Kapitulo 16

Kaminyoon—Usa ka Mahangturong Panag-uban

“Ang labing importanting panag-uban anaa sa kaminyoon—kana nga relasyon nga adunay malungtaron ug mahangturon nga kahulugan.”

Gikan sa Kinabuhi ni Howard W. Hunter

Sa dihang si Howard W. Hunter 20 anyos ang panuigon, nahimamat niya si Claire Jeffs sa usa ka sayaw diha sa Simbahan sa Los Angeles, California, samtang siya kauban sa usa sa mga higala ni Howard. Human sa sayaw, pipila sa mga young adult nangadto miubog sa ocean surf. Nawala ang kurbata ni Howard, ug si Claire miboluntaryo sa paglakaw sa baybayon uban kaniya aron pagtabang sa pagpangita niini. Sa wala madugay si Howard miingon, “Sa sunod higayon nga kami nanggawas, akong gidala si Claire, ug ang [akong higala] mikuyog og lain.”¹

Sa sunod nga tuig misugod sila og seryoso nga date, ug usa ka gabii sa tingpamulak hapit tulo ka tuig human sila nagkita, gidala ni Howard si Claire ngadto sa usa ka nindot nga taas nga dapit nga matan-aw ang lawod. “Among [gitan-aw] ang mga bawod nga nagligid gikan sa Pasipiko ug mosalpok sa mga dagkong bato diha sa kahayag sa takdol nga bulan,” misulat siya. Nianang gabhiona si Howard mitanyag og kaminyoon, ug gidawat ni Claire. “Among giistoryahan ang mahitungod sa among mga plano,” miingon siya, “[ug] mihimo og daghang mga desisyon nianang gabhiona ug pipila ka lig-on nga mga saad kalabut sa among mga kinabuhi.”²

Si Howard ug si Claire gikasal sa Salt Lake Temple niadtong Hunyo 10,1931. Sa sunod 52 ka tuig, ang ilang gugma nagkalawom samtang gipatubo nila ang ilang anak nga mga lalaki, miserbisyo diha sa Simbahan, ug giatubang ang ilang mga hagit uban sa hugot nga pagtuo.

Ang ilang kalipay isip managtiayon klaro ngadto sa ilang pamilya. Si Robert Hunter, ang ilang kamagulangang apo nga lalaki, miingon: “Kon ako maghunahuna ni Lolo Hunter, wala akoy laing gihunahuna kon dili ang pagka-ehemplo sa usa ka mahigugmaong bana. … Inyo gayud nga mailhan ang mahigugmaong panaghiusa tali kanilang duha.”³

Ang gugma ni Presidente Hunter sa iyang asawa mas nadayag samtang iyang giamumahan siya sulod sa katapusang dekada sa kinabuhi sa iyang asawa, sa dihang siya nakigbisog sa seryosong problema sa panglawas. Sa dihang namatay si Claire niadtong Oktubre 9, 1983, kini usa ka “usa kadakong kasubo” ngadto ni Presidente Hunter.⁴ Misulat siya nga sa dihang siya miabut sa panimalay sa adlaw nga si Claire namatay, “ang balay ingon og bugnaw, ug samtang ako naglakaw-lakaw, ang tanan nagpahinumdom kanako kaniya.”⁵

Human sa hapit pito ka tuig nga nag-inusara, nangasawa si Presidente Hunter ngadto kang Inis Stanton niadtong Abril 1990. Si Presidente Gordon B. Hinckley mipahigayon sa seremonyas diha sa Salt Lake Temple. Si Inis usa ka tinubdan sa dakong kahupay ug kalig-on ngadto ni Presidente Hunter sulod sa iyang pagserbisyo isip Presidente sa Korum sa Napulog Duha ka mga Apostoles ug Presidente sa Simbahan. Miuban siya kaniya sa daghan niyang mga biyahe sa pakighimamat sa mga Santos sa tibuok kalibutan.

