Kapitulo 22

Pagtudlo sa Ebanghelyo

“Ang katuyoan sa pagtudlo … [mao] nga unta kita mahimong instrumento diha sa mga kamot sa Ginoo sa pag-usab sa kasingkasing sa usa ka indibidwal.”

Gikan sa Kinabuhi ni Howard W. Hunter

Sa Abril 1972 nga kinatibuk-ang komperensya, si Elder Howard W. Hunter, kanhiay usa ka miyembro sa Korum sa Napulog Duha ka mga Apostoles, usa sa katapusang mamumulong sa usa sa mga sesyon. Siya dihay giandam nga pakigpulong, apan walay igo nga panahon nga nahibilin sa sesyon alang kaniya sa paghatag niini. “Nag-obserbar sa orasan,” miingon si Elder Hunter, “Gipilo ko ang mubo nga mga sulat nga akong giandam ug gisulod kini sa akong bulsa. Apan pahisguta ako bisan og dyutay nga panahon sa usa ka hitabo nga mihatag kanako og panghunahuna sa dihang gamay pa ko. Nakahinumdom ako sa dihang gihisgutan nga ania uban kanato niining hapona ang usa ka dakong grupo sa mahalarong mga tawo kinsa nagtudlo sa atong kabatan-onan.

“Sayo sa buntag adlaw kadto sa ting-init. Nagbarug ako duol sa bintana. Misalipud ang mga kurtina kanako gikan sa duha ka gamay nga mga binuhat nga diha sa nataran. Ang usa dako nga langgam ug ang usa gamay nga langgam, klaro nga mao pay paggula gikan sa salag. Nakita nako ang dakong langgam nga nagtakingking diha sa nataran, unya gibundak ang iyang mga tiil ug gilingo-lingo ang iyang ulo. Gibitad niya ang dakong tambok nga ulod ilawom sa nataran ug mibalik nga nagtakingking. Ang gamay nga langgam mibuka og dako sa iyang ba-ba, apan gilamoy sa dakong langgam ang ulod.

“Dayon akong nakita ang dakong langgam nga milupad og taas ngadto sa usa ka kahoy. Gituhik niya ang panit og kadiyot ug mibalik nga may dako nga insekto diha sa iyang ba-ba. Ang gamay nga langgam mibuka og dako sa iyang ba-ba, apan gilamoy sa dakong langgam ang insekto. Dihay iyagak sa pagprotesta.

“Ang dakong langgam milupad, ug wala ko na makita kini og usab, apan akong gibantayan ang gamay nga langgam. Sa wala madugay, ang gamay nga langgam mitakingking diha sa nataran, gibundak ang mga tiil, ug gilingo-lingo ang ulo, ug gibitad ang dako nga ulod ilawom sa nataran.

“Panalanginan sa Dios ang buotan nga mga tawo kinsa nagtudlo sa atong mga kabataan ug kabatan-onan.”

Ang mubo nga mensahe ni Elder Hunter sa wala madugay gimantala ubos sa titulo nga “A Teacher.”¹

Kanunay nga gihatagan og gibug-aton ni Howard W. Hunter ang importansya sa maayong pagtudlo diha sa Simbahan. Mihatag siya og mga baruganan—sama sa importansya sa pagtudlo pinaagi sa ehemplo, gihulagway pinaagi sa istorya sa mga langgam—nga makatabang sa mga magtutudlo nga mahimong mas epektibo sa pagpanalangin sa mga kinabuhi niadtong ilang gitudloan. Sa kasagaran nakigsulti siya sa mga magtutudlo sa kabataan ug sa kabatan-onan, nagtabang kanila sa pagsabut sa ilang sagradong responsibilidad alang niadtong anaa sa nagtubo nga henerasyon. Sa usa sa maong hitabo, miingon siya:

“Sa akong atubangan karon nakita ko ang pipila sa piniling mga espiritu sa yuta. … Naningkamot akong mahanduraw ang kada usa [kaninyo mga magtutudlo] nga nagtrabaho sa inyong kaugalingon nga pihong buluhaton. Naghunahuna ako unsang matang sa bunga ang ihatag sa inyong paghago. Ang uban ba nianang bunga madaot tungod kay kamo napakyas sa pagtikad o pag-ugmad sa yuta nga gisalig nganha sa inyong pag-amuma; o ang tanan bang yuta pagaugmaron aron kini mohatag og labing daghang maayo nga bunga?

