Wase 6

Veivakavulici ka Vuli mai na Yalotabu

Eda gadreva na veidusimaki ni Yalo Tabu ni da vulica tiko na kosipeli kei na noda vakavulica vei ira na tani.

Na Bula nei Wilford Woodruff

Ena gauna a vakavakarau tiko kina o Elder Wilford Woodruff ki na dua na koniferedi ni Okotova 1855, e a masulaka me dusimaki, me vakaraitaki vei koya kei ira na tacina vakalotu na veika me ra cauraka vei ira na tamata. Na isau ni nona masu, e a ciqoma kina na ivakatakila oqo: “O iratou na noqu italai me ratou taura na Yalo Tabu ka maroroya na Yaloqu vei iratou, na ka oqori ena vakasalataki iratou kina ki na veika me na dau vakavulici tiko vei ira na tamata; ka vakasalataki ira na tamata me ra maroroya na noqu Yalotabu e lomadra, sa na qai rawa kina me ra kila vakavinaka na vosa ni Turaga ni sa vakavulici vei ira.”¹

Mai na nona ivakadinadina qaqaco me baleta na ivakavuvuli oqo, e vakavuqa me dau tekivuna o Peresitedi Woodruff na nona vosa ni koniferedi ena nona vakaraitaka ni dau gadreva me veivakavulici ena kaukauwa ni Yalo Tabu. Me kena ikuri, e dau vakavuqa me vakavotuya vei ira na Yalododonu na nodra itavi me ra dau vakarorogo ka vuli mai na kaukauwa vata ga o ya. A kaya o koya, “Oi keda kece sara eda sa vakararavi ki na Yalo ni Turaga, ena ivakatakila, ena veivakauqeti, ena Yalo Tabu ka rawa kina me da vakadonui me da vakavulici ira na tamata eda sa kacivi me da vosa vei ira, ia kevaka sa sega ni solia vei au na Turaga na Yalo Tabu ena yakavi nikua, au sa yalataka vei kemuni taucoko ni na takiveiyaga na veika ko ni na rogoca mai vei Baraca Woodruff.”²

iVakavuvuli nei Wilford Woodruff

Me da vakavulica na kosipeli ena gauna ga e dau vakauqeti keda kina na Yalo Tabu.

Au sega ni rawata, ka sega tale ni dua e rawata me vakavulici ira na luve ni tamata ka vakavukui ira ena Kosipeli i Jisu Karisito kevaka e sega kina na Yalo Tabu, na ivakatakila, kei na veivakauqeti ni Kalou sa Cecere Sara. O koya gona, au sa gadreva kina na nodra vakabauta na Yalododonu Edaidai, ka vakakina na nodra masu. Au sa gadreva na Yalo ni Kalou me vukei au, me vakataki ira na tamata yadua era saga me ra vakavulici ira na tamata ena veika ni matanitu vakalomalagi.³

Au vakabauta ni sega ni dua na tamata ena itabagauna oqo se dua tale, e rawa me vakavulici ka vakavukui ira na lewe i vuravura kevaka e sega kina na veivakauqeti ni Yalo ni Kalou. Oi keda na tamata eda sa vakatikori ena itutu … ka sa vakavulica, ena noda veiqaravi kei na cakacaka, na gadrevi vakaidina ni vakavinavinakataki na loloma ni Kalou ena veika kecega. Eda sa vakila nikua na gagadre oqo. Au sa kila tu niu sa sega ni vakadonui meu vakavulici ira na Yalododonu Edaidai se na vuravura kevaka e sega kina na Yalo ni Kalou. Au sa gadreva na ka oqo … ka vakakina na nomuni vakabauta kei na masumasu, ka me dusimaki na noqu vakasama ki na dua na salatu ka mo ni kune vinaka kina. Niu dau veivakavulici raraba au sega ni vakatara na noqu vakasama me vakamuria e dua tale na salatu vakavo ga na kena a vakaraitaka vei au na Yalotabu, ka sai koya oqo na noda itutu me da mai tawana ni da mai sota kei ira na Yalododonu, se ena noda laki vunautaka yani na kosipeli.⁴

E kaya na Turaga, ena nona vosa vei Josefa Simici: “Ia na ka kecega era sa tukuna ena veivakauqeti ni Yalo Tabu, sa ivunau; io sa ivakaro ni Turaga, sa loma ni Turaga, sa vosa ni Turaga, ka domo ni Turaga; io sa kaukauwa ni Kalou me ia kina na veivakabulai.” [V&V 68:4.] Na cava na vuna e vakakina oqo? Oqo e baleta ni Yalo Tabu e dua vei iratou na Lewetolu Vakalou, kei na gauna e vosa kina e dua na tamata ena Yalo Tabu, sai koya oqori na vosa ni Turaga. E dodonu me da vakasaqara na Yalotabu oqo me rawa ni dau tiko vata ga kei keda ena veigauna kece ka yaco me ivakavuvuli ni ivakatakila vei keda.⁵