Si Elder James E. Faust sa Korum sa Napulog Duha ka mga Apostoles namulong kabahin ni Inis nga panalangin ngadto kang Presidente Hunter: “Human sa kamatayon ni [Claire], mingaw kini nga panahon sulod sa daghang katuigan hangtud gipangasawa niya si Inis. Nag-uban giambit nila ang daghang malipayon nga mga handumanan ug mga kasinatian.” Dayon, namulong ngadto ni Sister Hunter, miingon siya, “Walay pulong nga makalitok sa among pagpasalamat kanimo, Inis, alang sa pakig-uban ug sa imong mapinanggaon ug maunungong pag-amuma kaniya. Nakahatag ka og kalipay ug hingpit nga kalipay diha sa labing nindot nga mga tuig sa iyang kinabuhi ug sa iyang pangalagad.”⁶

“Diha sa templo atong madawat ang labing taas nga ordinansa nga anaa alang sa mga lalaki ug mga babaye, ang sealing sa mga bana ug mga asawa nga mag-uban sa kahangturan.”

Mga Pagtulun-an ni Howard W. Hunter

Ang kaminyoon tali sa lalaki ug sa babaye giorden sa Dios ug gituyo nga mahimong mahangturon.

Ang Ginoo nagtin-aw sa kaminyoon alang kanato. Miingon siya,“Tungod niining maong hinungdan kinahanglan pagabiyaan sa lalaki ang iyang amahan ug ang iyang inahan ug makig-ipon siya sa iyang asawa ug silang duha mahimong usa” (Mateo19:5).⁷

Ang labing importanting panag-uban sa kinabuhi anaa sa kaminyoon—kana nga relasyon nga adunay malungtaron ug mahangturon nga kahulugan.⁸

Uban ang kahibalo sa plano sa kaluwasan isip pundasyon, ang usa ka lalaki kinsa naghupot sa priesthood nagtan-aw sa kaminyoon isip usa ka sagrado nga pribilehiyo ug obligasyon. Dili maayo alang sa lalaki ni sa babaye nga mag-inusara. Ang lalaki dili kompleto nga walay babaye. Ni makatuman sa katuyoan sa ilang pakalalang nga wala ang usa (tan-awa sa 1 Mga Taga-Cor.11:11; Moises 3:18). Ang kaminyoon tali sa lalaki ug sa babaye giorden sa Dios (tan-awa sa D&P 49:15–17). Pinaagi lamang sa bag-o ug walay katapusang pakigsaad sa kaminyoon nga sila makaamgo sa kahingpitan sa walay katapusang mga panalangin (tan-awa sa D&P 131:1–4; 132: 15–19).⁹

Ang kaminyoon kasagarang gipasabut isip usa ka panag-uban sa Dios. Dili lamang kini usa ka pulong nga pasumbingay. Kon kini nga panag-uban magpabilin nga malig-on ug magtinabangay, ang lalaki ug ang babaye maghigugma sa usag usa ingon sa ilang paghigugma sa Dios, ug adunay moabut nganha sa ilang panimalay og usa ka tam-is ug pagbinatiay nga modala og mahangturong kalampusan.¹⁰

Ang unang kaminyoon gipahigayon sa Ginoo. Kini usa ka mahangturong kaminyoon tungod kay walay ingon nga butang sama sa panahon sa dihang kana nga seremonyas nahitabo. Ang seremonyas gipahigayon alang sa usa ka magtiayon nga kaniadto dili ulipon sa kamatayon; busa, ubos niana nga kahimtang ang panag-uban dili gayud matapos. Human sa pagkapukan, ang atong unang mga ginikanan giabug gikan sa Halaman. Niana sila naulipon sa kamatayon, apan ang pagkabanhaw gisaad ngadto kanila. Walay panahon nga giingon nga ang ilang mahangturong kaminyoon matapos.¹¹

Diha sa templo atong madawat ang labing taas nga ordinansa nga anaa alang sa mga lalaki ug mga babaye, ang sealing sa mga bana ug mga asawa nga mag-uban sa kahangturan. Atong lauman nga ang atong mga kabatan-onan dili mouyon sa bisan unsa nga kaminyoon gawas lamang sa kaminyoon diha sa templo.¹²

Sama nga ang bunyag usa ka sugo sa Ginoo, mao usab ang kaminyoon diha sa templo. Ingon nga ang bunyag importante sa pagsulod sa Simbahan, mao usab ang kaminyoon diha sa templo importante ngadto sa kahimayaan diha sa presensya sa Dios. Kabahin kini sa atong padulngan. Dili nato matuman ang atong katapusan nga mga katuyoan nga wala niini. Ayaw katagbaw sa bisan unsa nga minos niini.

