Mga Pagtulon-an sa mga Presidente
Kapitulo 13: Ang Templo—Ang Talagsaong Simbolo sa Atong Pagkamiyembro


Kapitulo 13

Ang Templo—Ang Talagsaong Simbolo sa Atong Pagkamiyembro

“Mao kini ang labing dakong tinguha sa akong kasingkasing nga ang matag miyembro sa Simbahan takus nga mosulod sa templo.”

Gikan sa Kinabuhi ni Howard W. Hunter

Ang inahan ni Howard W. Hunter usa ka matinud-anon nga miyembro sa Simbahan sa tibuok niyang kinabuhi, apan ang iyang amahan wala mabunyagi hangtud si Howard nag-edad og 19. Mga tuig ang milabay, sa diha nga si Howard nahimong presidente sa stake sa California, ang mga miyembro sa stake mobiyahe ngadto sa Mesa Arizona Temple sa pagpahigayon sa buluhaton sa templo. Sa dili pa magsugod ang sesyon, ang presidente sa templo mihangyo kaniya sa pagpamulong ngadto niadtong kinsa nagpundok sa chapel. Ika- 46 nga adlawng natawhan kadto ni Presidente Hunter. Sa wala madugay gisulat kana niya nga kasinatian:

“Samtang ako namulong ngadto sa kongregasyon, … ang akong amahan ug inahan misulod sa chapel nga nagsul-ob og puti. Ako walay ideya nga ang akong amahan andam alang sa iyang mga panalangin sa templo, bisan tuod si Mama naghinamhinam mahitungod niini sa dugay na nga panahon. Nasanapan ako sa pagbati nga ako wala makapadayon sa pagsulti. Si Presidente Pierce [ang presidente sa templo] miduol sa akong kilid ug mipasabut sa rason sa pagkahunong. Sa diha nga ang akong amahan ug inahan misulod sa templo niana nga buntag ilang gihangyo ang presidente sa dili pagsulti kanako nga sila anaa tungod kay gusto nila nga kini usa ka surprisa alang sa adlawng natawhan. Kini usa ka adlawng natawhan nga wala gayud nako kalimti tungod kay nianang adlawa sila na endowed ug ako dihay pribilehiyo sa pagsaksi sa ilang sealing, nga gisundan sa akong pagka-sealed ngadto kanila.”1

Mga sobra og gamay sa 40 ka tuig ang milabay, sa dihang si Howard W. Hunter mihimo sa iyang una nga pahayag sa publiko isip Presidente sa Simbahan, usa sa iyang labing importante nga mensahe alang sa mga miyembro mao ang pagtinguha sa mga panalangin sa templo uban sa mas dako nga debosyon.2 Gipadayon niya sa paghatag og gibug-aton kana nga mensahe sa tibuok niya nga serbisyo isip Presidente. Namulong diha sa dapit sa Nauvoo Temple niadtong Hunyo 1994, miingon siya:

“Sayo niini nga bulan misugod ako sa akong pagpangalagad pinaagi sa pagpahayag sa akong dakong tinguha nga unta magkadaghan ang mga miyembro sa Simbahan nga mahimong takus sa templo. Sama sa panahon [ni Joseph Smith], ang pagbaton og takus ug endowed nga mga miyembro mao ang importante sa pagtukod sa gingharian sa tibuok kalibutan. Ang pagkahimong takus alang sa templo nagsiguro nga ang atong mga kinabuhi nahiuyon sa kabubut-on sa Ginoo, ug kita andam sa pagdawat sa Iyang paggiya sa atong mga kinabuhi.”3

Daghang mga bulan ang milabay, sa Enero 1995, ang katapusan nga kalihokan sa publiko ni Presidente Hunter mao ang pagpahinungod sa Bountiful Utah Temple. Sa pahinungod nga pag-ampo, siya nangayo nga ang mga panalangin sa templo mopalambo sa mga kinabuhi sa tanan kinsa mosulod:

