Iralaud 3
Nein Lihai pwutak ko pwurala Serusalem pwe re en ale pirahs pileit ko—Leipen kahng kiheng irail pileit ko—Nihpai kangoange oh kakehlaka rie pwutak ko—Leipen pirapahsang arail dipwsou ko oh song en kemeirailla—Leimen oh Lemuel woakih Nihpai oh Sam oh tohnleng men lipwoare ira. Ele Sounpar 600–592 Mwohn Krais.
1 Kedekedeo ngehi, Nihpai, pwurasang ei koasokoasoi ong Kauno, pwuralahng ni imwen ei pahpao impwalo.
2 Kedekedeo e koasoaiong ie, ndinda: Kilang I ouramankihda ouraman ehu, [nan ouramano] Kauno poahngokihong ie me kowe oh riomw pwutak kan anahne pwurala Serusalem.
3 Pwe kilang, Leipen kolokol poadoapoad en mehn Suhs akan oh pil ntingdi en kadaudok en ei pahpa kahlap ako, oh re ntingdi pohn pileit prahs ko.
4 Eri, Kauno pahngokihong ie me kowe oh riomw pwutak kan pahn kohla ni imwen Leipen, oh rapahki poadoapoad kan, oh wahdihdo wasaht nan sapwtehne.
5 Ahpw met, kilang riomw pwutak ko kaulimalahr oh ndinda me mehkot apwal ehu me I anahne sang ira; ahpw kilang kaidehn ngehi me anahne sang ira, ahpw iei kosonned en Kauno.
6 Eri kohla, samwa, oh ke ahpw pahn kenikenla mehlel rehn Kauno, pwehki ke sohte kin kaulim.
7 Kedekedeo ngehi, Nihpai, ndahieng ei pahpao: I pahn kohla oh wia soahng kan me Kauno pahngokih, pwe I ese me Kauno sohte kin ketkihdo kosonned rehn aramas akan, ihte ma e pahn ketin kaunopada wiepen arail pahn kapwaiada dahme e pahngokihong irail.
8 Kedekedeo ni ahnsou me ei pahpao rongada koasoi pwukat e udahn perenda mehlel, pwe e ese me Kauno kapaiedahr.
9 Oh ngehi, Nihpai, oh riei pwutak wahda imwat impwal akan oh seiloakla nan sapwtehno, pwe sen kohdahla nan sahpw en Serusalem.
10 Kedekedeo ni ahnsou me se lelladahla nan sahpw en Serusalem, ngehi oh riei pwutak ko kapwungada nan pwungat.
11 Oh se ahpw usuhski—ihs nanpwungat me pahn kohla ni imwen Leipeno. Kedekedeo Leimen ahpw uhsada; oh Leimen kohlongala nan imwen Leipeno, oh mwohndi nan imwehu oh koasoaieng ih.
12 Oh e peki rehn Leipen poadoapoadakan me ntingdi pohn pirahs pileit kan, me audaukihda ntingdi en kadaudok en ei pahpao.
13 Oh kilang, kedekedeo Leipen lingeringerda, oh kausasang ih nan imwehu; oh e sohte men mweidehng en ale poadoapoad ko. Eri, e ndahieng: Kilang kowe lipirap men, oh I pahn kemeiukala.
14 Ahpw Leimen tangasang reh, oh kohdo ndahieng kiht soahng kan me Leipen wiahieng. Oh se ahpw pahtoukihla mehlel, oh riei pwutak ko ahpw pahn pwuralahr rehn ei pahpao nan sapwtehno.
15 Ahpw kilang I kahukihong irail me: Ni mehlel pwehki Kauno eh ieias, oh kitail momour, kitail sohte pahn kohdihla rehn atail pahpao nan sapwtehno lao kitail kapwaiada dahme Kauno pahngokihong kitail.