Dili kamo modawat og kalibutanong matang sa bunyag, di ba? Ang Dios adunay iyang paagi sa bunyag—pinaagi sa pagpaunlod pinaagi sa usa ka tawo kinsa naghupot sa awtoridad. Dayon modawat mo og kalibutanon nga matang sa pagminyo? Siya adunay paagi sa pagminyo usab: Kini ang kaminyoon diha sa templo.¹³

Nag-ampo ako nga ang Ginoo mopanalangin kanato nga kita makaamgo sa rason sa atong pagpakabuhi ug unsay atong kinahanglan gayud nga buhaton aron makaplagan nato ang atong dalan ngadto sa kahimayaan ug kinabuhing dayon. Kabahin sa plano sa kahangturan mao ang kaminyoon nga atong gihuptan nga sagrado. Kon kita andam nga mosunod, ang mga ordinansa mahimong permanente sa hangtud. Pagkamahimayaong butang kini nga magbaton niini nga pagsabut ug magbaton niining mga kamatuoran nga gipadayag kanato.¹⁴

Sa paghukom kon kinsa ang minyoan, pagpailub, pagbaton og hugot nga pagtuo, ug pagpabilin nga takus sa pagdawat sa balaang pagtabang.

Ako nagtuo nga ang labing dako nga desisyon nga inyong kinahanglan gayud nga himoon … mao ang desisyon nga moumol sa inyong kinabuhi alang sa kahangturan, ug kana mao ang inyong kaminyoon. Ako nakasiguro nga kamo mouyon kanako nga kini mahimong mas importante kay sa bisan unsa pa ang inyong buhaton sa kinabuhi, tungod kay ang inyong trabaho ug ang inyong propesyon o bisan unsay inyong pagabuhaton dili ingon ka importante sama sa mahangturong mga hiyas. … [Ang desisyon mahitungod sa kaminyoon] makaapekto kaninyo hangtud ngadto sa kahangturan; kini makaapekto usab kaninyo samtang nagpuyo kamo dinhi sa yuta.¹⁵

Ayaw… pagdali-dali ngadto sa usa ka relasyon nga walay hustong pagpangandam ug inspirasyon. Sa mainampuong paagi pangayoa ang paggiya sa Ginoo kabahin niining butanga. Pagpabilin nga takus sa pagdawat nianang balaan nga panabang.¹⁶

Kadaghanan kaninyo … naguol mahitungod sa pagpangulitawo, kaminyoon, ug sa pagsugod og pamilya. Tingali dili ninyo makaplagan ang pangalan sa inyong umaabut nga kapikas diha sa panan-awon ni Nephi o sa basahon sa Pinadayag; tingali dili kamo sultihan niini pinaagi sa anghel o gani sa inyong bishop. Pipila ka mga butang nga kinahanglan gayud nga inyong buhaton sa inyong mga kaugalingon mismo. Pagbaton og hugot nga pagtuo ug pagmasulundon, ug ang mga panalangin moabut. Paningkamuti nga magmapailubon. Paningkamuti nga dili motugot sa unsay wala kaninyo nga mopugong kaninyo sa pag-ila niana nga kamo aduna. Kon kamo mabalaka og maayo mahitungod sa kaminyoon, kini makaguba gayud sa posibilidad niini. Pagpuyo sa hingpit ug matinud-anon ingon nga dili minyo sa wala pay angay nga kabalak-an mahitungod sa kaminyoon.¹⁷

Samtang nagpaabut sa gisaad nga mga panalangin, ang tawo kinahanglan nga adunay buhaton, kay ang pagkapakyas sa pag-uswag maoy pagaingnon nga usa ka pag-us-us. Pagmatinguhaon sa pag-apil diha sa maayo nga mga katuyoan, lakip ang inyong kaugalingon nga paglambo.¹⁸

“Samtang nagpaabut sa gisaad nga mga panalangin, … pagmatinguhaon sa pag-apil diha sa maayo nga mga katuyoan, lakip ang inyong kaugalingon nga paglambo.”

Walay panalangin nga ikawang ngadto sa takus nga mga indibidwal kinsa dili minyo.