Sa gadrevi sara me dau vakani tikoga na nodra vakasama na matatamata oqo, ka me da vakararavi kece vua na Yalo Tabu kei na Turaga me vakani na noda vakasama mai na mataniwai kaukauwa ni vuku ka lako mai vua na Kalou, ni da sega ni rawata mai na kakana mai na dua tale na ivurevure me vakani kina na vakasama ni tawa mate rawa ni tamata.⁶

E taukena tu na tamata e dua na yalo me na vosota tikoga ka tawamudu, oqo na yalo mai vua na Kalou, kei na veigauna kecega ena sega ni vakani kina mai na ivurevure se kaukauwa vata o ya ka a buli koya ena sega ni rawa vua me yalo vakacegu.⁷

E sega ni dodonu me da veivakavulici kevaka e sega vei keda na Yalo Tabu.⁸

Ni da vakavulica na kosipeli, me da nanuma tiko ni veika dina e matata ka rawarawa sara sa ikoya e veivakavukui vakalevu.

Na ivakatakila i Jisu Karisito e vakatavulica vei keda ni a sucu vakayago na iVakabula, e a qai kaya o Tamana ni na sega ni solia taumada vua na taucoko ni veika kece ia ena tubu tiko ena loloma ki na loloma me yacova ni sa taura taucoko ka vakatokai me Luve ni Kalou baleta ni a sega ni taura taumada na iukuuku taucoko [raica V&V 93:12–14]; ena ivakarau vata o ya me da vakasaqara ena yaloda taucoko me da tubu ena loloma vakalou, rarama kei na dina, ni na yaco na kena gauna me da ciqoma na kena taucoko [raica V&V 93:20].

Sa tu vua na Turaga e vuqa sara na ivakavuvuli cecere me baleti keda, ka sa ivakavuvuli cecere duadua e tu vua me baleti keda sai koya e matata ka rawarawa. Na kena e matata duadua sai koya na imatai ni ivakavuvuli ni kosipeli ka muataki keda yani ki na bula tawamudu ia sa sega tale ni dua e lagilagi se bibi cake vei keda. Era na dau cakacaka na tamata me ra vakaraitaka na taledi, vulica ka kila ka ena tabaivola se vunau, era na saga me ra vunautaka na veika vuni ka vakatakila eso na ka tani, cecere ka totoka, ka ra na oga me baleta na ka oqo ena nodra igu taucoko, ena yalo kei na kaukauwa ni tamata ka sega kina na veivuke ni Yalo Tabu ka ra sega ni vakavukui na tamata ka takiveiyaga na nodra vunau. Sai koya ga na veika e matata ka rawarawa duadua ena vakavukui keda vakalevu, kevaka e vakavulici ena Yalo ni Kalou, ka sega tale ni dua na ka e bibi cake se me da kune vinaka kina. Kevaka ena dau tiko vata kei keda na Yalotabu o ya, ka tikoga e lomada ena veigauna, ka vakararamataka na noda vakasama ena siga kei na bogi—eda sa lakova tiko na vanua taqomaki.⁹

Au gadreva meu vakaraitaka ena noqu sa mai veikilai ena lotu oqo, sa raici ira na tamata, era vakaturi cake ka tovolea me ra italai ni Kalou. Era tovolea me ra vakamacalataka na veika eso era sega ni kila kina e dua na ka, me ra rairai vuku kina. Sa vakaitamera sara na ivakarau vakaoqo ena itabagauna oqo. E dua vei ira na iliuliu iTalatala Qase ni Lotu e a gole yani ka vunautaka eso na ivakavuvuli vei ira na tamata. E a rogoca rawa o Josefa na ka oqo ka kerea vua me vakaraitaka vakaivola vua na ivakavuvuli. A vola sara, ni sa vakacavara a wilika ki vua na Parofita. E a tarogi Josefa se cava na nona nanuma, “Baleta,” a kaya o Josefa, “sa dua sara na ituvatuva totoka, au sa raica ka kunea kina e dua na cala”— “Na cava o ya Baraca Josefa?” A kaya o Josefa—“E sega ni dina.” Au kaya kina, e dau yaco ena so na gauna vua e dua, me vakasamataka ni sa vuku, ka tovolea me vakavulica e dua na ka e sega ni tiko ena Vunau kei na Veiyalayalati kei na cakacaka ni Lotu, ka a sega ni dina. …

… Vunautaka na dina ni ko sa kila vakavinaka. Kakua ni vakamacala ena veika o sega ni kila kina e dua na ka, ni na sega ni yaga vua e dua na tamata. Kevaka ko na vakarorogo ki na ivakavuvuli lasu ko na vagolei tani ena yalo velavela. Mo nanuma ka muria na ka oqo, ko na kune vinaka kina. Tudei tu ena salatu ni dina, ena yaco vei iko na veika vinaka.¹⁰

Na gauna eda soqoni kina me da vulica na kosipeli, eda na gadreva na Yalotabu me vakataki koya e veituberi.

