Kapitulo 23

“Sama sa Pagkamaalagaron”

“Kadaghanan nato hilum ra, mga tawo nga wala kaayo mailhi kinsa … nagbuhat sa atong trabaho nga wala ipasundayag. Kaninyo kinsa maghunahuna niana nga … dili talagsaon, ako moingon, kamo ‘sama sa pagkamaalagaron’ kay sa labing talagsaon ninyong mga kaubanan.”

Gikan sa Kinabuhi ni Howard W. Hunter

Si Presidente Howard W. Hunter nailhan dili lamang isip usa ka mapahinunguron nga lider ug pinalangga nga propeta, apan alang usab sa hilum nga paagi sa iyang pagserbisyo. Siya nasayud nga ang pagserbisyo mismo importante, dili tungod kay nakadawat siya og bisan unsa nga pag-ila. Si Elder Neal A. Maxwell sa Korum sa Napulog Duha kausa miingon bahin niya, “Si Presidente Howard W. Hunter usa ka mapainubsanon nga tawo. … Kini mao ang mapainubsanon nga tawo, sa dihang nakamata ko human sa kapoy ug abugon nga adlaw nga nagkauban sa usa ka buluhaton didto sa Egypt, kinsa hilum nga mipasinaw sa akong sapatos, usa ka buhat nga naglaum siya nga mahuman nga walay makakita.”¹

Si Presidente Thomas S. Monson unang nakabantay sa mapainubsanong paagi ni Presidente Hunter sa pagserbisyo sa dihang ang Los Angeles California Temple napahinungod niadtong 1956, pipila ka tuig sa wala pay natawag nilang duha isip Apostol. Nahinumdom siya:

“Ang akong … pagpaila ngadto kang Presidente Hunter nahitabo dihang nagserbisyo siya isip presidente sa Pasadena California Stake ug adunay responsibilidad sa pag-coordinate sa lokal nga mga kasabutan alang sa pagpahinungod sa Los Angeles (California) Temple. Pribilehiyo nako kadto nga maka-print sa mga tiket. Ang iyang buluhaton labihan ka dako. Ang akong nakita mao lamang kanang porsyon nga may kalabutan sa mga tiket, nga adunay color coding, maayo kaayo nga pagkasipra, ug ginumerohan sa labing han-ay nga paagi nga akong nakita sukad. Gihatag gayud niya ang pasidungog ngadto sa uban ug misiguro nga ang iyang ngalan dili kaayo mailhan, bisan kon importante kaayo siya sa pag-organisar niining mga kalihokan.”²

Si Elder James E. Faust sa Korum sa Napulog Duha dugang nga nakabantay: “Wala siya magkinahanglan nga daygon. Sa tanan niyang kaalam, makalingkod siya diha sa iyang mga kaigsoonan ug gamay ra ang isuti. Komportable ra kaayo siya sa iyang kaugalingon.”³

Si Presidente Hunter nakasabut nga ang matag buhat sa pagserbisyo importante sa atubangan sa Dios, bisan kon dili mapasalamatan o dili makita. Pipila ka semana sa wala pa mamatay si Presidente Hunter, usa ka higala ang nangutana, “Minahal nga Presidente, unsa ang labing halangdon nga katungdanan o calling—kana bang sa usa ka minahal ug sinaligan nga higala, o kanang sa usa ka propeta sa Dios?” Human makadungog sa pangutana, ang Presidente hilum nga namalandong sulod sa daw pipila ka minutos; dayon hinay nga mikupot sa kamot sa iyang higala ug milingi direkta ngadto niya, nga dunay luha nga miagas sa iyang luya nga aping, siya mitubag, ‘kanang duha sagradong mga calling sa pagsalig.’”⁴

Ang makapausab sa kinabuhi nga pagserbisyo mahatag sa daghan “kinsa wala masentro sa pagtagad, kinsa wala makadawat sa pagtagad sa kalibutan.”