“Mapainubsanon kaming nag-ampo nga unta ikaw modawat niini nga edipisyo ug himoa nga ang imong mga panalangin maania dinhi. Himoa nga ang imong espiritu maania ug mogiya sa tanan kinsa mopahigayon dinhi niini, nga ang pagkabalaan mopatigbabaw sa matag lawak. Hinaut nga ang tanan kinsa mosulod adunay limpyo nga mga kamot ug putli nga mga kasingkasing. Hinaut nga sila matukod diha sa ilang hugot nga pagtuo ug mobiya uban ang pagbati sa kalinaw, nagdayeg sa imong balaan nga pangalan. …

“Hinaut nga kini nga Balay makahatag og diwa sa kalinaw ngadto sa tanan kinsa naniid sa kahalangdon niini, ug ilabi na niadtong kinsa mosulod alang sa ilang kaugalingong sagrado nga mga ordinansa ug sa pagpahigayon sa buhat alang niadtong mga nangamatay na. Ipabati nila ang imong balaan nga gugma ug kalooy. Hinaut nga sila may pribiliheyo sa pagsulti, ingon sa mga Salmista sa karaan, ‘Matam-is ang atong panag-usa sa pagtinambagay, sa balay sa Dios nanlakaw kita kuyog sa panon.’

“Sa among pagpahinungod niining sagrado nga edipisyo, among ipahinungod pag-usab ang amo gayud nga mga kinabuhi nganha kanimo ug sa imong buhat.”4

Imahe
Mesa Arizona Temple

Ang Mesa Arizona Temple, diin si Presidente Howard W. Hunter na-sealed ngadto sa iyang mga ginikanan niadtong 1953

Mga Pagtulun-an ni Howard W. Hunter

1

Kita giawhag sa paghimo sa templo isip ang talagsaong simbolo sa atong pagkamiyembro.

Sa panahon sa akong call ngadto niining sagrado nga katungdanan [Presidente sa Simbahan], usa ka pagdapit gihatag alang sa tanang mga miyembro sa Simbahan sa paghimo sa templo sa Ginoo isip talagsaong simbolo sa ilang pagkamiyembro ug ang langitnong dapit alang sa ilang labing sagrado nga mga pakigsaad.

Sa akong pagpamalandong sa templo, naghunahuna ako niini nga mga pulong:

“Ang templo mao ang usa ka dapit sa panudlo diin ang lawom nga mga kamatuoran kalabut ngadto sa Gingharian sa Dios gipadayag. Kini usa ka dapit sa kalinaw diin ang mga hunahuna makapunting diha sa mga butang sa espiritu ug ang mga kabalaka sa kalibutan ikasalikway. Diha sa templo kita makahimo og mga pakigsaad sa pagsunod sa mga balaod sa Dios, ug mga saad gihimo ngari kanato, nag-agad kanunay sa atong pagkamatinud-anon, nga molugway ngadto sa kahangturan” (The Priesthood and You, Melchizedek Priesthood Lessons—1966, Salt Lake City: The Church of Jesus Christ of Latter-day Saints, 1966, p. 293).

Ang Ginoo Mismo kinsa, diha sa Iyang mga pinadayag ngari kanato, naghimo sa templo nga importante kaayo nga simbolo alang sa mga miyembro sa Simbahan. Hunahunaa ang mga batasan ug matarung nga mga kinaiya nga gipasabut sa Ginoo nga kinahanglan natong palamboon diha sa tambag nga Iyang gihatag ngadto sa mga Santos sa Kirtland pinaagi ni Propeta Joseph Smith samtang nangandam sila sa pagtukod og templo. Kini nga tambag magamit gihapon:

“Han-aya ninyo ang inyong mga kaugalingon; andama ang matag butang nga kinahanglanon; ug pagtukod og usa ka balay, gani usa ka balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa pagtulun-an, usa ka balay sa himaya, usa ka balay sa kahusay, usa ka balay sa Dios” (D&P 88:119). Kini ba nga mga pamatasan ug mga kinaiya sa tinuoray nagpakita sa unsay gitinguha ug gipangita sa matag usa kanato? …