Au sa nuitaka ni Yalo ni Kalou ena rawa me tiko sega walega vei ira era vosa ka veivakavulici … ia vei ira talega era dabe ka vakarorogo tiko.¹¹

Eda gadreva taucoko na veivakauqeti nei koya sa Cecere Sara—se da vunau se vakarorogo.¹²

Au kaya vei ira na taciqu kei na ganequ, me da tovolea ka vakarautaka na noda vakasama kei na lomada ena masumasu vua na Turaga, me rawa kina me da vakararamataki ena Yalotabu kei na veivakauqeti ni Yalo Tabu, ka raica rawa me na taqomaki ena salatu ni bula, kei na gauna eda ciqoma kina na nodra ivakavuvuli kei na ivakasala na italai ni Kalou, ka rawa kina me da tugana ena lomada ka vakayacora ena noda bula.¹³

Kevaka me da taukena na ivotavota ni Yalo ni Kalou ka sa noda madigi me da marautaka ka gumatuataka na noda ilesilesi, ena qai tu vei keda na ivakadinadina o ya ka dodonu me umanaki tu e lomada ena gauna e vakatakilaitaki mai kina e dua na ivakavuvuli vou, se ivakavuvuli makawa ka vakamatatataki sara vakavinaka. Ena sala oqo eda na qai vakaiyau mai na nodra vunau o ira na veitacini, ka rawa me kumuni vata na ivakavuvuli ni bula tawamudu.¹⁴

Au sa nuitaka ka masulaka ni na gauna eda soqoni vata kina eda na rawa ni marautaka na Yalo ni Kalou ka lomavata me vaka ga e dua na tamata; ka me vakatakilaitaki na noda masu vua na Turaga, ka me tiko vata kei keda na nona veivakalougatataki kei ira era vunauci keda me ra vakayacora ena veivakauqeti ni Yalo Tabu kei na kaukauwa ni Kalou.¹⁵

E dodonu me da dau vakarorogo vagumatua vua [na qasenivuli], ena masu kei na vakabauta, ni gauna eda cakava kina oqo eda na taukena na veika sa vakasinaita tu na lomana na veika ena yaga vei keda.¹⁶

Ena gauna e tu … ka vosa kina e dua na lewe ni Mataveiliutaki ni Lotu oqo, se na Kuoramu ni Le Tinikarua, se dua ga vei ira na iTalatala Qase, era na vakabauti ira na tamata, ka namaka me ra na marautaka na Yalo Tabu ni cauraka mai e dua na ka era na vakavukui kina; e voleka ni tamata taucoko era vakasaqara na ka oqo. Ena dua tale na rai au kaya kina ni ko iratou na Mataveiliutaki, na Le Tinikarua, kei ira na iTalatala Qase … era namaka vei ira na tamata me tiko [talega] kei ira na Yalo ni Turaga me ra kila vakavinaka kina, me vaka sa gadrevi sara, ka ra vakasamataka donu na veika e cauraki vei ira me vaka sa namaki tu vei ira na veitacini era vosa me ra vakavulica na vunau, ivakavuvuli, na dina kei na ivakatakila i Jisu Karisito.

Na gauna e vakayadrati ka vakararamataki kina na noda vakasama na tamata ena kaukauwa ni Kalou kei na isolisoli ni Yalo Tabu sa rawa kina me ra vakavinavinakataka ka maroroya dei na ivakavuvuli ni dina tawamudu kei na ivakatakila sa solia mai na Kalou … era sa na qai vakarautaki me ra taukena na veivakalougatataki sa sovaraka mai vei ira. Oi kemuni yadua ko ni sa taura oti na veivakalougatataki oqo, kau vakabauta ni sa yaco kece vei kemuni ena so na gauna ni nodra bula ni ra vakila e dua na veisau ki na nodra vakasama. Au kila ni oqo e a yaco vei au kau vakabauta ni vakakina vei kemuni.

Ena so na gauna [e] tadola na raivotu ni noqu vakasama meu kila vakavinaka kina na vosa ni Kalou kei na nodra ivakavuvuli na nona italai.— Sa tadola ka vakayadrati na raivotu ni noqu vakasama ena kaukauwa ni Kalou kei na isolisoli ni Yalo Tabu. O koya gona ena gauna au mai dabe kina eke ka rogoci iratou na Mataveiliutaki, kei ira na italai ni Kalou me ra vakavulica na ivakavuvuli ni ivalavala dodonu, kei na vosa ni Kalou kivei keimami, au a vakila kina na igu, na kaukauwa kei na bibi ni dina tawamudu oqo era sa vakatakilaitaka ki na neimami vakasama, ia ena so na gauna e dau vakavulici na dina vata ga oqo, ia era yali sara yani ka ra sega ni vakauqeta na noqu vakasama.

