1 Apang tan-awa, mangin madamo—sa sina nga adlaw nga magasugod ako sa paghimo sing isa ka dalayawon nga buluhaton sa tunga nila, agud nga madumduman ko ang akon mga kasugtanan nga ginhimo ko sa mga anak sang katawhan, agud nga mapahamtang ko liwat ang akon kamot sa ika-duha nga tion sa pagbawi sang akon katawhan nga iya sang panimalay ni Israel;

2 Kag amo man, agud madumduman ko ang mga promisa nga ginhimo ko sa imo, Nefi, kag amo man sa imo amay, nga pagadumdumon ko ang inyo kaliwatan; kag nga ang mga pulong sang inyo kaliwatan magagwa halin sa akon baba padulong sa inyo kaliwatan; kag ang akon mga pulong magalapos tubtob sa mga punta sang kalibutan bilang isa ka bandera sa akon katawhan nga iya sang panimalay ni Israel;

3 Kag bangod ang akon mga pulong magalapos—madamo sang mga Gentil ang magasiling: Isa ka Biblia! Isa ka Biblia! May ara na kami Biblia, kag wala na sing bisan ano pa man nga Biblia.

4 Apang amo ini ang ginasiling sang Ginuong Dios: O mga buang, magaangkon sila sing isa ka Biblia; kag magahalin ini sa mga Judio, ang akon dumaan nga katawhan sang kasugtanan. Kag ano ang pasalamatan nila sa mga Judio tungod sang Biblia nga nabaton nila halin sa ila? Huo, ano ang buot silingon sang mga Gentil? Nadumduman bala nila ang mga pag-antos, kag mga pagpangabudlay, kag mga kasakit sang mga Judio, kag ang ila katutum sa akon sa pagpahayag sang kaluwasan sa mga Gentil?

5 O kamo nga mga Gentil, nadumduman bala ninyo ang mga Judio, ang akon dumaan nga katawhan sang kasugtanan? Wala; kundi nga ginsumpa ninyo sila, kag gindumtan sila, kag wala magtinguha sa pagbawi sa ila. Apang tan-awa, ibalik ko ining tanan nga butang sa inyo kaugalingon nga mga ulo; kay ako nga Ginuo wala nalipat sa akon katawhan.

6 Ikaw nga buang, nga magasiling: Isa ka Biblia, may ara na kami Biblia, kag wala na kami nagakinahanglan pa sing Biblia. Nakaangkon bala kamo sing isa ka Biblia luwas lang kon ini paagi sa mga Judio?

7 Wala bala kamo makahibalo nga madamo sang nasyon indi lang kay isa? Wala bala kamo makahibalo nga ako, nga Ginuo nga inyo Dios, amo ang nagtuga sang tanan nga tawo, kag nga ginadumdum ko inang mga yara sa mga pulo sang dagat; kag nga ako ang nagadumala sang mga langit sa ibabaw kag sa duta sa idalom; kag ginapahayag ko ang akon pulong sa mga anak sang katawhan, huo, bisan sa tanan nga nasyon sang duta?

8 Gani nagakumod kamo tungod bala nga magabaton kamo sing dugang sang akon pulong? Wala bala kamo makahibalo nga ang testimonya sang duha ka nasyon saksi sa inyo nga ako amo ang Dios, nga ginadumdum ko ang isa ka nasyon pareho sa isa? Gani, nagahambal ako sang amo man gihapon nga mga pulong sa isa ka nasyon pareho sa isa. Kag kon ang duha ka nasyon magasulong nga magkaupod ang testimonya sing duha ka nasyon magasulong man nga magkaupod.

9 Kag ginahimo ko ini agud nga mapamatud-an ko sa madamo nga ako amo man gihapon kahapon, subong, kag tubtob sa wala’y katapusan; kag nga ginahambal ko ang akon mga pulong suno sa akon kaugalingon nga ikalipay. Kag bangod naghambal ako sing isa ka pulong indi kinahanglan nga inyo hunahunaon nga indi ako makahambal sing isa pa; kay ang akon buluhaton wala pa matapos; kag indi pa tubtob sa katapusan sang tawo, kag indi pa sumugod sa sina nga tion kag tubtob sa wala’y katapusan.

10 Gani, bangod nga may ara na kamo Biblia indi kinahanglan nga inyo hunahunaon nga ini nagaunod sang akon tanan nga pulong; kag indi man kinahanglan nga inyo hunahunaon nga wala ako nagpasulat sing dugang.

11 Kay ginasugo ko ang tanan nga tawo, sa este kag sa weste, kag sa norte, kag sa sur, kag sa mga isla sang dagat, nga isulat nila ang mga pulong nga akon ginahambal sa ila; kay paagi sa mga libro nga igasulat hukman ko ang kalibutan, ang tagsa ka tawo suno sa ila mga binuhatan, suno sa sinang nasulat.

12 Kay tan-awa, magahambal ako sa mga Judio kag isulat nila ini; kag magahambal man ako sa mga Nefinhon kag isulat nila ini; kag magahambal man ako sa iban pa nga mga tribo sang panimalay ni Israel, nga akon gintuytuyan palayo, kag isulat nila ini; kag magahambal man ako sa tanan nga nasyon sang duta kag isulat nila ini.

13 Kag matabo ini nga ang mga Judio makaangkon sang mga pulong sang mga Nefinhon, kag ang mga Nefinhon makaangkon sang mga pulong sang mga Judio; kag ang mga Nefinhon kag mga Judio makaangkon sang mga pulong sang nadula nga mga tribo ni Israel; kag ang nadula nga mga tribo ni Israel makaangkon sang mga pulong sang mga Nefinhon kag mga Judio.

14 Kag matabo ini nga ang akon katawhan, nga iya sang panimalay ni Israel, mapanipon pauli sa mga kadutaan nga ila mga ginapanag-iyahan; kag ang akon pulong matingob man sa isa. Kag ipakita ko sa ila nga nagapakig-away batok sa akon pulong kag batok sa akon katawhan, nga iya sang panimalay ni Israel, nga ako amo ang Dios, kag nga nakighisugot ako kay Abraham nga akon pagadumdumon ang iya kaliwatan tubtob sa wala’y katapusan.