1 Kedekedeo se ahpw douluhla nan aht seiloak nan sapwtehno; oh se ahpw kohlahng palimese sang ahnsouo kohla. Oh se ahpw lellohng kahpwal tohto nan aht seiseiloak nan sapwtehno; oh aht pwoud kan naitikiedi seri nan sapwtehno.

2 Oh sapwellimen Kauno kapai laud kin kodohng kiht, oh ni aht kin momouriki uduk me amas nan sapwtehno, aht pwoud kan kin kadihdi mwahu neirail seri kan, oh irail kehlail, mehlel, duwehte ohl akan; oh irail tepdahr sohla kaulimki arail seiloak.

3 Oh kitail kak kilang me sapwellimen Koht kosonned akan uhdahn pahn pweida. Oh ma aramas pahn kin kapwaiada sapwellimen Koht kosonned akan e uhdahn pahn apwalih irail, oh kakehlaka irail, oh ketikihong irail wiepen arail pahn kak kapwaiada soahng kan me e kin ketin kehkehlingkiheng irail; eri, e ketin apwalih kiht erein aht seiseiloak nan sapwtehno.

4 Oh se ahpw seiseiloangki erein soupar tohto, iei, sounpar waluh nan sapwtehno.

5 Oh se ahpw kohdo nan sahpw me se kahdankihla Sahpwen Rahk, pwehki e diren wahn tuhke oh pil sukehn loangalap; oh Kauno me ketin kaunopada mepwukat koaros pwe se en dehr mehla. Oh se kilangada sehdo, me kahdaniki Iriandom, me wehwehki pihl tohto.

6 Kedekedeo se ahpw kauada imwat impwal akan ni keilen oaroahro; oh mehndahte aht lokolok laud nan kahpwal akan oh kasongosong kan, iei, me tohto me se sohte kak ntingihdi, ahpw se ahneki peren laud ni ahnsou me se lelledo ni oaroahro; oh se kahdanihkihla wasao Sahpwen Rahk, pwehki e diren wahn sahpw.

7 Kedekedeo mwurin ngehi, Nihpai, ei mihmihkiher nan Sahpwen Rahk erein rahn tohto, I rong kepitien Kauno eh peidohng ie, mahsanih: Pwourda, oh kohdahla pohn nahnao. Oh ni ahnsouohte I pwourda oh kohdahla pohn nahnao, oh lukuweriong Kauno.

8 Kedekedeo Kauno eri mahsanihong ie, ketihtihki: Ke pahn wiahda sohp pwoat, ni wiepe me I pahn kasalehienguhk, pwe I en kak wahla noumw aramas akan kotehla sehd wet.

9 Oh ngehi eri patohwan: Maing Kaun, ia wasa me I pahn kohla ie pwe I en kak diar takai me mete me I pahn inimada lao peipeseng, pwe I en kak wiahda dipwisou kan me pahn doadoahkohng wiahda sohp me komw mahsanihongieo?

10 Kedekedeo Kauno mahsanihongie wasa me I pahn kohla ie pwe I en kak diar takai me mete, pwe I en kak wiahkihda dipwisoun doadoahk kan.

11 Kedekedeo ngehi, Nihpai, ahpw wiahda mehn pepeuk me I pahn peuk ki kisinieio, [mehn pepeuko wiawikihda] kilin mahn; oh mwurin ei wiahda mehn pepeuko, pwe I en kak peungki kisinieio, I ale takai riau oh idingpene pwe I en kak saunda kisiniei.

12 Pwe Kauno sohte kupwurki sen kalapw saunda kisiniei, ni aht wie seiseiloak nan sapwtehno; e ketin mahsanih: I pahn wiahieng kenemwail mwenge kan en memla, pwe kumwail en dehr kukih;

13 Oh ngehi me pahn wia kamarainpamwail nan sapwtehno; oh I pahn kaunopada ahlo mwohmwail, ma kumwail pahn kapwaiada ei kosonned akan; eri, ni amwail pahn kapwaiada ei kosonned akan [I] pahn kahluwaikumwaillahng nan sahpw en inouo; oh kumwail pahn ese me ngehi me kahluwaikumwail.

14 Eri, Kauno pil mahsanih: Mwurin amwail pahn lella nan sahpw en inouo, kumwail pahn ese me ngehi, Kauno, iei Koht; oh me ngehi, Kauno, me kapitkumwailla sang kamwomwala; ei, I waikumwaildo sang sahpw en Serusalem.

