Kapitulo 7
Si Jacob nagapadayon sa pagbasa halin sa Isaias: Si Isaias naghambal para sa Mesias—Ang Mesias magaangkon sang dila sang mga may tinun-an—Igataya Niya ang Iya likod sa mga nagapanakit—Indi Sia mahuy-an—Ikomparar ang Isaias 50. Mga 559–545 B.C.
1 Huo, kay amo ini ang ginasiling sang Ginuo: Ginbayaan ko bala ikaw, ukon ginsikway ko bala ikaw sing dalayon? Kay amo ini ang ginasiling sang Ginuo: Diin bala ang sulat sa pagbulagay sang inyo iloy? Kay sin-o ko bala kamo ginbaylo, ukon kay sin-o bala sa akon mga nautangan nga ginbaligya ko kamo? Huo, kay sin-o ko bala kamo ginbaligya? Tan-awa, tungod sang inyo mga kalainan ginbaligya ninyo ang inyo mga kaugalingon, kag tungod sang inyo mga kalapasan ang inyo iloy ginbayaan.
2 Gani, sang nag-abot ako, wala sing tawo; sang nagpanawag ako, huo, wala sing isa nga nagsabat. O panimalay ni Israel, ginpalip-ot bala ang akon kamot nga indi ini makatubos, ukon wala bala ako sing gahum sa pagluwas? Tan-awa, sa akon pagsaway ginpamala ko ang dagat, ginahimo ko nga kamingawan ang ila mga suba kag ang ila mga isda nagabaho bangod ang mga tubig nagmala, kag nagkalamatay sila tungod sang kauhaw.
3 Ginapasul-oban ko ang kalangitan sang kaitom, kag ginahimo ko nga panapton nga sako ang ila tabon.
4 Ang Ginuong Dios naghatag sa akon sang dila sang mga may tinun-an agud makahibalo ako kon paano maghambal sang pulong sa husto nga panahon sa imo, O panimalay ni Israel. Kon kamo ginalapyo nagapukaw sia kada aga. Ginapukaw niya ang akon dulunggan sa pagpamati pareho sang mga may tinun-an.
5 Ginbuksan sang Ginuong Dios ang akon dulunggan, kag wala ako nagrebelde, ukon nagtalikod.
6 Gintaya ko ang akon likod sa nagapanakit, kag ang akon mga pisngi sa ila nga naggabot sang burangos. Wala ko pagtagoa ang akon nawong sa kahuya kag pagdupla.
7 Kay ang Ginuong Dios magatabang sa akon, gani indi ako mahuy-an. Gani ginpalig-on ko ang akon nawong pareho sang bato nga pangbag-id, kag nakahibalo ako nga indi ako mahuy-an.
8 Kag malapit ang Ginuo, kag ginapakamatarong niya ako. Sin-o ang magapakigbais sa akon? Magtindog kita sing ulolupod. Sin-o ang akon kaaway? Papalapita sia sa akon, kag sakiton ko sia sa kusog sang akon baba.
9 Kay ang Ginuong Dios magatabang sa akon. Kag sila tanan nga magakondenar sa akon, tan-awa, sila tanan magadaan pareho sang biste, kag ang sipit magaut-ot sa ila.
10 Sin-o sa inyo ang nagakahadlok sa Ginuo, nga nagatuman sang tingug sang iya alagad, nga nagalakat sa kadulom kag wala sing kasanag?
11 Tan-awa tanan kamo nga nagadabok sang kalayo, nga ginapalibutan ang inyo mga kaugalingon sang mga igrab, nagalakat sa dabdab sang inyo kalayo kag sa mga igrab nga inyo gindabukan. Ini inyo maagom halin sa akon kamot—magahigda kamo sa kasubo.