Wase 11

Masu me Ciqomi na Veivakalougatataki mai Lagi

Ni da masu ena vakabauta, eda sa vakarautaki keda tiko me da ciqoma na veivakalougatataki e sa vakarautaka tu na Tamada Vakalomalagi.

Na Bula nei Wilford Woodruff

Ena Maji ni 1835, ni veiqaravi tiko ena imatai ni nona kaulotu, e a lakova kina o Wilford Woodruff na veiuciwai kei na vanua lolobo ena ceva-i-cake kei Amerika. Erau a musuka kei na nona itokani e dua na vunikau ka taya e dua na bavelo, me rau sokota rawa kina na vanua lolobo. Erau a voce me rauta ni 150 na maile, ni bera ni rau qai biuta na bavelo ka taubale. E a qai nanuma lesu o Peresitedi Woodruff ni rau a muria e dua na gaunisala ka “takosova na lolobo, e soso ka tovaki wai ena vuqa sara na vanua, me rauta ni duanadrau vitusagavulu na maile. Keirau taubaletaka e vasagavulu na maile ena dua na siga ni yacova tu na durui keirau na wai kei na soso. Ena ika 24 ni Maji, ni oti na neirau taubale tiko ena soso me rauta na tini na maile, sa vakamalumalumutaki au na duruqu ni a mosi kaukauwa sara ga. Au mani dabe sobu ena dua na tolo ni kau.”

Ena gauna oqo, sa nanuma kina na nona itokani, ni sa oca sara vakalevu ena vuku ni cakacaka oqo me sa lesu ki vale, e a biuti koya tu ena tolo ni kau ka dabe toka kina o ya ena dua na vanua lolobo ka sinai tu kina na karokotaile, ka lesu yani ki nodratou. E a goleva na Turaga ko Wilford Woodruff, ena nona sega ni via yalolailai. E kaya kina, “Au tekiduru ena soso ka masu, ka qai vakabulai au na Turaga, au qai tomana yani na noqu ilakolako ena reki.”¹

Ena vica na yabaki e muri, e vakaraitaka na nona vakabauta o Peresitedi Woodruff ena nona vodo waqa vata kei na watina kei na lewe vica tale ena nodra ilakolako ni veiqaravi ki Igiladi. E nanuma lesu o koya, “Keimami sa soko tiko ena loma ni tolu na bogi ena dua na cagi tataba, ka keimami sa laubili lesu tale tiko ki muri. Au sa qai kerei ira na noqu itokani me ra muri au mada ki loma ni dreke, au tukuna vei ira me ra masulaka me veisautaka na cagi na Turaga. Au a sega ni rerevaka na soko sese; ia au sega ga ni taleitaka de keimami laubili lesu tale ki Niu Ioka, me vaka niu vinakata tiko meu lako yani ena noqu ilakolako. E tautauvata kece na masu keimami cabora, na turaga kei na marama; ni sa oti keimami lako yani ki dela ni dreke, e sega ni oti e dua na miniti, e vaka ga ni dua e taura e dua na iseleiwau ka qai kolata rua na batinicagi tataba o ya, e rawa beka ni o viritaka yani e dua na itavoi mamare ka na sega ga ni yavalata.”²

iVakavuvuli nei Wilford Woodruff

Sa noda itavi me da masuta ena vakabauta na veivuke eda gadreva.

E dua na nona ivakasala na iVakabula e dodonu me ra muria na Nona Yalododonu kece sara na Kalou, ia au leqataka, de sega ni da vakayacora tiko vakakina, sai koya me da dau masu tikoga ka kakua ni guce [raica na Luke 18:1; V&V 88:126]. Au leqataka, me vaka ni da tamata, de da sega tiko ni dau masu vakalevu ena vakabauta. E dodonu me da dau masu vagumatua vua na Turaga, ka vakatakila vua na noda veigagadre kece sara. Kevaka ena sega ni taqomaki keda ka sereki keda ko koya, ena sega tale ni dua na kaukauwa e rawata. O koya sa tu kina ki Vua na noda vakanuinui. O koya sa dodonu kina me na dau rogoca na Tamada Vakalomalagi na noda masu ena veisiga kei na veibogi.³

Era sega tiko ni kila na lewei vuravura na revurevu kei na yaga ni masu. E dau rogoca ka sauma na Turaga na nodra masu na turaga, marama kei na gone. E levu duadua na kaukauwa e rawata na masu, me baleta na kena dolavi mai na veivakalougatataki ni Kalou, mai na veika kece tale eso.⁴

Ni sa saqata ko vuravura na matanitu ni Kalou ena gauna oqo, e dodonu beka me da taqaya na Yalododonu? … E sega ni dodonu me da vakakina. E dua na ka me da cakava, sai koya, me da masuta na Kalou. Era dau vakayacora vakaoqo o ira kece na tamata bula dodonu; o Jisu sara mada ga na iVakabula, na Le Duabau ga nei Tamana ena yago, e a masu, mai na vale ni manumanu ki na kauveilatai, ena gauna taucoko oqori; ena veisiga taucoko e kaciva na Tamana me solia vua na loloma soli wale me tokoni koya ena nona gauna ni vakararawataki ka me rawa kina vua me gunu mai na bilo wiwi. Sa vakakina vei iratou na nona tisaipeli.⁵