15 Eri, ngehi, Nihpai, ahpw nantihong kapwaiada sapwellimen Kauno kosonned akan, oh I ahpw koangoangehki riei ohl akan en mehlel oh loaloapwoat.

16 Kedekedeo I ahpw wiahda dipwisoun doadoahk kan sang ni takai me mete me I inimada lao peipeseng.

17 Oh ni ahnsou me riei ohl akan kilangada me I pahn wiahda sohp pwoat, irail tepda kaulimeie oh nda: Riatail pwutako pweipwei, pwe e lemehieng me e kak wiahda sohp; ei, oh e pil lemehieng me e kak kotehla lapalahn madau kat.

18 Oh riei ohl akan eri kaulimahkinie, oh sohte men iang wia doadoahk, pwe irail sohte kamehlele me I kak wiahda sohp pwoat; oh irail pil sohte kamehlele me Kauno me ketin mahsanihong ie dahme I pahn wia.

19 Kedekedeo, ngehi, Nihpai, pahtoukihla mehlel pwehki keptaikai en mohngiongarail kan; oh met ahnsou me irail kilangada ei tepda pahtou irail perenda nan mohngiongarail kan, lao irail kouruhrkinie oh ndinda: Se ese me ke sohte kak wiahda sohp pwoat, pwe se eseier me ahmw madamadau sohte itar; eri, ke sohte kak wiahda soahngen doadoahk laud duwehte men.

20 Oh ke duwehte atail pahpao, me mihla pan madamadau likamw en ah mohngiongo; mehlel, e kahluwaikitail sang nan sahpw en Serusalem, oh kitail kokohseli mwahl nan sapwtehn erein sounpar tohto; oh atail pwoud kan wiahier doadoahk laud, ni ar liseiandahr; oh irail naitikihdi seri nan sapwtehno oh lokolongki soahng koaros, ihte re sohte mehla; oh e pahn mwahute ma re mehla mwohn arail kohkohlahsang Serusalem oh wie lokolongki kahpwal pwukat.

21 Kilang, erein sounpar tohto kitail wie lokolok nan sapwtehn erein ahnsouo kitail kak wie nsensenamwahuki atail dipwisou kan oh sapwatail sahpwo; ei, oh mwein kitail pahn pereperen.

22 Oh kitail ese me aramas akan me mihmi nan sahpw en Serusalem wia aramas pwung kei; pwe irail kin kapwaiada sapwellimen Kauno koasoandi kan oh kopwung kan, oh sapwellime kosonned akan koaros, nin duwen kosonned en Moses; eri, kitail ese me irail wia aramas pwung kei; oh atail pahpao kadeik irail, oh kahluwaikitailsang pwehki atail kin rong eh koasoai kan; mehlel, oh riatail pwutako pil duwehte ih. Oh ih mwomwen koasoai me riei pwutak kan kaukaulimkihong kiht.

23 Kedekedeo ngehi, Nihpai, ahpw koasoaieng irail oh nda: Kumwail kamehlele me atail pahpa kahlap oko, me wia seri en Israel akan, kak pitisang mehn Isip kan ma irail sohte rong mahsen en Kauno?

24 Mehlel, kumwail medemedewe me irail kak pakahrlahsang arail wia lidu ma Kauno sohte mahsanihong Moses en kahluwairail sang arail wia lidu?

25 Met kumwail ese me seri en Israel wia lidu; oh kumwail ese me irail kin wiewia doadoahk laud, me uhdahn kansensuwed mehlel; eri, kumwail ese me e wia mehkot mwahu ong irail, me irail en kasaledeksang mour en kalidu.

26 Met kumwail ese me Kauno kehkehlikieng Moses pwe en wia doadoahk kesempwal wo; oh kumwail ese me sang ni sapwellime mahseno Sehd Weitahtao pwalpeseng, oh irail eri kotehla, keid pohn ngalangal.

27 Ahpw kumwail ese me mehn Isip ko, me wia nein Parao sounpei kan ahpw duhla nan Sehd Weitahtao.

28 Oh kumwail pil ese me [Kauno] ketin katungoalehkinirail manna nan sapwtehno.

29 Mehlel, oh kumwail pil ese me Moses, sang ni eh mahsen nin duwen manaman en Koht me mihmi reh, [e] poakih paipo oh pihl ahpw kusieisang loale, pwe seri en Israel kan en kak nimpil.

