1 Ang pulong nga nakita ni Isaias, anak ni Amoz, parte sa Juda kag Jerusalem:

2 Kag matabo ini sa ulihing mga adlaw, nga ang bukid sang balay sang Ginuo ipahamtang sa putok-putokan sang mga bukid, kag pakataason sa ibabaw sang mga bungyod, kag ang tanan nga nasyon magatipon sa sini.

3 Kag madamo nga katawhan ang magakadto kag magasiling, Dali kamo, kag magtaklad kita sa bukid sang Ginuo, sa balay sang Dios ni Jacob; kag tudloan niya kita sang iya mga dalanon, kag magalakat kita sa iya mga banas; kay halin sa Sion magagwa ang layi, kag ang pulong sang Ginuo halin sa Jerusalem.

4 Kag magahukom sia sa tunga sang mga nasyon, kag magasaway sang madamo nga tawo: kag ang ila mga espada pulpogon nila nga mangin punta sang mga arado, kag ang ila mga bangkaw nga mangin mga garab nga inughagbas—ang nasyon indi mag-alsa sang espada batok sa nasyon, kag indi na sila magtuon sang giyera.

5 O panimalay ni Jacob, dali kamo kag maglakat kita sa kasanag sang Ginuo; huo, dali na, kay kamo tanan nagtalang, ang tagsa-tagsa sa iya malain nga mga dalanon.

6 Gani, O Ginuo, ginpabay-an mo ang imo katawhan, ang panimalay ni Jacob, tungod kay napuno sila sang mga pamatasan halin sa este, kag nagapamati sa mga manugpakot pareho sang mga Filistinhon, kag ginalipay nila ang ila mga kaugalingon sa mga anak sang mga pangayaw.

7 Ang ila man duta puno sang pilak kag bulawan, kag wala sing katapusan ang ila mga manggad; ang ila duta puno man sang mga kabayo, kag wala sing katapusan ang ila mga karusa.

8 Ang ila duta puno man sang mga dios-dios; ginasimba nila ang buhat sang ila kaugalingon nga mga kamot, nga ginhimo sang ila kaugalingon nga mga tudlo.

9 Kag ang kubos nga tawo wala nagaduko, kag ang dako nga tawo wala nagapaubos sang iya kaugalingon, gani, indi sia pagpatawara.

10 O kamo nga mga malain, magsulod kamo sa bato, kag magpanago kamo sa yab-ok, kay ang kahadlok sa Ginuo kag ang himaya sang iya pagkahari magasakit sa inyo.

11 Kag matabo ini nga ang matinaas-taason nga mga panulok sang tawo paubson, kag ang pagkabugalon sang mga tawo panubuon, kag ang Ginuo lamang ang pakataason sa sina nga adlaw.

12 Kay ang adlaw sang Ginuo sang mga Kasoldadohan magaabot sa indi madugay sa tanan nga nasyon, huo, sa tanan; huo, sa bugalon kag matinaas-taason, kag sa tanan nga hambog, kag pakanubuon sia.

13 Huo, kag ang adlaw sang Ginuo magaabot sa tanan nga kahoy nga cedro sang Libano, kay mataas kag lantyog ang mga ini; kag sa tanan nga kahoy nga oak sang Basan;

14 Kag sa tanan nga mataas nga bukid, kag sa tanan nga bungyod, kag sa tanan nga nasyon nga hambog, kag sa tanan nga katawhan;

15 Kag sa tagsa ka mataas nga tore, kag sa tagsa ka mabakod nga pader;

16 Kag sa tanan nga barko sang dagat, kag sa tanan nga barko sang Tarsis, kag sa tanan nga matahum nga talan-awon.

17 Kag ang pagkamatinaas-taason sang tawo panubuon, kag ang pagkabugalon sang mga tawo paubson; kag ang Ginuo lamang ang pakataason sa sina nga adlaw.

18 Kag ang mga dios-dios pagadulaon niya sing lubos.

19 Kag magakadto sila sa mga guab sang mga bato, kag sa mga kuweba sang duta, kay ang kahadlok sa Ginuo magapangibabaw sa ila kag ang himaya sang iya pagkahari magasakit sa ila, kon magtindog sia sa pag-uyog sing mabaskog sang duta.

20 Sa sina nga adlaw ihaboy sang tawo ang iya mga dios-dios nga pilak, kag ang iya mga dios-dios nga bulawan, nga iya ginhimo para sa iya kaugalingon agud simbahon, sa mga ilaga kag sa mga kabog;

21 Agud magkadto sa mga litik sang mga bato, kag sa mga ibabaw sang taliwis nga mga bato, kay ang kahadlok sa Ginuo magapangibabaw sa ila kag ang pagkahari sang iya himaya magasakit sa ila, kon magtindog sia sa pag-uyog sing mabaskog sang duta.

22 Bayai ninyo ang tawo, nga ang iya ginhawa yara sa iya mga ilong; kay para sa ano nga hatagan sia sing pagtamod?