Mga Pagtulun-an ni Howard W. Hunter

Kadtong nagserbisyo sa hilum ug sa dili dayag “sama sa pagkamaalagaron” niadtong nakadawat sa pagdayeg sa kalibutan.

Nasulti kini bahin sa batan-on ug maisug nga si Kapitan Moroni: “Kon ang tanan nga mga tawo maingon, ug naingon, ug maingon bisan kanus-a, sama ngadto kang Moroni, tan-awa, ang mga gahum gayud sa impyerno nauyog na unta sa kahangturan; oo, ang yawa wala untay gahum ibabaw sa mga kasingkasing sa mga katawhan.” (Alma 48:17.)

Pagkanindot nga komplimento ngadto sa usa ka inila ug impluwensyal nga tawo! Dili ko makahunahuna og mas maayo pa nga pasidungog gikan sa usa ka tawo ngadto sa lain. Duha ka bersikulo human niana diha sa usa ka pamahayag bahin kang Helaman ug sa iyang kaigsoonan, kinsa adunay dili kaayo dayag nga tahas kay sa kang Moroni: “Karon tan-awa, si Helaman ug ang iyang mga kaigsoonan sama sa pagkamaalagaron ngadto sa mga katawhan ingon kang Moroni.” (Alma 48:19.)

Sa laing pagkasulti, bisan kon si Helaman dili ingon nga nabantayan o nakit-an sama kang Moroni, siya sama sa pagkamaalagaron; nga mao, nga siya nakatabang o mapuslanon sama ni Moroni.

Klaro lang, nga kita makabenepisyo og dako pinaagi sa pagtuon sa kinabuhi ni Captain Moroni. Ehemplo siya sa pagtuo, pagserbisyo, dedikasyon, pasalig, ug daghan pang laing diosnong mga kinaiya. Imbis nga motutok niining talagsaong tawo, hinoon, akong gipili nga motan-aw niadtong dili sentro sa pagtagad, kinsa wala makadawat og atensyon sa kalibutan, apan sa gihapon “sama sa pagkamaalagaron,” sigun sa gipamulong sa kasulatan.

Dili kitang tanan mahimong sama kang Moroni, nakakuha sa pagdayeg sa atong mga kaubanan sa tibuok adlaw sa matag adlaw. Kadaghanan nato hilum ra, mga tawo nga wala kaayo mailhi kinsa motunga ug mawala ug nagbuhat sa atong trabaho nga wala ipasundayag. Kaninyo kinsa maghunahuna niana nga makaguol o makahadlok o dili lang gayud talagsaon, ako moingon, kamo ‘sama sa pagkamaalagaron’ niadtong labing talagsaon ninyong mga kaubanan. Kamo, usab, kabahin sa kasundalohan sa Dios.

Hunahunaa, pananglit, ang tiunay nga serbisyo nga gihatag sa usa ka inahan o amahan diha sa hilum nga wala mailhi nga takus nga panimalay sa mga Santos sa Ulahing mga Adlaw. Hunahunaa ang mga magtutudlo sa Gospel Doctrine ug mga chorister sa Primary ug mga Scoutmaster ug mga visiting teacher nga Relief Society nga mialagad ug nakapanalangin sa minilyon apan kansang mga ngalan dili gayud mapasalamatan sa publiko o masibya sa media sa nasud.

Napulo ka liboan ka mga tawo nga wala mailhi ang mihimong posible sa atong mga oportunidad ug kalipay matag adlaw. Sama sa gipahayag sa kasulatan, sila “sama sa pagkamaalagaron” niadtong kansang mga kinabuhi anaa sa ulohang mga pahina sa mga mantalaan [newspaper].

Ang sentro sa pagtagad sa kasaysayan ug ang kontemporaryo nga atensyon kanunay nga nagtutok sa usa imbis nga sa daghan. Ang mga indibidwal kasagaran mao ang hatagan sa pagtagad gikan sa ilang mga kaedad ug gitan-aw isip mga bayani. Akong giangkon nga kining matang sa atensyon usa ka paagi sa pag-ila nianang gidayeg sa mga tawo o gihatagan og bili. Apan usahay kana nga pag-ila dili angay, o mahimo pa gani nga pagsuporta sa sayop nga mga mithi.