30 Oh mendahte Kauno arail Koht, arail Sounkomour, eh ketin kahluwairail oh ketiket mwohrail, kahkahluwa irail nirahn oh kamkamarainih irail nihpwong, oh kin ketin wiahiong irail soahng koaros me kesempwal ong aramas en alehdi, irail ahpw keptakaila oh karotongala arail madamadau kan, oh lahlahwe Moses oh Koht mehlel oh ieiaso.

31 Kedekedeo nin duwen sapwellime mahsen e kin ketin kamwomwirailla; oh nin duwen sapwellime mahsen e kin ketin kahluwa irail; oh nin duwen sapwellime mahsen e kin ketin wiahieng irail soahng koaros; oh sohte mehkot kin wiawi ihte sang ni sapwellime mahsen.

32 Oh mwurin arail kotehla pillap en Sordan e ketin kakehlairailda pwe irail en pwakihpeseng tohn sahpwo, ei, pwe irail [tohn sahpwo] en mwerpeseng oh mehla.

33 Oh met, kumwail medemedewe me tohn sahpwet, me mihmi nan sahpw en inouo, me atail pahpa kahlap oko kasareirailao, kumwail leme me irail aramas pwung kei? Kilang, I ndaiong kumwail, Soh.

34 Kumwail wiahki me atail pahpa kahlap oko kesempwalasang irail ma irail aramas pwung kei? I ndaiong kumwail, Soh.

35 Kilang, Kauno kin ketin kesempwaliki aramas koaros; mehmen me pwungkin kenikenla rehn Koht. Ahpw kilang, aramas pwukat soikala mahsen en Koht koaros, oh irail kin wiewia me suwed; oh engieng en Koht mihla pohrail; oh Kauno ahpw keriahla sahpwo ong irail, oh kapaiahkihda atail pahpa kahlap oko sahpwo; mehlel, e ketin keriairaila pwehn kamwomwirailla oh kapaiahkihda atail pahpa kahlap oko irail ensapwenikihla.

36 Kilang, Kauno ketin kapikada sampah pwe aramas en kousoanlaie; oh e ketin kapikada sapwellime seri kan pwe re en sapwenikihla.

37 Oh e kin ketin apwaliada wehi pwung, oh kawehla wehi suwed akan.

38 Oh e kin ketin kahluwahla me pwung kan nan sahpw en inou kan, oh kamwomwala me suwed kan, oh keriahla sahpw akan ong irail.

39 E kin ketin kakaun nanleng wasa ileilehie, pwehki iei wasa me mwoahle kin mih ie, oh sampah iei utupen aluweluwe kan.

40 Oh e ketin poakohng irail akan me men wiahki ih arail Koht. Kilang, e ketin poakohng atail pahpa kahlap oko, oh e ketin inoukihong irail, iei, Eipraam, Aisek, oh Seikop; oh kin ketin tamataman inou kan me e ketin wiadahr; eri, e ahpw ketin wairailsang nan Sahpw en Isip.

41 Oh e ahpw ketin kainenehkinirailla sapwellime sokono nan sapwtehno; pwe irail kakeptaikaila kapehdarail kan, duwehte dahme kumwail wiahier; oh Kauno kaineneirailla pwehki arail wiewia suwed kan. E ketin kadarala sinek pwoisin kei rehrail; oh mwurin sinek ko eh keirailpenehr e ahpw ketin kaunopada wiepen arail pahn kak mwahula; oh doadoahk me irail anahne wia iei kilenglahng; oh pwehki koasoandio eh nohn mengei, de pwehki wiepeo eh mengei, tohto irail ahpw mehla.

42 Oh irail kin kakeptakaila mohngiongirail kan ekei pak, oh irail kin lahlahwe Moses, oh pil lahlahwe Koht; ahpw, kumwail ese me sapwellime manamano me ketin kahluwairaillahng nan sahpw en inouo.

43 Oh met, mwurin mepwukat koaros, ahnsouo eri lelledo me irail suwedla, iei, suwedla mehlel; oh I sehse ahpw ahnsou wet irail nektehn kamwomwomwala; pwe I ese me rahno uhdahn pahn lelledo me irail pahn kamwomwomwala, ihte ekei me pahn kalipilipala oh selidi.

