Balaan ng mga Kasulatan
2 Nefi 2


Kapitulo 2

Ang pagtubos nagaabot paagi sa Balaan nga Mesias—Ang kahilwayan sa pagpili (pagbuot) kinahanglanon sa pagkabuhi kag pag-uswag—Si Adan nahulog agud ang tawo mabuhi—Ang tawo hilway sa pagpili sang kahilwayan kag kabuhi nga wala’y katapusan. Mga 588–570 B.C.

1 Kag karon, Jacob, nagahambal ako sa imo: Ikaw ang akon panganay sa mga adlaw sang akon pag-antos sa kamingawan. Kag tan-awa, sa imo pagkabata naagyan mo ang mga pag-antos kag tuman nga kasubo tungod sang kapintas sang imo mga kauturan.

2 Apang, Jacob, panganay ko sa kamingawan, nakilala mo ang pagkagamhanan sang Dios; kag ikonsagrar niya ang imo mga pag-antos para sa imo kaayohan.

3 Gani, ang imo kalag pakamaayohon, kag magapuyo ka nga wala sing peligro kaupod ang imo utod nga si Nefi; kag ang imo mga inadlaw igahinguyang sa pag-alagad sa imo Dios. Gani, nahibal-an ko nga natubos ka na tungod sang pagkamatarong sang imo Manunubos; kay nakit-an mo nga sa kabug-osan sang panahon magakari sia sa pagdala sang kaluwasan sa mga tawo.

4 Kag nakita mo sa imo pagkapamatan-on ang iya himaya; gani, bulahan ka pareho sa ila nga pagaalagaran niya sa unod; kay ang Espiritu amo man gihapon, kahapon, subong, kag tubtob sa wala’y katapusan. Kag nahanda ang paagi halin pa sa pagkahulog sang tawo, kag ang kaluwasan wala sing bayad.

5 Kag ang mga tawo ginatudloan sing nagakaigo nga ila mahibal-an ang maayo sa malain. Kag ang layi ginahatag sa mga tawo. Kag paagi sa layi wala sing unod nga mapakamatarong; ukon, paagi sa layi ang mga tawo ginasikway. Huo, paagi sa dutan-on nga layi ginsikway sila; kag amo man, paagi sa espirituhanon nga layi madula sila halin sa sinang maayo, kag mangin miserable sa wala’y katapusan.

6 Gani, ang pagtubos nagaabot paagi kag tungod sa Balaan nga Mesias; kay puno sia sang grasya kag kamatuoran.

7 Tan-awa, ginahatag niya ang iya kaugalingon nga isa ka halad para sa sala, sa pagsabat sang mga katuyoan sang layi sa tanan sinang may masinulub-on nga tagipusuon kag mahinulsulon nga espiritu; kag wala na sa iban pa nga mahimo nga masabat ang mga katuyoan sang layi.

8 Gani, daw ano kadako ang kakinahanglanon nga ipahibalo ining mga butang sa mga pumuluyo sang duta, agud mahibal-an nila nga wala sang unod nga makapuyo sa atubang sang Dios, luwas lamang kon ini mangin paagi sa mga merito, kag kaluoy, kag grasya sang Balaan nga Mesias, nga magahatag sang iya kabuhi suno sa unod, kag magabawi sini liwat paagi sa gahum sang Espiritu, agud nga mapahanabo niya ang pagkabanhaw sang mga minatay, bilang una nga magabangon.

9 Gani, sia ang unang bunga sang Dios tungod sia ang magapanabang para sa tanan nga anak sang katawhan; kag sila nga magapati sa iya maluwas.