“Diha sa inyong tagsa-tagsa nga mga ward ug mga stake … nagpuyo ang daghang mga anak sa atong Amahan. Sama kaninyo, sila pinili diha sa iyang panan-aw; apan, dili sama kaninyo, ang kadaghanan walay kasinatian ug daghang bag-o diha sa Ebanghelyo. Ang inyong responsibilidad ngadto kanila sa tinuod importante kaayo. Ang ilang mga kinabuhi maimpluwensya, dali nga mausab, dali nga mahulma, sayon nga magiyahan, kon inyong maangkon ang ilang kompyansa ug pagsalig. Kamo ang ilang ‘tigbalantay.’ Kinahanglan gayud nga giyahan ninyo sila ngadto sa ‘berdeng sibsiban.’ …

“Pagkadakong hagit, pagkanindot nga buhat, pagkasagradong responsibilidad nga inyo karon! …Unsa ka mahunahunaon, ka makiangayon, ka maloloy-on, ka malumo, kaputli og kasingkasing, ka nakapanag-iya nianang dili hakog nga gugma sama sa gipanag-iya sa atong Ginoo, kamapainubsanon, ka mainampoon kamo samtang inyong akohon pag-usab ang inyong buhat sa pagpakaon sa mga nating karnero ingon nga ang Ginoo nagsugo kaninyo sa pagbuhat!”²

Ang pagtudlo sa mga bata diha sa simbahan nagsuporta sa mga pagtulun-an sa ginikanan diha sa panimalay.

Mga Pagtulun-an ni Howard W. Hunter

Tabangi ang uban sa pagpalambo og pagsalig diha sa mga kasulatan.

Nanlimbasog ako sa pag-awhag kaninyo sa paggamit sa mga kasulatan sa inyong pagtudlo ug sa pagbuhat sa tanan diha sa inyong gahum sa pagtabang sa mga estudyante sa paggamit niini ug mahimong mobati nga komportable niini. Buot ako nga ang atong kabatan-onan makabaton og pagsalig diha sa mga kasulatan, ug buot ako kaninyo nga mosabut niana nga hugpong sa mga pulong sa duha ka mga paagi.

Una, buot kita nga ang mga estudyante makabaton og pagsalig diha sa kalig-on ug mga kamatuoran sa mga kasulatan, pagsalig nga ang ilang Langitnong Amahan sa tinuod nakigsulti nganha kanila pinaagi sa mga kasulatan, ug pagsalig nga sila makabasa sa mga kasulatan ug makakaplag sa mga tubag sa ilang mga problema ug sa ilang mga pag-ampo. Kana ang usa ka matang sa pagsalig nga ako nanghinaot nga inyong ihatag sa inyong mga estudyante, ug makahatag kamo niini ngadto kanila kon kamo mopakita kanila kada adlaw, kada oras, nga kamo misalig diha sa mga kasulatan niana lang gayud nga paagi. Ipakita kanila nga kamo mismo nagsalig nga anaa sa mga kasulatan ang mga tubag ngadto sa daghan— sa pagkatinuod kadaghanan—nga mga problema sa kinabuhi. Busa, kon kamo magtudlo, pagtudlo gikan sa mga kasulatan.

[Ang ikaduha] nga kahulugan nga gipasabut diha sa hugpong sa mga pulong “pagsalig diha sa mga kasulatan” mao ang pagtudlo og maayo sa mga estudyante sa sumbanan nga mga kasulatan aron sila makabasa og maayo niini nga may pagsalig, nagkat-on sa importanting mga kasulatan ug mga wali ug mga pulong nga anaa niini. Kami manghinaot nga walay mga estudyante ninyo nga mobiya sa klasroom nga nahadlok o naulaw nga wala nila makaplagi ang tabang nga ilang gikinahanglan tungod kay sila wala kaayo masinati sa mga kasulatan igo nga makakaplag sa tukma nga mga tudling . Hatagi kining mga kabatan-onan og igo nga kasinatian diha sa Biblia, sa Basahon ni Mormon, sa Doktrina ug mga Pakigsaad, ug sa Perlas nga Labing Bililhon nga sila makabaton niining duha ka matang sa pasalig nga ako pa lamang nga nahisgutan.

