Wase 1

Na Vakalesui mai ni Kosipeli

Sa vakalesuya mai na Turaga vua na Parofita o Josefa Simici na Nona kosipeli kei na kena lagilagi dina, kaukauwa, dodonu, kei na rarama.

Na Bula nei Wilford Woodruff

Ena gauna a se gonelailai kina o Wilford Woodruff, o koya kei na nona matavuvale a veikilai sara kei na dua na turaga o Robert Mason, e dua e buta vinaka tu ena veika vakaivolatabu. E kaya kina o Peresitedi Woodruff:

“E vakabauta o koya ni dodonu me ra tiko na parofita, iapositolo, tadra, raivotu kei na ivakatakila ena lotu i Karisito, me vaka ga a yaco tu ena gauna makawa; ka vakabauta tu o koya ni na taracake na Turaga e dua na kawatamata kei na dua na Lotu, ena gauna edaidai, ka na tiko kina na parofita, iapositolo kei na isolisoli taucoko, kaukauwa, kei na veivakalougatataki, na kena e taucoko ena dua na itabagauna kei vuravura. … E dau vakawasoma na nona dau gole mai ki na neitou vale na turaga oqo niu se cauravou lailai, ka vakavulici au kei iratou na tuakaqu ena ivakavuvuli o ya; kau a vakabauti koya.

“Sa dua na ka na [nona] daumasu, ka dau tadra ka raivotu, ka vakaraitaka vua na Turaga e vuqa na ka, ena raivotu, ka me na vakavotukanataki ena iotioti ni gauna.

“Au na talanoataka eke e dua na raivotu, ka a tukuna vei au o koya. Na iotioti ni gauna au a raici koya kina, e a kaya: ‘Au a cakacaka tiko ena noqu iteitei ena sigalevu tutu ka sa solegi au e dua na raivotu. Au sa laki tu ena dua na loma ni veikau vakaitamera ni kau vuata: Au sa viakana vakalevu, kau taubale yani vakabalavu ena loga ni veikau vuata, ena noqu vakasaqara e dua na kequ vuata; ia au a sega ni kunea e dua ena loga ni veikau vuata taucoko oqo, kau a tagi niu sega ni kunea rawa e dua na vuata. Niu sa tu ka wanonova yani na loga ni veikau vuata, ka lomatarotarotaka na cava e sega ni kune kina e dua na vuata, era sa tekivu babale e yasaqu na veivunikau, me yacova sara ni sa sega tale ni dua na vunikau me duri tu ena loga ni veikau vuata oqo; niu sa taleitaka tu na sarava na ka oqo, au sa raica sara ni ra sa buroro mai na kena sulisuli lalai mai na wakadra na vunikau ka ra bale tu, ka ra seraka yani ki na veivunikau bulabula. Era kovukovu, se ka beta, ka vua me yacova ni sa sobi na vunikau taucoko ena vuana totoka au se sega mada ni bau raica, kau a rekitaka niu sa raica na vakaitamera ni veivuata totoka. Au a kalawa yani ki na dua na vunikau ka vakasinaita na ligaqu ruarua ena levu na vuata, ka qoroya na kena totoka, ia ena gauna meu tovolea kina e a tasogo vei au na raivotu, kau sa tu tale ena vanua vata ga au tu kina e liu ni se bera na raivotu.

“ ‘Au a tekiduru e dela ni qele, ka masuta na Turaga, ka kerea vua, ena yaca i Jisu Karisito, me vakaraitaka vei au na ibalebale ni raivotu. E a qai kaya vei au na Turaga: “Oqo na ibalebale ni raivotu; na vunikau lelevu ni veikau vuata e matataka tiko na itabagauna ni tamata o bula tiko kina. E sega ni tiko e dua na Lotu i Karisito, se matanitu ni Kalou e vuravura ena nomu itabagauna. E sega ni tiko e vuravura e dua na vua ni Lotu i Karisito. E sega ni tiko e dua na tamata edaidai kei na itabagauna oqo e lesi koya na Kalou me qarava e dua vei ira na cakacaka tabu ni kosipeli ni veivakabulai. Ia ena itabagauna e tarava, oi au na Turaga au na tauyavutaka na noqu matanitu kei na noqu Lotu ena vuravura oqo, kei na vua ni matanitu kei na lotu i Karisito, me vaka era vakamuria na parofita, iapositolo kei ira na yalododonu ni veitabagauna, ena tauyavutaki tale ena kena taucoko e vuravura. Ko na bula tiko mo raica na kena siga, ka taura e ligamu na vuana; ia ko na sega ni kania rawa ni ko bula tiko.” ’ ”

