1 Oh met: Kumwail peneinei en Israel kan, rong ie, kumwail koaruhsie me lekideklahr oh pakasaralahr pwehki wiewia suwed en kaun kan en nei aramas akan; iei, kumwail koaruhsie me lekideklahr, me kamweremwerpesengehr wasateikan, me wia nei aramas, kumwail peneinei en Israel. Kumwail me kin koukousoan ni deke kan oh wasa doh kan, kumwail rong ie; Kauno ketin piliedahr mwohn ei ipwidi; E ketin malipehkinie edeiet ni ei nohno eh liseiankinie.

2 Oh e ketin wiahda eweiet duwehla kedilahs keng pwoat; nan mwetehn ni limeo e ketin nekidiehla, oh wiakiniehla arep kaselel pwoat; nan sapwellime deupen arep e ketin nekidiehla;

3 Oh mahsanihong ie: Israel, kowe me nei ladu me I pahn linganikihda.

4 I ahpw patohwan, I wie doadoahkehr ni soh katepe, I wia uwen ei kak oh sohte lipwe oh sohte katepe; mehlel, ei kadeik pahn mih rehn Kauno, oh ei doadoahk rehn Koht.

5 O met, Kauno—me ketin piliehda nan kapehd en inei me I en wiahla sapwellime ladu, pwe I en kapwurehdo Seikop reh—mehndahte Israel sohte pahn pwurpene, ahpw I pahn kelinganla mwohn silangin Kauno, oh ei Koht pahn ketin wia kakehlepei.

6 Oh e ketin mahsanih: Mehkot mengei ehu me kowe nei ladu me pahn kasapwilada kadaudok en Seikop akan, oh kapwurehdo Mehn Israel kan me luwehdi. I pil pahn wiahkinuhkala kamarainpen Mehn Liki kan, pwe ke en kak wia komourpei wasa koaros ni sampah.

7 Kauno, Soundoar en Israel, me Sarawio, me aramas kin mwamwahliki, me wehi kan kin udahn kailongki, ketin mahsanih ong ladu en kaun akan: Nahnmwarki kan pahn mahsanih oh ketida, sohpeidi kan pahn pil pwongihuk, pwehki Kauno me ketin loaloapwoat.

8 Eri Kauno ketin mahsanih: Kumwail deke kan en nansehd, I kin rong kumwail oh ni rahn en komour eh pahn leledo I pahn seweseikumwail; oh I pahn doareikumwailla, oh kiheng kumwail nei ladu en wiahda inou ehu ong aramas akan, pwe kumwail en pwurehng soandi nan sapwamwail me ahnsouet olahr;

9 Pwe ke en kak patohwanohng irail me sensel kan: Kumwail saledekla; irail kan me mihmi nan rotorot: Kumwail kohdo nan marain. Irail pahn mwengemwengeseli, oh arail mohs akan pahn mihla wasa kan me ileile.

10 Re sohte pahn duhpekla de men nimpilda, karakar en ketipin pil sohte pahn kamadakirailla; pwe ih me kin ketin poakohngirail pahn ketin kahluwairaillahng ni pwarer en pihl kan.

11 Oh I pahn wiahkihla ei nahna kan koaruhsie ahl lap pwoat, oh elei kan pahn lapalapala.

12 Kilang, kumwail peneinei en Israel kan, mepwukat pahn kohdo sang wasa doh kan; oh kilang, re pahn kohdo sang paliepeng oh palikapi; oh re pahn kohdo sang nan sahpw en Sinim.

13 Kumwail tohn nanleng kan, kumwail koul; oh sampah, kumwail perenda; pwe patenehn irail akan me mih palimese pahn pwurehng pwurodo; oh nahna kan, kumwail tepda kokoul; pwe re sohlahr pahn kalokolok; pwe Kauno pahn ketin koaloalamwahwiala sapwellime aramas akan, oh pahn ketin kupwurkalahngan ong sapwellime kan me wie lokolok.

14 Ahpw, kilang, Saion koasoaiahier: Kauno ketin keseielahr, oh ei Kauno ketin likidmelieielahr—ahpw Kauno pahn ketin kasalehda me e sohte ketin wia met.

15 Pwe mie lih emen me kak manokehla nah seri pwelel me kin dihdi, ni e sohte pahn poakpoake wahn adio? Ei, lih akan kak manokehla, ahpw I sohte pahn manokeikumwaila, kumwail peneinei en Israel kan.

16 Kilang, I ntingihkumwaildier nan pei kat; amwail kehl akan wie mihmihte mwohi ahnsou koaros.

17 Noumwail seri kan pahn powehdi amwail imwintihti kan; oh irail akan me kamwomwkumwaillahr pahn pokousla.

18 Sarada oh kilang dahme wiewiawi; irail koaruhsie pokonpenehr, oh irail pahn kohdo rehmw. Oh nin duwen Ngehi, Kauno ketin mahsanih, ke pahn kapwatkihda likou kaselel, oh katengehdi duwehte lih kamwohd emen eh kin kapwatikihda.

19 Pwe sapwomw et olahr oh tehndahr, oh sapwemw ohlao, pahn sohla itar ong kumwail koaros en kousoanla ie; oh irail akan me kamwomwkumwaillahr pahn lekidekila dohlahsang kumwail.

20 Mwurin tepin noumw seri eh mehla, seri kan me ke pahn nainikihda, pahn pwurehng ndahienguhk: Sahpwet nohn tikitik ong ie; kitail anahne sahpw laud me kitail en kousoanie.

21 Kowe eri pahn mengimengiloalki: Ihs me kaipwiedi ong ie seri pwukat, pwe I solahr neitik, oh I depwenlahr, sella liki, oh sansaruwaruseli? Oh ihs me apwaliada seri pwukat? Kilang, I kin wie kalakalapwukte; irail pwukat, ia wasa re kohsangie?

22 Kauno Koht eri mahsanih: Kilang, I pahn kapahla limeiet rehn Mehn Liki kan, oh ketikihong irail ei koasoandi; oh irail pahn wahdo noumw pwutak kan, oh noumw serepein kan pahn mi pohn pwopwerail ko.

23 Oh nanmwarki kan pahn apwalihiuk duwehte pahpa men, oh lih nanmwarki kan pahn katungoaleiuk duwehte nohno men; irail pahn kin poaridi mwohmw, oh kamwakelehsang pwehl ni paten nehmw kan; oh ke ahpw pahn dehdehkihla me ngehi me Kauno; pwe irail akan me kin koapwoaroapwoarkinie, sohte pahn sarohdi.

24 Pwe mie me kak adiasang aramas kehlail men dipwisou ehu me e koledi, de kapitala kalapwuhs men me kolkoldi pahn kosonned?

25 Ahpw Kauno ketin mahsanih, me kalapwuhs kan pahn pehdsang rehn me kehlail kan, oh dipwisou me alahldi pahn kapwurupwursang rehn me lemei meno; pwe I pahn uhwong oh pelianda irail akan me pahn uhwong uhk, oh I pahn kapitala noumw seri kan.

26 Oh irail akan me kin kalokeikumwail I pahn kamwengehkin irail pein udukarail; irail pahn sakaukihla pein ntahrail duwehte ahr pahn nim wain mem; oh aramas koaros eri ahpw pahn dehdehkihla me iei ngehi Kauno, amwail Sounkomour oh amwail Soundoar, me ketin wia Wasa Lapalap en Seikop.