Wase 8

Kila na Mate kei na Tucaketale

Ni ra mate na noda daulomani ka vakakina ni da vakananuma na noda bula oqo, eda na kunea na vakacegu kei na veivakadeitaki ena kosipeli vakalesui mai nei Jisu Karisito kei na dina tawamudu ni tucaketale.

Na Bula nei Wilford Woodruff

Ni qai cabe na vula o Okosita ni 1839, e a biuta o Elder Wilford Woodruff na nona vale mai Montrose, Iowa, ena nona talairawarawa ki na veikacivi ni Turaga, me laki kaulotu ki Peritania. E a vakamoce vei Phoebe, na watina, kei Sarah Emma na luvena e duabau, ka se qai yabaki dua. Ena gauna oqori, sa buketetaki Wilford lailai tiko kina o Phoebe, ka na sucu ena ika 22 ni Maji, 1840.

Ni oti e vica na vula ena nona biuti Montrose, a sa laki tiko o Elder Woodruff ena tokalau kei Amerika, e vunautaka tiko kina na kosipeli ka vakavakarau ki na ilakolako yani ki Peritania. Ena nona tiko voli oqori a vola kina ena nona ivolaniveisiga me baleta e tolu na tadra ka raica kina na watina. Ni oti na imatai ni tadra a vola kina vakaoqo ena nona ivolaniveisiga: “Au raici Mrs. Woodruff ena dua na tadra mai Montrose, ka tarai koya tu e dua na rarawa levu. Au a sega ni raici Sarah Emma.”¹ E lekaleka talega vakakina na itukutuku ni ikarua ni nona tadra: “Au a tadra ena bogi ni keirau veivakatarogi tiko kei Mrs. Woodruff, ia au a sega ga ni raici Sarah Emma.”² Na ikatolu ni tadra e matailalai toka: “Keirau reki sara vakalevu ni rawa ni keirau veitarotarogi vakataki keirau, ia e veiwaki kei na rarawa na neirau veimokomoko, ni oti na neirau veitalanoataka vakalailai na veika e baleta na nona cakacaka e vale, au a taroga se evei o Sarah Emma. … E kaya mai ena tagi, … ni sa mate.’ Keirau vakaloloku vakalailai, au qai yadra mai. … E dina beka na tadra oqo? Me qai tukuna ga ko gauna.”³

Ena ika 14 ni Julai, 1840, e a vola kina o Elder Woodruff, ka sa tu ena gauna oqo mai Peritania, e dua na itukutuku ena nona ivolaniveisiga me ivakananumi ni dua na siga bibi ki na nona matavuvale: “Sa na yabaki rua ena siga nikua ko Sarah Emma. Me taqomaki iratou tiko na watiqu kei na luvequ na Turaga mai na tauvimate kei na mate me yacova na noqu lesu yani.” Meu na dau vakaliuca tikoga na loma ni Turaga, e qai vakuria, “Isa Turaga, au sa laivi iratou e ligamuni; ni veivakani, veivakasulumi, ka veivakacegui vei iratou, ia me nomuni tikoga na kena lagilagi.”⁴ Ni oti e tolu na siga, sa mai takali o Sarah Emma lailai.

E a sega ni kila tu o Elder Woodruff na mate nei luvena yalewa me yacova na ika 22 ni Okotova, 1840, ni wilika na itukutuku ena dua na ivola ka a vakau vua e dua na nona itokani ena Kuoramu ni Le Tinikarua.⁵ Ni oti e va na siga sa qai ciqoma na itukutuku mai vei Phoebe, ena dua na ivola ka a volai ena ika 18 ni Julai. A lavetaka e dua na iwase ni nona ivola ena nona ivolaniveisiga:

“I Wilford noqu daulomani, ena vakacava beka na yalomu niu kaya ni enanoa au a kacivi meu vakadinadinataka na nona sa mai biuta ko nodaru Sarah Emma lailai na vuravura oqo? Io, sa lako ko koya. Sa butakoci koya mai na noqu imoko na ligai mate sega ni dauloloma. … Ena noqu dau vakaraici koya, au dau vakasamataka se na vakaevei na lomaqu kevaka keirau na veitalatala, vakabibi ni sa mai yali na noqu itokani. Ia sa lako ko koya. Sa kauti koya ki vale, ki Vua, na Turaga, ena dua na inaki vuku.