E a tomana o Peresitedi Woodruff: “Ena gauna sa vakacavara kina [o koya] na italanoa ni raivotu kei na kena ibalebale, a qai kaya vei au, … ‘Au na sega ni kania rawa na vuana niu se bula tiko; ia ko na kania, ka yaco mo dua na iliuliu gugumatua ena matanitu oqori.’ E a qai gole yani ka biuti au tu mai. Sai koya oqori na iotioti ni veika e a tukuna vei au ena vuravura oqo. …

“E a raica o koya na raivotu oqo ena yabaki 1800, ka qai vakadeitaka vei au ena 1830—oqo na vulaitubutubu vata ga ka a tauyavu kina na Lotu.

“Na raivotu oqo, kei na nona ivakavuvuli tale eso vei au, e a curuma sara ga na noqu vakasama, kau a masu vakavuqa sara vua na Turaga me liutaki au na nona Yalotabu, ka vakarautaki au ki na nona Lotu ni sa tadu mai.”

Ena gauna sa lewena kina na Lotu o Wilford Woodruff, e a vola e dua na ivola vei Robert Mason na nona itau. “Au … a tukuna vua niu sa kunea na Lotu i Karisito ka a tukuna vei au,” e a vakananuma lesu. “Au a tukuna vua na kena tauyavutaki kei na kena vakatakilai mai na iVola i Momani; ka sa tu ena Lotu na parofita, iapositolo, na isolisoli kei na veivakalougatataki taucoko sara, ka ra sa tauca na Yalododonu na vuanikau dina ni matanitu kei na Lotu i Karisito me vaka ga e a vakamatatataki ena kedra maliwa na Yalododonu ni Turaga sa vakaraitaka vua ena nona raivotu. E a taura na noqu ivola, ka wilika ka se baci wilika tale, ka taura me vaka ga e a taura na vuata ena raivotu; ia e sa qase sara o koya, ka vakalailai ga sa leqa. E a sega ni bula tiko me raica e dua na iTalatala Qase me vakayacora vua na cakacaka tabu ni Kosipeli.

“Ni oti ga na kena vakatakilai mai na ivakavuvuli ni nodra papitaisotaki na mate, au a lako sara yani ka laki papitaisotaki ena vukuna.”¹

iVakavuvuli nei Wilford Woodruff

Na kosipeli i Jisu Karisito e tawamudu ka sega ni veivukiyaki.

Na Turaga e sa vakayacora e vuqa sara na ka ena veitabagauna duidui eso me tauyavutaka kina na Nona matanitu e vuravura; e sa vakatubura o Koya na tamata eso—era yalo dokai—ka ra tadu mai me ra mai bula vakayago ena veigauna duidui kei na itabagauna. E vakauqeti ira na tamata oqori; solia vei ira na ivakatakila; era umanaki ena veivakauqeti, ena rarama, na dina, kei na veika ni matanitu ni Kalou.²

Kevaka beka mo na sotavi tamada o Atama, kei Seci, Mosese, Eroni, kei na Karisito, se o ira na iapositolo, era na vakavulica ga na ivakavuvuli eda sa vakavulici kina; era na sega ni vukica e dua na tikina. E tawamudu na kosipeli oqo ena kena inaki ka sega ni veivukiyaki na kena ituvaki.³

