1 Kedekedeo Kauno eri mahsanihongie, eri I ahpw wiahda pileit mete pwe I en kak ntingihdi pohrail poadepen nei aramas akan. Oh I ntingihdi duwen poadoapoad en ei pahpao pohn pileit akan me I wiahda, oh I pil ntingihdi pohwe duwen aht seiseiloakseli nan sapwtehno, oh kokohp kan en ei pahpao; oh pil pein ei kokohp tohto I pil ntingihdi pohwe.

2 Oh ahnsou me I wiahda pileit ko I sehse me Kauno pahn mahsanihongie I en wiahda pileit pwukat; eri, poadoapoad en ei pahpao, oh pil irekidien peneinei en ah pahpa kahlap oko, oh pali laud en aht wiewia kan nan sapwtehno ntingdi pohn keieun pileit ko me I koasoaiadahr; eri, soahng ko me pwaradahr mwohn ei wiahda pileit pwukat iei, ni mehlel, ntingdier pohn keieun pileit ko.

3 Oh mwurin ei wiadahr pileit pwukat sang ni koasoandi, ngehi, Nihpai, alehdi kehkehlik ehu me doadoahk sarawi oh kokohp akan, me keieu kesempwal oh sansal, pahn anahne ntingdi pohn pileit pwukat; oh soahng kan me pahn ntingdi anahne nekinekla pwe re en wia mehn kaweid nei aramas akan, me uhdahn pahn sapwenikihla sahpwo, oh pil ong kahrepe kesempwal teikan, me Kauno kelehpw ketin mwahngi.

4 Eri, ngehi, Nihpai, ahpw ntingihdi pohn pileit teiko, me wia koasoaiepen, de pali laud en koasoaiepen mahwin kan, pingiping kan oh mwomwlahn nei aramas akan. Oh met I wiadahr, oh padahkihong nei aramas akan dahme irail uhdahn pahn wia mwurin ei pahn sohla mie rehrail; oh me pileit pwukat pahn kohieng ehu ehu dih en mwuhr akan, de sang rehn emen soukohp kolahng rehn emen, lao Kauno ketikihong irail ekei koasoandi tohrohr.

5 Oh koasoaipen ei wiahda pileit pwukat pahn ntingdi mwuhr; oh met, kilang, I pahn doulahng nan dahme I koasoaiahier; oh met I pahn ntingihda pwe soahng kan me sarawi en kak nekinekla ong kamarainpen nei aramas akan.

6 Ahpw, soahng sarawi kei te me I ntihngihdi pohn pileit kan. Oh met, ma I sapwungala, e pil duwehte irail akan me kin sapwungala mahs; I sohte peikidiki ei sapwung kan pwehki aramas teiko, ahpw pwehki pein ei soakoahiek, nin duwen aramas, iei me I peikidiki.

7 Pwe soahng kan me ekei aramas kin kesempwaliki, ong paliwar oh palingehn, ekei sohte kin katapaniki oh re kin tiakpeseng. Mehlel, me duwehte aramas akan arail tiakidi Koht en Israel; I nda, tiakidi me wehwehki—re sohte katapaniki, oh sohte men rong sapwellime kaweid akan.

8 Oh kilang e pahn ketido, nin duwen mahsen en tohnlengo, sounpar wenepwiki mwurin ei pahpao eh mweselsang Serusalem.

9 Oh, E pahn wiemwahlla rehn tohn sampah pwehki arail wiewia suwed kan; eri irail pahn kaloke ih, oh e pahn ketin mweidada; oh irail pahn woakih ih, oh e pahn ketin mweidada. Mehlel, irail pahn kandipih ih, oh e pahn ketin mweidada, pwehki sapwellime limpoak kalahngan oh sapwellime kanengamah ong aramas akan.

10 Oh Koht, en atail pahpa kahlap oko, me kahluwairail sang Isip, sang nan kalidu, oh pil ketin kamakamaur irail nan sapwtehno, iei, Koht en Eipraam, oh Aisek, oh Koht en Seikop, me ketin mweidala pein ih, nin duwen me tohnlengo mahsanih, ni eh ketin wia aramas emen, nan pehn aramas suwed akan, nin duwen mahsen en Sihnok, oh pahn ketin kalohpwuhla, nin duwen mahsen en Nehum, oh pahn ketin nekinekidi nan sousou, nin duwen mahsen en Sihnos, me e koasoaia me pid duwen rahn siluh me pahn rotorot, me pahn wia kilel en sapwellime pwoulao ong irail akan me pahn mih pohn deke kan en nansed, ahpw mehlel ong irail akan me wia kisehn peneinei en Israel.