Kinahanglan kitang maalamong mopili sa atong mga bayani ug mga ehemplo, samtang nagahatg usab og pasalamat alang niadtong daghang mga higala ug mga lumulupyo nga dili kaayo ilado apan kinsa “sama sa pagkamaalagaron” sa mga Moroni sa atong kinabuhi.⁵

Diha sa kasulatan, daghang mga tawo kinsa miserbisyo samtang ang uban gihatagan og pagtagad nakahimo og importante nga mga tampo.

Tingali makahunahuna kamo uban nako sa pipila ka makapainteresado nga mga tawo gikan sa kasulatan nga wala masentro sa pagtagad apan kinsa, samtang atong gitimbang-timbang ang kasaysayan, nakapamatuod sa ilang kaugalingon nga tinuoray nga bayanihon.

Daghan sa nakabasa sa istorya sa bantugang propeta nga si Nephi hapit makalimot sa hingpit sa laing maisugon nga anak ni Lehi kansang ngalan mao si Sam. Si Nephi usa sa labing ilado nga mga tawo sa tibuok Basahon ni Mormon. Apan si Sam? Ang ngalan ni Sam kanapulo lamang nga nahisgutan dinha. Sa dihang si Lehi mitambag ug mipanalangin sa iyang kaliwatan, miingon siya kang Sam:

“Bulahan ikaw, ug ang imong mga binhi; kay ikaw makapanunod sa yuta sama ngadto sa imong igsoon nga lalaki nga si Nephi. Ug ang imong binhi pagaiphon uban sa iyang binhi; ug ikaw mahisama sa imong igsoon nga lalaki, ug ang imong binhi sama sa iyang binhi; ug ikaw panalanginan sa tanan nimo nga mga adlaw.” (2 Ne. 4:11.)

Ang tahas ni Sam mao ang pagsuporta ug pag-abag sa iyang mas ilado nga manghud, ug sa katapusan siya nakadawat sa samang mga panalangin nga gisaad ngadto kang Nephi ug sa iyang kaliwatan. Walay gisaad ngadto kang Nephi nga wala ihatag sa matinud-anong si Sam, apan gamay ra kaayo ang mga detalye sa pagserbisyo ug tampo ni Sam. Hapit wala siya mailhi nga tawo dinhing kinabuhia, apan klaro kaayo nga usa siya ka nagmadaugon nga lider ug mananaug sa mga talaan sa kahangturan.

Daghan ang naghimo sa ilang mga tampo sa dili ilado nga mga paagi. Si Ishmael mibiyahe kauban ang pamilya ni Nephi sa labihan nga personal nga sakripisyo, nag-antus sa “daghan nga mga kasakit, kagutom, kauhaw, ug kakapoy.” (1 Ne. 4:35 PM.) Dayon taliwala sa tanan niining mga kasakit, namatay siya sa kamingawan. Pipila lang gani kanato ang makasugod sa pagkasabut sa sakripisyo sa maong tawo niadtong karaang mga panahon ug mga kahimtang. Tingali kon kita mas manggihunahunaon ug masinabtunon, kita usab magbangutan, sama sa iyang anak nga mga babaye didto sa kamingawan, kay unsa ang nahatag sa tawo nga sama niini—ug unsa ang iyang gisakripisyo!—aron makabaton kita sa Basahon ni Mormon karon.

Ang mga ngalan ug mga handumanan sa ingon nga mga lalaki ug babaye kinsa “sama sa pagkamaalagaron” daghan diha sa Basahon ni Mormon. Si Inahang Sariah man kini o ang katabang nga si Abish, ang sulugoon sa Lamanite nga rayna, ang matag usa nakahimo og mga tampo nga wala mailhi sa kalibutan apan wala kalimti sa Dios.

