa ila mga sala.

39 O, pinalangga kong mga kauturan, dumduma ang pagkamakahaladlok sang paglapas batok sa sinang Balaan nga Dios, kag sang pagkamakahaladlok man sang pagpadaug sa mga pagpangganyat sinang isa nga tuso. Dumduma, ang mangin dutan-on sing kaisipan amo ang kamatayon, kag ang mangin espirituhanon sing kaisipan amo ang kabuhi nga wala’y katapusan.

40 O, pinalangga kong mga kauturan, magpamati sa akon mga pulong. Dumduma ang pagkawala’y tupong sang Balaan sang Israel. Indi kamo magsiling nga naghambal ako sa inyo sang masakit nga mga pulong batok sa inyo; kay kon inyo himuon, magapasipala kamo batok sa kamatuoran; kay naghambal ako sang mga pulong sang inyo Tagtuga. Nahibal-an ko nga ang mga pulong sang kamatuoran masakit batok sa tanan nga kahigko; apang ang matarong wala nagakahadlok sang mga ini kay nagakaluyag sila sa kamatuoran kag wala nagakurog.

41 O kon amo, pinalangga kong mga kauturan, magpalapit kamo sa Ginuo, ang Balaan. Dumduma nga ang iya mga banas matarong. Tan-awa, ang dalan para sa tawo makitid, apang nahamtang ini sa matadlong nga alagyan sa iya atubang, kag ang manugbantay sang ganhaan amo ang Balaan sang Israel; kag wala sia sing ginagamit nga alagad didto; kag wala na sing iban nga alagyan luwas lang nga ini paagi sa ganhaan; kay indi sia madayaan, kay ang Ginuong Dios amo ang iya ngalan.

42 Kag kon sin-o man ang nagapanuktok, sia ang iya pagabuksan; kag ang maalam, kag ang may tinun-an, kag sila nga mga manggaranon, nga naghambog tungod sang ila tinun-an, kag sang ila kaalam, kag sang ila mga manggad—huo, amo sila ang iya ginakaugtan; kag luwas lang nga ipahabog nila ining mga butang, kag kabigon ang ila mga kaugalingon nga mga buang sa atubang sang Dios, kag magpanaog sa kadalumon sang pagpaubos, indi niya sila pagbuksan.

43 Apang ang mga butang sang mga maalam kag sang mga mahinalungon pagalipdan sa ila tubtob sa wala’y katapusan—huo, inang kalipayan nga ginahanda para sa mga santos.

44 O, pinalangga kong mga kauturan, dumduma ang akon mga pulong. Tan-awa, ginauba ko ang akon mga panapton, kag ginawaswas ko ang mga ini sa inyo atubang; ginapangamuyo ko sa Dios sang akon kaluwasan nga tan-awon niya ako sang iya mapangusisa nga mata; gani, inyo mahibal-an sa katapusan nga adlaw kon san-o ang tanan nga tawo pagahukman sang ila mga binuhatan, nga ang Dios sang Israel nagsaksi nga ginwaswas ko ang inyo mga kalainan halin sa akon kalag, kag nga nagatindog ako nga may kaputli sa iya atubang, kag nakakasan ako sang inyo dugo.

45 O, pinalangga kong mga kauturan, talikdi ang inyo mga sala; huksa ang mga kadena niya nga magagapos sa inyo sing hugot; magpalapit sa Dios nga amo ang bato sang inyo kaluwasan.

46 Ihanda ang inyo mga kalag para sa sinang mahimayaon nga adlaw nga kon san-o ang hustisya igahatag sa mga matarong, bisan ang adlaw sang paghukom, agud nga indi kamo magpalangupos sa grabe nga kahadlok; agud nga indi ninyo madumduman sing bug-os ang inyo makahaladlok nga kabasulanan, kag mapilitan sa pagsinggit: Balaan, balaan ang imo mga paghukom, O Ginuong Dios nga Makagagahum—apang nahibal-an ko ang akon kabasulanan; ginlapas ko ang imo layi, kag ang akon mga kalapasan akon kaugalingon; kag nakuha ako sang yawa, nga isa ako ka biktima sang iya makahaladlok nga kalisud.

47 Apang tan-awa, mga kauturan ko, ginakinahanglan bala nga pukawon ko kamo sa isa ka makahaladlok nga kamatuoran sining mga butang? Matublag ko bala ang inyo mga kalag kon matinlo ang inyo mga kaisipan? Mangin prangka bala ako sa inyo suno sa kaprangka sang kamatuoran kon nahilway kamo sa sala?

48 Tan-awa, kon kamo balaan magahambal ako sa inyo parte sa pagkabalaan; apang kay indi kamo balaan, kag nagatulok kamo sa akon bilang isa ka manunudlo, kinahanglanon gid nga tudloan ko kamo sang mga kadangatan sang sala.

49 Tan-awa, ang akon kalag nagakangil-ad sa sala, kag ang akon tagipusuon nagakalipay sa pagkamatarong; kag dayawon ko ang balaan nga ngalan sang akon Dios.

50 Dali, mga kauturan ko, ang kada isa nga ginauhaw, magpalapit kamo sa mga tubig; kag sia nga wala sing kwarta, dali na magbakal kag magkaon; huo, dali na magbakal sang bino kag gatas nga wala sing kwarta kag wala sing bili.

51 Gani, indi mag-uyang sang kwarta para sa sinang wala’y kapuslanan, ukon sang inyo pagpangabudlay para sa sinang indi makapalipay. Magpamati sing matutum sa akon, kag dumduma ang mga pulong nga akon ginhambal; kag magpalapit sa Balaan sang Israel, kag magpaayaw sa sinang indi mawala, ukon indi man madunot, kag tugoti ang inyo kalag nga malipay sa katambukon.

52 Tan-awa, pinalangga kong mga kauturan, dumduma ang mga pulong sang inyo Dios; magpangamuyo sa iya sing dalayon sa adlaw, kag magpasalamat sa iya balaan nga ngalan sa gab-i. Papangalipaya ang inyo mga tagipusuon.

53 Kag tamda kon daw ano kawala’y tupong ang mga kasugtanan sang Ginuo, kag kon daw ano kawala’y tupong ang iya mga pagpakaubos sa mga anak sang katawhan; kag tungod sang iya pagkawala’y tupong, kag sang iya grasya kag kaluoy, nagpromisa sia sa aton nga ang aton kaliwatan indi gid lubos nga malaglag, suno sa unod, kundi nga pagaamligan niya sila; kag sa palaabuton nga mga henerasyon mangin isa sila ka matarong nga sanga sang panimalay ni Israel.

54 Kag karon, mga kauturan ko, luyag ko pa nga maghambal sing dugang sa inyo; apang sa bwas ko na ipahayag sa inyo ang nabilin sang akon mga pulong. Amen.