10 Kag tungod sang pagpanabang para sa tanan, ang tanan nga tawo magapalapit sa Dios; gani, magatindog sila sa iya atubang agud hukman niya suno sa kamatuoran kag pagkabalaan nga yara sa iya. Gani, ang mga katuyoan sang layi nga ginhatag sang Balaan, sa pagpatuman sang silot nga naangot, nga ang amo nga silot nga naangot kontra sa sinang kalipayan nga naangot, sa pagsabat sang mga katuyoan sang pagbayad-sala—

11 Kay kinahanglan gid nga may pamatok sa tanan nga butang. Kon indi, panganay ko sa kamingawan, ang pagkamatarong indi mapahanabo, bisan man ang kalainan, bisan ang pagkabalaan ukon kalisud, bisan maayo ukon malain. Gani, ang tanan nga butang kinahanglan gid nga matingob sa isa; gani, kon isa lang kuntani ini ka lawas pat-od gid nga magpabilin ini nga pareho sang patay, nga wala sing kabuhi bisan kamatayon, ukon pagkadunot ukon wala’y pagkadunot, kalipayan ukon kalisud, bisan balatyagon ukon kawala’y balatyagon.

12 Gani, sigurado kuntani nga gintuga ini para sa isa ka butang nga wala sing pulos; gani nangin wala kuntani sing katuyoan ang rason sa pagtuga sini. Gani, ini nga butang pat-od gid nga magaguba sang kaalam sang Dios kag sang iya wala’y katapusan nga mga katuyoan, kag amo man sang gahum, kag sang kaluoy, kag sang hustisya sang Dios.

13 Kag kon magasiling kamo nga wala sing layi, magasiling man kamo nga wala sing sala. Kon magasiling kamo nga wala sing sala, magasiling man kamo nga wala sing pagkamatarong. Kag kon wala sing pagkamatarong wala sing kalipayan. Kag kon wala sing pagkamatarong ukon kalipayan wala sing silot ukon kalisud. Kag kon wala ining mga butang wala sang Dios. Kag kon wala sang Dios wala kita, bisan man ang duta; kay wala kuntani sing pagtuga sang mga butang, bisan nga maghulag ukon pahulagon; gani, ang tanan nga butang pat-od gid nga magkaladula.

14 Kag karon, mga anak ko, nagahambal ako sa inyo sining mga butang para sa inyo kaayohan kag pagtuon; kay may isa ka Dios, kag gintuga niya ang tanan nga butang, sa mga langit kag sa duta, kag ang tanan nga butang nga yara sa mga ini, nga mga butang nga maghulag kag mga butang nga pahulagon.

15 Kag sa pagpahanabo sining wala’y katapusan nga mga katuyoan sa kadangatan sang tawo, pagkatapos nga iya gintuga ang aton unang mga ginikanan, kag ang mga kasapatan sang kapatagan kag ang mga kapispisan sang kahanginan, kag sa malip-ot nga pulong, ang tanan nga butang nga gintuga kinahanglan gid nga may pamatok; bisan ang ginadilian nga bunga bilang kabaliskaran sang kahoy sang kabuhi; nga ang isa matam-is kag ang isa mapait.

16 Gani, ang Ginuong Dios nagtugot sa tawo nga maghulag sia para sa iya kaugalingon. Gani, ang tawo indi makahulag para sa iya kaugalingon luwas lang nga ganyaton sia sing isa ukon sing isa.

17 Kag ako, si Lehi, suno sa mga butang nga akon nabasa, kinahanglan gid nga magpati nga isa ka anghel sang Dios, suno sa sinang nasulat, ang nahulog halin sa langit; gani, nangin yawa sia tungod nagtinguha sia sinang malain sa atubang sang Dios.

18 Kag tungod nahulog sia halin sa langit, kag nangin miserable sa wala’y katapusan, gintinguhaan man niya nga mangin miserable ang tanan nga tawo. Gani, nagsiling sia kay Eva, huo, bisan inang dumaan nga man-og, nga amo ang yawa, nga amo ang amay sang tanan nga kabutigan, gani nagsiling sia: Magkaon ka sang ginadilian nga bunga kag indi kamo mapatay, kundi nga mangin pareho kamo sang Dios nga nakahibalo sang maayo kag malain.

