Un Splikashon Breve tokante e Buki di Mormon

E Buki di Mormon ta un registro sagrado di pueblonan den Amérika antiguo i tabata grabá riba planchanan di metal. Fuentenan for di kual e registro aki a wòrdu kompilá ta inkluí lo siguiente:

1. E Planchanan di Nefi, kual tabata di dos sorto: e planchanan menor i e planchanan mayor. E promé tabata mas partikularmente dediká na asuntunan spiritual i e ministerio i siñansanan di e profetanan, miéntras ku e di dos tabata okupá prinsipalmente pa un historia sekular di e pueblonan konserní (1 Nefi 9:2–4). For di e tempu di Mosias, sinembargo, e planchanan mayor a inkluí tambe artíkulonan di importansia spiritual grandi.

2. E Planchanan di Mormon, kual ta konsistí di un kompilashon dor di Mormon for di e planchanan mayor di Nefi, ku hopi komentario. E planchanan aki tambe tabata kontené un kontinuashon di e historia dor di Mormon i adishonnan di su yu hòmber Moroni.

3. E Planchanan di Eter, kual ta presentá un historia di e yareditanan. E registro aki a wòrdu kompilá dor di Moroni, kende a agregá komentarionan di su mes i a inkorporá e registro ku e historia general bou di e título “Buki di Eter.”

4. E Planchanan di Bròns ku e pueblo di Lehi a trese for di Herusalèm na 600 pK. Esakinan tabata kontené “e sinku bukinan di Moises, … i tambe un registro di e hudiunan for di komienso, … te na komienso di e reinado di Sedekías, rei di Huda; i tambe e profesianan di e santu profetanan” (1 Nefi 5:11–13). Hopi sita for di e planchanan aki, sitando Isaías i otro profetanan bíbliko i no bíbliko, ta aparesé den e Buki di Mormon.

E Buki di Mormon ta konsistí di diessinku parti òf divishon prinsipal, konosí, ku un eksepshon, komo bukinan, usualmente designá pa e nòmber di nan outor prinsipal. E promé porshon (e promé seis bukinan, terminando ku Omni) ta un tradukshon for di e planchanan menor di Nefi. Entre e bukinan di Omni i Mosias tin un adishon yamá e Palabranan di Mormon. E adishon aki ta konektá e registro grabá riba e planchanan menor ku e kompilashon di Mormon di e planchanan mayor.

E porshon di mas largu, for di Mosias te na Mormon kapítulo 7, ta un tradukshon di Mormon su kompilashon di e planchanan mayor di Nefi. E porshon final, for di Mormon kapítulo 8 te na final di e volúmen, a wòrdu grabá pa Mormon su yu hòmber Moroni, kende, despues di a kaba e registro di e bida di su tata, a hasi un kompilashon di e registro yaredita (komo e buki di Eter) i despues a agregá e partinan konosí komo e buki di Moroni.

Alrededor di e aña 421 dK, Moroni, e último di e profeta-historiadónan nefita, a seya e registro sagrado i a skonde esaki pa e propósitonan di Señor, pa aparesé den e delaster dianan, manera predesí pa e stèm di Dios pa medio di Su profetanan antiguo. Na aña 1823, e mesun Moroni aki, e tempu ei un personahe resusitá, a bishitá e Profeta José Smith i despues a entregá e planchanan grabá na dje.

Tokante e edishon aki: E portada original, inmediatamente promé ku e página di kontenido, ta tumá for di e planchanan i ta parti di e teksto sagrado. Introdukshonnan den un tipografia no-kursivá, manera den 1 Nefi i inmediatamente promé ku Mosias kapítulo 9, tambe ta parti di e teksto sagrado. Introdukshonnan den kursivo, manera na kabes di kapítulonan, no ta original pa e teksto pero ta inkluí komo yudansa di estudio pa komodidat den lesamentu.

Algun eror menor den e teksto a wòrdu perpetuá den edishonnan anterior di e Buki di Mormon publiká na ingles. E edishon aki ta kontené korekshonnan ku ta parse apropiá pa trese e material den konformidat ku manuskritonan original i edishonnan promé editá pa e Profeta José Smith.