Kasagaran ako naghunahuna nga ang atong mga kabatan-onan sa Simbahan mahimong sama kaayo sa ubang kabatan-onan sa gawas sa atong Simbahan kon sila dili makabaton og kahanas ug kasayon sa sumbanan nga mga kasulatan. Kamong tanan nahinumdom sa mga bersikulo nga gisulat ni Propeta Joseph Smith samtang napriso siya sa Bilanggoan sa Liberty. Lakip niini misulat siya, “Kay aduna pay daghan sa ibabaw sa yuta diha sa tanan nga mga tinuohan, mga pundok, ug mga pundok sa relihiyon, kinsa nabutaan pinaagi sa maliputon nga paglingla sa mga tawo, diin sila naghulat aron sa pagpangilad, ug kinsa natago gikan sa kamatuoran tungod kay sila wala masayud asa kini pangitaa” (D&P 123:12; emphasis gidugang).

Kita adunay dakong responsibilidad isip [mga magtutudlo] diha sa Simbahan sa pagsiguro nga ang atong kaugalingong mga miyembro, ang atong kaugalingong mga kabatan-onan, dili mahulog ngadto nianang alaot nga matang sa tawo nga nabutaan, buotan, maayo, takus nga kabatan-onan kinsa napahilayo gikan sa mga kamatuoran sa mga kasulatan tungod kay sila wala mahibalo kon asa pangitaa kadtong mga kamatuoran ug tungod kay sila wala magbaton og pagsalig [sa paggamit] sa ilang sumbanan nga mga kasulatan.³

Pagtudlo uban ang Espiritu

Pangandam ug pagkinabuhi sa paagi nga kamo makabaton sa Espiritu sa Ginoo sa inyong pagtudlo. Adunay daghan kaayong butang sa atong kalibutan nga nagguba sa pagpamati sa Espiritu ug labi pa gayud nga mopalayo kanato gikan sa pagbaton sa Espiritu uban kanato. Kinahanglan natong buhaton ang tanan nga atong mahimo alang niining kabatan-onan kinsa kanunay nabantang ngadto sa pagkakalibutanon nga naglibut kanila. Kinahanglang buhaton nato ang tanang mahimo sa pagpabati kanila sa tam-is, makapahupay nga presensya sa Espiritu sa Ginoo. …

Sa usa sa sukaranang pagpadayag niini nga dispensasyon ang Ginoo miingon, “Ug ang Espiritu ihatag nganha kaninyo pinaagi sa pag-ampo diha sa hugot nga pagtuo; ug kon kamo dili makadawat sa Espiritu kamo dili motudlo” (D&P 42:14).

Alang kanako kini nga bersikulo nagpasabut nga dili lamang kita dili motudlo nga wala ang Espiritu, apan nga kita usab sa tinuod dili makatudlo nga wala kini. Ang pagkat-on sa espirituhanong mga butang dili gyud mahitabo nga wala ang panudlo ug panghimatuod nga presensya sa Espiritu sa Ginoo. Si Joseph Smith ingon og mouyon: “Ang tanan mosangyaw sa Ebanghelyo, pinaagi sa gahum ug sa impluwensya sa Espiritu Santo; ug walay tawo nga makasangyaw sa Ebanghelyo nga wala ang Espiritu Santo” [Mga Pagtulun-an sa mga Presidente sa Simbahan: Joseph Smith (2007), 332].

… Mabalaka ako kon makita ang bug-at nga emosyon o walay hunong nga pagluha gipakisama sa presensya sa Espiritu. Sa pagkatinuod ang Espiritu sa Ginoo makadala og bug-at nga emosyonal nga mga pagbati, lakip ang mga luha, apan kana nga pagpakita kinahanglan nga dili sabton nga presensya sa Espiritu mismo.