11 Pwe iei me soukohpo mahsanih: Kauno Koht uhdahn pahn ketila rehn peneinei en Israel koaros ni rahno, ekei irail pahn rong kepitie, pwehki arail mour pwung, ong komourparail oh arail peren laud, oh ekei pahn rong posopos en nahnsapwe oh kilang lioal en sapwellime manaman, sang ni melimel, kisiniei, oh ediniei, oh rotorot mosul, oh pwalpeseng en sampah, oh sang nahna kan me pahn pwekpwekdahla.

12 Oh soukohp Sinos mahsanih me mepwukat koaruhsie uhdahn pahn wiawi. Oh paip akan en sampah pahn pwalpeseng; oh pwehki mwahiei en sampah, nahnmwarki tohto pohn deke kan en nansehd pahn direkihla Ngehn en Koht, kahrehda re ketin werikihda: Koht en kepikipiko ketin wie lokolok.

13 Oh soukohpo mahsanih, irail akan me mihmi Serusalem pahn lokolok rehn aramas koaros, pwehki arail kalohpwuala Koht en Israel, oh wekidala mohngiongarail kan, soikala manaman oh kilel kopwuriamwei kan, oh manaman oh lingan en Koht en Israel.

14 Oh soukohpo mahsanih, pwehki arail wekidala mohngiongarail kan, oh kailongki Koht Sarawi en Israel, irail pahn wie saruaruseli, oh mwomwala, oh aramas pahn kepitikinirail oh kapailokeirail, oh wehi koaros pahn kailongkinirail.

15 Ahpw, soukohpo mahsanih, ni ahnsou me rahno pahn lelledo, me irail solahr pahn wekidala mohngiongarail kan sang Koht Sarawi en Israel, e pahn ketin tamanda inou kan me e ketin wiahiongehr arail pahpa kahlap oko.

16 Ei, e pahn ketin tamanda deke kan en nansehd; ei, Kauno mahsanih, e pahn ketikihpene aramas koaros me wia kisehn peneinei en Israel sang ni keimw pahieu en sampah, nin duwen mahsen en soukohp Sihnos.

17 Ei, soukohpo mahsanih, sampah pwon pahn kilang komourlahn Kauno; wehi koaros, keinek koaros, lokaia koaros, oh aramas koaros pahn kapaida.

18 Oh ngehi, Nihpai, ntingihdier mepwukat ong nei aramas akan, pwe I en kak kamantikih irail re en tamataman Kauno arail Soundoar.

19 Eri, I koasoaiongehr peneinei en Israel koaros, ma iei irail pahn alehdi soahng pwukat.

20 Pwe kilang, palingeniet doadoahk laud, me kapwangaiehda kahrehda nan koakonei kat luwetala, pwehki irail akan me mihmi Serusalem; pwe ma sohte kalahngan en Kauno, me kasalehiongie duwen irail, duwehte eh ketin wiahiong soukohp en mahs oko, I pil pahn iang mehla.

21 Oh e ketin kasalehiong soukohp en mahs oko soahng koaros me pid irail; oh e pil ketin kasalehieng soukohp tohto duwen kitail; eri, e kesempwal kitail en ese duwen irail pwehki e ntingdier pohn pirahs pileit ko.

22 Kedekedeo Ngehi, Nihpai, ahpw padahkihong riei pwutak ko mepwukat; kedekedeo ngehi wadek ong ira soahng tohto, me ntingdier pohn pirahs pileit ko, pwe ira en kak ese duwen sapwellimen Kauno doadoahk nan sahpw teikan, rehn aramas en mahs oko.

23 Oh I wadek ong ira soahng tohto me ntingdier nan pwuhk kan en Moses; ahpw I en kak koangoange ira ni unsek ira en kamehlele Kauno ara Soundoar, I wadek ong ira nting kan me Soukohp Aiseia ntingiadahr; pwe I kin karasahiong kitail pwuhk sarawi koaros, pwe en kak wia kamwahupatail oh kamarainpatail.

24 Eri I koasoaieng ira, nda: Kumwail rong mahsen kan en soukohpo, kumwail me wia kisehn peneinei en Israel, ehu rah me tipwasangehr; kumwail rong mahsen kan en soukohpo, me ntingdier ong peneinei en Israel koaruhsieh, oh kumwail momourki, pwe kumwail en kak ahneki koapwoaroapwoar duwehte riamwail ko me kumwail tipwasangehr; pwe ih duwen koasoai me soukohpo ntingihdier.