iVakamacala Taumada

Eratou sa tauyavutaka na Mataveiliutaki Taumada kei na Kuoramu ni iApositolo Le Tinikarua na veivola eso ena Nodra iVakavuvuli na Peresitedi ni Lotu me vukei kemuni me titobu kina na nomuni kila vakavinaka sara na kosipeli vakalesui mai ka toro voleka yani vua na Turaga ena nodra ivakavuvuli na parofita ena gauna oqo. Ni sa vakaikuritaka na Lotu na itukutuku ena veivola oqo, ko ni na vakasokumuna kina e dua na iyau ni ivola veidusimaki me baleta na nomuni vuvale.

E lewe ni ivola oqo na ivakavuvuli nei Peresitedi Wilford Woodruff, ka a veiqaravi vaka-Peresitedi ni Lotu i Jisu Karisito ni Yalododonu Edaidai mai na Epereli ni 1889 ki na Sepiteba ni 1898.

Vuli Yadua

Ena nomuni vulica na ivakavuvuli nei Peresitedi Wilford Woodruff, mo ni vakasaqara na veivakauqeti ni Yalotabu. Mo ni nanuma na yalayala vakalou nei Nifai: “Ia ko koya sa vakasaqara matua ena kunea; ka na vakatakilai vua, na veika vuni ni Kalou ena kaukauwa ni Yalo Tabu” (1 Nifai 10:19).

Ena itinitini ni wase yadua, ko ni na raica kina na “Vakatutu ni Vuli kei na Veivakavulici.” Na veitaro, veivakasama, kei na veivolanikalou oqo ena vukei kemuni mo ni kila vakavinaka ka bulataka na ivakasala nei Peresitedi Woodruff. Sa rawa mo ni raica lesu mada ni bera ni ko ni wilika na kena wase. Mo ni tugana talega na veitaro oqo ni ko ni vuli tiko:

• Na ivakavuvuli cava e vakavulica tiko o Peresitedi Woodruff? Na cava au rawa ni vulica mai kina?

• Ena rawa vakacava me vukea na noqu bula na ivakavuvuli nei Peresitedi Woodruff? Ena vukei au vakacava na ivakavuvuli oqo ena noqu ilesilesi ena vuvale kei na Lotu?

• Na cava beka meu vakayacora niu sa mai vulica na veika oqo?

Veivakavulici mai na iVola Oqo

Kevaka o ni veiqaravi tiko vakadauniveivakavulici ena iSoqosoqo ni Veivukei, kuoramu ni italatala qase, se iliuliu ni bete levu, sa rawa mo ni veivakavulici mai na ivola oqo. Ena vukei kemuni na idusidusi era tukuni toka oqo.

Mo ni raica matua na Vosa nei Peresitedi Woodruff kei na iVolanikalou

E a vakarota na Turaga me da “vunautaka walega na nodra vosa na parofita kei na iapositolo me vaka sa volai tu; io me vaka sa vakatakila vei [keda] ko koya na Dauveivakacegui ena vuku ni masu kei na vakabauta” (V&V 52:9).

Ena so beka na gauna ko ni na temaki mo ni vakawalena na ivola oqo ka veivakavulici mai na ivola tale eso. Ia sa nomuni ilesilesi mo ni vukei ira na so tale me ra vulica na kosipeli mai na vosa nei Peresitedi Woodruff kei na ivolanikalou. Me usutu tiko ni lesoni yadua na veivosa lavetaki ena ivola oqo kei na ivolanikalou e veiganiti ena itinitini ni iwase yadua. Vakabibitaka ena lesoni e dua na gauna ni kena wiliki ka veivosakitaki na vosa nei Peresitedi Woodruff.

Vakayaloqaqataki ira na lewe ni kalasi me ra na dau vulica mai na iwase ni ivola ni bera na soqoni ena Sigatabu ka ra kauta tiko mai ki lotu. Ni ra sa na dau wilika taumada mai na ivola, era na vakavakarau vakavinaka cake ena nodra na mai vakaitavi ka veivakatataki vakaiira.

Vakasaqara na Veidusimaki ni Yalo Tabu

Ena nomuni masuta mo ni vukei ka vakavakarau vagumatua, na Yalo Tabu ena veidusimaki ena nomuni sasaga (raica Alama 17:2–3; V&V 11:21; 42:14; 88:77–78). Na voqa ni dua na domo lailai ki na nomuni vakasama kei na lomamuni, ena vukei kemuni mo ni na digitaka kina na veivosa lavetaki mai na ivola oqo ka na vakayaloqaqataki ira na tani me ra vulica ka bulataka na kosipeli.

Ni ko ni sa veivakavulici, masuta na kaukauwa ni Yalotabu me salavata kei na nomuni vosa kei na gauna ni veivosaki vakalasi. E kaya vakaoqo o Nifai, “Ia ko koya sa vosa ena kaukauwa ni Yalo Tabu, na kaukauwa ni Yalo Tabu ena vakadewa ki na yalodra na luve ni tamata” (2 Nifai 33:1; raica talega V&V 50: 13–22).

