Keieu en Pwuhk en Nihpai
Ah Mwehi oh Doadoahk
Duwen Lehi oh ah werek Sariah, oh nah pwutak pahmen, oh iet adarail kan, (tepsang me laud) Leimen, Lemuel, Sam, oh Nihpai. Kauno kapariki Lihai en kohkohlahsang nan sahpw en Serusalem, pwehki e kohpada suwed en aramas ako oh irail song en kawehla ah mour. E wahda ah peneinei oh seiseiloangki rahn siluh nan sapwtehno. Nihpai kahrehda rie pwutak kau oh pwurala nan sahpw en Serusalem pwe re en ale poadoapoad en mehn Suhs akan. Duwen arail lokolok kan. Irail pwoudkihda nein Isimael serepein kan. Irail wahda arail peneinei kan oh kohkohla nan sapwtehno. Arail lokolok kan oh kahpwal akan nan sapwtehno. Ahl me irail seiseiloak loalle. Irail lella ni sehdo. Rien Nihpai pwutak kau akupwungieng. E katokeirahdi, oh wiahda sohp pwoat. Irail kahdaniki wasahu Paundipul [de Sapwen Rahk]. Irail kotehla sehdo oh kolahng nan sahpw en inouo, oh pil soahng teikan. Met iei duwen ahn Nihpai nting; me wehweki ngehi, Nihpai, me ntingihdi poadoapoad wet.
Iralaud 1
Nihpai tapiada ntingihedi poadoapoad en nah aramas akan—Lihai kilangada nan kaudiahl uhr en kisiniei ehu oh wadekasang nan pwuhk en kokohp ehu—E kepinga Koht, kohpada ketidohn Mesaiao, oh kohpada kamwomwalahn Serusalem—Mehn Suhs akan kailongkihla. Ele Sounpar 600 Mwohn Krais.
1 Ngehi, Nihpai, ipwidisangehr nohno oh pahpa mwahu, I esehlahr mehkoaros me ei papaho kaskuhlikinie; oh I kilangehr kahpwal tohto nan ei mour, ahpw, pwehki ei kenikenlamehlel rehn Kauno rahn koaros; iei, pwehki ei wehwehkihla laud duwen sapwellimen Koht kalahngan oh me rir kan, kahrehda I wiahda poadoapoaden ei wiewia kan nan ei mwehi.
2 Iei, I wiahda ehu poadoapoad ni lokaia me ei pahpa kin doadoahngki, me audaudki kaskuhl en mehn Suhs akan oh lokaiahn mehn Isip kan.
3 Oh I ese me poadoapoad me I ntingiada e mehlel; oh I pein wiahkihda pehi kat; oh I wiahda nin duwen ei loalekeng.
4 Kedekedeo ni tepidahn keieun pahr en mwehi en Sedekaia, [me wia] nahnmwarki en Suda, (ei pahpao, Lihai, kin koukousoan erein pahr tohto kei nan Serusalem); oh nan pahrohte soukohp tohto kohdo, kokohp ong aramas akan me irail anahne koluhla, pwe ma soh a kahnimw en Serusalempahn kamwomwomwla.
5 Eri kedekedeo ei pahpao, Lihai, ni eh patohla, e ahpw kapakap ong Kauno, mehlel, sang nan ah mohngiong unsek, pwehki nah aramas akan.
6 Kedekedeo ni eh kapakap ong Kauno, uhr en kisiniei ehu pwarada oh mih pohn paip ehu mwohwe; oh soahng tohto e kilangada oh rongada; oh pwehki soahng kan me e rongehr oh kilangehr kahrehda e mwekidida oh rerer kouwahlap.
7 Oh kedekedeo e pwurala ni imweo nan Serusalem; oh wendi pohn dowe pehto, pwehki eh inenen direkihla Ngehno oh soahng kan me e kilangadahr.
8 Oh pwehki [ah] direkihla Ngehno, e mihla nan kaudiahl ehu, ih eri kilangada nanleng eh ritpeseng, oh e medewe me e kilangada Koht ketiket pohn mwoaleo, oh tohnleng ngedehriekapelpene oh wie kokoul oh kepikepinga arail Koht.