Aduna lamang kitay dose ka mga bersikulo sa kasulatan kalabut sa kinabuhi ni Mosiah, ang hari sa tibuok yuta sa Zarahemla ug amahan sa ilado nga si Haring Benjamin. Apan ang iyang pagserbisyo sa katawhan importante kaayo. Gipangulohah niya ang mga tawo “pinaagi sa daghan nga mga pagsangyaw ug mga pagpanagna” ug “gipahimangnoan [sila] sa kanunay pinaagi sa pulong sa Dios.” (Omni 1:13.) Sila si Limhi, Amulek, ug Pahoran—ang naulahi kinsa adunay kahalangdon sa kalag nga wala manghimaraut sa dihang giakusahan og maayo nga dili makiangayon—lain pang mga ehemplo sa mga tawo kinsa nagserbisyo nga walay paghunahuna sa kaugalingon samtang ang uban nasentro sa pagtagad.

Ang sundalo nga si Teancum, kinsa misakripisyo sa iyang kaugalingong kinabuhi, o si Lachonius, ang labaw nga maghuhukom nga mitudlo sa mga tawo nga maghinulsol atol sa hagit sa mga Gadianton, o sa wala mahisguti nga mga misyonaryo nga sila si Omner ug Himni, ang tanan “sama sa pagkamaalagaron” sa ilang mga kauban, apan gamay lamang kaayo ang ilang nadawat nga pagtagad diha sa kasulatan.

Wala kaayo kitay nahibaloan kalabut ni Shiblon, ang matinud-anon nga anak ni Alma kansang istorya natung-an nianang kang Helaman, ang umaabut nga lider, ug ni Corianton, ang nakalapas; apan mahinungdanon nga gihulagway siya isip usa ka “makiangayon nga tawo [kinsa] naglakaw nga matarung sa atubangan sa Dios.” (Alma 63:2.) Ang bantugang propeta nga si Nephi, mihisgut diha sa basahon ni Helaman, nga adunay igsoon nga ginganlan og Lehi, kinsa daw nalakbitan lamang og hisgut apan nahibaloan nga “dili layo kaniya sa mga butang nga may kabahin sa pagkamatarung.” [Helaman 11:19; tan-awa usab sa bersikulo 18.]⁶

Human makupti ni Abish (wala) ang kamot sa Lamanite nga rayna, ang rayna mibangon gikan sa yuta (tan-awa sa Alma 19:15–29).

Bisan tuod nga dili kita mailhan kaayo, makahatag kita og dakong serbisyo sa gingharian.

Siyempre, adunay mga ehemplo usab niining sama sa pagkamaalagaron nga mga indibidwal sa atong dispensasyon. Si Oliver Granger mao ang matang sa hilum, mapaluyuhon nga indibidwal sa ulahing mga adlaw nga nahinumduman sa Ginoo diha sa seksyon 117 sa Doktrina ug mga Pakigsaad. Ang ngalan ni Oliver mahimong dili pamilyar sa daghan, busa sultihan ko kamo bahin niining bantugan nga tawo.

Si Oliver Granger onse anyos ang kamagulangon ni Joseph Smith ug, sama sa Propeta, nagagikan sa New York. Tungod sa grabeng katugnaw ug pagka-expose sa dihang traynte y tres anyos siya, dili na kaayo makakita si Oliver. Bisan pa man sa limitado niyang panan-aw, miserbisyo siya og tulo ka full-time nga mga misyon. Mitrabaho usab siya sa Kirtland Temple ug miserbisyo sa high council sa Kirtland.