Nakakita ako og daghan kaayo sa akong mga kaigsoonan sa mga tuig nga nanglabay ug kami nagkauban og pipila ka talagsaon ug dili masulti nga mga espirituhanong mga kasinatian. Kadto nga mga kasinatian tanan lain-lain, ang kada usa talagsaon sa iyang kaugalingong paagi, ug ang ingon nga sagradong mga higayon mahimong ubanan o dili og mga luha. Kasagaran gayud kini ingon niana, apan usahay kini inubanan og hingpit nga kahilum. Sa uban nga mga higayon, kini inubanan og hingpit nga kalipay. Sa kanunay sila inubanan og usa ka talagsaon nga pagpahayag sa kamatuoran, sa pagpadayag ngadto sa kasingkasing.

Hatagi ang inyong mga estudyante og kamatuoran sa ebanghelyo nga gamhanang gitudlo; kana mao ang paagi sa paghatag kanila og usa ka espirituhanon nga kasinatian. Pahitaboa kini sa natural nga paagi ug sa ingon nga kini mahitabo, tingali inubanan sa pag-agas sa mga luha, apan tingali usab dili. Kon ang inyong gisulti tinuod, ug inyong gisulti kini sa lunsay nga paagi ug uban sa matinuoron nga pagtuo, kadtong mga estudyante mobati sa espiritu sa kamatuoran nga gitudlo kanila ug makaila nga ang inspirasyon ug pagpadayag misulod ngadto sa ilang mga kasingkasing. Ingon niana ang pagtukod og hugot nga pagtuo. Ingon niana unsaon nato paglig-on ang mga pagpamatuod—uban ang gahum sa pulong sa Dios nga gitudlo nga lunsay ug uban may konbiksyon.

Paminaw sa kamatuoran, patalinghugi ang doktrina, ug himoa nga ang pahayag sa Espiritu moabut ingon nga kini mahimo diha sa tanan niining daghan ug nagkalain-laing mga matang. Padayon uban sa lig-on nga mga baruganan; pagtudlo gikan sa putli nga kasingkasing. Niana ang Espiritu motuhop sa inyong hunahuna ug kasingkasing ug sa kada hunahuna ug kasingkasing sa inyong mga estudyante.⁴

Dapita ang mga estudyante nga direktang mangita sa Dios nga Amahan ug ni Jesukristo.

Ako nakasiguro nga kamo nakaila sa kalagmitang kakuyaw … sa gihimo[ng] pagkamaunungon sa inyong mga estudyante nganha kaninyo kay sa ngadto sa ebanghelyo. … Kana mao nganong kamo kinahanglan nga modapit sa inyong mga estudyante sa pagsiksik sa mga kasulatan sa ilang mga kaugalingon mismo, dili lamang sa paghatag kanila sa inyong interpretasyon ug pagpahayag niini. Kana mao nganong kamo kinahanglan gayud modapit sa inyong mga estudyante sa pagbati sa Espiritu sa Ginoo, dili lamang sa paghatag kanila sa inyong personal nga pagpamalandong niana. Kana mao ngano, sa katapusan, kamo kinahanglan gayud modapit sa inyong mga estudyante diretso ngadto ni Kristo, dili ngadto sa tawo kinsa nagtudlo sa iyang doktrina, bisan unsa ka maayo. Kamo dili kanunay anaa alang niini nga mga estudyante. …

Ang atong importanting buhat mao ang pagtukod og pundasyon niini nga mga estudyante sa unsay mahimong makatabang kanila sa tibuok kinabuhi, sa pagtudlo kanila paingon kaniya kinsa naghigugma kanila ug makagiya kanila diin walay usa kanato moadto. Palihug siguroha nga ang pagkamaunungon sa mga estudyante adto sa mga kasulatan ug sa Ginoo ug sa mga doktrina sa gipahiuli nga Simbahan. Igiya sila paingon sa Dios nga Amahan ug sa iyang Bugtong Anak, si Jesukristo, ug paingon sa pagkapangulo sa tinuod nga Simbahan. … Ihatag kanila ang gasa nga motabang kanila sa panahon nga sila mag-inusara. Kon inyo kining buhaton, ang tibuok Simbahan mapanalanginan sulod sa mga henerasyon nga moabut.⁵

