2 Nifayi 16

Isahluko 16

UIsaya ubona iNkosi—Izono zikaIsaya zixolelwe—Uyabizwa ukuba aprofethe—Uprofetha ngokwaliwa kweemfundiso zikaKrestu ngamaYuda—Intsalela iya kubuya—Thelekisa Isaya 6. Malunga 559–545 P.K.

1 ^aNgomnyaka wokufa kokumkani u-Uziya, ndabona kananjalo iNkosi ihleli phezu kwetrone, inyukile kwaye iphakanyiselwe phezulu, ^bamasondo eengubo zayo ezalise itempile.

2 Ngentla kwayo kumi ^aiiserafi; iyileyo inamaphiko amathandathu; ngamabini yayizigqume ubuso bayo, kwaye ngamabini izigqume iinyawo zayo, kwaye ngamabini yaye iphaphazela.

3 Kwaye enye yaye yadanduluka kwenye, yaza yathi: Ingcwele, ingcwele, ingcwele, iNkosi yeMikhosi; umhlaba wonke uzaliswe bubuqaqawuli bayo.

4 Yaza yashukuma ^aimigubasi yesango ngenxa yezwi lalowo wadandulukayo, nendlu yazaliswa ngumsi.

5 Ndathi ke mna: Yeha phezu kwam! kuba ^anditshatyalalisiwe; ngenxa yokuba ndiyindoda emilebe iyinqambi; kwaye ndihleli phakathi kwabantu abamilebe iyinqambi; kuba amehlo am ambonile uKumkani, iNkosi yeMikhosi.

6 Yaphaphazela ke enye yeeserafi yeza kum, iphethe ^ailahle elivuthayo esandleni sayo, eyayilithabathe ngeziphatho ezazisesibingelelweni;

7 Kwaye yalibeka emlonyeni wam, yaza yathi: Yabona, eli lahle liyichukumisile imilebe yakho; kwaye ^aubugwenxa bakho bususiwe, kwaye nesono sakho sihlanjululwe.

8 Kananjalo ndeva ilizwi leNkosi, lisithi: Ngubani na endingamthumayo, kwaye ngubani na oya kusiyela? Ndathi ke: Ndikho; thuma mna.

9 Yaza yathi: Hamba uze uxelele aba bantu—Phulaphulani ngenene, kodwa abazange babe nakuqonda; kwaye nibone ngenene, kodwa abazange babe nakubona.

10 Zityebise iintliziyo zabo aba bantu, uze uzenze iindlebe zabo zibe zizithulu, uze uwavale amehlo abo—hleze babone ngamehlo abo, baze ^abeve ngeendlebe zabo, baze baqonde ngentliziyo yabo, baze baguquke baze baphiliswe.

11 Ndathi ke mna: Nkosi, kode kube nini na? Waza wathi: Zide izixeko zidilizwe kungekho mmi, nezindlu zingabi namntu, kwaye nelizwe libe yinkangala ngokupheleleyo;

12 Kwaye neNkosi ide ibe ^aibashenxisele kude abantu, kuba kuya kubakho ukuncama okukhulu phakathi kwelizwe.

13 Kodwa kusaya kubakho isahlulo seshumi, kwaye siya kubuya, kwaye siya kudliwa, ngokungathi singumthi womterebhinti, nanjengom-oki osiphunzi sawo sikuwo noxa amagqabi sele ewile; ke ngoko imbewu engcwele iya kuba ^asisiphunzi sawo.