“Oqo e dua na veivakatovolei vei au, ia sa tu e yasaqu na Turaga ena dua na kena ivakarau vakasakiti. Au rawa ni raica ka vakila ni sa kauti koya ki vale ka na laki qaravi koya vakavinaka cake, mai na kena au na rawata ena gauna lekaleka oqo ni bera niu na qai lako yani me keirau sota. Io, Wilford, sa dua na nodaru agilosi lailai mai lomalagi, au vakabauta ni rawa ni sa laki sikovi iko oti yani na yalona ni se bera na gauna oqo.

“Sa dredre dina na bula ni yali o koya. … Sa laiva tu mai vata kei au e dua na iregu me baleta na tamana ni se bera ni mate. … Era a tabaka na buradelana na italatala qase ka ra lumuti koya vakavica, ia ena siga ka tarava sa biubiu yani kina na yalona ki na dua tale na vuravura ka sega kina na rarawa.

“Nikua era a tomani keirau vata kei Wilford lailai e vica na itokani, ena ilakolako ki Commerce, [Illinois,] ka laki solia kina na iotioti ni neimami vakarokoroko ki vua na nodaru ka talei, me laki bulu kina vakavinaka. E sega ni dua na wekana me muri koya yani ki na ibulubulu ka me turu na wainimatana ena vukuna ia na tinana ga kei Wilford lailai. … Au se qai lesu mai ena dua na ilakolako talei, ni yalorarawa kei na yaluma ki na ibulubulu nei Sarah. E davo duadua koto ena vakacegu. Au rawa ni kaya ni sa solia na Turaga ka kauta tani tale na Turaga, ia me vakavinavinakataki ga na yaca ni Turaga [raica Jope 1:21].”⁶

Ke a sega ni lavetaki na ivola nei Phoebe, e a vola o Elder Woodruff e vica wale na ka me baleta na nona takali na luvena goneyalewa. E kaya walega ni sa kau tani yani o Sarah Emma “mai na gauna” ka ni sa “gole yani me sega tale ni kune ena bula oqo.”⁷

Ena 91 na yabaki ni nona bula, e a vosota mai kina o Wilford Woodruff na nodra mate e vuqa na nona daulomani, ka ra oka kina e vica na lewe ni nona matavuvale kei ira kece sara na iapositolo a veiqaravi vata kei ira ena nona veiliutaki na Parofita o Josefa Simici. Ena veigauna bibi oqori, sa dau kunea na vakacegu mai na nona ivakadinadina ni kosipeli vakalesui mai ka vakakina ena “dina tawamudu” ni tucaketale.⁸ E dau vakavulica wasoma o koya ni nona mate e dua na Yalododonu Edaidai yalodina sa gauna ni veivakatovolei ka gauna talega ni reki. Ni sa voleka me cava na nona bula e a qai vola na idusidusi oqo me baleta na nona soqo ni veibulu: “Au sega ni gadreva me ra na dara na noqu matavuvale se o ira na noqu itokani na ivakatakilakila ni vakaloloku me baleti au, ena gauna au na bulu kina se ni sa oti o ya, kevaka au na yalodina ka dei tu me yacova na noqu mate ena sega ni ganita me dua e tagicaki au.”⁹

Veivakavuvuli nei Wilford Woodruff

Ni sa mate, sa na curuma yani na yalo kecega na vuravura ni yalo, na vanua era na reki vata kina na bula dodonu ka tomana tiko na cakacaka ni Turaga.

E vuqa sara na [tamata] era vakabauta ni sa mate ga e dua, sa nona icavacava o ya, ni sa sega tale ni dua na bula ni oti eke. E rawa beka ni dua na tamata e vinaka tu na ituvaki ni nona vakasama me vakabauta rawa ni o koya na Kalou ni lomalagi, ka sa bulia e rua se tolu na drau na udolu na milioni na yalo, ka solia vei ira na vale [na yago], me ra mai bula ga kina e vuravura ka ra lako tale yani ka me ra qai guilecavi ka vakarusai? E vaka vei au ni sega ni dua na tamata ka tu vinaka na nona vakasama ena rawa ni vaka tu o ya na nona vakabauta. E veisaqasaqa sara ga vakalevu oqori ki na vakasama vinaka kei na vakanananu titobu.¹⁰