“Paninguha kutob sa inyong mahimo sa paghunahuna sa [mga estudyante] sa indibidwal nga paagi, sa paghimo kanilang mobati og usa ka butang nga personal ug talagsaon nga inyong kabalaka, ilang magtutudlo.”

Paninguha og tabang sa indibidwal.

Ako kanunay nga nagtuo nga ang Ginoo nagtagad kanato sa personal, indibidwal nga paagi. Grupo kita nga nagbuhat og daghang mga butang diha sa Simbahan, ug nagkinahanglan kita og mga organisasyon nga igo ang gidak-on sa pagtugot kanato sa pagdumala usab sa Simbahan, apan daghan kaayong importanting mga butang—ang labing importanting mga butang—gihimo sa indibidwal nga paagi. Nagpanalangin kita og gagmay nga mga bata sa tinagsa, bisan kon sila mga kaluha o tagutlo. Nagbunyag ug nagkumpirma kita og mga bata sa tinagsa. Nag-ambit kita sa sakramento, gi-orden ngadto sa priesthood, o nakadawat sa mga ordinansa diha sa templo isip mga indibidwal—ingon nga usa ka tawo nga nagpalambo og relasyon ngadto sa atong Amahan sa Langit. Tingali adunay uban kanato nga sama niini og mga kasinatian, ingon man nga adunay uban diha sa inyong klasroom, apan ang gihatagan og gibug-aton sa langit anaa sa kada indibidwal, o sa kada usa ka tawo.

Sa dihang si Kristo mipakita ngadto sa mga Nephite, miingon siya:

“Tindog ug duol ngari kanako, aron kamo mohikap pinaagi sa inyong kamot sa akong kilid, ug usab kamo mobati sa mga agi sa lansang sa akong mga kamot ug sa mga tiil. …

“Ug nahinabo nga ang pundok sa mga katawhan miduol ngadto kaniya, ug mihikap pinaagi sa ilang mga kamot ngadto sa iyang kilid, ug mibati sa mga agi sa mga lansang sa iyang mga kamot ug sa iyang mga tiil; ug kini sila mihimo, miduol tagsa-tagsa hangtud silang tanan nakaduol, ug nakakita uban sa ilang mga mata ug mibati uban sa ilang mga kamot, nasayud sa pagkatinuod ug nagpamatuod” (3 Nephi 11:14–15; emphasis gidugang).

Kana nga kasinatian mikabat og panahon, apan importante nga ang kada indibidwal adunay kasinatian, nga ang kada paris sa mga mata ug paris sa mga kamot aduna nianang makapasiguro og balik, personal nga pagsaksi. Wala madugay gitagad ni Kristo ang kabataan nga mga Nephite sa sama gayud nga paagi. “Ug siya mikuha sa ilang gagmay nga mga bata, sa tinagsa, ug mipanalangin kanila, ug nag-ampo ngadto sa Amahan alang kanila” (3 Nephi 17:21; emphasis gidugang).

Kini lisud alang kaninyo sa paghatag sa tanang personal nga atensyon nga ang pipila sa inyong mga estudyante gusto ug nagkinahanglan, apan sulayi ang labing maayo nga inyong mahunahuna kanila sa tinagsa, sa pagpabati kanila og ingon nga personal ug talagsaon nga kabalaka ninyo, ilang magtutudlo. Pag-ampo nga mahibaloan hain nga estudyante nagkinahanglan og unsa nga matang sa tabang, ug pagpabilin nga sensitibo ngadto niadtong mga pag-aghat sa panahon nga kini moabut. …Hinumdumi nga ang labing maayo nga pagtudlo mao ang tinagsa tagsa ug kasagaran mahitabo sa gawas sa klasroom. …

