Introdukshon

E Buki di Mormon ta un volúmen di Skrituranan santu kompará ku e Beibel. E ta un registro di Dios su komunikashon ku e habitantenan antiguo di Amérika i ta kontené e plenitut di e evangelio eterno.

E buki a wòrdu skirbí dor di hopi profeta antiguo pa medio di e spiritu di profesia i revelashon. Nan palabranan, skirbí riba planchanan di oro, a wòrdu sitá i kompilá pa un profeta historiadó yamá Mormon. E registro ta duna un relato di dos gran sivilisashon. Unu a bini for di Herusalèm den 600 pK. i despues a wòrdu separá den dos nashon, konosí komo e nefitanan i e lamanitanan. E otro a bini mas promé ora Señor a konfundí e lenguahenan na e Toren di Babel. E grupo aki ta konosí komo e yareditanan. Despues di míles di aña, tur a wòrdu destruí eksepto e lamanitanan, i nan ta entre e antepasadonan di e indjannan di Amérika.

E suseso mas grandi registrá den e Buki di Mormon ta e ministerio personal di Señor Hesu-Kristu entre e nefitanan djis despues di Su resurekshon. E ta eksponé e doktrinanan di e evangelio, deskribí e plan di salbashon, i bisa hende kiko nan mester hasi pa logra pas den e bida aki i salbashon eterno den e bida benidero.

Despues ku Mormon a kompletá su eskritonan, el a entregá e relato na su yu Moroni, ku a agregá algun palabra di dje mes i a skonde e planchanan den e Seru Kumora. Riba 21 di sèptèmber 1823, e mesun Moroni, na e momentu ei un ser glorifiká i resusitá, a aparesé na e Profeta José Smith i a instruyé konserniente e registro antiguo i a destiná e tradukshon di esaki na e idioma ingles.

Na e debido tempu e planchanan a wòrdu entregá na José Smith, ku a tradusí nan pa medio di e don i poder di Dios. E registro awor ta publiká den hopi idioma komo un testigu nobo i adishonal ku Hesu-Kristu ta e Yu di e Dios bibiente i ku tur ku lo bini na djE i obedesé e lei i ordenansanan di Su evangelio por wòrdu salbá.

Konserniente e registro aki e Profeta José Smith a bisa: “Mi a deklará na e rumannan ku e Buki di Mormon tabata e buki mas korekto ku kualke otro buki riba tera, i e piedra klave di nos religion, i un hende lo hala mas serka di Dios dor di sigui su preseptonan, ku kualke otro buki.”

Ademas di José Smith, Señor a proveé pa diesun otro por wak e planchanan di oro pa nan mes i pa ta testigunan spesial di e bèrdat i divinidat di e Buki di Mormon. Nan testimonionan skirbí ta inkluí den esaki komo “E Testimonio di Tres Testigu” i “E Testimonio di Ocho Testigu.”

Nos ta invitá tur hende tur kaminda pa lesa e Buki di Mormon, pa skrudiñá den nan kurason e mensahe ku e ta kontené, i despues puntra Dios, e Tata Eterno, den e nòmber di Kristu si e buki ta bèrdat. Esnan ku sigui e kaminda aki i puntra ku fe lo optené un testimonio di su bèrdat i divinidat pa medio di e poder di e Spiritu Santu. (Wak Moroni 10:3–5.)

Esnan ku optené e testimonio divino aki di e Spiritu Santu lo yega na sa tambe pa medio di e mesun poder ku Hesu-Kristu ta e Salbador di e mundu, ku José Smith ta Su reveladó i profeta den e delaster dianan aki, i ku E Iglesia di Hesu-Kristu di e Ssantunan di e Delaster Dianan ta Señor su reino un biaha mas establesé riba tera, den preparashon pa e Segundo Binida di e Mesias.