Sa dihang kadaghanan sa mga Santos gipapahawa sa Kirtland, Ohio, ang Simbahan aduna pay mga utang nga wala mabayari. Si Oliver gitudlo nga morepresentar ni Joseph Smith ug sa Unang Kapangulohan pinaagi sa pagbalik ngadto sa Kirtland aron mabayran ang mga utang sa Simbahan. Kabahin niini nga buluhaton, ang Doktrina ug mga Pakigsaad mirekord: “Busa, himoa siya nga makugihon nga makigbisog alang sa katubsanan sa Unang Kapangulohan sa akong Simbahan, nag-ingon ang Ginoo.” (D&P 117:13.)

Iyang gipahigayon kini nga buluhaton nga nakatagbaw sa nalambigit nga mga giutangan nga ang usa kanila misulat: “Ang pagdumala ni Oliver Granger sa pagpakigsabut sa wala mabayari nga mga utang sa mga tawo nga mibalhin sa Far West, sa pagtuman sa ilang gisaad ug sa ingon mipabilin sa ilang kaligdong, tinuod gayud nga dalaygon, ug nakuha niya ang akong taas nga pagtahud, ug matag mapasalamatong paghandum.” (Horace Kingsbury, gikutlo sa Joseph Smith, History of the Church, 3:174.)

Sa panahon nga didto si Oliver sa Kirtland, may pipila ka mga tawo, lakip na ang nasilo nga mga miyembro sa Simbahan, naningkamot aron dauton ang Unang Kapangulohan ug dudahan ang ilang kaligdong pinaagi sa pagpakatap og sayop nga mga pasangil. Si Oliver Granger, pinaagi sa iyang mga lihok, “mitubos sa Unang Kapangulohan” pinaagi sa iyang matinud-anong pagserbisyo. … Ang Ginoo misulti bahin kang Oliver Granger: “Ang iyang ngalan pagahinumduman diha sa pagkasagrado gikan sa kaliwatan ngadto sa kaliwatan, hangtud sa kahangturan.” (D&P 117:12.) “Akong ibayaw ang akong sulugoon nga si Oliver, ug akong himoon nga bantugan ang iyang ngalan dinhi sa yuta, ug taliwala sa akong katawhan, tungod sa kaligdong sa iyang kalag.” (History of the Church, 3:350.)

Sa dihang namatay siya niadtong 1841, bisan tuod nga gamay ra kaayo ang mga Santos nga nagpabilin sa dapit sa Kirtland ug mas gamay pa gayud ang mga higala sa mga Santos, ang lubong ni Oliver Granger gitambungan sa daghang mga tawo gikan sa kasikbit nga kalungsuran.

Bisan tuod nga si Oliver Granger wala kaayo mailhi karon sama sa unang mga lider sa Simbahan, sa gihapon siya usa ka bantugan ug importante nga tawo diha sa serbisyo nga iyang gihatag sa gingharian. Ug bisan kon walay usa gawas sa Ginoo ang nakahinumdom sa iyang ngalan, igo na kana nga panalangin alang kaniya—o alang ni bisan kinsa kanato.⁷

Si Nephi usa ka ehemplo sa paghinumdom sa Dios isip tinubdan sa iyang kalig-on ug mga panalangin.

Siguro kinahanglan kitang mahibalo nga adunay espirituhanong kakuyaw ngadto niadtong nasayop og pagsabut bahin sa kanunayng masentro sa pagtagad. Mahimong magsige na lang sila og tinguha nga mainila ug sa ingon makalimot sa kaimportante sa serbisyo nga gihatag.

Kinahanglang dili nato tugutan ang atong kaugalingon nga motutok sa daklit nga kabantog o magtinguha nianang pagtagad agig hulip sa tinuod apan kanunayng wala mahibaloi nga buhat nga makapatagad sa Dios, bisan kon dili kini mahilbaloan. Gani, ang pakpak ug pagtagad mahimong espirituhanong kahuyang bisan sa labing hanas taliwala kanato.