Sa inyong pagpangita alang sa tinagsa tagsa nga pagtudlo sa kada estudyante, labing siguro madiskubrihan ninyo nga ang pipila dili maayo sa klase sama sa uban ug nga ang pipila dili gyud motambong og klase. Hatagi og personal nga interes ang maong mga estudyante; hatagi og sobra nga paningkamot sa pagdapit ug pagtabang sa nawalang karnero balik ngadto sa panon. “Hinumdumi ang bili sa mga kalag mahinungdanon sa panan-aw sa Dios”(D&P 18:10). Dili makalkulo ang bili nga gibayad sa atong Manluluwas alang kanatong tanan, ug kini katungdanan nato sa pagbuhat sa tanan natong mahimo sa pagtabang kaniya sa iyang buhat. Kini atong obligasyon sa pagsiguro nga ang gasa sa Pag-ula gilugway ngadto sa tanang batan-ong lalaki o babaye nga kita adunay responsibilidad. Sa inyong sitwasyon, kana nangahulugan sa paghatag kanila og daghan kaayong kalihokan diha sa inyong mga klase.

Hatagi og espesyal nga atensyon kadtong kinsa tingali nakigbisog, ug lakaw ingon nga gikinahanglan sa pagpangita sa nawalang karnero. Usa ka sinulat nga postcard, tawag sa telepono, o, kon mahimo, personal nga pagbisita ngadto sa usa ka panimalay sa daghang mga sitwasyon adunay nindot nga resulta. Ang personal nga atensyon ngadto sa usa ka batan-ong tawo nga nagsugod pa lamang sa pagkahisalaag mahimong makadaginot og daghang mga oras—sa tinuod, daghang mga tuig—nga paningkamot sa kadugayan natong pagsulay sa pagbawi niana nga tawo ngadto sa pagkaaktibo. Buhata ang tanan ninyong mahimo sa pagpanalipod sa lig-on nga tawo ug tabangi paglig-on ang nawad-an og interes sa ebanghelyo ang mga tawo niini nga edad.⁶

Pagtudlo pinaagi sa ehemplo.

Kinahanglanon kaayo kini alang kanato [isip mga magtutudlo] sa paghatag og husto nga ehemplo, sa pagkugi ug pagmabinantayon sa atong kaugalingon nga mga kinabuhi, sa pagbalaan sa Igpapahulay nga Adlaw, sa pagtahud sa mga lider sa ward, sa stake, ug sa Simbahan. Kinahanglan walay dili angay kitang isulti nga mohatag ni bisan kinsa nga bata sa katungod o pribilehiyo sa pagbuhat og sayop. Sa tinuod kon kita mosulti o mobuhat og usa ka butang nga sayop, ang mga bata may permiso sa pagsunod.

Ang ehemplo nagdala og impluwensya nga mas labaw ka gamhanan kay sa lagda. Siya kinsa nagdani sa uban sa pagbuhat og matarung kinahanglan nga mobuhat og matarung sa iyang kaugalingon mismo. Tinuod kini nga siya kinsa nagbansay og maayong mga lagda tungod kay sila mga maayo ug nagpugong sa iyang kaugalingon nga maimpluwensya sa dili matarung nga batasan sa uban pagagantihan og mas buhong kay sa usa ka tawo kinsa nagsulti ug wala magbuhat. … Ang mga bata malagmit mosunod niadtong kinsa sila mihatag og pagsalig. Mas dako ang ilang pagsalig, mas dali sila nga maimpluwensya sa maayo o sa dautan. Ang kada maayong Santos nagtahud og tininuod nga pagkamaayo bisan asa kini makita ug mosulay sa pagsunod sa tanang maayo nga mga ehemplo.⁷

Ang pormula alang sa maayong magtutudlo dili lamang ang pagsunod sa mga sugo sa Ginoo ug sa pagpasiugda sa mga sugo sa Ginoo, apan ang pagbaton sa diwa sa pagtudlo pinaagi sa pag-ampo. Kon kita makabaton niana nga espiritu ug mosunod sa mga sugo sa Ginoo, nagmasulundon diha sa Iyang atubangan, niana ang mga kinabuhi niadtong atong naimpluwensya mausab ug sila madasig sa pagpuyo og mga kinabuhi sa pagkamatarung.⁸

