1 Oh met ngehi, Nihpai, sohte pahn ntingihdi irekidi en kadaudok en ei pahpa kahlap ko nan ei poadoapoad wet. Sang met kohla I pil sohte pahn ntingihdi pohn pileit me I wie ntingting powe; pwehki e ntingdier nan poadoapoad me ei pahpao kin apwalih; eri, I sohte pahn ntingihdi nan poadoapoad wet.

2 Pwe e itarete I en nda me se wia kisehn kadaudok en Sosep.

3 Oh e sohte katapan ongie ma I oaritikih koasoaiepen soahng koaros me pid ei pahpao, pwe re sohte pahn ntingdi pohn pileit pwukat, pwe I men en mie dewen soahng kan me I pahn ntingihdi me sang rehn Koht.

4 Pwe uhdahn kahrepen ei wia met iei I en kak kamantiki aramas akan en kohdo rehn Koht en Eipraam, oh Koht en Aisek, oh Koht en Seikop, oh komourla.

5 Eri, I sohte pahn ntingihdi soahng kan me kaperen ong sampah, ahpw I pahn ntingihdi soahng kan me kin kaperenda kupwur en Koht oh irail akan me sohte wia kisehn sampah.

6 Eri, I pahn kiheng kadaudokei kan kosonned, me irail sohte pahn audehki pileit pwukat soahng kan me sohte kesempwal ong aramas akan.