44 Eri, Kauno poahngokihong ei pahpao me e pahn kohkohla nan sapwtehn; oh mehn Suhs akan pil song kemehla ih; ei, oh kumwail pil song kemehla ih; eri, nan kapehdemwail kan kumwail wia soun kamaramas kei oh kumwail duwehte irail.

45 Kumwa kin mwadang wia me suwed ahpw pwand en tamanda Kauno amwa Koht. Kumwa kilangehr tohnleng men, oh e mahsenieng kumwa; ei, mie ahnsou me kumwa rongehr kepitien [Kauno]; oh e mahsanihong kumwa ni ngihl tikitik, ahpw kumwa sohte nsenohki, kahrehda kumwa sohte kak kehn sapwellime mahsen akan; eri, e ketin mahsaniong kumwa duwehte ngihl en nansapwe, me kahredahr sampah eh rerrer oh mwomwen me e pahn pwalpeseng.

46 Oh kumwail ese me sang ni manaman en sapwellime mahseno e kak kahrehda imwilahn sampah; mehlel, oh kumwail ese me sang sapwellime mahsen e kak ketin wiahieng wasa sapahrek kan en pahrekla, oh wasa pahrek kan en ohla. Eri, dahme kahrehda, kumwa kakeptakaila nan kapehdamwa kan?

47 Kilang, palingeniet okihlahr ei lokolok pwehki kumwa, oh mohngiongiet medengki; I periki kumwa de lekidekla kohkohlahte. Kilang, I direkihla Ngehn en Koht, kahrehda paliwereiet sohla angih.

48 Oh met mwurin ei ndaiong irail soangen koasoai pwukat irail ahpw lingeringerda pahi, oh men keseiehlahng nan wasa loal nan kepin madau; oh ahnsou me irail kohdohng koliehdi I koasoai ong irail, nda: Ni mwaren Koht Wasa Lapalap, I ndaiong kumwail en dehr doahkeie, pwe I direkihla manaman en Koht, me kipehdi paliwereiet; oh mehmen me pahn doahkeie e pahn mengila duwehte ahlek pwoat memengilahr; oh e pahn mwamwahlla mwohn manaman en Koht, pwe Koht pahn ketin kaloke.

49 Kedekedeo ngehi, Nihpai, ndaiong irail me irail re en dehr kaulime arail pahpao; oh re en dehr peikasaliki ar pahn sewese ie, pwe Koht me poahngoakihiengie I en wiahda sohp pwoat.

50 Oh I ndaiong irail: Ma Koht mahsanihongie I en wia soahng koaros, I kak wia. Ma e pahn mahsanihongie I en ndaiong pihlet, en wiepwella, e pahn wiepwella; oh ma I pahn nda, e pahn wiawi.

51 Oh met, ma Kauno sapwellimaniki soangen manamano, oh ketin wiahiongehr aramas akan manaman kopwuriamwei tohto, ia mwomwen e sohte pahn kak ketin kaweid ie, pwe I en kak wiahda sohp?

52 Kedekedeo ngehi, Nihpai, ahpw koasoaiahieng riei ohl oko soahng toht, kahrehda arail pwonla oh sohla kak akamaiong ie; irail pil sohte kak koliehdi de doahkehkinie sendinpehrail kan, erein rahn ekei. Irail sohte men wia pwe irail en dehr mengidi pwehki manaman kehlail en Ngehn en Koht; oh e ketin ieiang ie.

53 Kedekedeo Kauno eri mahsanihongie: Kapahwei pehmwen rehn riomw ohl akan, a irail sohte pahn mengidi, ahpw I pahn kamedekihrahla, Kauno mahsanih, oh met I pahn wia, pwe irail en ese me ngehi iei Kauno ara Koht.

54 Kedekedeo ngehi eri kapahla pehiet rehn riei ohl oko oh ira sohte mengidi mwohi; ahpw Kauno ketin itik ira, nin duwen sapwellime mahsen me e mahsaniher.

55 Oh met, ira nda: Se esehier me Kauno ketin ieianguhk, pwe se ese me manaman en Kauno me itingkitada. Oh ira pwupwidi mwohi, oh pahn pwongih ie, ahpw I sohte mweidehng ira oh I ndaiong ira: Ngehi riamwail pwutak, iei, riamwail me keieu tikitik; eri, pwongih Kauno amwa Koht, oh kahkahki semomw oh inomw, pwe kumwa en kak mour werei pohn sahpw me Kauno amwa Koht pahn ketikihong kumwa.