E a dua ga na kosipeli, ka na dua ga ena soli vei ira na luve ni tamata, ka sa sega mada vakadua ni veisautaki ka na sega ni na veisautaki rawa ena veigauna se ena tawamudu. Sa vaka tu o ya ena veitabagauna ni vuravura oqo; e duadua tu ga na kena cakacaka tabu. O ira era vakabauta na kosipeli era vakabauti Jisu ni bera ni tadu mai me mai vakayago, e a vunautaki taumada na veivutunitaki ni ivalavala ca ni bera na nona gauna eke ka vakakina ena siga ni kua, era a vakayacora talega na papitaiso ni bokoci ni ivalavala ca kei na veitabaki ni liga ni isolisoli ni Yalo Tabu; ka sa tu vei ira na tauyavutaki ni Lotu kei ira na tamata vakauqeti. … Na veika oqo sa ka yaga sara ena itabagauna yadua kei vuravura.⁴

Ena gauna ga e vakatikora kina na Turaga e dua na Lotu e vuravura, ka na ciqoma na Lotu o ya na Kosipeli i Karisito, ka ra marautaka na Yalo Tabu, na isolisoli kei na loloma vakalou yadua ka sa nona tu na Lotu ni Kalou e sa na nona na Lotu o ya.⁵

E a tauyavutaka o Jisu Karisito na Nona Lotu ena gauna ni Nona veiqaravi vakatamata, ia era a qai vukitani na tamata ni oti ga na Nona mate kei na Tucaketale.

E a kauta yani na kosipeli o Jisu Karisito vei ira na Jiu ka tauyavutaka ena kedra maliwa na Nona matanitu, ka umanaki vata mai kei na kena isolisoli, loloma vakalou kei na kaukauwa taucoko: era a vakabulai na tauvimate; vakasavi ira tani na tevoro; sa matanataki ena kedra maliwa na isolisoli. Ia era a besetaki Koya ga na Jiu, ka yaco sara me ra vakamatei Koya. … E a sega ni ciqomi Koya; ni oti o ya, me vaka sa vakaroti, e a kau yani na Kosipeli oqo vei ira na kai Veimatanitu tani.⁶

Ena gauna e a soli kina na matanitu vei ira na kai Veimatanitu Tani, sa soli vata kei ira na iapositolo kei na parofita, vata kei na kaukauwa ni veivakabulai, kei na ivakatakila ka soli vakadodonu sara ga mai vua na Kalou, na isolisoli kei na loloma vakalou kecega era vakabauta tu na Jiu, ka ra a marautaka ena gauna era a yalodina tu kina: ena gauna a kau yani kina vei ira na kai Matanitu tani e a vinaka taucoko tu na kena ituvaki; ia ni sa toso tiko na gauna era a veisautaka na cakacaka tabu ni matanitu ni Kalou, ka ra lutu vakatalega kina ena tawa vakabauta vata ga o ya, ka sa vaka tu o ya me vica vata na senijiuri ka sega tu vei ira na ituvatuva ni lomalagi. … Ni toso na gauna na isolisoli, kei na loloma vakalou, kei na kaukauwa ni matanitu ni Kalou e a kau tani, kei ira na tamata era a veiqaravi tiko ena lotu taumada ni Kalou era a voleka ni vakamatei taucoko; era a vakamatei baleta era a saga me ra maroroya na kena savasava, ka ra saga ena nodra kaukauwa taucoko me ra tauyavutaka na ivakavuvuli sa vakatakila mai na Kalou.⁷

Era sa sivi yani na veisenijiuri ogaoga. Era sucu mai e milioni na tamata, ra mai bula voli e vuravura, mate, ka gole yani ki na vuravura ni yalo, ka sega mada ga ni dua vei ira, ena noda sa kila tu, me ra gole yani ena kedra maliwa na kawatamata ka vakayacora na cakacaka tabu ni Kosipeli ni bula kei na veivakabulai. E sega ni vakabekataki, ni ra milioni na tamata vinaka, era a cakacaka ena veika era kila tu vakavuku … era bula ena nodra gauna ka vunautaka na Kosipeli ena vuku sa tu vei ira. Ia e a sega vei ira na kaukauwa me ra qarava kina e dua na cakacaka tabu ka tu kina e dua ga na kaukauwa ni oti na mate. Era sega ni lewena na Matabete tabu.⁸