… Ang paghimo sa templo nga tinuod gayud nga simbolo ngari kanato, kinahanglan ato kining tinguhaon nga mahimong mao. Kinahanglan gayud kita nga magpuyo nga takus aron makasulod sa templo. Kinahanglan gayud kita nga mosunod sa mga sugo sa atong Ginoo. Kon kita makasunod sa atong kinabuhi sama ngadto sa Agalon, ug dawaton ang Iyang pagtulun-an ug ehemplo isip ang halangdong sundanan alang sa atong kaugalingon, dili kita maglisud nga mahimong takus sa templo, nga mahimong makanunayon ug maunungon sa tanang aspeto sa kinabuhi, kay kita mahimong mopasalig ngadto sa bugtong, sagrado nga sumbanan sa pamatasan ug pagtuo. Sa balay man o sa merkado, nag-eskwela o dugay nang nahuman sa pag-eskwela, hingpit kita nga nag-inusara sa paglihok o kauban ang laing mga tawo, ang atong tumong mahimong tataw ug ang atong mga sumbanan klaro.

Ang abilidad nga mobarug sa kaugalingong mga baruganan, ang mopuyo nga adunay integridad ug hugot nga pagtuo sumala sa gituohan sa usa ka tawo—mao ang labing mahinungdanon. Ang pagkamaunungon ngadto sa tinuod nga baruganan—diha sa atong indibidwal nga mga kinabuhi, diha sa atong mga panimalay ug mga pamilya, ug sa tanang mga dapit nga atong makaila ug maimpluwensya ang ubang mga tawo—kana nga pagkamaunungon mao ang labing gihangyo sa Dios kanato. Nagkinahanglan kini og pasalig—tibuok kalag, gihuptan og maayo, mahangturong gimahal nga pasalig ngadto sa mga baruganan nga atong nasayran mga tinuod diha sa mga sugo nga gihatag sa Dios. Kon kita magmatinuoron ug magmatinud-anon sa mga baruganan sa Ginoo, nan himoon natong kanunay kitang takus sa templo, ug ang Ginoo ug ang Iyang balaan nga mga templo mahimong mahinungdanong mga simbolo sa atong pagkadisipulo Kaniya.5

2

Ang matag usa kanato kinahanglan nga maningkamot sa pagdawat og temple recommend.

Mao kini ang labing dako nga tinguha sa akong kasingkasing nga ang matag miyembro sa Simbahan takus nga mosulod sa templo. Makapahimuot kini sa Ginoo kon ang matag hamtong nga miyembro mahimong takus—ug magdala—og usa ka magamit nga temple recommend. Ang mga butang nga kinahanglan gayud nato nga buhaton ug dili buhaton aron mahimong takus sa usa ka temple recommend mao gayud ang mga butang nga mosiguro nga kita magmalipayon isip mga indibidwal ug isip mga pamilya.6

Tataw nga gilatid sa atong Langitnong Amahan nga kadtong kinsa mosulod sa templo kinahanglan gayud nga limpyo ug lingkawas gikan sa mga sala sa kalibutan. Siya miingon, “Ug kon ang akong mga katawhan motukod og usa ka balay ngari kanako sa ngalan sa Ginoo, ug dili motugot sa bisan unsa nga mahugaw nga butang nga mosulod ngadto niini, aron kini dili mahugawan, ang akong himaya mopahulay diha niini; … Apan kon kini mahugawan Ako dili mosulod ngadto niini, ug ang akong himaya wala diha; kay Ako dili mosulod nganha sa mga templo nga dili balaan” (D&P 97:15, 17).

