1 Kedekedeo ira ahpw kaudokiong Kauno, oh patehngie wenla mwowe; oh kiht ahpw koadoahke tuhke oh wiahda doadoahk me kapwuriamwei kaselel. Oh ekei ahnsou Kauno ketin kasalehiongie duwen ei pahn doadoahngki tuhke ko oh wiahkihda sohpo.

2 Met ngehi, Nihpai, sohte doadoahngki tuhke ko ni wiepe me semen kan wehwehki, de ni wiepe me aramas kin wiahda sohp; ahpw I wiahda ni wiepe me Kauno ketin kasalehiongie; eri, e sohte wiawi ni wiepe me aramas kin doadoahngki.

3 Oh ngehi, Nihpai, kin kalapw kohla pohn nahna, oh I kin kalapw kapakap ong Kauno; Kauno eri ketin kasalehiongie soahng kapwuriamwei tohto.

4 Kedekedeo mwurin ei kanekelahr sohpo, nin duwen mahsen en Kauno, riei pwutak ko eri kilangada me e mwahu, oh me wiepen doadoahko me kaselel mehlel; eri, irail pil pwurehng karakarahkala mwohn Kauno.

5 Kedekedeo kepitien Kauno ahpw peido rehn ei pahpao, me se en pwourda oh kohdihla nan sohpo.

6 Kedekedeo mandahn rahno, mwurin aht kaunopadahr soahng koaros, wahn tuhke oh uduk tohto sang nan sapwtehno, oh lapalahn sukehn loangalap, oh soahngen mwenge kan me Kauno ketin mahsanihong kiht, se ahpw kohdihla nan sohpo, iangahki aht wisik kan oh werentuhke kan, oh soahng koaros me se wahda, nin duwen ahn emen emen sounpar; eri, se ahpw kohdihla nan sohpo, iangahki aht pwoud kan oh nait seri kan.

7 Oh met, ei pahpao ahpw nainikihdahr pwutak riemen nan sapwtehno; me laudo adaniki Seikop oh me tikitiko andaniki Sosep.

8 Kedekedeo mwurin aht pwonte kohdihla nan sohpo, oh wahdahr dipwisou kan oh soahng kan me Kauno mahsanih ong kiht, se ahpw tepiada seiloak nan madau oh kisiniengo ahpw ipirkihtalahng sahpw en inouo.

9 Oh mwurin kisiniengo eh ipirkihtalahr erein rahn tohto, kilang, riei ko oh nein Ismael pwutak ko oh pil arail pwoud ko ahpw tepda pereperen mwahl, kahrehda ahr tepda kahlek, oh koul, oh lokaia lemei, ei, lao irail manokehla soangen manaman dah me kahkahluwa irail; iei, irail ahpw lemeila douluhl.

10 Oh ngehi, Nihpai, ahpw tepida masepwehkada mehlel pwe Kauno de ketin engiengda paht, oh kalokehkinkiht aht sapwung kan, oh e pahn kahrehiong aht kihrla nan kepin madau; eri, ngehi, Nihpai, tepda koasoai maledek ong irail; ahpw kilang irail lingeringerda pahi oh nda: Se sohte pahn mweidohng riat pwutak tikitiko en kaunkitada.

11 Kedekedeo Leimen oh Lemuel ahpw koliehdi oh pirehkiniehdi sahl kei, oh ira sarlemei ong ie; ahpw, ahpw Kauno ketin mweidehng dahme re wiewia pwe en ketin kasalehda sapwellime manaman, nin duwen sapwellime mahsen me e ketin mahsaniher me pid me suwed akan.

12 Kedekedeo mwurin ara salihiehdi ngehi eri solahr kak mwekid, kamposo, me Kauno ketin kaunopadahro, sohla doadoahk.

13 Eri, re sehsehla wasa re pahn ilihlihla ie sohpo, kahrehda melimel kehlail ehu ahpw wiawi, ei, kisinieng kehlail oh keper ehu, oh se peila mwuri nan erein rahn siluh; oh irail tepda masepwehkada kowahlap pwe re de mwowihdi oh duhla nan sehdo; ahpw ira sohte sapwadiehda.