Sa voleka me dravuisiga ko vuravura ena kila ka ni ka dina, kei na Yalo Tabu ka dau sovaraki me liutaki ira na kawatamata ena salatu ni veika dina. … Ena kena vakayacori ka tauyavutaki na ivakarau kei na veisoqosoqo ena veitabagauna kecega, ka ra vakaraitaka ni ra matataka tiko na yavu ni veivakabulai, ia era veisaqasaqa vakaiira, me yacova sara ni ra sa tauyavutaka e vuqa na veimatalotu ka duidui na nodra yavu ni ivakavuvuli vakalotu, ka sa vakadinadinataka tu na cala sa tiko.⁹

Ni mai cava na veisenijiuri ni vukitani, sa vakalesuya mai na Turaga na taucoko ni kosipeli vua na Parofita o Josefa Simici.

Sa mua yani na kosipeli ena noda gauna ena kena lagilagi dina, kaukauwa, dodonu, kei na rarama, me vaka ga ena gauna sa dau digitaka kina na Kalou e dua na mataqali tamata ena kedra maliwa na tamata. Na ituvatuva vata ga kei na kosipeli e a mate kina na Karisito, ka dave kina na nodra dra na iapositolo me ra vakadeitaka kina, sa mai tauyavutaki tale ena itabagauna oqo. E a tadu mai vakacava? Ena nona veiqaravi e dua na agilosi tabu ni Kalou, mai lomalagi, ka a [veivosaki] vata kei na tamata ka vakatakila vua na butobuto ka ubia tu na vuravura, ka vakatakila vua na butobuto e solega tu na vuravura, ka vakamacalataka vua na butobuto levu e vakavolivolita tu na veimatanitu, na veika vakaoqori ka dodonu me yaco tiko ena itabagauna oqo, ka veitarataravi mai me yacova sara na nona sa na lesu mai na Mesaia [raica Josefa Simici—Ai Tukutuku 1:30–49]. E a vakavulica na agilosi vei Josefa Simici na veivakavuvuli oqori ka sa gadrevi ena kena vakabulai na vuravura; sa qai solia na Turaga vua na ivakaro, ka vauca vua na matabete, ka solia vua na kaukauwa me qarava na cakacaka tabu ni vale ni Turaga. E a tukuna vua ni sega ni tiko vei ira na tamata na kosipeli, ka sega ni dua na mataisoqosoqo dina ni nona matanitu e vuravura, ni ra sa vukitani na tamata mai na nona cakacaka dodonu, era veisautaka na cakacaka tabu ka voroka na veiyalayalati tawamudu, era sa vakaiyau ena lasu kei na veika e sega na kedra yaga. E a tukuna vua ni sa yaco mai na gauna me sa vakatikori kina na yavu ni kena tauyavutaki na Matanitu ni Kalou vei ira na tamata ena iotioti ni gauna ni vakavakarau ni kena rusa na vuravura.¹⁰

Na cava e a vakayacora o Josefa Simici ena nona sa ciqoma [na] matabete kei na kena cakacaka tabu? Au na tukuna na cava e a vakayacora o koya. E a vakayacora na veika era a sega ni cakava rawa o ira na italatala kei na veimatanitu Vakarisito, kei na vuravura taucoko ena loma ni 17 na senijiuri kei na 50 na itabagauna sa oti—e dina ga ni cauravou [tawavuli], e a vakaraitaka ki vuravura na kosipeli i Jisu Karisito ena kena taucoko, matata ka rawarawa, me vaka a vakavulica o koya na kena iTaukei kei ira na nona iapositolo; e a vakatakila na lotu i Jisu Karisito kei na matanitu ni Kalou e taucoko vinaka tu na kena ituvaki; me vaka e vakamacalataka o Paula—ena ulu kei na yava, taba kei na liga, na veitiki ni yago yadua e ka uasivi e matai lomalagi kei vuravura [raica 1 Korinica 12:12–28]. E rawa vakacava vua, e dua na cauravou [tawavuli] me vakayacora rawa na veika era a sega ni vakayacora taucoko ena loma ni tinikavitu na senijiuri. E baleta ga ni a curumi koya na kaukauwa ni Kalou, ka a vakasalataki mai vei ira na tamata era, a bula tu e liu ka ra vunautaka na kosipeli vata ga, o koya gona ni sa vakayacora na ka oqo sa yaco kina na veika era a parofisaitaka na Tamada o Atama, Inoke, Mosese, Ilaisa, Aisea, Jeremaia kei Jisu kei ira na nona iapositolo.