Tingali makapaikag kini alang kaninyo nga mahibalo nga ang Presidente sa Simbahan kanhiay naanad sa pagpirma sa matag temple recommend. Ingon niana ka lig-on ang gibati sa unang mga presidente mahitungod sa pagkatakus sa pagsulod sa templo. Niadtong 1891 ang responsibilidad gibutang diha sa mga bishop ug presidente sa stake, kinsa mangutana kaninyo og daghang mga pangutana kalabut sa inyong katakus nga makasarang og temple recommend. Kinahanglan kamong mahibalo kon unsay gipaabut nganha kaninyo aron makasarang og temple recommend.

Kinahanglan gayud nga kamo nagtuo sa Dios ang Amahan sa Kahangturan, sa Iyang Anak nga si Jesukristo, ug sa Espiritu Santo. Kinahanglan gayud nga kamo motuo nga kini mao ang ilang sagrado ug balaang buhat. Kami nag-awhag kaninyo sa pagbuhat matag adlaw sa pagtukod sa inyong pagpamatuod diha sa atong Langitnong Amahan ug ni Ginoong Jesukristo. Ang Espiritu nga inyong gibati mao ang Espiritu Santo nga nagpamatuod nganha kaninyo sa ilang pagkatinuod. Sa dili madugay, diha sa templo, mas daghan pa ang inyong makat-unan mahitungod sa Dios nga Kapangulohan pinaagi sa gipadayag nga panudlo ug mga ordinansa.

Kamo kinahanglan gayud nga mopaluyo sa mga General Authority ug sa lokal nga mga lider sa Simbahan. Sa inyong pagpataas sa inyong mga kamot sa dihang ang mga pangalan niini nga mga lider gipresentar, kamo mipakita nga kamo mopaluyo kanila diha sa ilang mga responsibilidad ug mga tambag nga ilang ihatag kaninyo.

Kini dili usa ka bansay sa paghatag og pagtahud ngadto niadtong kinsa gitawag sa Ginoo sa pagdumala. Hinoon, kini usa ka pag-ila sa ka tinuod nga ang Dios nagtawag og mga propeta, mga manalagna, ug mga tigpadayag, ug uban pa isip mga General Authority. Kini usa ka pasalig nga kamo mosunod sa mga panudlo nga moabut gikan sa tigdumala nga mga opisyal sa Simbahan. Ingon man usab kamo kinahanglang mobati og pagkamaunungon ngadto sa bishop ug presidente sa stake ug sa ubang mga lider sa Simbahan. Ang pagkapakyas sa pagpaluyo niadtong anaa sa awtoridad dili magkauyon sa serbisyo diha sa templo.

Kinahanglan gayud nga kamo limpyo og moral nga mosulod ngadto sa balaang templo. Ang balaod sa kaputli nagkinahanglan nga kamo walay sekswal nga mga relasyon ngadto ni bisan kinsa gawas sa inyong bana o asawa. Kami labi nga nag-awhag kaninyo sa pagbantay batok sa mga panglingla ni Satanas nga mobuling sa inyong moral nga kalimpyo.

Kamo kinahanglan gayud nga mosiguro nga wala sa inyong relasyon sa mga sakop sa pamilya nga wala mahiuyon sa mga pagtulun-an sa Simbahan. Kami labi nga nag-awhag sa [kabatan-onan] sa pagsunod sa [ilang] mga ginikanan diha sa pagkamatarung. Kinahanglan gayud nga ang mga ginikanan mabinantayon aron sa pagsiguro nga ang ilang mga relasyon sa mga sakop sa pamilya nahiuyon sa mga pagtulun-an sa ebanghelyo ug dili gayud maglakip og pag-abuso o pagpasagad.

Sa pagsulod sa templo kinahanglan gayud nga kamo matinuoron sa tanan ninyong mga pakigsabut sa uban. Isip mga Santos sa Ulahing mga Adlaw kita adunay sagrado nga obligasyon nga dili gayud manlimbong o dili magmatinuoron. Ang atong importanting integridad namiligro kon kita molapas niini nga pakigsaad.