Kon sa inyong kinabuhi mahitabo nga kamo masentro sa pagtagad tungod sa kabantog, mas maayo nga inyong sundon ang ehemplo niadtong anaa sa kasulatan kinsa nakadawat og dungog. Si Nephi usa sa mahinungdanong mga ehemplo. Human sa tanan niyang nahimo sa pagbiyahe sa kamingawan kauban ang iyang pamilya, ang iyang kinaiya nagtutok gihapon sa mga butang nga labing mahinungdanon. Siya miingon:

“Ug kon ako magtinguha sa pagmaya, ang akong kasingkasing mag-agulo tungod sa akong mga sala; bisan pa niana, ako nasayud kang kinsa ako mosalig.

“Ang akong Dios mao ang akong kaabag; siya nag-agak kanako sa akong mga kasakit sa kamingawan; ug siya nanalipod kanako diha sa ibabaw sa mga katubigan sa dakong lawod.

“Siya mitagbaw kanako sa iyang gugma, gani hangtud sa pagkaugdaw sa akong unod.

“Siya mipaubos sa akong mga kaaway, ngadto sa paghimo kanila nga mokurog sa akong atubangan.” (2 Ne. 4:19–22.)

Ang masentro sa pagtagad wala gayud makapalimot ni Nephi sa tinubdan sa iyang kalig-on ug sa iyang mga panalangin.⁸

Kon nakasabut kita nganong moserbisyo kita, dili kita mabalaka bahin kon asa kita moserbisyo.

Sa panahon nga anaa ang pagtagad ug pagka-inila, mas makaayo kon tubagon nato ang pangutana nga, Nganong moserbisyo man kita? Kon makasabut kita kon ngano, dili kita mabalaka bahin kon asa kita moserbisyo.

Si Presidente J. Reuben Clark, Jr., mitudlo niining mahinungdanong baruganan sa iyang kaugalingon kinabuhi. Atol sa kinatibuk-ang komperensya niadtong Abril 1951, si Presidente David O. McKay gipaluyohan isip Presidente sa Simbahan human sa pagkamatay ni Presidente George Albert Smith. Hangtud nianang panahona, si Presidente Clark miserbisyo isip Unang Magtatambag ngadto kang Presidente Heber J. Grant ug dayon ngadto kang Presidente George Albert Smith. Si Presidente McKay nahimong Ikaduhang Magtatambag nilang duha.

Atol sa katapusang sesyon sa komperensya sa dihang napahigayon na ang buluhaton sa Simbahan, si Brother Stephen L Richards gitawag sa Unang Kapangulohan ug gipaluyohan isip Unang Magtatambag. Si Presidente J. Reuben Clark, Jr., gipaluyohan isip Ikaduhang Magtatambag. Human sa pagpaluyo sa mga opisyales sa Simbahan, si Presidente McKay mipasabut nganong gipili niya ang iyang mga magtatambag niana nga han-ay. Siya miingon:

“Akong gibati nga ang usa ka magiyahong baruganan niini nga pagpili mao ang pagsunod sa seniority diha sa Konseho [sa Napulog Duha]. Kining duha ka mga lalaki naglingkod sa ilang mga dapit nianang tigdumalang pundok sa Simbahan, ug akong gibati nga mas maayo kon ipadayon kanang samang seniority diha sa bag-ong korum sa Unang Kapangulohan.” (Sa Conference Report, 9 Abril 1951, p. 151.)

Si Presidente Clark gihangyo dayon nga mamulong sunod ni Presidente McKay. Ang iyang pakigpulong niini nga okasyon mubo ra apan nagtudlo og mahinungdanong leksyon: “Sa pagserbisyo sa Ginoo, dili kon asa ka nagserbisyo kondili giunsa. Diha sa Simbahan ni Jesukristo sa mga Santos sa Ulahing mga Adlaw, ang usa ka tawo molingkod sa katungdanan diin siya takus nga gitawag sa katungdanan, nga walay tawo nga mangayo ni mobalibad. Ipasalig nako kang Presidente McKay ug kang Presidente Richards ang hingpit nga matinud-anong pagserbisyo sa mga buluhaton nga moabut kanako kutob sa mahimo sa akong kusog ug mga abilidad, ug kutob sa ilang ipabuhat kanako, bisan unsa pa ang kulang kanako.” (Ibid., p. 154.)