Se na cava ga e yaga me da rawata ka marautaka, sa noda itavi me da kerea vua na Turaga. Me da golevi Koya ena veivanua vuni ka vakaraitaka Vua na noda gagadre, me rogoci ka saumi kina ki buradelada na noda masu. E koto e keri na noda kaukauwa. Eda vakanuinui vua na Kalou, ka sega vua na tamata.⁶

Sa nona itavi na Yalododonu yadua ni Kalou … me vagolea na nona masu me rogoca na Turaga ni Siga ni Vakacecegu, ena siga kei na bogi ena kena gauna, ena ituvatuva vakamatavuvale kei na veivanua vuni, me tokoni ira na nona tamata na Turaga, tarai Saioni cake ka vakayacora na nona yalayala. …

… E levu cake na noqu vakabauta na masu vua na Turaga mai na ivakavuvuli kece tale eso e vuravura. Kevaka eda sega ni vakabauta na masu vua na Kalou, ena sega talega ni levu na noda vakabauti koya se na kosipeli. E dodonu me da masuta na Turaga, ka kerea vua na veika eda vinakata. Me tubu cake tikoga vua na Turaga na nodra masu na tamata oqo ena kena gauna, ka na sega ni vuki tani mai kina na Turaga, ia era na rogoci ka saumi, ka na tucake ka serau na matanitu kei na Saioni ni Kalou, ena tokara na nona isulu vakaiukuuku ka vakasulumi ena lagilagi ni nona Kalou, ka vakayacora na inaki ni nona mai cokonaki e vuravura [raica V&V 82:14].⁷

Me vaka ni da dua ga na matatamata sa dodonu me da tucake ena vakabauta kei na kaukauwa ena mata ni Kalou ka vakaraitaka na veika eda gadreva, ka laiva na keda icavacava e ligana. Sa tu e kea. Ena dau tu ga e kea.⁸

Sa dodonu me da masu me rawa kina ni da kila na loma ni Turaga ka ciqoma na Nona veidusimaki.

Au nanuma ni dodonu me da laveta na yaloda ena masu vua na Kalou na Tamada Vakalomalagi me baleta na Nona loloma veivueti, ka ni na tuberi keda ka dusimaki keda ena veivakauqeti ni Yalo Tabu, me vakararamataki kina na noda vakasama, ka dolavi na noda kila ka me da kila na Nona nanuma kei na lomana me baleti ira na Nona tamata.⁹

Ena gauna ga o lomalomarua kina me baleta e dua na itavi se cakacaka e vakarau mo cakava, kakua tale ni tosoya ena nomu kitaka e dua na ka me yacova ni ko sa lako ka masumasu vagumatua ka rawata na Yalo Tabu. Na vanua cava ga e vakauqeti iko kina na Yalotabu mo lako kina se mo cakava, ena dodonu oqori; ena nomu muria na nona veivakauqeti, ena yaco mo donu.

Eda na kau ki na vuqa na vanua ena noda cakacaka vakaveiqaravi ena veimatanitu ni vuravura, eda na nanuma ni na dodonu kina e dua na ivalavala ni veiqaravi, ia, kevaka eda sega ni kila, ena vinaka me da lako yani vua na Turaga, ka kerea ena vakabauta me da dusimaki ena sala ni bula.¹⁰

Me da cakacaka ena yalodina ka masuta na Turaga e veisiga me baleta na yalomatua, me tu kina vei keda na kaukauwa me da qaqa ka veirawai.¹¹

Sa nodra itavi tabu na itubutubu me ra vakavulici ira na luvedra me ra dau masu ka raica me ra dau masu vata vakamatavuvale.

Sa nona nanuma ka nona lewa na Kalou, vei ira na tagane kei na yalewa era sa curuma na veiyalayalati ni vakamau, ka sa soli vei ira eso na luvedra tagane kei na yalewa, ni gauna ga era sa qase cake kina, e dodonu me ra vakavulici ira ena masu.

Sa nodra itavi na Yalododonu Edaidai me ra vakavulici ira na luvedra ni ra se gone me ra dau masu; me ra vakavulici ira me ra kila na ivakavuvuli kei na yaga ni masu, me rawa kina ni ra dau masulaki ira na nodra itubutubu kei na veika tale eso e yaga. Kevaka o ni na tekivu vata kei ira na gone ena sala oqo ka, ka tuberi ira cake me ra rerevaka na Turaga, ena dau vakavudua sara me ra gole tani mai kina. Me kakua ni dau masu tikoga na iliuliu ni matavuvale, ia me dau tukuna vei ira na lewe ni nona matavuvale me ra dau masu, ka kerea na veivakalougatataki ena teveli.¹²

Ni da bulataka na kosipeli, ena saumi na noda masu ena veivakalougatataki ki uluda.