Aron makasarang og temple recommend, kinahanglan kamong maninguha sa pagbuhat sa inyong katungdanan diha sa Simbahan, motambong sa sakrament, priesthood, ug uban nga mga miting. Kinahanglan gayud usab kamong mosunod sa mga lagda, balaod, ug mga sugo sa ebanghelyo. Pagkat-on … sa pagdawat og mga calling ug ubang mga responsibilidad nga ihatag nganha kanimo. Pag-aktibo sa pag-apil sa inyong mga ward ug mga branch, ug himoa nga kamo usa ka tawo nga kasaligan sa inyong mga lider.

Aron makasulod sa templo kinahanglan gayud nga kamo hingpit nga tigbayad sa ikapulo ug nagsunod sa Pulong sa Kaalam. Kining duha ka mga sugo, yano ang mga panudlo niini apan hilabihan kaayo kaimportante sa atong espirituhanong pagtubo, mga kinahanglanon sa paghimatuod sa atong personal nga katakus. Ang obserbasyon sa daghang mga katuigan nagpakita nga kadtong matinud-anong nagbayad sa ilang ikapulo ug nagsunod sa Pulong sa Kaalam kasagaran matinud-anon sa tanang uban nga mga butang kalabut sa pagsulod sa balaang templo.

Kini dili mga butang nga tiaw-tiawan. Kon makaplagan nga takus mosulod sa templo, kita mopahigayon og mga ordinansa nga mao ang labing sagrado nga gipangalagad bisan asa dinhi sa yuta. Kini nga mga ordinansa kalabut sa mga butang sa kahangturan.7

Imahe
usa ka priesthood lider nga may katungdanan

“Ang mga bishop ug mga presidente sa stake … mangutana kaninyo og daghang mga pangutana kalabut sa inyong katakus nga makasarang og usa ka temple recommend.”

3

Ang pagbuhat og buluhaton sa templo nagdala og dagkong mga panalangin ngadto sa mga indibidwal ug mga pamilya.

Pagkamahimayaon nga butang kini alang kanato nga makabaton og pribilehiyo sa pag-adto sa templo alang sa atong kaugalingong mga panalangin. Dayon human sa pag-adto sa templo alang sa atong kaugalingong mga panalangin, pagkamahimayaon nga pribilehiyo ang paghimo sa buhat alang niadtong kinsa nangamatay na. Kini nga aspeto sa buhat sa templo usa ka dili hinakog nga buhat. Gani sa higayon nga kita mohimo sa buhat sa templo alang sa ubang mga tawo adunay panalangin nga mobalik ngari kanato. Busa dili nato ikatingala nga ang Ginoo nagtinguha nga ang Iyang katawhan mahimong mga katawhan nga nadasig sa templo. …

… Dili lamang kita moadto alang sa atong mga nangamatay nga kaliwat apan alang usab sa personal nga panalangin sa pagsimba sa templo, alang sa pagkasagrado ug kaluwasan nga anaa sulod niadtong gibalaan ug gipahinungod nga mga bong-bong. Samtang kita nagtambong sa templo, atong makat-unan nga mas buhong ug lawom ang katuyoan sa kinabuhi ug ang ka importante sa maulaong sakripisyo ni Ginoong Jesukristo. Atong himoon ang templo, uban ang pagsimba diha sa templo ug mga pakigsaad sa templo ug kaminyoon diha sa templo, nga atong labing importanting yutan-ong tumong ug ang labing nindot nga mortal nga kasinatian.8

Daghang mga butang ang mahimo pinaagi sa atong pagtambong diha sa templo—atong gituman ang mga panudlo sa Ginoo sa paghimo sa atong kaugalingong ordinansa nga buluhaton, atong gipanalanginan ang atong mga pamilya pinaagi sa mga ordinansa sa sealing, ug atong gipakigbahin ngadto sa uban pinaagi sa pagbuhat alang kanila unsay dili nila mahimo sa ilang kaugalingon. Agi og dugang niini, kita nagbayaw sa atong kaugalingon nga mga hunahuna, naghimo nga mas masuod ngadto sa Ginoo, nagtahud [sa] priesthood, ug naghimo nga espirituhanon ang atong mga kinabuhi.9