Sa kaya kina o Paula—“Niu sa sega ni maduataka na itukutuku vinaka kei Karisito, ni sai koya oqo na kaukauwa ni Kalou me vakabulai kina ko ira yadua era sa vakabauta.” [Raica Roma 1:16.] Me ra qai kaya vakakina na Yalododonu Edaidai—“Keimami sa sega ni maduataka na kosipeli kei Karisito.” Au sega ni maduataka meu kaya ni sa parofita ni Kalou o Josefa Simici; au sega ni maduataka meu vakadinadinataka ni sa kacivi koya na Kalou, ka vakatikora na yavu ni Lotu oqo kei na matanitu e vuravura, ni sa dina na ka oqo, ka sa rawa kina vua e dua na tagane se yalewa e vakauqeti koya na Yalo Tabu me raica rawa ka kila vakavinaka na veika oqo.

… E a bula tiko o koya me yacova ni sa ciqoma na idola taucoko, cakacaka tabu kei na lawa e se bau soli vua e dua na tamata e vuravura, mai vei Atama na Tamada ka lako sobu mai, ka yacova mai na itabagauna oqo. E a ciqoma na kaukauwa kei na idola ni nodra vakasoqoni na mataqali i Isireli ena iotioti ni gauna mai vei Mosese; e a ciqoma na idola ni nodra vauci na lomadra na qase vei ira na gone kei na lomadra na gone vei ira na nodra qase mai na liga i [Ilaija]; e a ciqoma na cakacaka vakaiapositolo, kei na kena ilesilesi, mai vei Pita, Jemesa, kei Joni; e a ciqoma na idola kei na kaukauwa taucoko e tiko ena itoko i Josefa ka tu ena liga i Ifereimi, mai vei Moronai; e a ciqoma na matabete i Eroni kei na kena idola kei na kaukauwa taucoko, mai vei Joni na dauveipapitaisotaki; kei na idola kei na kaukauwa kece tale eso e tiko ena itabagauna oqo, kau sega ni maduataka meu kaya ni sa parofita ni Kalou o koya.¹¹

Ena vuku beka ni a dodonu me bula tiko o Josefa Simici me volekata yani e dua na udolu na yabaki me vakataki Atama, ia e a bula ga me yabaki tolusagavulu kawalu. E a vakatakila mai o koya na itukutuku ni ititoko i Josefa ka tu e liga i Ifereimi—na kedra ivolatukutuku o ira era bula mai liu ena vanua oqo. E a vakadewataka rawa mai na kaukauwa ni Kalou, ka sa tabaki tu ena vuqa sara na veimataqali vosa. E kuria, na nona tauyavutaka na Lotu i Jisu Karisito ni Yalododonu Edaidai ka vakayavutaki vei ira na iapositolo kei na parofita, ka sa kena vatunitutu ivakadei o Jisu Karisito [raica Efeso 2:20]. Era sa tabaki ki na Matabete na tagane mai na veimataqali ituvaki ni bula, me ra lako ka kauta yani na Kosipeli oqo ki vuravura. E a tukuna na Kalou vei Josefa Simici ni sa kacivi me samaka tale na loga ni vaini ena iotioti ni gauna ni se bera ni lesu mai na Luve ni Tamata [raica V&V 24:19]. Mai na gauna o ya, era sa vakau yani e udolu na iTalatala Qase i Isireli ki vuravura me ra vunautaka na Kosipeli. … Sa rawa vua e dua ga na tamata me wilika na ivakatakila ena ivola ni Vunau kei na Veiyalayalati, ka a soli mai vua ena gauna lekaleka wale e a bula tiko kina. Sa dua vei ira na itukutuku volai cecere duadua e bau solia e dua na tamata ki na vuvale ni kawatamata. E sega walega ni koya oqo, ia e a tuvanaka na edaumeni ka vakayacora e vuqa tale na cakacaka. O cei beka e a namaki koya me vakayacora vakalevu cake na ka mai na kena e rawata rawa ena gauna lekaleka walega e a bula kina? Au a ciqoma mai vua na noqu edaumeni. E a vakatakila mai o koya na cakacaka tabu kece oqo ka sa tu oqo vei ira na Yalododonu Edaidai. Oqo na ka dina, ni sa dua na ka mana ka veivakurabuitaki ni a vakayacora rawa vakavinaka na veika e kitaka.¹²

Sa tu vei keda na dodonu me da lako voli ena rarama ni kosipeli vakalesui mai.