Ang kada magtutudlo kinahanglan gayud nga adunay personal nga pagpamatuod nga ang Dios buhi, sa balaang misyon ni Jesukristo, ug nga ang pagpakita sa Amahan ug sa Anak ngadto ni Joseph Smith tinuod. Dili lamang kinahanglan gayud nga siya aduna nianang kahibalo ug pagpamatuod, apan kinahanglan nga siya matinguhaon sa pagpahayag sa iyang tinuohan nga may kalig-on ngadto niadtong kinsa moduol aron makakat-on.⁹

Ang epektibong pagtudlo sa ebanghelyo nagdala ngadto sa “pagkausab sa tawhanong kalag.”

Magpaka-instrumento diha sa mga kamot sa Ginoo sa pagtabang sa mga estudyante nga makasinati og milagrusong kausaban sa kasingkasing.

Kon ang usa ka magtutudlo nagbuhat ingon nga buot sa Ginoo, usa ka dakong milagro ang mahitabo. Ang milagro sa Simbahan karon dili ang mga pagpang-ayo diin daghan kaayo, dili nga ang bakol makalakaw, ang buta makakita, ang bungol makadungog, o ang masakiton mamaayo. Ang dakong milagro sa Simbahan ug gingharian sa Dios sa atong adlaw ug sa atong panahon mao ang pagkausab sa tawhanong kalag. Samtang kami nagbiyahe sa tibuok mga stake ug mga misyon sa Simbahan, mao kini ang among nakita—ang pagkausab sa tawhanong kalag tungod kay usa ka tawo nagtudlo sa mga baruganan sa kamatuoran.

Kini ingon sa gisangyaw ni Alma, sa iyang panahon sa pagtudlo sa katawhan, sa dihang siya miingon: “Ug karon tan-awa, ako mangutana kaninyo, akong mga kaigsoonan sa simbahan, kamo sa espirituhanon nga paagi natawo ba sa Dios? Kamo nakadawat ba sa iyang hitsura diha sa inyong mga panagway? Kamo nakasinati ba niining dako nga kausaban diha sa inyong mga kasingkasing?” (Alma 5:14.) Kini mao ang katuyoan sa pagtudlo. Mao kini ang rason nga kita nagtrabaho og maayo, nagtinguha sa Espiritu, ug nag-andam sa atong mga hunahuna sa maayong mga butang ingon nga gimando sa Ginoo, nga kita unta mahimong instrumento diha sa mga kamot sa Ginoo sa pag-usab sa kasingkasing sa usa ka indibidwal. Ang atong tumong mao ang pagtanom diha sa mga kasingkasing sa mga bata ang tinguha nga mamaayo, ang tinguha nga magmatarung, ang tinguha sa pagsunod sa mga sugo sa Ginoo, ang tinguha sa paglakaw nga mapainubsanon sa Iyang atubangan. Kon kita mahimong instrumento diha sa mga kamot sa Ginoo sa pagpahinabo niining gamhanang kausaban diha sa mga kasingkasing sa mga bata, niana kita nakatuman sa dakong milagro sa usa ka magtutudlo. Ug sa tinuod, kini usa ka milagro. Dili kita makasabut kon giunsa sa Ginoo pag-usab ang mga kasingkasing sa mga tawo, apan Iyang gihimo. …

Ako mohatag sa akong pagsaksi sa makapadasig og usab nga gahum sa Espiritu diha sa mga kinabuhi sa mga miyembro sa Simbahan. Naghangyo ako kaninyo … sa pagtrabaho nga walay hunong sa pagkamatarung ug pagkabalaan diha sa atubangan sa Ginoo sa pagtuman sa buhat nga gipabuhat kaninyo.”¹⁰

Mga Sugyot alang sa Pagtuon ug Pagtudlo

Mga Pangutana

Mubo nga sulat: Tingali gusto ninyong hisgutan ang pipila sa mosunod nga mga pangutana gikan sa panan-aw sa mga ginikanan nga nagtudlo sa ilang mga anak.