Niu lolositaka na nodra yali na noqu itokani era sa takali yani, e sega ni rawa ni yali na noqu vakasamataka, ni, ena veimate yadua sa yaco e dua na sucu; sa biuta na yalo na yago sa mate yani vei keda, sa curu yani ki na yasa kadua ni ilati ka bula ki na ilawalawa cecere ka vakaturaga o ya, ka ra cakacakataka tale tikoga na vakataucokotaki ni nona inaki na Kalou, ena kena vueti ka vakabulai e dua na vuravura sa lutu tu.¹¹

E yaco na reki ni sa curu yani na yalona e dua na Yalododonu ni Kalou Bula ki na vuravura ni yalo ka sota vata kei ira na Yalododonu era sa liu yani.¹²

Eso era cakacaka ena yasa ni ilati oqo, ka so ena yasana kadua. Kevaka eda na tikoga eke eda namaka me da cakacaka me baleta na veivakabulai, ia kevaka eda sa liu yani eda namaka me da cakacaka tikoga me yacova na nona lesu tale mai na Luve ni Tamata.¹³

Ena vuku ni Veisorovaki nei Jisu Karisito, ena tucaketale kina na tamata kecega, ka na duavata tale na yalodra kei na yagodra tawamate rawa.

Eda kila ni ena vukui Atama eda sa mate kecega, ni sa mate na kawatamata kecega ena vuku ni lutu, ka vakakina na manumanu kecega ni vanua, na ika ni waitui kei na manumanu vuka kei na cakacaka kecega ni Kalou, me vaka na veika sa tu e vuravura. Oqo na lawa ena sega ni veisau ka na sega ni bokoci. … E a tovolea na mate na iVakabula; e a mate me vueta na vuravura; e a vakadavori na yagona ena ibulubulu, ia e a sega ni raica na vuca; ni oti e tolu na siga a duri cake mai na ibulubulu ka sega tale ni mate rawa. Sai koya na imatai ni tucaketale.¹⁴

Au sa dau vakamamautaki, ena veigauna kecega, me baleta na tucaketale. Au dau rekitaka. Sa dolavi vei keda na sala ena nona dra na Luve ni Kalou.¹⁵

Ni sa yaco mai na tucaketale, eda na tucake mai ka vakaisulu ena yago sega ni mate rawa; ka sa na oti me tawamudu na veivakacacani, na vakararawataki, na yaluma, na mosi kei na mate, ka dau yaco ena bula oqo.¹⁶

Na ivunau oqo ni nodra tucaketale na mate sa dua na ka lagilagi. Sa dau veivakacegui, ki na yaloqu mada ga, niu dau vakasamataka, ni ena mataka ni tucaketale, sa na rawa ki na yaloqu me na tokara tale na yago ka a tokara tu eke. Ni keimami italatala qase e Isireli keimami sa lakova oti e vica vata na udolu na maile ena oca kei na yaluma, ka cakacaka vakaukauwa ena neimami vunautaka na kosipeli i Jisu Karisito vei ira na luve ni tamata. Au na marautaka vakalevu meu taukena tale na yago oqo kau a vavaca kina ena veilolobo, qalova na veiuciwai ka veilakoyaki, ka cakacaka kina ena kena taraicake na matanitu ni Kalou ena vuravura oqo ena gauna ni tucaketale.¹⁷

Na kosipeli e kauta mai na vakacegu ni ra mate na noda daulomani.