Ang leksyon nga gitudlo ni Presidente Clark mapahayag sa laing paagi niining balak ni Meade McGuire, nga kadaghan na gibalik-balik:

“Amahan, asa man ko motrabaho karon?”
Ug ang akong gugma midagayday sa kainit ug kagawasnon.
Dayon Siya mitudlo sa gamay nga luna
Ug miingon, “Alang kanako atimana kana.”
Dali akong mitubag, “Ah dili; dili kana!
Ngano, kay walay usa nga makakita,
Bisan unsa pa kanindot sa akong gihimo;
Dili kana nga dapit alang kanako.”
Ug ang pulong nga Iyang gisulti, walay kalagot;
Siya mitubag kanako sa kalumo:
“Ah, ikawng bataa ka, diha sa imong kasingkasing pangitaa.
Nagtrabaho ka ba alang kanila o alang kanako?
Ang Nazaret usa ka dapit nga gamay ra,
Ug mao usab ang Galilea.”

[Tan-awa sa Best-Loved Poems of the LDS People, gihugpong ni Jack M. Lyon ug uban pa (1996), 152.]

Si Haring Benjamin namahayag: “Tan-awa, ako moingon nganha kaninyo nga tungod kay ako miingon nganha kaninyo nga ako migahin sa akong mga adlaw diha sa pag-alagad kaninyo, ako wala magtinguha sa pagpanghambog, kay ako anaa lamang sa pag-alagad sa Dios. Ug tan-awa, ako mosulti kaninyo niini nga mga butang nga kamo unta makakat-on og kaalam; nga kamo unta makakat-on nga kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.” (Mosiah 2:16–17.)⁹

Kita ang “labing malipayon ug malampuson sa kinabuhi” kon ang atong “mga interes inubanan sa pag-abag ngadto sa uban ug sa pagtabang nila nga makakita sa agianan.”

Kinahanglan kita nga matinud-anon ug hilum nga moserbisyo, nga magbantay kalabut sa pagdayeg sa uban.

Siya ang labing malipayon ug malampuson sa kinabuhi kansang mga interes inubanan sa pag-abag ngadto sa uban ug sa pagtabang nila nga makakita sa agianan.

Ang timailhan diha sa kinasang-an sa agianan sa tren nga mopasidaan kanato nga mohunong, motan-aw, ug maminaw mahimong giya alang kanato. Mohunong samtang nagkapuliki kita sa kinabuhi. Motan-aw sa tanang mahigalaon, mahunahunaon, matinahuron nga mga butang nga atong mahimo, ug sa tanang ginagmay nga mga panginahanglan sa tawo nga atong matubag. Maminaw sa uban ug magkat-on bahin sa ilang mga gilauman ug mga problema aron kita makatampo sa ginagmay nga mga paagi sa ilang kalampusan ug kalipay.¹⁰

Si Presidente Ezra Taft Benson miingon … : “Ang Kristohanong pagserbisyo makabayaw. … Ang Ginoo misaad nga kadtong magawagtang sa ilang kinabuhi sa pagserbisyo sa uban makakaplag sa ilang kaugalingon. Si Propeta Joseph Smith misulti kanato nga kinahanglan kitang ‘mohalad sa atong mga kinabuhi’ sa pagpahinabo sa Iyang mga katuyoan. (D&P 123:13.)” (Ensign, Nob. 1989, pp. 5–6.)

Kon inyong bation nga daghan sa inyong gibuhat dili makapahimo ninyo nga inila, ayaw kasagmuyo. Kadaghanan sa labing maayo nga mga tawo nga nabuhi sukad dili usab mga inila. Moserbisyo ug molambo, sa matinud-anon ug sa hilum nga paagi. Pagbantay kalabut sa pagdayeg sa mga tawo. Si Jesus miingon diha sa Wali sa Bukid:

“Kinahanglan magmatngon kamo nga ang inyong mga maayong buhat dili ninyo himoon sa atubangan sa mga tawo, aron lamang sa pagpasundayag niini ngadto kanila: kay sa ingon niana wala kamoy balus gikan sa inyong Amahan nga anaa sa langit.