Kini mao ang simbahan ni Jesukristo, dili simbahan sa mga minyo o ulitawo ug dalaga o bisan unsa nga grupo o indibidwal. Ang ebanghelyo nga atong gisangyaw mao ang ebanghelyo ni Jesukristo, nga molukop sa tanang makaluwas nga mga ordinansa ug mobayaw sa matag indibidwal kinsa andam sa pagdawat ni Kristo ug mosunod sa mga sugo nga siya ug ang atong Amahan sa Langit naghatag.¹⁹

Walay panalangin, lakip nianang mahangturong kaminyoon ug mahangturong pamilya, nga ikawang ngadto ni bisan kinsang takus nga indibidwal. Samtang kini ingon og madugay—gani tingali lapas niining mortal nga kinabuhi—alang sa uban nga matuman kini nga panalangin, dili kini ikawang. …

Karon, gusto kong motanyag og pipila ka mga pulong sa tambag ug gugma.

Ngadto kaninyo kinsa mga ulitawo: Ayaw ilangan ang kaminyoon tungod kay kamo wala diha sa hingpit nga panginabuhi ug pinansyal nga kahimtang. …Hinumdumi nga isip usa ka tighupot sa priesthood kamo adunay obligasyon nga mag-una sa pagpangita og mahangturong panag-uban.

Ngadto kaninyo nga mga dalaga: Ang mga saad sa mga propeta sa Dios kanunay nga ang Ginoo mahunahunaon kaninyo; kon kamo matinud-anon, tanang mga panalangin mainyo. Ang pagkadili minyo ug walay pamilya niini nga kinabuhi usa ka temporaryong kondisyon lamang, ug ang kahangturan usa ka taas nga panahon. Mipahinumdom si Presidente Benson kanato nga “ang panahon gitakda lamang ngadto sa tawo. Anaa sa hunahuna sa Dios ang inyong mahangturong panan-awon.” (Ensign, Nob. 1988, p. 97.) Pun-a ang inyong mga kinabuhi og bililhon, makahuluganon nga mga kalihokan.

Ngadto kaninyo kinsa nakasinati og diborsyo: Ayaw itugot ang kahigawad o pagbati sa kapakyasan nga mousab sa inyong ideya sa kaminyoon o sa kinabuhi. Ayaw pagkawala og pagtuo sa kaminyoon o pagtugot sa kapait nga mokutkot sa inyong kalag ug moguba ninyo o niadtong inyong hinigugma o gihigugma.²⁰

Ang malampusong kaminyoon nagkinahanglan sa atong labing maayong paningkamot sa pagsunod sa mga baruganan sa ebanghelyo.

Ang [kaminyoon] … usa ka nakat-unan nga kalihokan. Ang atong tinuyoang paningkamot, dili ang kinaiyang sugyot, nagpiho sa kalampusan. Ang nag-awhag nga pwersa nagagikan sa pagkamabination, tinuod nga pagbati, ug paghunahuna alang sa kalipay ug kaayohan sa usag usa.

Sa wala pa ang kaminyoon atong gitan-aw ang kinabuhi gikan sa atong kaugalingon nga pagsabut, apan human molabang ngadto nianang ganghaan, magsugod kita sa pagtan-aw niini gikan usab sa pagsabut sa uban. Adunay panginahanglan sa paghimo og mga sakripisyo ug pagpahiangay isip mga pagpakita sa inusab nga pasalig ug gugma.

Kini kasagarang gisulti nga ang pagkamalipayon ug pagkamalampuson sa kaminyoon sa kinatibuk-an dili hinungdan ang pagminyo sa tukma nga tawo kaysa mahimong tukma nga tawo. Ang estatistika nga nagpakita sa taas nga gidaghanon sa diborsyo mahimong magpakita og dili maalamong mga pagpili sa mga kapikas. Kon sila naminyo og laing mga tawo, ang piho nga problema tingali mahimong mawala, apan sa tinuod lain nga problema ang mopuli sa lugar niini. Ang maalamong pagpili sa usa ka kapikas usa ka dako nga kontribusyon ngadto sa usa ka malampuson nga kaminyoon, apan ang tinuyo nga paningkamot sa hingpit nga pagbuhat sa iyang kaugalingong responsibilidad mao ang labing dako nga elemento nga nagtampo sa kalampusan.²¹

Samtang kini tinuod nga ang takus nga mga magtiayon makabaton og kahimayaan didto sa celestial nga gingharian, ang matag lalaki ug babaye nga sealed sa mahangturong relasyon kinahanglan gayud nga indibwal nga takus niana nga panalangin.