Kevaka e sega na kosipeli i Karisito sa na yaco me dua na iulutaga buwawa duadua beka me da na vakasamataka na veitawasei ena mate; ia ena gauna ga eda sa taura kina na kosipeli ka vulica na ivakavuvuli ni tucaketale, sa na kau tani e dua na iwase levu ni buwawa, na yaluma kei na rarawa ka dau kauta mai na mate. Au dau vakasamataka vakawasoma, ni sa dua na ka buwawa duadua beka e vuravura me da raica e dua na yago mate, ka da qai raica ni sa vakotori ena ibulubulu na yago mate oqori ka bulu yani ena qele; ni sega na kosipeli sa tautauvata ni da rika yani ki na butobuto. Ia na kena totolo ga ni noda taura na kosipeli, ena gauna ga sa vakararamataki kina na yalo ni tamata ena veivakauqeti i Koya sa Cecere Sara, sa rawa ni kailavaka kina me vakataki ira na a bula ena gauna e liu—“Ko iko mate, sa evei na nomu bati gaga? Ko iko ibulubulu, sa evei na nomu gumatua? Sa kena bati gaga ni mate na ivalavala ca: ka sa loloma ni Kalou na bula tawamudu, ena vuku ni noda Turaga ko Jisu Karisito.” [Raica 1 Korinica 15:55–57.] Sa tu ena mata ni nona vakasama ka sa vakararamataki tu na tamata ena tucaketale mai na mate, ka sa koto kina vua na yavu me vakacegu kina na yalona. Oqo na nodra itutu na Yalododonu Edaidai nikua. Eda sa kila tu, eda sega ni tu ena butobuto ena vuku ni veika oqo; sa vakatakila vei keda na Kalou ka da kila na ivakavuvuli ni nodra tucaketale na mate, ka kauta mai na kosipeli na bula kei na tawa mate rawa [raica 2 Timoci 1:10].¹⁸

Sa ka dredre dina, na veitawasei vata kei ira na noda itokani. … Sa tiki ni noda bula me da dau vakaraitaka na lomada ena noda tagicaka na noda sa laki maroroya na yagodra na noda itokani lomani, ka tu e dua na kena ivakategedegede e rawa ni da yacova e dodonu ka veiganiti; ia e tu eso na kena ivakatagedegede sara e cake ka dau caka vakawasoma, e sega ni dodonu se veiganiti kei keda na Yalododonu Edaidai me da vakamurimuria.¹⁹

Ena vuku ni dua na inaki au sega ni kila, au sa bula tiko kina meu lakova na veibulu vei ira e vuqa na Parofita kei na iApositolo kei ira e levu sara na Yalododonu era sa dau cakacaka vagumatua ena Lotu ena nodra gauna kei na nodra itabatamata. … Au sega vakadua ni se bau nanuma ena dua na gauna meu tagicaka e dua na Parofita, iApositolo, se dua na Yalododonu ni Kalou bula ka sa dau tudei ka yalodina tiko vua na Kalou, o koya sa tudei ka yalodina tiko ki na Nona veiyalayalati, o koya sa ciqoma na Kosipeli i Jisu Karisito kei na kena cakacaka tabu vakalotu, kei na Matabete, ena noqu muri koya yani ki na ibulubulu. O ira na turaga kei na marama vakaoqori era sa mai rawata vakavinaka na nodra itavi ena vuravura oqo ena vakarokoroko, ena cakacaka, ena loloma, me yacova na gauna era sa kacivi lesu yani kina ki vale. Era mate ena vakabauta, ka ra na ciqoma e dua na isala vakatui lagilagi.

Oqori na veika au nanuma ena nodratou mate o Peresitedi [Brigham] Young, Baraca [Heber C.] Kimball, Baraca [John] Taylor, o iratou na iApositolo Le Tinikarua, kei ira kece sara na tamata era sa ciqoma na Kosipeli i Karisito ka sa tudei ka yalodina tikoga ena itavi ko ya. Oqori na dina tawamudu—ka na qai kila ko vuravura taucoko—ena bula oqo. E tiko e dua na dina tawamudu ena mate. E tiko e dua na dina tawamudu ena tucaketale, kei na veilewai ena qai yaco ena gauna mai muri, kei na nona veimaliwai na Kalou vata kei na tamata kecega ena veigauna mai muri me vaka na ivalavala ena bula vakayago; ka vakakina ena gauna sa kacivi yani kina ki na vuravura ni yalo, e dua na tagane se dua na yalewa ka sa veiyalayalati oti kei na Turaga, ka sa ciqoma oti na Kosipeli kei na kena veicakacaka tabu, ka a tudei ka yalodina tikoga ena nona gauna kei na nona itabatamata, se o cei na tamata ka kila tu na ivakavuvuli oqo ka rawa ni tagicaka na turaga se na marama ko ya?²⁰

Ena vuku ni Veisorovaki nei Jisu Karisito, era na rawata kina na lagilagi vakasilesitieli o ira kece na gonelalai era mate ni se bera ni ra yacova na yabaki ni vakatulewa.

