Kapitulo 22
Sa adlaw sang milenya, ang tanan nga tawo magadayaw sa Ginuo—Magapuyo sia sa tunga nila—Ikomparar ang Isaias 12. Mga 559–545 B.C.
1 Kag sa sina nga adlaw magasiling ka: O Ginuo, dayawon ko ikaw; bisan pa kon naakig ka sa akon ang imo kaakig nadula, kag ginapaumpawan mo ako.
2 Tan-awa, ang Dios amo ang akon kaluwasan; magasalig ako, kag indi magkahadlok; kay ang Ginuong Jehova amo ang akon kusog kag ang akon ambahanon; sia man ang akon nangin kaluwasan.
3 Gani, upod ang kalipay magasag-ob kamo sing tubig halin sa mga bubon sang kaluwasan.
4 Kag sa sina nga adlaw magasiling kamo: Dayawa ang Ginuo, magpanawag sa iya ngalan, magpahayag sang iya mga kahimoan sa tunga sang katawhan, isambit nga ang iya ngalan ginapakataas.
5 Magkanta sa Ginuo; kay nakahimo sia sang labing maayo nga mga butang; nabantugan ini sa bug-os nga duta.
6 Maghugyaw kag magsinggit, kamo nga mga pumuluyo sang Sion; kay dako ang Balaan sang Israel sa tunga ninyo.