Vakarautaka e dua na iTuvatuva ni Lesoni

Ni vakauqeti kemuni na Yalotabu ena vakasama mo ni veivakavulici kina, mo ni na dau vola na veivakasama oqori mo ni na nanuma tiko kina. Ni bera na nomuni veivakavulici, vola e dua na ituvatuva me semati kina na veivakasama oqo ki na dua na ituvatuva vakalesoni. Sa rawa mo ni vakayagataka e dua na iwalewale wase vakava oqo:

1. Vulica na iwase ni ivola. Wilika na iwase ni ivola mo ni kila vakavinaka kina na ivakavuvuli nei Peresitedi Woodruff. Vakamuria na ivakasala ka tiko ena “Vuli Yadua,” ena tabana e v.

2. Digitaka ka masulaka na veimalanivosa ka na veivuke vakalevu vei ira ko vakavulica. Mo ni vulica na iwase o ya ke lailai me vakadua tale. Raica lesu na ulutaga lalai, ka tukuna vakatabakidua tiko na ivakavuvuli e dodonu mo ni vakavulica. Masuta na Turaga me dusimaki kemuni ena nomuni digitaka na veimalanivosa ena vukei ira vakavinaka sara na lewe ni kalasi me ra vulica ka bulataka na ivakavuvuli o ya. Me vaka ga ni levu cake na itukutuku e umanaki tu ena dua na wase mai na kena o ni rawa ni vakavulica ena dua ga na gauna ni kalasi, e sega ni gadrevi sara mo ni vakavulica na ivakavuvuli kece se vakayagataka na veimalanivosa taucoko.

3. Digitaka na iwalewale ni nomuni vakavulica na veimalanivosa. Ena gauna o ni sa digitaka kina na veimalanivosa eso, ko ni sa na tu vakarau mo ni navuca na veisala ni kedra vakavulici. Masuta na veidusimaki ni Yalotabu ena nomuni vakayacora na ka oqo. Taurivaka na vakasama eso mai na “Vakatutu ni Vuli kei na Veivakavulici” ena itinitini ni iwase. Mo ni nanuma tiko ni nomuni veivakavulici e dodonu me vukei ira na lewe ni kalasi me ra kila vakavinaka, veivosakitaka, ka bulataka na vosa nei Peresitedi Woodruff.

4. Vola e dua na ituvatuva me tauyavutaki kina na nomuni vakasama. Ena vukei kemuni na nomuni vola vakalekaleka e dua na ituvatuva ni nomuni tauyavutaka na nomuni vakasama kei na vakavulici ni lesoni. Na nomuni ituvatuva e dodonu me tiko kina e tolu na ka bibi oqo:

   • iVakamacala Taumada. Vakarautaka e dua na ivakamacala lekaleka me vukea na nodra rai matua na lewe ni kalasi ki na vosa nei Peresitedi Woodruff.

   • Veivosakitaki ni ivakavuvuli nei Peresitedi Woodruff. Vola na ituvatuva ni nomuni vakavulica na veimalanivosa ko ni sa digitaka. Sa rawa mo ni wasea na tiki ni nomuni ituvatuva ki na ivakavuvuli ena ulutaga lalai rairai levu ni iwase.

   • iTinitini. Vakarautaki kemuni mo ni na vakamacalataka vakalekaleka na ivakavuvuli sa veivosakitaki oti ka wasea na nomuni ivakadinadina ni ivakavuvuli o ya. Sa rawa talega mo ni vakarautaka na veisala ni nodra sureti eso me ra wasea na nodra ivakadinadina.

Vakayacora na Veivosaki e Veivakatataki Cake

Sa vakatakila na Turaga na ivakavuvuli ni veivakavulici e mana ena Nona kaya, “Dou lesia e dua me nomudou qasenivuli; ia mo dou kakua ni vakamacala kecega ena dua vata na gauna; raica me dua ga e vosa ka ra vakarorogo na kena vo ki na nona ivakamacala; ia ni dou sa vosa oti kece, dou sa qai vuli ka veivakavulici kece talega; raica ena soli vakatautauvata na dodonu ki na tamata yadua” (V&V 88:122). Na idusidusi e tarava ena rawa ni vukei kemuni mo ni vakauqeta ka vakayacora kina na veivosaki e veivakatataki cake.

• Vakasaqara na veidusimaki ni Yalo Tabu. Ena dau vakauqeti iko mo taroga na veitaro macala vinaka se okata eso ena veivosaki.

• Vukei ira na lewe ni kalasi me ra rai matua ki na ivakavuvuli nei Peresitedi Woodruff. Me ra wilika na nona vosa me vakavurea na kena veivosakitaki ka sauma na veitaro eso. Mo ni dau vagolea lesu mai vakamalua na veivosaki sa riba tani mai na ulutaga.

• Dau vakadinadinataka vakawasoma na dina sa veivosakitaki. Sureti ira na lewe ni kalasi me ra wasea talega na nodra ivakadinadina.