16 Eri, kitail loalloapwoationg kapwaiada kosonned akan en Kauno; eri kitail kohdihla nan sapwen atail pahpao sahpw en sohsou, pwe kilang e pwilikihdi kohl oh siliper, oh soahngen dipwsou en pai kei. Oh e wiahier soahng pwukat koaros pwehki kosonned akan en Kauno.
17 Pwehki e ese me Serusalem pahn kamwomwomwla, pwehki suwed en aramas akan.
18 Pwe kilang, irail soikalahr mahsen en soukohp akan. Eri, ma ei pahpao pahn mihmihte nan sahpwo mwurin eh pahngokehng en kohkohlahsang nan sahpwo, kilang, e pahn kamakamala. Eri, e konehng en tangasang nan sahpwo.
19 Oh kilang, iei Sapwellimen Koht eripit me kitail en alehdi poadoapoad kan, pwe kitail en kak kolokolehng neitail seri kan ehn atail pahpa kahlap oko arail lokaia;
20 Pwe kitail en pil kak peusehieng irail mahsen akan me miehier sang nan dawesen soukohp sarawi kan, me kohdohng irail sang Ngehno oh manaman en Koht, sangete ni tepdahn sampah, lelledohr ahnsou wet.
21 Kedekedeo I nantihong I en panawih ira ni soahngen wiepen koasoi pwukat, pwe ira en kak loalloapwoationg kapwaiada sapwellimen Koht kosonned akan.
22 Kedekedeo se kohdihla nan sapwat sahpwo, oh kiht eri kihpene nait kohl, nait silper, oh aht dipwsou kesempwal akan.
23 Oh mwurin aht kihpene mepwukat, se pwurehng pwuradahla ni imwen Leipeno.
24 Kedekedeo se aphw pidolongalahr rehn Leipen, oh peki reh ma e kak kiheng kiht poadoapoad kan me ntingdi pohn prahs pileit kan, a se pahn kawelialihkihong nait kohl, oh silper, oh aht dipwsou kesempwal akan.
25 Kedekedeo ni ahnsou me Leipen kilangada aht dipwsou kan, oh pwehki eh inenen tohto mehlel, e noahrokehda, kahrehda e kauskit, oh kadar nah ladu kan re en kemeikitala, pwe en kak kihsang aht dipwsou kan.
26 Kedekedeo se tangasangehr nein Leipen ladu ko, oh se pwilikihdi aht dipwsou ko pwehki sohte aht ahnsou mwahu en wahda, oh Leipen ahnekilahr.
27 Kedekedeo se ahpw tangalahr nan sapwtehno, oh nein Leipen ladu ko sohte kolkihtdi, oh se rukila nan pwoahr en paip ehu.
28 Kedekedeo Leimen lingeringerida pahi, oh pil pahn ei pahpao; oh Lemuel pil iangala, pwehki e kin rongala ehn Leimen koasoi kan. Eri Leimen oh Lemuel wiahier koasoi sapwung tohto ong kiht riara pwutak tikitik kan, oh ira woktuhkehihkit.
29 Kedekedeo nindoken ara wokwokkihkinkiht tuhke, kilang, tohnleng en Kauno men ahpw pwaredo oh kesihnenda mwora, oh patohwanong ira, ketihtihki: Dahme kumwa kemekemehki riomwa pwutak tikitik kan lepin tuhkehn? Kumwa sehse me Kauno pilada pwe en wiahla amwa kaun, oh met pwehki amwa wiewia suwed akan? Kilang kumwail pahn pwurehng pwuradahla Serusalem, oh Kauno ahpw pahn ketkiheng kumwail Leipen.
30 Oh mwurin tohnlengo e patohieng kiht, e ahpw patpatohla.
31 Oh mwurin tohnlengo eh patpatohla, Leimen oh Lemuel pwurehng tepda kaulim oh nda: Ia mwomwen Kauno e pahn kak kiheng kitail Leipen? Kilang, e wia ohl kehlail men, oh e kak ruwese meh limehk, mehlel, e kak kemehla meh limehk; a dahme kitail sohki?