1 Apang, ang kadulom indi mangin pareho sang iya pag-antos, sang sadtong una ginpaantos niya sing mamag-an ang duta sang Zabulon, kag ang duta sang Neftali, kag pagkatapos sini tuman nga ginpaantos ang dalanon sang Pula nga Dagat sa tabok sang Jordan sa Galilea sang mga nasyon.

2 Ang katawhan nga naglakat sa kadulom nakakita sing isa ka dako nga kasanag; sila nga nagapuyo sa duta sang landong sang kamatayon, sa ila nagsilak ang kasanag.

3 Ginpadamo mo ang nasyon, kag gindugangan ang kalipay—nagakalipay sila sa imo atubang suno sa kalipay sa pag-ani, kag pareho sang pagkasadya sang mga tawo kon magbahin-bahin sila sang inagaw.

4 Kay ginbali mo ang gota nga iya ginapas-an, kag ang sungkod sang iya abaga, ang bilugon sang iya manugpigos.

5 Kay ang tagsa ka inaway sang soldado naupdan sang magamo nga kinagahod, kag sang biste nga ginpaligid sa dugo; apang ini sulonugon kag inuggatong sa kalayo.

6 Kay sa aton natawo ang isa ka bata, sa aton ginhatag ang isa ka anak nga lalaki; kag ang pagdumalahan mangin sa iya abaga; kag tawgon ang iya ngalan, Dalayawon, Manuglaygay, Ang Dios nga Makagagahum, Ang Wala’y Katubtuban nga Amay, Ang Prinsipe sang Paghidaet.

7 Parte sa pagdugang sang pagdumalahan kag paghidaet wala ini sing katapusan, sa trono ni David, kag sa iya ginharian sa pagpahamtang sini, kag sa pagpalig-on sini upod ang katarungan kag upod ang hustisya sugod subong, bisan tubtob sa wala’y katapusan. Ang kaukod sang Ginuo sang mga Kasoldadohan ang magahikot sini.

8 Ang Ginuo nagpadala sang iya pulong kay Jacob kag ini nagtupa sa Israel.

9 Kag ang tanan nga katawhan makahibalo, bisan ang Efraim kag ang mga pumuluyo sang Samaria, nga nagasiling sa bugal kag katig-a sang tagipusuon:

10 Ang mga tisa nagkalahulog, apang magapatindog kita gamit ang tiniltigan nga mga bato; ang mga kahoy nga sicomoro ginpang-utod, apang ilisan naton ang mga ini sing mga kahoy nga cedro.

11 Gani iplastar sang Ginuo ang mga kaaway ni Rezin batok sa iya, kag tingbon ang iya mga kaaway;

12 Ang mga Sirianhon sa atubang kag ang mga Filistinhon sa likod; kag lamunon nila ang Israel sa naganganga nga baba. Tungod sini tanan ang iya kaakig wala nadula, kundi nga ang iya kamot nauntay pa gihapon.

13 Kay ang katawhan wala magbalikid sa iya nga nagsakit sa ila, ukon wala man magpangita sa Ginuo sang mga Kasoldadohan.

14 Gani utdon sang Ginuo halin sa Israel ang ulo kag ang ikog, ang sanga kag ang hilamon sa isa ka adlaw.

15 Ang tigulang, sia ang ulo; kag ang propeta nga nagatudlo sang mga kabutigan, sia ang ikog.

16 Kay ang mga nagapangulo sining katawhan amo ang nagapasayop sa ila; kag sila nga ginapangunahan nila ginalaglag.

17 Gani ang Ginuo indi magkalipay sa ila mga pamatan-on, kag indi man magkaluoy sa ila mga ilo kag mga balo nga babayi; kay ang tagsa sa ila hipokrito kag manughimo sang malain, kag ang tagsa ka baba nagahambal sing kabuangan. Tungod sini tanan ang iya kaakig wala nadula, kundi nga ang iya kamot nauntay pa gihapon.

18 Kay ang kalainan nagadabadaba pareho sang kalayo; magalamon ini sang mga kahoy-kahoy kag tunukon nga mga tanom, kag magasunog sa mga kasiutan sang mga lasang, kag magaibwal ang mga ini pareho sang pagpaibabaw sang aso.

19 Paagi sa kaakig sang Ginuo sang mga Kasoldadohan ang duta nagdulom, kag ang katawhan mangin pareho sang gatong sang kalayo; wala’y tawo nga maluoy sa iya utod.

20 Kag magasabnit sia sa tuo nga kamot kag gutumon; kag magakaon sia sa wala nga kamot kag indi sila mabusog; magakaon sila ang tagsa ka tawo sang unod sang iya kaugalingon nga butkon—

21 Ang Manases batok sa Efraim; kag ang Efraim batok sa Manases; sila nga duha batok sa Juda. Tungod sini tanan ang iya kaakig wala nadula, kundi nga ang iya kamot nauntay pa gihapon.