1 Kumwail rong met, kadaudok en Seikop, me kin adaniki Israel, oh me kohsang nan pihl en Suda, de sang nan pihl en pepdais, me kahukihla ni mwaren Kauno, oh kosekose Koht en Israel, ahpw irail sohte kin kahukihla mehlel de pwung.

2 Ahpw, irail kin koasoaia me irail iei towe mehlel en kahnimw sarawio, ahpw irail sohte kin koapworopworki Koht en Israel, me iei Kauno Wasa Lapalap; me mware iei Kauno Wasa Lapalap.

3 Kilang, I kalohkidahr dahme pahn wiawi sangete ni tapio; oh e kepwilipwilwei sang nan douwaseiet, oh I kasaleiraildahr. I mwadangete kasalehda.

4 Oh I wia met pwehki I ese me ke keptakai, oh tepinweremwen kekeluwak rasehng mete, oh tomwemwen rasehng pirahs.

5 Oh I kadehdedahr sang nin tapio dahme pahn lelohnguhk; mwohn eh leledo I kasalehienguhkehr; oh I kasalehienguhk pwe ke en dehr koasoaia—Ei dikadik en eni me wia, oh ei sansal likamw, oh dikadik eni mete me elehda mepwukat eh pweida.

6 Ke kilangehr oh rongehr mepwukat koaruhsie; oh ke sohte pahn dehdehki? Oh me I kasalehienguhkehr soahng kapw akan me pahn wiawi, de pil soahng rir kan, oh ke sohte ese duwen soahng pwukat.

7 Re ahpwtehn sansalada ahnsouet, oh kaidehn e sangete ni tapio, de pil mwohn rahno meke saik rong duwen met, pwe ke en dehr nda—Kilang I esehier duwen mepwukat.

8 Ei, oh ke sohte rong duwen met; ei, ke, sohte wehwehki; ei, sang ahnsouo sohte rohng ehu lelohnguhk; pwe I ese me sohte me kak likihiuk, oh ke wia aramas kahngohdi men sangete ni omw ipwidio.

9 Ahpw, pwe [aramas] en kepinga mwarei kahrehda ei kolokol ei engieng, oh I pahn kolokol oh sohte kaweiukala.

10 Pwe, kilang, I kamwakeleiukadahr, I piluhkadahr nan kisiniei en lokolok.

11 Ong pein kamwahupei, iei, ong pein kamwahupei I pahn wia met, pwe I sohte pahn mweidohng mwarei en sohla wahuwi, oh I sohte pahn mweidohng emen en iang ahneki lingan me ei kelehpw.

12 Rong ie, kowe Seikop, oh Israel me I malipedohr, pwe ngehi iei ih; Ngehi me tapi, oh ngehi me pil imwi.

13 Nin limei kat me pil wiadahr poahsoan en sampah, oh palimaun en pehi kat me sohngedi pahnlahng. I malipe sampah oh lahng oh ira eri patpene uhda.

14 Kumwail koaruhsie, pokonpene, oh rong; ihs nanpwungarail me kalohkihengirailehr mepwukat? Kauno ketin poakehng ih; ei, oh e pahn ketin kapwaiada sapwellime mahsen me e ketin kasalehdahr sang rehrail; oh e pahn ketin wiahiong Papilon dahme e ketin kupwurki, oh e pahn ketin kaloke mehn Kaldea kan.

15 Kauno pil mahsanih; Ngehi Kauno, ei, I mahsanihier; ei, I malipehdo pwe en kalohk, I kahluhwa, oh e pein dipwirawihda en pweida.

16 Keido limwahi; I sohte kin mahsen rir; sangete nin tapio, ngehi me mahsen sangete ahnsou me e kalohkdao; oh Kauno Koht, oh sapwellime Ngehno, me ketin kadariehdo.

17 Oh Kauno, amwail Soundoar, me Sarawien Israel mahsanih; Kauno amwail Koht me ketin padahkihonguhk ke en keirda, me ketin kaweiduhk nan ahl me ke pahn keidie, iei ngehi me wiahier met.

18 Ma ke peikieng ei kosonned akan—ahmw popohl pahn rasehng pillap pwoat, oh ahmwpwung pahn rasehng ilok kan en nan madau.

19 Kadaudokomw kan pahn tohto rasehng pihk [en ni oaroahr]; noumw seri kan rasehng rahr [en ni oaroahr]; edeo sohte pahn manoknokla de mwomwla mwohi.

20 Kumwail kohkohweisang nan Papilon, kumwail tangasang mehn Kaldea kan, kumwail kalohki ni amwail kokoulseli nin sampah; kumwail ndinda: Kauno ketin doarehlahr sapwellime ladu Seikop.

21 Oh irail sohte men nimpilda; e ketin kahluwa irail nan sapwtehno; e ketin kupwurehda pihl en kusieisang nan paip ehu ong irail; e pil ketin pwalangpeseng paipo oh pihl kusieisang loale.

22 Oh mehndahte eh ketin wiahdahr mepwukat koaros, oh pil soahng kapwuriamwei teikan, Kauno mahsanih, me suwed akan sohte pahn ahneki popohl.