E sega ni dua na gone dramidrami se gonelailai ka a mate ni se bera ni yacova yani na yabaki me rawa ni vakatulewa kina vakataki koya, me sega ni vueti, ka me sa na tu kina ki na veivakararawataki nei eli. …Au na bolea kina na tamata kecega ni da na sega ni raica e dua na cakacaka tabu ena dua na ivolatukutuku me baleta na veika dina ena nodra vakabulai na gone ka ra se bera tu ni kila na vinaka kei na ca; ena sega kina ni kilikili ena kena irairai, ia na ka ga e rawa ni laurai kina na nona tauri ira na gonelalai e ligana o Jisu ka vakalougatataki ira, sai koya na ka e dodonu me vakayacori me vaka na kena ivakarau vua na Kalou. Ia na nodra papitaiso na gone ena kena vakamiraki vei ira na wai se na ivunau me ra lako ki eli na gone ena ituvaki cava ga, e ivunau vakatamata ka sega ni mai vua na Kalou, o koya ena sega kina ni yaga, e cala ka na sega ni vakamarautaka na Kalou. Sa rauta na veika e baleti ira na gonelalai. …Era na vueti ena dra i Jisu Karisito.²¹

O ira na gonelalai era savasava tu ena mata ni Kalou; na nodra mate kei na vuna, sa koto ga ena liga ni Kalou, ia me da vakataki Jope ka kakua ni vosa kudrukudrutaka na Turaga kei na nona itabagauna. …Sa koto na iloloma oqo ka sema ki na ka oqo—e sega na nodra cala, era sega ni ivalavala ca. Era sa sauma na lawa ni mate ka solia na Kalou vei Atama kei ira kece na nona kawa; ia ni sa biuta na yagodra na yalo ka yaco yani ki na vuravura ni yalo sa oti e kea na nodra leqa kei na nodra rarawa. … Era na tucake mai na nodra ibulubulu ena mataka ni imatai ni tucaketale,. …ka vakaisulu ena lagilagi, na tawamate rawa kei na bula tawamudu, ena iserau tawamudu, ka ra na soli yani ki ligadra na nodra itubutubu, ka ra na ciqomi ira yani ki na matavuvale ni vuravura vakasilesitieli, ka ra na qai taukeni ira na nodra itubutubu me tawamudu. Era na bula me vaka ga na balavu ni nona bula tiko na nodra Kalou. Oqo, ki vei ira na Yalododonu Edaidai, era vakabauta na tucaketale mai na mate, e dodonu me ivurevure ni vakacegu kei na iloloma.

… Ena tubu beka vei kedaru na lomatarotaro—“Na cava e sa kauti ira tani kina na luvequ na Turaga?” Ia au na sega ni rawa ni tukuna vei kemuni na ka oqori, baleta niu sega ni kila; sa koto ga ena ligana na Turaga, a sa vaka tu kina ni se qai buli na vuravura me yacova mai oqo. Era sa dau kau tani na gone ni ra se gonelalai, era sa lako kina ki na vuravura ni yalo. Era lako mai ki ke me ra mai vakataucokotaka na nodra gagadre, o ya, na nodra vale ena yago. Era lako mai me ra mai vakatovolei ka rawata e dua na ivotavota e vuravura; era rawata e dua na yago, se na vale, ena maroroi tu me nodra na vale oqori, ia ena mataka ni imatai ni tucaketale era na cokovata kina na yalo kei na yago, ia me vaka ga eke eda raici ira na gone ka duidui na nodra yabaki ni bula ena dua na matavuvale, mai vei ira na gonelalai era se sucu voli vei tinadra ki vei ira era sa uabula, ena vakakina na matavuvale ena vuravura vakasilesitieli. Era na vakalesui mai vei keda na luveda me vaka ga ena gauna era a bulu kina, kevaka eda na tudei tiko ena vakabauta na itubutubu ka vakadinadinataki keda ni sa kilikili me da rawata na bula tawamudu; ia kevaka eda na sega ni vakadinadinataki keda rawa era na maroroi tikoga na luveda, ka ra na rawata na lagilagi vakasilesitieli. Oqori na noqu rai me baleti ira kece sara na gonelalai era mate, se ra sucu mai vei ira na Jiu se vei ira na kai matanitu tani, bula dodonu se dau caka ca. E a lako mai vei tamadra tawamudu kei tinadra tawamudu era a sucu mai kina ena vuravura tawamudu, ka ra na vakalesui ki vei rau na nodra itubutubu tawamudu; ko ira kece na itubutubu era sa mai vakaluveni eke me vaka na ivakarau ni Kalou kei na matabete tabu, veitalia se na itabagauna cava ga era bula kina, era na tauri ira tale na gone oqori ena mataka ni imatai ni tucaketale, ka ra na soli vei ira ka ra na qai vakalougatataka tu na nodra matavuvale ena vuravura vakasilesitieli …

