Balaan ng mga Kasulatan
2 Nefi 31


Kapitulo 31

Si Nefi nagasugid kon ngaa ginbunyagan si Cristo—Ang mga tawo kinahanglan gid nga magsunod kay Cristo, magpabunyag, magbaton sang Balaan nga Espiritu, kag magpadayon tubtob sa katapusan agud maluwas—Ang paghinulsol kag bunyag amo ang ganhaan sa mapiot kag makitid nga banas—Ang kabuhi nga wala’y katapusan nagaabot sa sinang mga nagatuman sang mga kasugoan pagkatapos sang bunyag. Mga 559–545 B.C.

1 Kag karon ako, si Nefi, nagatapos sang akon pagpropesiya sa inyo, pinalangga kong mga kauturan. Kag indi ako makasulat kundi pila lamang ka butang nga nahibal-an ko nga pat-od gid nga matabo; kag indi man ako makasulat kundi pila lamang sang mga pulong sang akon utod nga si Jacob.

2 Gani, ang mga butang nga akon ginsulat tama na sa akon, luwas lang nga ini pila ka pulong nga kinahanglan ko gid nga ihambal parte sa doktrina ni Cristo; gani, magahambal ako sa inyo sing maathag suno sa kaathagan sang akon pagpropesiya.

3 Kay ang akon kalag nagakalipay sa kaathagan; kay sa sini nga paagi ang Ginuong Dios nagahikot sa tunga sang mga anak sang katawhan. Kay ang Ginuong Dios nagahatag sing kasanag sa paghangop; kay sia nagahambal sa mga tawo suno sa ila lengguahe, agud makahangop sila.

4 Gani, luyag ko nga inyo panumdumon nga naghambal ako sa inyo parte sinang propeta nga ginpakita sa akon sang Ginuo, nga magabunyag sang Kordero sang Dios, nga magakuha sang mga sala sang kalibutan.

5 Kag karon, kon ang Kordero sang Dios, sia nga balaan, ginakinahanglan nga bunyagan paagi sa tubig sa pagtuman sang tanan nga pagkamatarong, O dayon, daw ano kadako pa gid ang pagkakinahanglanon nga kita, nga di-balaan, mabunyagan, huo, bisan paagi sa tubig!

6 Kag karon, mamangkot ako sa inyo, pinalangga kong mga kauturan, paano gintuman sang Kordero sang Dios ang tanan nga pagkamatarong sa pagpabunyag paagi sa tubig?

7 Wala bala kamo makahibalo nga balaan sia? Apang bisan pa nga balaan sia, ginpakita niya sa mga anak sang katawhan nga suno sa unod ginapaubos niya ang iya kaugalingon sa atubang sang Amay, kag ginapamatud-an sa Amay nga mangin matinumanon sia sa iya sa pagtuman sang iya mga kasugoan.

8 Gani, pagkatapos nga nabunyagan sia paagi sa tubig ang Balaan nga Espiritu nagpanaog sa iya sa dagway sing isa ka pating.

9 Kag sa liwat, ini nagapakita sa mga anak sang katawhan sang kapiot sang banas, kag sang kakitid sang ganhaan, nga paagi sa sini sila magasulod, sia nga nagpahamtang sang ehemplo sa ila atubang.

10 Kag nagsiling sia sa mga anak sang katawhan: Sunod ka sa akon. Gani, pinalangga kong mga kauturan, makasunod bala kita kay Jesus luwas lang kon sugot kita sa pagtuman sang mga kasugoan sang Amay?

11 Kag ang Amay nagsiling: Maghinulsol kamo, maghinulsol kamo, kag magpabunyag sa ngalan sang akon Hinigugma nga Anak.

12 Kag amo man, ang tingug sang Anak nag-abot sa akon nga nagasiling: Sia nga nabunyagan sa akon ngalan, sa iya igahatag sang Amay ang Balaan nga Espiritu pareho sa akon; gani, sunda ninyo ako, kag himoa ang mga butang nga inyo nakita nga akon ginahimo.