19 Kag pagkatapos nga sanday Adan kag Eva nakakaon sang ginadilian nga bunga gintabog sila pagwa sa hardin sang Eden, sa pag-uma sang duta.

20 Kag nagbun-ag sila sang mga anak; huo, bisan ang panimalay sang bug-os nga duta.

21 Kag ang mga adlaw sang mga anak sang katawhan ginpalawig, suno sa kabubut-on sang Dios, agud nga makahinulsol sila samtang yara sa unod; gani, ang ila kahimtangan nangin isa ka kahimtangan sang pagtilaw, kag ang ila tion ginpalawig suno sa mga kasugoan nga ginhatag sang Ginuong Dios sa mga anak sang katawhan. Kay naghatag sia sang kasugoan nga ang tanan nga tawo kinahanglan gid nga maghinulsol; kay ginpakita niya sa tanan nga tawo nga nagtalang sila tungod sang paglapas sang ila mga ginikanan.

22 Kag karon, tan-awa, kon si Adan wala naglapas wala kuntani sia nahulog, kundi nga nagpabilin sia sa hardin sang Eden. Kag ang tanan nga butang nga gintuga nagpabilin kuntani sa amo man gihapon nga kahimtangan nga yara sila pagkatapos nga gintuga sila; kag magapabilin sila sa wala’y katapusan, kag wala sing katapusan.

23 Kag wala kuntani sila sing mga anak; gani nagpabilin kuntani sila sa isa ka kahimtangan sang pagkawala’y sala, nga wala sing kalipay kay wala sila makakilala sang kalisud; wala nagahimo sang maayo kay wala sila makakilala sang sala.

24 Apang tan-awa, ang tanan nga butang ginhimo sa kaalam niya nga nakahibalo sang tanan nga butang.

25 Si Adan nahulog agud ang tawo mabuhi; kag ang tawo nagakabuhi agud makaangkon sila sing kalipay.

26 Kag ang Mesias magakari sa kabug-osan sang panahon agud matubos niya ang mga anak sang katawhan halin sa pagkahulog. Kag tungod nga natubos sila halin sa pagkahulog nangin hilway sila sa wala’y katapusan nga nakakilala sang maayo sa malain; sa paghulag para sa ila mga kaugalingon kag indi pagpahulagon, luwas lang kon ini paagi sa silot sang layi sa dako kag ulihi nga adlaw suno sa mga kasugoan nga ginhatag sang Dios.

27 Gani, ang mga tawo hilway suno sa unod; kag ang tanan nga butang ginahatag sa ila nga kinahanglanon sa tawo. Kag hilway sila sa pagpili sang kahilwayan kag kabuhi nga wala’y katapusan, paagi sa dako nga Manugpatunga sang tanan nga katawhan, ukon sa pagpili sang pagkabihag kag kamatayon suno sa pagkabihag kag gahum sang yawa; kay ginatinguhaan niya nga ang tanan nga tawo mangin miserable pareho sang iya kaugalingon.

28 Kag karon, mga anak ko, luyag ko nga magtulok kamo sa dako nga Manugpatunga, kag magpamati sa iya dalagko nga mga kasugoan; kag mangin matutum sa iya mga pulong, kag magpili sang kabuhi nga wala’y katapusan suno sa kabubut-on sang iya Balaan nga Espiritu;

29 Kag indi magpili sang kamatayon nga wala’y katapusan suno sa kabubut-on sang unod kag sang kalainan nga yara sa sini, nga nagahatag sa espiritu sang yawa sing gahum sa pagbihag, sa pagdala sa inyo paidalom sa impiyerno, agud nga magagahum sia sa inyo sa iya kaugalingon nga ginharian.

30 Ginhambal ko ining pila ka pulong sa inyo tanan, mga anak ko, sa katapusan nga mga inadlaw sang akon pagtilaw; kag ginpili ko ang maayo nga bahin suno sa mga pulong sang propeta. Kag wala na ako sing iban pa nga tinutuyo luwas sa wala’y katubtuban nga kaayohan sang inyo mga kalag. Amen.