Atong madawat ang personal nga mga panalangin diha sa atong pagtambong sa templo. Nagkomentaryo kon sa unsang paagi napanalanginan ang atong mga kinabuhi pinaagi sa tambong sa templo, si Elder John A. Widstoe mipahayag:

“Ang buluhaton sa templo … naghatag og nindot kaayong oportunidad nga magpabiling abtik ang atong espirituhanong kahibalo ug kalig-on. … Ang gamhanang panan-awon sa kahangturan gipakita sa atong atubangan diha sa balaang mga templo; atong makita ang panahon gikan sa walay utlanan nga sinugdanan ngadto sa walay pagtapos nga katapusan; ug ang pagsaksi sa representasyon sa walay katapusan nga kinabuhi gibukhad diha sa atong atubangan. Niana mas klaro nakong makita ang akong dapit taliwala sa mga butang sa kalibutan, ang akong dapit taliwala sa mga katuyoan sa Dios; mas mapahimutang nako og maayo ang akong kaugalingon diin ako nahisakop, ug mas makahimo ako sa paghatag og bili ug sa paghukom, sa pagbulag ug sa paghan-ay sa yano, ordinaryong mga katungdanan sa akong kinabuhi aron ang gagmay nga mga butang dili molupig o mokuha sa akong panan-awon sa mas dagkong mga butang nga gihatag sa Dios kanato” (sa Conference Report, Abr.1922, pp. 97–98).10

Hunahunaa ang harianong mga pagtulun-an diha sa gamhanang paghalad nga pag-ampo sa pagpahinungod sa Kirtland Temple, usa ka pag-ampo nga gisulti ni Propeta Joseph Smith nga gihatag pinaagi sa pagpadayag. Kini usa ka pag-ampo nga nagpadayon nga pagatubagon diha kanato sa tinagsa, diha kanato isip mga pamilya, ug diha kanato isip katawhan tungod sa gahum sa priesthood nga gihatag sa Ginoo kanato nga gamiton diha sa Iyang balaan nga mga templo.

“Ug karon, Balaan nga Amahan,” pangamuyo ni Propeta Joseph Smith, “kami mohangyo kanimo aron sa pagtabang kanamo, imong mga katawhan, uban sa imong grasya … nga kami unta makita nga takus, diha sa imong panan-aw, sa pagdawat sa katumanan sa mga saad nga ikaw mihimo ngari kanamo, imong mga katawhan, diha sa mga pagpadayag nga gihatag ngari kanamo;

“Aron ang imong himaya mokunsad nganha sa imong mga katawhan. …

“Ug kami mangayo kanimo, Balaan nga Amahan, nga ang imong mga sulugoon makasulod unta niini nga balay sinangkapan uban sa imong gahum, ug aron ang imong ngalan unta maanaa diha kanila, ug ang imong himaya maglibut kanila, ug ang imong mga anghel mobantay kanila” [D&P 109:10–12, 22].11

Ang pagtambong sa templo nagmugna og pagka-espirituhanon. Kini usa sa labing maayo nga programa nga kita aduna diha sa Simbahan sa pagpalambo og pagka-espirituhanon. Kini mopabalik sa mga kasingkasing sa mga anak ngadto sa ilang mga amahan ug ang mga kasingkasing sa mga amahan ngadto sa ilang mga anak (Malaquias 4:6). Kini nagpalambo og kalig-on ug panaghiusa sa pamilya.12

4

Magdali kita ngadto sa templo.