… Au kila ni ka bibi me da cakacakataka na rawati ni Yalotabu, me da vakatataki kina ka tugana voli vei keda kei na gauna eda vunauci kina sa na vakarautaki na noda vakasama me ciqoma …

Au na kaya eke ni gauna era ciqoma kina na kosipeli e vuqa vei keda ka soqoni vata yani kei ira na Yalododonu ni Kalou, sa ka bibi me da cakacakataka nikua, me da bula voli ena veivakauqeti ni Yalotabu ka me tubu tikoga me taqomaki keda ena noda ivalavala ena kedra maliwa na luve ni tamata. Na gauna ga e tiko kina vua e dua na tamata na Yalo Tabu ka rogoca na dina matata ka rawarawa ni veivakabulai era sa iyau levu duadua mai vei ira era tiko e yasana, ka sa tu vakarau o koya me kauta laivi na veika taucoko vakavuravura ka vakadeitaka e kea na nona vakabulai, ia ena gauna e butobuto kina na nodra vakasama na tamata, ena cawadru laivi mai vei ira na Yalo Tabu kei na mana ni kosipeli o ya, ka ra sega ni kila na madigi kei na dokai ni veimaliwai kei ira na Yalododonu ni Kalou …, ka ra sega talega ni ra tudei tiko ena nodra yalodina ki vua na Tamadra Vakalomalagi, ka vakarokorokotaka na yacana e vuravura se taqomaka na nodra veiwekani kei ira era lewena na matabete tabu, ka yaco me ra lakova yani na butobuto. … Eda qoroqoro ka kurabui ni da vakararamataki ena Yalo ni Kalou kei na ivakatakila sa solia vei keda o koya, kei na gauna eda vakayadrati me da kidava rawa kina na bibi ni veika oqo eda na qai raica kina na kena yaga kei na veivakaqaqacotaki kivei keda, e sega walega ni kena vakarautaki na noda vakasama me lako yani ki na vuravura ni yalo, ia me vakarautaki keda me da sotava na Tamada Vakalomalagi.¹⁷

Vakatutu ni Vuli kei na Veivakavulici

Taurivaka na veivakasama oqo ni ko ni vulica na kena iwase oqo se ni ko ni vakavakarau mo ni veivakavulici. Raica na tabana e vi–x, me ikuri ni veivuke.

Wilika na malanivosa nei Peresitedi Woodruff ena imatai ni rua na parakaravu ni iwase oqo (tabana e 63. Na vakasama cava me baleti koya e tiko ena malanivosa oqo? Na vakasama cava e tiko kina me baleta na veivakavulici kei na vuli?
Na cava o ni sa vulica rawa mai na vosa nei Peresitedi Woodruff me baleta na veivakavulici ena kaukauwa ni Yalotabu? (Raica na tabana e 63, 66; raica talega 2 Nifai 33:1–2.) Eda na vakavakarau vakacava me da ciqoma kina na veidusimaki ni Yalo Tabu ni da veivakavulici?
Na veika cava o ni sa sotava ena nomuni vakavulica ka vuli mai ena Yalotabu?
Raica lesu na tikina ka tekivu tiko ena tabana e 65. Na cava e rerevaki kina me da tukuna na veika eso eda sega ni kila kina e dua na ka? Na cava na vuna eda vakavukui vakalevu cake mai na dina e matata ka rawarawa?
Na cava eso na nodra itavi na vuli tiko? (Raica na tabana e 66–69.) Ena rawa vakacava na noda taukena na veika yaga cecere mai na dua na lesoni se vunau ni kosipeli? Me tugani se veivosakitaki na sala mo ni vakavakarau mo ni vakavulici kina mai vua na Yalotabu.
Raica lesu na imatai ni parakaravu ena tabana e 68. Ena nomuni kila ena kena vakavulici na kosipeli, ko ni sa rawa ka vakacava mai na nodra vakarorogo, masumasu kei na vakabauta o ira ko ni vakavulica?
Ena vukei keda vakacava na ivakavuvuli ena wase oqo ena noda vulica na ivola oqo? (Raica talega na tabana e vi–x. Ena mana vakacava na ivakavuvuli oqo ni da vulica ka vakavulica na kosipeli ena noda vuvale?

iVolanikalou Veisemati: Iperiu 4; 2; 2 Pita 1:21; 2 Nifai 31:3; Alama 17:2–3; V&V 11:18–21; 42:14; 50:13–22; 52:9; 100:5–8