• Me vaka ni ganita, wasea na veika eso e sotavi ka baleta na ivakavuvuli ena wase ni ivola. Vakayaloqaqataki ira me ra wasea na veika era sotava me vaka e vakauqeti ira kina na Yalo Tabu.

• Kakua ni balavu na nomuni vosa. Vakayaloqaqataki ira me ra tukuna na nodra nanuma, taro, ka veivakavulici vakataki ira.

• Kakua ni taqaya ni sega ni saumi mai na nomuni taro. Era dau gadreva sara vakalevu na lewe ni kalasi e dua na gauna me ra vakasama kina se raica na nodra ivola ni bera ni ra wasea na nodra vakasama, ivakadinadina, kei na veika era sotava.

• Dolea na vakasama kece sara ena gauna ni veivosaki. Vakarorogo matua, ka tovolea mo ni kila vakavinaka na nodra cau na lewe ni kalasi. Vakavinavinakataka na nodra vakaitavi.

• Ena gauna era wasea tiko kina e levu na nodra vakasama na lewe ni kalasi, sa rawa mo ni digia e dua me vola na veivakasama oqo ena papanivolavola.

• Kakua ni tagutuva e dua na veivosaki vinaka ena nomuni saga mo ni vakacavara taucoko na lewe ni ivola o ni sa vakarautaka. Na ka e bibi duadua o ya me ra vakila na lewe ni kalasi na veivakauqeti ni Yalotabu ka ra qaqaco cake ena nodra solibula me ra bulataka na kosipeli.

Na taro vivinaka ena rawa ni vakavurea na veivakavulici, veivosaki e momona, kei na kena bulataki. Ena itinitini ni iwase yadua ni ivola oqo, ko na raica na veitaro eso e veivukei ena “Vakatutu ni Vuli kei na Veivakavulici.” Dau taleva tiko na veitaro oqo. Ni gadrevi vakakina, sa rawa mo bulia ga na nomu taro. Vakarautaka na veitaro ena muataki ira na lewe ni kalasi me ra vakasaqaqara, vakadigova ka bulataka na ivakavuvuli nei Peresitedi Woodruff, me vaka e vakaraitaki toka oqori e ra.

• Taro ni vakasaqaqara ena vakayaloqaqataki ira na lewe ni kalasi me ra wilika ka veivosakitaka na veimalanivosa nei Peresitedi Woodruff. Me kena ivakaraitaki, ena nomu rawa ni taroga, “Na cava e rawa ni da vulica mai na ivakasala nei Peresitedi Woodruff me baleta na wasei ni kosipeli?”

• Taro ni vakadidigo ena muataki ira na lewe ni kalasi me ra veinanuyaka na ivakavuvuli nei Peresitedi Woodruff ka me vakatitobutaka na nodra kila vakavinaka na ivakavuvuli ni kosipeli. Me kena ivakaraitaki, ena gauna era sa sauma oti kina na taro ni vakasaqaqara ka toka mai cake o ira na lewe ni kalasi, sa rawa mo taroga, “Na cava e sa dua kina na gauna marautaki na cakacaka ni kaulotu?”

• Taro ni kena bulataki ena vukei ira na lewe ni kalasi me ra raica rawa na sala me ra bulataka kina na ivakavuvuli nei Peresitedi Woodruff. Me kena ivakaraitaki, sa rawa mo taroga, “Na cava eso na ka bibi e rawa ni da vakayacora me da wasea kina na kosipeli?”

iVurevure Eso e Cavuti Tiko ena iVola Oqo

Na ivakavuvuli nei Peresitedi Woodruff ena ivola oqo e lavetaki mai na nona ivunau, ivola tabaki, kei na ivolaniveisiga. Ena veivosa lavetaki mai na nona ivolaniveisiga, era sa vakavoutaki na kena irogorogo, matanivola, ulu ni vosa, kei na parakaravu. Na veivosa lavetaki tale eso e sega ni veisau kina e dua na ka mai na kena ivurevure taumada, vakavo ke veisautaki na kena ivolavolai se kena tabaki me matata cake kina na kena wiliki. O koya gona, o ni na raica kina eso na duidui lalai ena ivola oqo. Me kena ivakaraitaki, na vosa kosipeli e vakamata ni volalalaitaki ena so na vosa lavetaki ka vakamata ni volalevutaki ena so tale.

Sa vakakina, na nona dau vakayagataka vakavuqa o Peresitedi Woodruff na ivosavosa me vaka na tagane, tamata, se kawatamata me vakaibalebaletaka vei ira na tamata kecega, na tagane kei na yalewa. E dau vakayagataka vakavuqa o koya na vosa tagane me baleta na yalewa kei na tagane. Oqo sa itovo ni ivosavosa ena nona gauna. E dina ga ni tiko na duidui ena ivosavosa veiwekani oqo kei na kena sa taurivaki tu ena gauna oqo, na ivakavuvuli nei Peresitedi Woodruff e sa baleta na tagane kei na yalewa.

Wilford Woodruff

Woodruff signature

teacher and class

Relief Society discussion