Atong ipakigbahin sa atong mga anak ang espirituhanon nga mga pagbati nga atong gibati diha sa templo. Ug tudloan nato sila og maayo ug sa mas komportable nga paagi sa mga butang nga mahimo natong isulti sa tukma nga paagi mahitungod sa mga katuyoan sa balay sa Ginoo. Paghupot og usa ka litrato sa templo diha sa inyong panimalay aron makita sa inyong mga anak. Tudloi sila mahitungod sa mga katuyoan sa balay sa Ginoo. Ipaplano nila gikan sa ilang bata pa nga pangidaron ang pag-adto didto ug sa pagpabiling takus niana nga panalangin. Andamon nato ang matag misyonaryo sa pag-adto sa templo nga may katakus ug sa paghimo niana nga kasinatian nga gani mas nindot kay sa pagdawat og mission call. Planohon ug tudloan ug hangyoon nato ang atong mga anak sa pagminyo diha sa balay sa Ginoo. Atong balikon ang pagmatuod nga mas may kalig-on kay sa nabuhat nato sukad sa nanglabay nga panahon nga kini adunay kalabutan asa kamo maminyo ug pinaagi sa unsang awtoridad kamo gipahayag nga bana ug asawa.13

Makapahimuot kini sa Ginoo nga ang atong mga kabatan-onan takus nga moadto sa templo ug mopahigayon og gitugyan [vicarious] nga bunyag alang niadtong walay oportunidad nga mabunyagan sa buhi pa. Makapahimuot kini sa Ginoo kon kita takus nga moadto sa templo aron personal nga mohimo sa atong kaugalingong mga pakigsaad ngadto Kaniya ug ma-sealed isip mga magtiayon ug mga pamilya. Ug makapahimuot kini sa Ginoo kon kita takus nga moadto sa templo aron sa pagpahigayon sa sama nga makaluwas nga mga ordinansa alang niadtong nangamatay na, kadaghanan kanila naghinam-hinam nga naghulat nga makompleto kini nga mga ordinansa alang kanila.14

Ngadto kanila kinsa wala pa makadawat sa ilang mga panalangin sa templo, o kinsa wala maghupot og temple recommend, mahimo bang awhagon ko kamo diha sa pagpaubos ug gugma sa pagpaningkamot niana nga adlaw nga kamo makasulod ngadto sa balay sa Ginoo. Siya misaad niadtong kinsa mga matinud-anon sa ilang mga pakigsaad, “Ug kon ang akong mga katawhan mopatalinghug ngadto sa akong tingog ug ngadto sa tingog sa akong mga sulugoon kinsa Ako mitudlo sa pagpangulo sa akong mga katawhan, tan-awa, sa pagkatinuod Ako moingon nganha kaninyo, sila dili papahawaon sa ilang dapit” (D&P 124:45). … Nagsaad ako kaninyo nga ang inyong personal nga pagka-espirituhanon, relasyon ngadto sa inyong bana o asawa, ug mga relasyon sa pamilya mapanalanginan ug malig-on sa inyong kanunay nga pagtambong sa templo.15

Himoa nga kita usa ka katawhan nga kanunayng moadto sa templo ug mahigugmaon sa templo. Magdali kita og adto ngadto sa templo ingon ka kanunay nga itugot sa panahon ug salapi ug personal nga mga kahimtang. Dili lamang kita moadto alang sa atong mga nangamatay na nga kaliwat apan kita usab moadto alang sa personal nga panalangin sa pagsimba sa templo, alang sa pagkasagrado ug kaluwasan nga ihatag sulod niadtong gibalaan ug gipahinungod nga mga bong-bong. Ang templo usa ka dapit sa katahum, usa kini ka dapit sa pagpadayag, usa kini ka dapit sa kalinaw. Balay kini sa Ginoo. Kini balaan ngadto sa Ginoo. Kinahanglan nga kini balaan ngari kanato.16

Mga Sugyot alang sa Pagtuon ug Pagtudlo

Mga Pangutana

  • Palandunga ang mga pagtulun-an ni Presidente Hunter sa seksyon 1. Unsaon nato “pagtukod ang templo sa Ginoo isip ang talagsaon nga simbolo sa [atong] pagkamiyembro”?