… Au na kaya vei ira na noda itokani era lolosi tu, era sa kau tani na luvemuni ka sa sega ni dua na ka o ni rawa ni cakava kina, e sega ni dua vei keda e rawa ni cakava kina e dua na ka, e sega ni dua na vosa kaukauwa me na tukuni vei ira na itubutubu ni ra sa cakava na kena vinaka duadua era rawata. Me kakua ni vosataki e dua na tina baleta ni sega ni rawa ni vakabula na luvena tauvimate, ia me da laiva tu na veika oqori ena liga ni Turaga. Ena vakalailai ga era sa na vakalesui tale mai vei keda. …

Me baleta na nodra tubu, kei na lagilagi ni nodra vakacerecerei na gonelalai ena bula sa bera mai e se bera ni vakatakila vei au e dua na ka na Kalou me baleta na iulutaga oqori, se baleti ira na luvemu, na luvequ se na luvena e dua tale, ia eda kila ga ni ra sa vakabulai. Au nanuma ni dodonu me da na solia ga na noda veivakabauti vua na Turaga ena veivakararawataki oqo, me da vakararavi ga ki ligana ka rai vua me da vakacegui ka lomani. Eda na sega ni lolosi ena gauna ni veivakararawataki vakaoqo me vakataki ira e sega tu na nodra inuinui; eda na sega ni lolositaka na nodra yali na luveda me vaka ni da na sega tale ni raici ira, baleta ni da kila vinaka cake. Sa vakavulici keda vakavinaka na Turaga, ka vakakina na kosipeli; na ivakatakila i Jisu Kairisito sa vakaraitaka vei keda ni ra na vakalesui mai vei keda ena nodra na tucaketale na bula dodonu. …

… Au masuta na Tamada Vakalomalagi me vakalougatataki Baraca kei Sisita Wheeler [e dua na veiwatini ka rau se qai mate walega oqo na luvedrau tagane yabaki va kei na yabaki ono] ena gauna ni nodrau lomabibi, ka solia vei rau na nona Yalo Tabu, ia ni rau davo sobu ena bogi ka duri cake ena mataka ka vakananumi rau na luvedrau, me rau na nanuma me rau soli rau ki na ligana na Turaga, ka me rau kila kina ni nodrau tawasei tani mai vei rau na luvedrau e sega ni tawamudu, ia erau na vakalesui mai vei rau ena dua na gauna lekaleka. Ena yaga vei keda kece oqo ni ra takali yani na luveda. Eda vakadavori ira yani ki na ibulubulu, ia era na tucake mai ena mataka ni tucaketale, ia keveka eda sa yalodina tiko ki na veika dina, eda na ciqomi ira ka reki vata kei ira.²²

Me da bula ena kena ivalavala me rawa kina ni da vakarau tu me da ciqoma na veivakalougatataki sa vakarautaka tu na Kalou me baleti keda ena gauna eda sa mate kina.

Na noda icavacava ena veigauna sa bera mai e koto ena yasa kadua ni ilati. Ena gauna au mate kina au na vinakata na galala meu lako ki na vanua e tiko kina na Kalou na Tamada Vakalomalagi, kei Jisu Karisito, na iVakabula kei vuravura.²³

Sa dodonu me da vakavinakataka cake na noda gauna, na noda taledi, kei na noda veigauna vivinaka ni da se tiko e vuravura. Au qai kila ni vuravura oqo e sega ni vanua me da tiko vakadua kina. Eda vakila na ivakadinadina ni tikina oqo ena veisiga kece ni noda bula. Eda sa kacivi me da buluti ira na noda parofita, iapositolo, italatala qase, turaga tamada, marama tinada marama watida, kei ira na luveda, na veika kece oqori era vakaraitaka vei keda ni sega ni vakadeitaki vei keda na noda gauna. Sa dodonu kina me da vakavinakataka cake na noda gauna ni kua.²⁴