Ang mahangturong kaminyoon maglangkub sa usa ka takus nga lalaki ug usa ka takus nga babaye, ang duha kinsa indibidwal nga nabunyagan sa tubig ug sa Espiritu; kinsa indibidwal nga nakaadto sa templo sa pagdawat sa ilang kaugalingong mga endowment; kinsa indibidwal nga misaad sa ilang pagkamatinud-anon ngadto sa Dios ug ngadto sa ilang kapikas diha sa pakigsaad sa kaminyoon; ug kinsa indibidwal nga misunod sa ilang mga pakigsaad, nagbuhat sa tanan nga gipaabut sa Dios kanila.²²

Ang pagsunod sa mga baruganan sa ebanghelyo naghimo og malipayong kaminyoon. … Kon ang duha ka tawo makapuyo sa mga baruganan sa ebanghelyo, ang kaminyoon mahimong tam-is ug kini mahimong malipayon.²³

Ang mga bana ug mga asawa kinahanglan mag-uban sa pagpaningkamot sa paglig-on sa mga gikauyonan sa kaminyoon.

Ang putling gugma ni Kristo ug pagpailub kauban ang mga kasaypanan

Kadaghanan sa mga kapikas adunay mga kasaypanan. … Si Richard L. Evans makausa miingon, “Tingali bisan kinsa kanato magkauyon sa usa ka perpekto nga tawo, apan ang atong tahas mao ang pakig-uyon sa tawo nga may kasaypanan” [Richard Evans’ Quote Book (1971), 165]. Atong masabtan diha sa kaminyoon nga kita wala makigsabut og perpekto nga mga tawo; kita naningkamot nga maperpekto ug kita nagpanaw sa dalan diin kita naglaum nga mahimong perpekto, apan kita kinahanglan gayud adunay pagsabut, mohatag sa atong labing maayo, ug mohimo sa kinabuhi nga manindot. …

… Ang Biblia nagsulti kanato: “Ang gugma mapailubon, ug mapuangoron” (tan-awa sa 1 Mga Taga-Corinto 13:4). Kana nga matang sa gugma, ang matang nga dili katiaw-tiawan, wala tapusa sumala sa gusto ug ilabay sama sa iglalabay nga plastic, apan kana nga molahutay sa tanang gagmay nga mga kalisud sa kinabuhi nga manag-uban ingon og naghiusa, mao ang katapusang pahayag sa tawhanong kalipay.²⁴

Panaghiusa sa kasingkasing

Sa tinuod ang labing malipayon nga mga kaminyoon mao kadtong diin ang imong kahiubos akong kahiubos, ang akong kasakit imong kasakit, akong kadaugan, imong kadaugan, akong mga kabalaka, imong mga kabalaka. Ang pagkahiusa sa kasingkasing, sa kalag, sa unod ingon og mas labaw ka mahagiton kay sa kaniadto dinhi sa kalibutan diin ang pangutana ingon ug: “ Unsay anaa niini alang kanako?” Daghan kaayo nga mga kapikas ang nahimo nga usa lamang ka dayan-dayan nga ipasigarbo kay sa magbaton og tinuod nga pagbati alang kanila.²⁵

Kon ang bana ug ang asawa “nahigugma sa usag usa sama sa ilang paghigugma sa Dios, … adunay moabut dinha sa ilang panimalay og usa ka tam-is ug pagbinatiay nga modala og mahangturong kalampusan.”

Ang pagkamatinud-anon sa hunahuna, sa pulong, ug sa buhat

Ang usa ka lalaki nga naghupot og priesthood magpakita og hingpit nga batasan sa pagkamatinud-anon ngadto sa iyang asawa ug dili mohatag kaniya og hinungdan sa pagduda sa iyang pagkamatinud-anon. Ang bana kinahanglan nga mohigugma sa iyang asawa sa tibuok niyang kasingkasing ug mounong ngadto kaniya ug wala nay lain (tan-awa sa D&P 42:22–26). Si Presidente Spencer W. Kimball mipasabut:

“Ang mga pulong wala nay lain nagpapha sa tanang tawo ug sa tanang butang. Niana ang kapikas mahimong prayoridad sa kinabuhi sa bana o sa asawa ug ni ang kinabuhing sosyal o panginabuhi o kinabuhing politikanhon o bisan unsa nga ubang interes o tawo o butang mahimong mas importante sa kapikas” (The Miracle of Forgiveness, Salt Lake City: Bookcraft, 1969, p. 250).