13 Gani, pinalangga kong mga kauturan, nahibal-an ko nga kon sundon ninyo ang Anak sa bug-os nga katuyoan sang tagipusuon, nga nagabuhat nga wala’y pagkahipokrito kag wala’y pagpatalang sa atubang sang Dios, kundi nga may matuod-tuod nga tinutuyo, nga nagahinulsol sang inyo mga sala, nga nagasaksi sa Amay nga sugot kamo sa pagdala sa inyo kaugalingon sang ngalan ni Cristo paagi sa bunyag—huo, paagi sa pagsunod sang inyo Ginuo kag sang inyo Manluluwas paidalom sa tubig, suno sa iya pulong, tan-awa, dayon mabaton ninyo ang Balaan nga Espiritu; huo, dayon magaabot ang bunyag sang kalayo kag sang Balaan nga Espiritu; kag dayon makahambal kamo sa iya ka dila sang mga anghel, kag magasinggit sang mga pagdayaw sa Balaan sang Israel.

14 Apang, tan-awa, pinalangga kong mga kauturan, sa amo nga paagi nabatian ko ang tingug sang Anak nga nagasiling: Pagkatapos nga kamo nakahinulsol sang inyo mga sala, kag nakasaksi sa Amay nga sugot kamo sa pagtuman sang akon mga kasugoan paagi sa bunyag sang tubig, kag nakabaton sang bunyag sang kalayo kag sang Balaan nga Espiritu, kag makahambal nga may isa ka bag-o nga dila, huo, bisan sa iya ka dila sang mga anghel, kag pagkatapos sini magapanghiwala sa akon, mas maayo pa para sa inyo nga wala kamo nakakilala sa akon.

15 Kag nabatian ko ang isa ka tingug halin sa Amay nga nagasiling: Huo, ang mga pulong sang akon Hinigugma matuod kag tampad. Sia nga magapadayon tubtob sa katapusan, ang amo man maluwas.

16 Kag karon, pinalangga kong mga kauturan, nahibal-an ko paagi sa sini nga luwas lang kon ang isa ka tawo magapadayon tubtob sa katapusan, sa pagsunod sang ehemplo sang Anak sang buhi nga Dios, indi sia maluwas.

17 Gani, himoa ang mga butang nga akon ginsugid sa inyo nga akon nakita nga pagahimuon sang inyo Ginuo kag inyo Manunubos; kay, sa amo nga kabangdanan ginpakita ang mga ini sa akon agud nga inyo mahibal-an ang ganhaan nga sa diin kamo dapat magsulod. Kay ang ganhaan nga sa diin kamo dapat magsulod amo ang paghinulsol kag bunyag paagi sa tubig; kag dayon magaabot ang kapatawaran sang inyo mga sala paagi sa kalayo kag paagi sa Balaan nga Espiritu.

18 Kag dayon yari kamo sa sining mapiot kag makitid nga banas nga nagapadulong sa kabuhi nga wala’y katapusan; huo, nakasulod na kamo paagi sa ganhaan; nakahimo na kamo suno sa mga kasugoan sang Amay kag sang Anak; kag nakabaton na kamo sang Balaan nga Espiritu, nga nagasaksi parte sa Amay kag sa Anak, sa katumanan sang promisa nga iya ginhimo, nga kon magsulod kamo sa amo nga paagi mabaton ninyo.

19 Kag karon, pinalangga kong mga kauturan, pagkatapos nga nakasulod na kamo sa sining mapiot kag makitid nga banas, mamangkot ako kon ang tanan nahimo na? Tan-awa, ginasiling ko sa inyo, Wala; kay wala pa kamo makaabot dira luwas lang kon ini paagi sa pulong ni Cristo nga may di-mauyog nga pagtuo sa iya, nga nagasandig sing bug-os sa mga merito niya nga gamhanan sa pagluwas.

20 Gani, kinahanglan gid nga magduso kamo pasulong upod ang kalig-on kay Cristo, nga may perpekto nga kasanagan sang paglaum, kag gugma sa Dios kag sa tanan nga tawo. Gani, kon magaduso kamo pasulong, nga nagapaayaw sa pulong ni Cristo, kag magapadayon tubtob sa katapusan, tan-awa, amo ini ang ginasiling sang Amay: Inyo maangkon ang kabuhi nga wala’y katapusan.

21 Kag karon, tan-awa, pinalangga kong mga kauturan, amo ini ang paagi; kag wala na sing iban pa nga paagi ukon ngalan nga ginhatag sa idalom sang langit nga paagi sini ang tawo mahimo nga maluwas sa ginharian sang Dios. Kag karon, tan-awa, amo ini ang doktrina ni Cristo, kag ang nagaisahanon kag matuod nga doktrina sang Amay, kag sang Anak, kag sang Balaan nga Espiritu, nga isa ka Dios, nga wala’y katapusan. Amen.