14 Oh kapahieu en rahno, me se wie peipeila mwuri, melimelo ahpw kehlailla mehlel.

15 Kedekedeo se ahpw kerenieng kihrdihla nan kepin madauo. Oh mwurin aht wie peipeilahr mwuri nan erein rahn pahieu, riei ohloko tepida kilang me engieng en Koht mih pohra, oh ira uhdahn pahn mehla ma ira sohte pahn koluhkihla ara wiewia suwed kan; eri, ira kohdo rehi, oh lapwadadahsang sahl oko ni kumwut en pehi kat, oh kilang pehi kat inenen mpwosada mehlel; oh tikelen nehi kat pil mpwosada mehlel, oh e inenen kamedek.

16 Ahpw, I kilenglahng ei Koht, oh I kepinga ih rahno pwon; oh I sohte kaulimahkihong Kauno ei kahpwal akan.

17 Met ei pahpao, Lihai, ndahieng ira soahng tohto, oh pil iangahki nein Ismael pwutak ko; ahpw, kilang, ira kamasakada koaros me pahn koasoaiahiong ira duwen ngehi; oh ei pahpa oh nohno pil mahlahr, oh lokolongkiher pahtou laud pwehki neira seri kan, ira luwetikihla, ei, lao ira wenohniki pohn dewera peht oko.

18 Pwehki ara nsensuwed oh pahtou laud, oh wiewia suwed en riei pwutak ko, kahredahr ara kerenieng mehla oh tuhong ara Kohto; ei, ira moangepwetalahr oh nektehn mehla; ei, kereniong ira en nekinekidi nansedo pwehki ara pahtou.

19 Oh pil Seikop oh Sosep, pwehki ara wie pwulopwulte, oh ira anahne epwelpen ara nohno, ira pil pahtoula pwehki kahpwal akan en ara nohno; oh ei pwoud pil wie sengiseng oh kapakap, oh pil nei seri ko, irail sohte kak kameleileidi mohngiong en riei ohl oko pwe ira en sapwadiehla.

20 Oh sohte mehkot ahpw ihte manaman en Koht kelehpw me kameleileidi ara mohngiong kan, sang ni eh ketin kamasangkinirahda ara pahn kamwomwala; eri, ahnsou me ira kilangada me ira kereniengehr mwowihdi wasa loal nan madauo ira koluhkihla soahng suwed me ira wiadahro, ira eri sapwadiehda.

21 Kedekedeo mwurin ara sapwadiehdahro, kilang, I ale kompaso, oh e ahpw doadoahk nin duwen dahme I men en wia. Kedekedeo I ahpw kapakap ong Kauno; oh mwurin ei kapakapiero kisiniengo ahpw tokedi, oh melimelo meleileidi, oh lapalahn eh mwelehdi.

22 Kedekedeo ngehi, Nihpai, ahpw ilihlihier sohpo, se ahpw pwurehng sereklahng ni sahpw en inouo.

23 Kedekedeo mwurin aht wie serekiher erein rahn tohto, se ahpw lella ni sahpw en inouo; oh se keradahla nan sahpwo, oh kauwada imwat impwal akan; oh kiht eri kahdanekihla wasao sahpw en inou.

24 Kedekedeo se ahpw tepda dei pwehl, oh padokedi werentuhke kan; mehlel, se padokedi werentuhke koaros me se wahdo sang nan sahpw en Serusalem. Kedekedeo re ahpw kekeirda mehlel; eri, se ahpw kapaikihda reken wahnsahpw.

25 Kedekedeo ni aht kohlongala nan sapwtehno nan sahpw en inouo, se ahpw diarada me mie soangsoangen mahn kei nanwel en sahpwo, mie kow ohl oh lih, oh ahs oh oahs, oh kuht oh kuht lawalo, oh soangsoangen mahn lawalo koaros, me aramas kak doadoahngki. Oh se ahpw diarada soangsoangen mete kan, kohl, oh silper, oh koaper.