Balaan ng mga Kasulatan
2 Nefi 32


Kapitulo 32

Ang mga anghel nagahambal paagi sa gahum sang Balaan nga Espiritu—Ang mga tawo kinahanglan gid nga magpangamuyo kag mag-angkon sing ihibalo para sa ila mga kaugalingon halin sa Balaan nga Espiritu. Mga 559–545 B.C.

1 Kag karon, tan-awa, pinalangga kong mga kauturan, sa banta ko ginabinag-binag pa gid ninyo sa inyo mga tagipusuon ang parte sa sinang dapat ninyo himuon pagkatapos nga nakasulod na kamo sa dalan. Apang, tan-awa, ngaa ginabinag-binag ninyo ining mga butang sa inyo mga tagipusuon?

2 Wala bala ninyo madumdumi nga nagsiling ako sa inyo nga pagkatapos nga nakabaton na kamo sang Balaan nga Espiritu makahambal na kamo nga daw may dila kamo sang mga anghel? Kag karon, paano kamo makahambal nga daw may dila kamo sang mga anghel luwas lang nga ini paagi sa Balaan nga Espiritu?

3 Ang mga anghel nagahambal paagi sa gahum sang Balaan nga Espiritu; gani, nagahambal sila sang mga pulong ni Cristo. Gani, nagsiling ako sa inyo, magpaayaw kamo sa mga pulong ni Cristo; kay tan-awa, ang mga pulong ni Cristo magasugid sa inyo sang tanan nga butang nga inyo dapat himuon.

4 Gani, karon pagkatapos nga mahambal ko ining mga pulong, kon indi ninyo mahangpan ang mga ini, ina tungod kay wala kamo magpamangkot, kag wala man kamo magpanuktok; gani, wala kamo madala sa kasanag, kundi pat-od gid nga madula sa kadulom.

5 Kay tan-awa, sa liwat ginasiling ko sa inyo nga kon magsulod kamo sa dalan, kag magbaton sang Balaan nga Espiritu, ipakita sini sa inyo ang tanan nga butang nga inyo dapat himuon.

6 Tan-awa, amo ini ang doktrina ni Cristo, kag wala na sing doktrina pa nga igahatag tubtob nga pagkatapos nga igapakita niya sa inyo ang iya kaugalingon sa unod. Kag kon magapakita sia sa inyo sang iya kaugalingon sa unod, ang mga butang nga iya ihambal sa inyo amo ang inyo tinguhaan nga himuon.

7 Kag karon ako, si Nefi, indi na makahambal sing dugang pa; ginapunggan sang Espiritu ang akon panghambal, kag padayon ako nga nagapangalisud tungod sang pagkawala’y pagtuo, kag sang kalainan, kag sang pagkaignorante, kag sang pagkabatinggilan sang mga tawo; kay indi sila magpangita sang ihibalo, kag indi man maghangop sang dako nga ihibalo, kon ginahatag ini sa ila sa kaathagan, bisan pareho kaathag sing isa ka pulong.

8 Kag karon, pinalangga kong mga kauturan, makita ko nga nagabinag-binag pa kamo gihapon sa inyo mga tagipusuon; kag ginakasubo ko nga kinahanglan gid nga maghambal ako parte sini nga butang. Kay kon magpamati kamo sa Espiritu nga nagatudlo sa isa ka tawo sa pagpangamuyo, mahibal-an ninyo nga dapat gid kamo nga magpangamuyo; kay ang malain nga espiritu wala nagatudlo sing isa ka tawo nga magpangamuyo, kundi nga nagatudlo sa iya nga indi sia dapat magpangamuyo.

9 Apang tan-awa, ginasiling ko sa inyo nga dapat gid kamo nga magpangamuyo sing dalayon, kag indi magpaluya; nga dapat gid nga indi kamo maghikot sing bisan ano nga butang sa Ginuo luwas lang nga una sa tanan magpangamuyo kamo sa Amay sa ngalan ni Cristo, agud nga ikonsagrar niya ang inyo ginpanghikot sa inyo, agud nga ang inyo ginapanghikot mangin para sa kaayohan sang inyo kalag.