9 Kedekedeo e kilangada Emen eh ketiketdihdohsang nanleng, oh e kilangada me sapwellime maraino lingan sang marain en ketipin nisouwas.
10 Oh e pil kilangada meh ehk-riemen ar ideidawehn ih, oh marainparail lingan sang marain en usu kan nanleng.
11 Oh irail ketdihdo oh ketiketseli pohn sampah; oh me keieuo ketido oh uh mwohn ei pahpao, oh ketikihong pwuhk ehu, oh mahsaniheng en wadek.
12 Kedekedeo nindoken eh wie wadwadek, e ahpw direkihla Ngehn en Kauno.
13 Oh e wadek, ketihtihki: Meid suwed, meid suwed, ong Serusalem, pwehki I kilangadahr ahmw suwed akan! Ei, oh soahng tohto me ei pahpao wadekadahr me pid duwen Serusalem—me e pahn kamwomwomwla, iangahki towe kan me kin koukouson wasao; tohto me pahn kamakamkihla kedlahs, oh tohto me pahn sellahng Papilon.
14 Kedekedeo ni ahnsou me ei pahpao wadekehr oh kilangehr soahng kesempwal oh kapwuriamwei tohto, e ahpw kepingahki Kauno soahng tohto; me duwehte; Sapwellimahr doadoahk kan me kesempwal oh kapwuriamwei mehlel, Maing Kaun Koht Wasa Lapalahpie! Mwoalemwi me ileile nanleng, oh sapwellimahr manaman, oh kupwur sapan, oh kupwur kalahngan kohieng aramas koaros pohn sampah; oh, pwehki sapwellimomwi kalahngan, Re sohte pahn ketin mweidohng irail akan me kohdo rehmwi irail en kamwomwomwla!
15 Oh ih mwomwen koasoai me ei pahpao kepikepingahkihong Koht; pwehki palingenio uhdahn pereperen, oh ah mohngiong direkihla Ngehno, pwehki soahng kan me e kilangehr, iei, me Kauno ketin kasalehiong ih.
16 Oh met ngehi, Nihpai, sohte ntingihdi soahng koaros me ei pahpao ntingiedier, pwe e ntingiedier soahng tohto me e kilangada nan kaudiahl oh ouraman kan; oh e pil ntingiedi soahng tohto me e kohpadahr oh kaweidiki nah seri kan, ihme kahrehda I sohte pahn ntingiedi ni unsek.
17 Ahpw I pahn ntingiedi duwen ei wiewia kan nan ei mwehi. Kilahng, I pahn wiahda poadoapoadmwotomwot en ei pahpao, pohn pileit kan me I pein wiahkihda pehi kat; eri, mwurin ei pahn wiahda poadoapoad mwotomwot en ei pahpao I ahpw pahn uhd ntingiedi duwen pein ei mour.
18 Eri, I men kumwail en ese, me mwurin Kauno eh ketin kasalehiongehr ei pahpa, Lihai, soahng kopwuriamwei tohto, iei, duwen kamwomwomwlahn Serusalem, kilang e kohla rehn aramas akan, oh tepda kokohp oh kasalehiong irail duwen soahng kan me e kilangehr oh rongehr.
19 Kedekedeo mehn Suhs akan ahpw kepitki pwehki soahng kan me e kadehdehiongehr irail; pwe e kadehdehiong irail ni mehlel duwen arail wiewia suwed akan oh arail sapwung kan; oh e kadehdehki me soahng kan me e kilangehr oh rongehr, oh pil soahng kan me e wadekehr nan pwuhko kasaledahr ni sansal duwen ketidohn Mesaia men, oh pil poadoandoarlahn sampah.
20 Oh ahnsou me mehn Suhs akan rongehr mepwukat irail ahpw lingeringerda pah; ei, duwehte dahme wiawihongehr soukohp en mahs oko, me irail kausalahr, oh koastakaier, oh kemelahr; oh irail pil rapahki wiepen arail pahn kemehla ih. Ahpw kilang, ngehi, Nihpai, pahn kasalehiong kumwail me sapwellimen Kauno limpoakkalahngan kan miehr rehn koaros me E ketin piladahr, pwehki arail pwoson, pwe en kihong irail en kehlail pwe irail en kak komourla.