Gidili sa Ginoo ug gipanghimaraut sa iyang simbahan ang bisan unsa ug matag suod kaayo nga relasyon nga gawas sa kaminyoon. Ang pagluib sa usa ka bana mosamad sa kasingkasing sa iyang asawa ug mowagtang sa iyang pagsalig ug sa pagsalig sa iyang mga anak (tan-awa sa Jacob 2:35).

Pagmatinud-anon sa inyong mga pakigsaad sa kaminyoon sa hunahuna, sa pulong, ug sa buhat. Ang pornograpiya, mga pag-ibid-ibid, ug ngil-ad nga mga imahinasyon mokutkot sa kinaiya sa tawo ug mohuyang sa pundasyon sa usa ka malipayong kaminyoon. Ang panaghiusa ug pagsalig sulod sa kaminyoon niana maguba. Ang usa ka tawo kinsa dili magpugong sa iyang mga hunahuna ug sa ingon makasala og panapaw diha sa iyang kasingkasing, kon siya dili maghinulsol, dili makaangkon sa Espiritu, apan maglimud sa tinuohan ug isalikway (tan-awa sa D&P 42:23; 63:16).²⁶

Pagkamalumo ug pagtahud diha sa suod kaayo nga pagbati

Ilikay ang inyong mga kaugalingon sa bisan unsang pasulabi ug dili takus nga kinaiya diha sa malumo, suod kaayo nga relasyon tali sa bana ug asawa. Tungod kay ang kaminyoon gi-orden sa Dios, ang suod kaayo nga relasyon tali sa mga bana ug mga asawa maayo ug dungganan diha sa mga mata sa Dios. Nagsugo siya nga sila mahimong usa ka unod ug nga sila mosanay ug mopuno sa yuta (tan-awa Moises 2:28; 3:24). Kamo kinahanglan nga mohigugma sa inyong asawa maingon usab nga si Kristo naghigugma sa Simbahan ug mitugyan sa iyang kaugalingon alang niini (tan-awa sa Mga Taga-Efeso 5:25–31).

Kalumo ug pagtahud—dili gayud ang kahakog— mao gayud ang giya nga mga baruganan diha sa suod kaayo nga relasyon tali sa bana ug sa asawa. Ang matag kapikas kinahanglan nga mahunahunaon ug sensitibo sa panginahanglan ug mga tinguha sa iyang kapikas. Ang bisan unsa nga pasulabi, law-ay, o dili kapugngan nga kinaiya diha sa suod kaayo nga relasyon tali sa bana ug asawa gipanghimaraut sa Ginoo.

Si bisan kinsa nga lalaki nga moabuso o mopakaulaw sa iyang asawa sa pisikal o sa espirituhanong paagi makasala og dako kaayo nga sala ug manginahanglan og sinsero ug lawom nga paghinulsol. Ang mga panagbangi kinahanglan nga sulbaron pinaagi sa gugma ug pagkamabination ug uban sa espiritu sa panag-uli sa usag usa. Ang usa ka lalaki kinahanglan nga kanunay mosulti ngadto sa iyang asawa sa mahigugmaon ug mabination nga paagi, magtagad kaniya uban sa labing taas nga respeto. Ang kaminyoon sama sa usa ka bag-ong tubo nga bulak … ug kinahanglan gayud nga amumahan kanunay uban sa mga pahayag sa gugma ug pagbati.²⁷

Maayong pagpaminaw

Daghang mga problema ang daling matubag, ug daghang lisud nga mga sitwasyon ang masulbad, kon kita makasabut nga adunay mga panahon nga kita kinahanglan nga maminaw. Sa eskwelahan makat-unan nato ang leksyon kon kita maminaw, apan mapakyas kon kita modumili sa paghatag og atensyon. Sa kaminyoon adunay kompletong kakulang sa pagsabut gawas kon kita andam sa pagpaminaw. … Dayag lang, kita kinahanglan nga magsinultihanay, apan kinahanglan gayud nga kita maminaw ngadto sa laing hunahuna aron sa pagdugang sa atong pagsabut igo sa paghimo og maalamon nga desisyon. Ang pagpaminaw usahay makahimo og kalainan.²⁸