Na ivakasala oqo e basika vakaukauwa mai vei keda na bula tiko, “O koya mo dou qai vakarau tu.” [Maciu 24:44.] E baleti keda kece. Ka sa baleti keda me vaka ni da itubutubu ka italatala qase e Isireli me da cakacakataka na nona inaki na Kalou, ena gauna e vakatarai tiko kina me da wawa; ka bula muria na rarama kei na kila ka eda sa vakalougatataki kina. Ni sa lesi ki na tamata kecega e dua na gauna; ka sa kauta yani kina e vuqa me vaka ga na nona lewa. Ena kauta o koya e via kauta, ka vakabula tiko o koya ena vakabula me baleta e dua na inaki vuku.²⁵

Ni da sa curuma yani na rarawa ni bula oqo ka rawata me soli vei keda na reki kei na lagilagi ni matanitu vakasilesitieli eda sa na qai kila kina na sala sa vakarautaki keda kina na veika rarawa ni bula oqo ka na rawa kina vei keda me da marautaka na veivakalougatataki sa vakarautaka tu na Kalou vei ira na yalodina.²⁶

Me rawa kina vei ira oqo me ra na veivutunitaka na nodra ivalavala ca kece sara, ka yadra ka me tu vei ira na kaukauwa me ra lako mai vua na Kalou me rogoci na nodra masu, me ra vakarau tu me ra tutaka na matanitu ka kakua sara ni guilecava na nodra veiyalayalati kei ira na wekadra, se cakitaka na kosipeli, ia me ra vakamalumalumutaki vuravura ka vakarau tu me ra yaco me ra taukena vata kei Karisito na taucoko ni imatai ni tucaketale ka sa vakarautaki tu vei ira era muria tiko na ivakaro ni Kalou.²⁷

Vakatutu ni Vuli kei na Veivakavulici

Taurivaka na veivakasama oqo ni ko ni vulica na kena iwase oqo se ni ko ni vakavakarau mo ni veivakavulici. Raica na tabana e vi–x, me ikuri ni veivuke.

Raica lesu na itukutuku ni mate nei Sarah Emma Woodruff (tabana e 85–7). Na ivunau cava e a solia na vakacegu ka vaqaqacotaki rau o Elder kei Sisita Woodruff? Na cava e rawa ni da vulica mai na italanoa oqo?
Me vaka na veika e vakaraitaka o Peresitedi Woodruff, na cava soti beka e rawa ni da namaka me da laki sota kaya ena vuravura ni yalo? (Raica na tabana e 91–3.) E vukei kemuni vakacava na kila ka oqo?
Ni o ni wilika na ivakasala nei Peresitedi Woodruff me baleta na nodra lolositaki o ira na noda daulomani era sa mate, na ivakavuvuli cava o ni raica kina? (Raica tabana e 89–91.) Na sala cava beka o ni kunea kina na vakacegu ni ra takali yani na nomuni daulomani? Na sala cava e rawa ni da vukei ira kina era dau lolosi ena gauna ni mate?
Na sala cava e kauta tani kina na batigaga nei mate na Veisorovaki nei Jisu Karisito? (Raica na tabana e 89–91; raica talega na 1 Korinica 15:55–57; Mosaia 16:6–9.)
Na cava beka e rawa ni o ni vulica mai na ivakavuvuli nei Peresitedi Woodruff me baleti ira na gonelalai era mate? (Raica na tabana e 91–4.)
Raica lesu na tabana e 95. Tovolea mo ni nanuma lesu me baleti ira na nomuni itokani se o ira na lewe ni matavuvale era a sa vakarau tu ni yaco mai na gauna me ra mate kina. Na cava beka e rawa ni da vulica mai vei ira oqo? Me vaka na vosa nei Peresitedi Woodruff, na cava e dodonu me da cakava me da vakavakarau kina ki na bula ni oti na mate? (Raica na tabana e 95–6.)
Na sala cava e vukea kina na nomuni kila ka me baleta na mate kei na tucaketale na ivakavuvuli nei Peresitedi Woodruff?

iVolanikalou Veisemati: 1 Korinica 15; Alama 11:42–45; 28:12; 34:32–41; Moronai 8:12–19; V&V 42:45–47; 76:50–70; 138:57