E dodonu me da dau yalomalumalumu ena noda itutu vakatamata, me da dau masu, me da dau lomasoli ki na kaukauwa me rawa ni da ciqoma kina na veivakalougatataki nei Tamada Vakalomalagi sa yalataki tu.¹³

E dodonu me da bula ena kena ivakarau kei na kena ivalavala me rawa kina ni da lako e matana na Turaga ka kerea na veivakalougatataki o ya, ena vakabauta kei na kaukauwa, eda na gadreva me tokoni keda ena noda qarava na inaki ni Kalou. … E yaga oqo ena noda toso ki liu.¹⁴

E nakita na Kalou me solia vei ira na Nona Yalododonu na veika vinaka ni vuravura, ka vakakina na veivakalougatataki ni lomalagi, ena gauna sa rawa kina vei ira me ra vakayagataka vakavinaka. …

… E vuqa vei kemuni era sa vulica na ivakarau ni masu; ka ra qai sega ni rawata me vagolei cake na nodra masu me rogoca na Kalou ni Siga ni Vakacecegu; ka na rogoci iko o Koya. … Ia na veivakalougatataki ni lomalagi ena rawa ka lewai walega ena ivakavuvuli ni bula dodonu.¹⁵

Sa sega tale na gauna me da vakamaumautaka ena noda vakarautaki keda me baleta na veika ena vakarau yaco mai ki vuravura; ko cei e vinakata me sega ni rawata na nona isala vakatui, na nona lagilagi, kei na nona vakanuinui ki na bula tawamudu ka a rawata tu ena veigauna sa sivi ena nona a ciqoma na kosipeli i Jisu Karisito? E sega ni dua na tamata ka sa rawata tu e dua na tiki ni Yalo ni Kalou. Me da tucake ka qarava vakavinaka na noda ilesilesi, ka cakacaka tiko vua na Kalou me yacova ni da sa rawata na Yalo Tabu, ka vakakina ni sa rawa me curu basikata na ilati ni tawamudu na noda masu ka rogoca na Kalou ni Siga ni Vakacecegu ka saumi mai ena veivakalougatataki ki uluda.¹⁶

Vakatutu ni Vuli kei na Veivakavulici

Taurivaka na veivakasama oqo ni ko ni vulica na kena iwase oqo se ni ko ni vakavakarau mo ni veivakavulici. Raica na tabana e vi–x, me ikuri ni veivuke.

Raica lesu na italanoa eso oqo ena tabana e 121, 123. Vakasamataka se veivosakitaka na veisala duidui eso ena raica kina o Elder Woodruff na veika oqo. Na cava e rawa ni da vulica mai na veika oqo?
Na cava beka e vakauqeti kemuni ena nomuni wilika na ivakavuvuli nei Peresitedi Woodruff me baleta na noda itavi me da dau masu? (Raica na tabana e 123–24.) Na cava beka na kena ibalebale vei kemuni na masu ena vakabauta? Na cava na vuna me da masu kina me da rawata na veivakalougatataki eda gadreva? Na cava eso tale na inaki ni masu?
Wilika taucoko na ikatolu ni parakaravu ena tabana e 123. Na cava na vuna e gadreva kina na iVakabula me masu? Na cava e rawa ni da vulica mai na Nona masu? (Raica Maciu 26:39; Joni 11:41; 3 Nifai 13:9–13.)
Na sala cava ena vukei keda kina na masu ni tu na veivakatulewa me da vakayacora se ni tu na noda lomatarotaro me baleta na noda itavi? (Raica na tabana e 124.)
Na sala cava soti e sa sauma kina na Tamada Vakalomalagi na nomuni masu? me vakaevei beka na noda raica na isau ni dua na masu ka sega ni sala vata kei na kena isau eda a namaka tiko?
Na veivakadeitaki cava a solia o Peresitedi Woodruff vei ira na itubutubu era dau vakavulica vei ira na luvedra me ra masu? (Raica na tabana e 125.) Na cava eso na ivakavuvuli ni masu e dodonu me ra vakavuvulitaka na itubutubu vei ira na luvedra? E rawa vakacava me ra veivuke na itubutubu vei ira na luvedra me rawa ni yaco me tiki ni nodra bula na masu?
Ena masu vakamatavuvale, na cava e bibi kina me dau soli vei ira na lewe ni matavuvale yadua e dua na gauna me ra masu kina? (Raica tabana e 126.) Sa vaqaqacotaka vakacava na nomuni matavuvale na masu?
Vulica na iotioti ni iwasewase ni iwase (tabana e 126), ka vaqara na itovo ni bula e kaya o Peresitedi Woodruff ni dodonu me tiko vei keda. Na cava na vuna e yaga kina na itovo ni bula eso oqori ni da masu kei na noda vakasaqara na isau ni noda masu?

iVolanikalou Veisemati: Maciu 7:7; Jemesa 1:5–6; 5:16; 2 Nifai 32:8–9; Alama 33:3–11; 34:17–28; 37:36–37; 3 Nifai 18:19–21; V&V 10:5; 68:28; 112:10