“Busa sa magahatag kag limos, ayaw pagpatingog og trumpeta sa atubangan mo, ingon sa ginahimo sa mga maut sa sulod sa mga sinagoga ug diha sa kadalanan, aron sila pagadayegon sa mga tawo. “Sa pagkatinuod magaingon ako kaninyo, Sila nakadawat na sa ilang balus.

“Apan ikaw sa magahatag kag limos, ayaw pahibaloa ang kamot mong wala sa gibuhat sa kamot mong tuo:

“Aron matago ang imong limos: ug ang imong Amahan nga nagatan-aw sa tago magabalus kanimo.” (Mat. 6:1–4.)

Unta ang atong Amahan sa Langit sa ingon moganti kaninyo sa kanunay.¹¹

Mga Sugyot alang sa Pagtuon ug Pagtudlo

Mga Pangutana

Unsa ang gusto ni Presidente Hunter nga atong masabtan pinaagi sa paghatag og gibug-aton nga si Helaman ug ang iyang kaigsoonan “sama sa pagkamaalagaron” ni Kapitan Moroni? (Tan-awa sa seksyon 1.) Sa unsang paagi nga kini nga panabut makatabang kaninyo?
Unsa ang matudlo kanato sa mga ehemplo sa kasulatan nga anaa sa seksyon 2? Sa unsang paagi nga kining mga ehemplo makaimpluwensya sa atong kaugalingong mga pagbati samtang nagserbisyo kita? Sa unsang paagi nga kamo napanalanginan sa uban nga nagserbisyo sa hilum, wala mahibaloi nga mga paagi?
Unsa ang atong makat-unan gikan sa istorya ni Presidente Hunter bahin ni Oliver Granger? (Tan-awa sa seksyon 3.) Nganong dili man kita angayang mabalaka kalabut sa pagdawat og pag-ila kon moserbisyo kita?
Sa unsang paagi nga “ang masentro sa pagtagad tungod sa pagkapopular” o dungog delikado? (Tan-awa sa seksyon 4.) Unsa ang matudlo sa ehemplo ni Nephi kalabut kon unsaon sa pagpabilin nga “nakatutok sa mga butang nga labing mahinungdanon”?
Ribyuha ang asoy bahin ni Presidente J. Reuben Clark Jr. diha sa seksyon 5. Unsay nakahatag kaninyo og impresyon kalabut sa kinaiya ug mga pulong ni Presidente Clark? Hunahunaa ang imong tubag sa pangutana nga “Nganong moserbisyo man ko?” Sa unsang paagi kita makapalambo og kinaiya sa paghatag sa atong pinakamaayo bisan asa pa kita moserbisyo?
Diha sa seksyon 6, si Presidente Hunter nagpasabut sa saad sa Ginoo nga “kadtong magawagtang sa ilang kinabuhi sa pagserbisyo sa uban makakaplag sa ilang kaugalingon” (tan-awa sa Mateo 10:39; 16:25). Unsa man ang buot ipasabut niini? Giunsa ninyo pagkahibalo nga tinuod kini? Sa unsang paagi nga ang pagserbisyo nakahatag kaninyo og kalipay?

May Kalabutan nga mga Kasulatan

Mateo 6:2–7, 24; 20:25–28; Santiago 1:27; D&P 76:5–7; 121:34–37

Tabang sa Pagtuon

“Ipakigbahin kon unsay imong nakat-unan. Samtang ikaw nagbuhat niini, ang imong mga hunahuna mahimong mas klaro ug ang imong gahum sa pagpabilin niini molambo”Pagtudlo, Walay Labaw Ka Mahinungdanon Nga Tawag[1999], 17).