  • Ribyuha ang mga kinahanglanon alang sa temple recommend ingon nga gilatid sa seksyon 2. Sa unsang paagi ang pagkinabuhi sumala niini nga mga kinahanglanon mipanalangin kaninyo ug sa inyong pamilya? Ngano nga kita gikinahanglan nga maningkamot nga “malimpyo gikan sa mga sala sa kalibutan” samtang kita mosulod sa templo?

  • Ribyuha ang mga pagtulun-an ni Presidente Hunter mahitungod sa mga panalangin sa paghimo og buluhaton sa templo (tan-awa sa seksyon 3). Sa unsang paagi ang pag-apil sa mga ordinansa sa templo mipanalangin kaninyo ug sa inyong pamilya? Unsaon ninyo nga mas hingpit makapahimulos sa mga panalangin sa templo? Mahimo ba kamong mopakigbahin og higayon diin gibati ninyo ang espirituhanong kalig-on o direksyon diha sa templo? Kon kamo wala pa makaadto sa templo, pamalandong kon unsaon ninyo sa pagpangandam ang pagdawat niana nga panalangin.

  • Unsa ang pipila ka mga paagi kita makatabang sa mga kabataan ug kabatan-onan sa pagkat-on mahitungod sa mga templo ug sa pagpalambo og gugma alang niini? (Tan-awa sa seksyon 4.) Unsaon nato pagtabang ang mga kabataan ug kabatan-onan sa pagtinguha nga magminyo diha sa balay sa Ginoo? Ngano nga importante nga kita moadto sa templo “ingon ka kanunay nga itugot sa panahon ug sa salapi ug sa personal nga mga kahimtang”?

May Kalabutan nga mga Kasulatan

Salmo 55:14; Isaias 2:2–3; D&P 97:12–17; 110:6–10; 124:39–41; 138:53–54; Bible Dictionary, “Temple”

Tabang sa Pagtudlo

“Sa kasagaran ang usa ka leksyon adunay daghang materyal kay sa mahimo ninyong itudlo sa oras nga gihatag kaninyo. Sa ingon nga sitwasyon, kinahanglan nga inyong pilion ang materyal nga labing makatabang niadtong inyong tudloan” (Pagtudlo, Walay Labaw Ka Mahinungdanon nga Tawag [1999], 98).

Mubo nga mga Sulat

  1. Tan-awa sa Eleanor Knowles, Howard W.Hunter (1994), 135.

  2. Tan-awa sa Jay M. Todd, “President Howard W. Hunter: Fourteenth President of the Church,” Ensign, Hulyo 1994, 4–5.

  3. “The Temple of Nauvoo,” Ensign, Sept. 1994, 62–63.

  4. Mga pulong sa pahinungod nga pag-ampo sa Bountiful Utah Temple, diha sa “‘Magnificent Edifice’ Consecrated to [the] Lord,” Church News, Ene. 14, 1995, 4.

  5. “The Great Symbol of Our Membership,” Ensign, Okt. 1994, 2, 5.

  6. “Exceeding Great and Precious Promises,” Ensign, Nob. 1994, 8.

  7. “Your Temple Recommend,” New Era, Abr. 1995, 6–9.

  8. “A Temple-Motivated People,” Ensign, Peb. 1995, 5.

  9. The Teachings of Howard W.Hunter, ed. Clyde J. Williams (1997), 240.

  10. “We Have a Work to Do,” Ensign, Mar. 1995, 65.

  11. “The Great Symbol of Our Membership,” 4.

  12. The Teachings of Howard W. Hunter, 239–40.

  13. “A Temple-Motivated People,” 5.

  14. “The Great Symbol of Our Membership,” 5.

  15. The Teachings of Howard W. Hunter, 240–41.

  16. “The Great Symbol of Our Membership,” 5.