Nag-awhag si Presidente Hunter sa mga magtutudlo sa pagtabang sa mga estudyante sa pagbaton og “pagsalig diha sa mga kasulatan” (seksyon 1). Kanus-a ang mga kasulatan mitabang kaninyo sa inyong kaugalingong kinabuhi? Kanus-a kamo nakakaplag og mga tubag sa inyong mga pangutana diha sa mga kasulatan? Unsaon nato sa pagtabang sa uban, lakip niadtong anaa sa atong mga panimalay, sa pagkat-on sa paghigugma sa mga kasulatan ug sa pagpahimulos sa gahum niini?
Unsa ang atong makat-unan gikan sa seksyon 2 mahitungod sa pagtudlo pinaagi sa Espiritu? Unsa nga mga kasinatian ang inyong naangkon sa pagtudlo ug pagkat-on pinaagi sa Espiritu? Unsa ang pipila ka mga butang ang inyong mahimo sa pagtabang kaninyo nga magtudlo pinaagi sa Espiritu?
Sa unsang paagi ang usa ka magtutudlo makatabang sa mga estudyante nga mahimong maunungon ngadto sa mga kasulatan ug sa ebanghelyo, dili diha sa iyang kaugalingon? (Tan-awa sa seksyon 3.) Sa unsang paagi ang magtutudlo makatabang nga ang mga estudyante maduol ngadto sa Langitnong Amahan ug ni Jesukristo? Sa unsang paagi ang magtutudlo makatabang sa mga estudyante nga mahimong may pundasyon diha sa ebanghelyo aron magpabilin silang malig-on “sa panahon nga sila mag-inusara”?
Pamalandunga ang mga pagtulun-an ni Presidente Hunter mahitungod sa importansya sa kada indibidwal (tan-awa sa seksyon 4). Unsaon ninyo pagtabang niadtong inyong gitudloan sa pagpalambo og pagpamatuod nga ang Dios nahibalo ug nahigugma kanila sa tinagsa. Hunahunaa unsay, isip usa ka magtutudlo, mabuhat ninyo sa pagtabang niadtong inyong gitudloan sa tinagsa-tagsa.
Gihatagan og gibug-aton ni Presidente Hunter ang importansya sa pagtudlo pinaagi sa ehemplo (tan-awa sa seksyon 5). Ngano nga ang atong ehemplo mas gamhanan kay sa atong mga pulong? Sa unsang paagi kamo napanalanginan sa usa ka magtutudlo kinsa usa ka maayong ehemplo? Sa unsang paagi ang ehemplo sa mga ginikanan nagtudlo sa ilang mga anak?
Kanus-a ninyo nasinati ang “dakong milagro” nga gihulagway ni Presidente Hunter diha sa seksyon 6, ingon nga usa ka magtutudlo o usa ka tigkat-on? Hinumdumi ang pipila ka mga magtutudlo kinsa nahimong maayong impluwensya sa inyong kinabuhi? Unsay naghimo kanila nga epektibong impluwensya? Unsaon nato pagtudlo ang ebanghelyo uban sa mas dakong gahum— diha sa panimalay, sa klasroom, o sa lain nga dapit?

May Kalabutan nga mga Kasulatan

Juan 21:15–17; 1 Mga Taga-Corinto 12:28; 2 Timoteo 3:14–17; 2 Nephi 33:1; Alma 17:2–3; 31:5; D&P 11:21–22; 50:17–22; 88:77–80

Tabang sa Pagtudlo

Sa lain nga mga piraso sa papel, isulat ang mga pangutana gikan sa katapusan sa kapitulo o lain nga mga pangutana nga kalabut sa kapitulo. Pagdapit og mga sakop sa klase sa pagpili og usa ka pangutana ug sa pagpangita sa kapitulo alang sa mga pagtulun-an nga makatabang sa pagtubag niini. Hangyoa sila sa pagpakigbahin unsa ang ilang nakat-unan.