Au vakatoka me ra tamata vakalougatataki mai vua na Turaga o ira e sa vakatakila vei ira o koya na kosipeli i Jisu Karisito, o ira e a vakatikora vei ira na matabete tabu kei na lewa me qarava na cakacaka tabu ni nona vale. … Au vakatoka oqo me sa keda ituvaki ena siga ni kua; sa tu vei keda na madigi me da lako voli ena rarama, sa tu vei keda na madigi me da vakasamataka ka kila na dina, me da kila na salatu me da vakabulai kina ka vakacerecerei ena mata ni Tamada na Kalou. Eda sa tu ena dua na itutu sa rawa kina me da kila na nona vakasama kei na lewa, mai vei ira na nona italai kei na parofita. Na Turaga e sa soli ira na ivakavuvuli kei na tamata uqeti vei keda, o ira era sa vakauqeti ena Yalotabu kei na kaukauwa ni Kalou, vakaisulutaki ira ena vuku me ra vakavulici keda ena veigauna ena salatu me da lako voli kina. Oqo e dua na veivakalougatataki levu.¹³

Ena noqu raica … na ituvaki ni matavuvale ni kawatamata, ka vakasamataka na noda duatani sara mai vei ira na vo ni kawatamata, au nanuma ni sa dodonu me da vakavinavinaka vua na noda Dauveivukei cecere. Era milioni na lewe ni matavuvale ni kawatamata era dausoqoni vata yani ena veivale, ena kacidrela, valenisoqoni, kei na valenilotu me ra qarava kina na Kalou, ia e tiko beka e dua na ivavakoso vakaoqori era soqoni vata mai ena nodra kila vakavinaka tu na dina, vakavo ga ke dua na iTalatala qase Yalododonu Edaidai e kacivi me vunau vei ira na lewe i vuravura? Era lako kece beka mai ena nodra kila vakavinaka tu na ivakavuvuli ni kosipeli vata ga, na yavu ni veivakabulai vata ga, na kosipeli i Jisu Karisito, ena dua na sala kei na ivakarau me ra duabau kina?

Ia oqo, e sega ni rawa vua na Kalou me vakaduabautaka na tamata ena vuqa na veimataqali vakabauta, kei na levu ni duidui ni vunau, kei na nodra veisaqasaqa vakaiira, me vaka sa yaco tu e vuravura, ia eda sa tamata kaulougata; sa tu vei keda na ivakavuvuli ni duavata kei na duabau, kei na noda bulataka era na semati keda vata me da duabau ga.

Ena yavu ni ivakavuvuli oqo era sa vakalougatataki ka sereki kina na Yalododonu Edaidai. Sa vakaitamera na noda vueti mai na leqaleqa kei na veilecayaki, ivakavuvuli lasu, na butobuto, na veika cala kei na vakanananu lasu ka ra vakabutobutotaka tu na noda vakasama me yacova na gauna sa cilavi ira kina na luve ni tamata era a tiko ena butobuto na rarama, ni a vaka tu oqo vei keda kece sara; me yacova na gauna e tadu mai kina na rarama eda a sasaga voli me da rawata na veivosoti ena butobuto, ena kena ka ca duadua. E dina beka ni da dau dina, ka da dau vakauqeti ena yalo e vinaka duadua ka vakalou, ia me yacova na kena sa vakatakilai mai na taucoko ni kosipeli, e a vaka tu na mataboko na vuravura ena nona vakayamoca na lalaga [raica Aisea 59:9–11]. E a sega tu na noda iApositolo, sega na Parofita, era a sega tu na noda tamata uqeti me ra tu ka tukuna vei keda na veika me da cakava me da vakabulai kina, ka da laki vakaogai tu ena leqaleqa o ya, rarawa kei na butobuto ka ra vesuki tu kina na luve ni tamata ena gauna era bula voli kina ena ivakavuvuli lasu, itovo lasu, kei na qasenivuli lasu. …