Ang walay paghunahuna sa kaugalingon

Ang mga panaghigalaay dili makalahutay kon kini pinasikad diha sa dili lig-on nga pundasyon sa pagkahakog. Ang mga kaminyoon dili molahutay kon kini walay kapasikaran gawas sa pisikal nga pagkadani, ug walay pundasyon sa usa ka mas lawom nga paghigugma ug pagkamaunungon.²⁹

Kami naglaum nga kamo kinsa mga minyo mohinumdom sa mga pagbati sa gugma nga migiya kaninyo ngadto sa altar diha sa balay sa Ginoo. Ang among mga kasingkasing nasubo sa pagkahibalo sa daghan kinsang gugma nagkabugnaw o kinsa pinaagi sa mga hinungdan sa pagkahakog o kalapasan nakalimot o nagtiaw-tiaw sa pagtagad sa mga pakigsaad sa kaminyoon nga ilang gihimo diha sa templo. Kami nangamuyo ngadto sa mga bana ug mga asawa sa pagbaton og gugma ug respeto alang sa usag usa. Sa pagkatinuod, kini mao ang among dakong panghinaut nga ang matag pamilya mapanalanginan og inahan ug amahan kinsa nagpahayag og gugma alang sa usag usa, kinsa matinahuron sa usag usa, ug kinsa nag-uban sa paglig-on sa mga gikauyonan sa kaminyoon.³⁰

Mga Sugyot alang sa Pagtuon ug Pagtudlo

Mga Pangutana

Diha sa seksyon 1, gihatagan og gibug-aton ni Presidente Hunter nga ang kaminyoon gi-orden sa Dios ug gituyo nga mahimong mahangturon. Sa unsang paagi nga ang pagkahibalo niini makaapekto sa inyong relasyon ngadto sa inyong kapikas? Unsa ang kahulugan niini diha kaninyo nga ang kaminyoon maoy “usa ka panag-uban sa Dios”? Unsaon nato pagtabang ang mga kabataan ug kabatan-onan sa pag-andam nga magminyo sa templo?
Unsa ang inyong mga hunahuna ug mga impresyon samtang kamo nagtuon sa tambag ni Presidente Hunter mahitungod sa pagdesisyon kon kinsa ang minyoan? (Tan-awa sa seksyon 2.)
Sa unsa nga paagi nga ang mga saad ug tambag ni Presidente Hunter diha sa seksyon 3 nagtabang sa mga tawo kinsa dili mga minyo? Unsaon nato paggamit ang mensahe ni Presidente Hunter nga “kini mao ang simbahan ni Jesukristo, dili simbahan sa mga minyo o dili mga minyo”?
Unsa sa inyong hunahuna ang gipasabut ni Presidente Hunter pinaagi sa pag-ingon nga ang kaminyoon “usa ka nakat-unan nga kalihokan”? (Tan-awa sa seksyon 4.) Kanus-a kamo nakakita nga ang pagsunod sa mga baruganan sa ebanghelyo nagdala og kalipay ngadto sa kaminyoon? Kon kamo minyo, hunahunaa kon unsa kaha ang inyong buhaton aron mas hingpit ninyong mapakita ang inyong gugma ngadto sa inyong kapikas.
Palandunga ang mga tambag ni Presidente Hunter sa seksyon 5. Unsaon sa managtiayon pagpalambo og mas dako nga pagpailub ngadto sa mga kasaypanan sa usag usa? Unsaon sa mga managtiayon sa pagpalambo og “panaghiusa sa kasingkasing”? Unsaon sa managtiayon pagpakita og pagkamatinud-anon diha sa kaminyoon pinaagi sa hunahuna, sa pulong, ug sa buhat?

May Kalabutan nga mga Kasulatan

Genesis 2:18, 21–24; Jacob 2:27, 31–33; 4 Nephi 1:11; D&P 42:22; Moises 3:19–24; tan-awa usab sa “Ang Pamilya: Usa ka Pamahayag ngadto sa Kalibutan ,” Ensign, Nob. 2010, 129

Tabang sa Pagtuon

“Ang inyong pagtuon sa ebanghelyo labing epektibo kon kamo gitudloan sa Espiritu Santo. Sugdi kanunay ang inyong pagtuon sa ebanghelyo pinaagi sa pag-ampo alang sa Espiritu Santo nga motabang kaninyo nga makakat-on” (Isangyaw ang Akong Ebanghelyo [2004], 18).