Eda sa sereki mai na veika oqori, sa cereki laivi mai vei keda na o ni butobuto, ka sa tekivu me cilava na noda vakasama na rarama ni dina tawamudu. …

Au sa wilika oqo me dua vei ira na veivakalougatataki cecere ni Kalou e solia vei ira na luve ni tamata, me vakamatatataki kina vakavinaka vei ira na ka dina. …

Sa evei na tagane se yalewa ka sa kila vinaka tu e dua na ka me baleta na Kalou se me baleta na tawamudu me yacova ni sa vakatakila mai o Josefa Simici na taucoko ni kosipeli? Au rawa ni wilika na veika oqori ena iVola Tabu ka da sa vakabauta tu ni sa tu vei keda, ia au vakawavoliti tu ena itovo vakavuravura kau a sega ni rawa ni kilai ira.

Eda sa vakavulici tiko oqo, ena veigauna ena ivakavuvuli matata ni kosipeli i Jisu Karisito, na yavu ni veivakabulai—na ivakarau ni noda bula me rawa ni da vakadonui kina mai vua na Tamada Vakalomalagi. E sega beka ni veivakalougatataki oqo e cecere duadua mai vei ira kece na veivakalougatataki? Kevaka me ra kila na tamata oqo na nodra sa kalougata e sega ni dodonu me ra dau yalo rarawa. Kevaka me ra kila na tamata oqo na veika era tutaka kei na nodra veiwekani dina kei na Kalou era na kunea na taucoko ni vakacegu ka ra na kidava rawa ni sa dau yalololoma vei keda na Kalou ka vakatikora vei keda na veivakalougatataki cecere ka lagilagi.¹⁴

Au vakavinavinakataka na Kalou niu bula donuya na siga nikua kei na itabagauna kei vuravura, ni sa mai rogoca na daligaqu na voqa ni taucoko ni kosipeli i Karisito.¹⁵

Vakatutu ni Vuli kei na Veivakavulici

Taurivaka na veivakasama oqo ni ko ni vulica na kena iwase oqo se ni ko ni vakavakarau mo ni veivakavulici. Raica na tabana vi–x, me ikuri ni veivuke.

Raica lesu na italanoa ena tabana e 1–3. Na cava a yali tiko ena bula nei Robert Mason? Na cava e vakavulica na italanoa oqo me baleta na Vukitani Levu kei na Vakalesui mai ni kosipeli?
Vulica na tabana e 3–6, mo ni vakasaqara na ivakatakilakila ni Lotu dina ni Turaga. Na cava e bibi kina vua na Lotu me tauyavutaki ena iwalewale vata ga o ya?
Ena nanuma nei Peresitedi Woodruff, na cava a vakavuna na Vukitani Levu? Na cava e a kauta mai na Vukitani Levu oqo? (Raica na tabana e 4–6.) E laurai vakacava edaidai na veika e kauta mai?
Raica lesu na tabana e 6–9, mo ni vakasaqara eso na rawa ka nei Parofita Josefa Simici ena Vakalesui mai ni kosipeli. E vakauqeta vakacava na nomuni bula na nona rawa ka oqori?
Wilika na malanivosa e tekivu ena boto e ra ni tabana e 7. Me da na vakaraitaka vakacava ni da sega ni maduataka na kosipeli vakalesui mai i Jisu Karisito?
Dikeva na butobuto kei na rarama ena tabana e 9–11. Na cava o ni sa vulica mai na nona vakayagataka o Peresitedi Woodruff na vosa e rua oqori? Na cava beka ena yali mai na nomuni bula kevaka mo ni a sega ni ciqoma na kosipeli vakalesui mai?

iVolanikalou Veisemati: Aisea 29:10–14; Emosi 8:11–12; Momani 1:13–14; V&V 128:19–21