Kapitulo 8

Pagsangyaw sa Ebanghelyo sa Tibuok Kalibutan

“Ania kita sa buluhaton sa pagluwas og mga kalag, sa pagdapit sa mga tawo sa pagduol kang Kristo.”

Gikan sa Kinabuhi ni Howard W. Hunter

Niadtong 1979, si Elder Howard W. Hunter, kaniadto sakop sa Korum sa Napulog Duha ka mga Apostoles, miingon: “Mituo gayud ako nga sa dili madugay atong makita ang pipila ka talagsaong kalamboan sa pagsangyaw sa ebanghelyo ngadto sa tanang kanasuran nga wala pa mahitabo niini nga dispensasyon o sa nangaging dispensasyon. Nakasiguro ko nga makahimo kita sa paghinumdom sa mga kagahapon … ug morekord sama sa nahimo ni Lucas, ‘Ug mikaylap ang pulong sa Dios’ (Mga Buhat 6:7).”¹

Atol sa pagpamulong ni Elder Hunter niini , ang mga politikanhong babag nagdili sa mga misyonaryo sa pagtudlo sa ebanghelyo sa daghang nasud sa Eastern Europe ug sa Soviet Union. Sulod sa 10 ka tuig, daghan niana nga mga babag gisugdan sa pagtangtang. Niadtong 1989 ug 1990 ang Paril sa Berlin [Berlin Wall], nga nagbahin sa West ug East Germany sa hapit 30 ka tuig, gibungkag. Si Presidente Hunter nagserbisyo isip Presidente sa Korum sa Napulog Duha nianang higayona, ug gipahayag niya ang mosunod nga mga hunahuna mahitungod sa makasaysayan nga hitabo ug ubang kausaban nga nanghitabo sa kalibutan:

“Ang dakong pagtagad bag-ohay lang nakatutok sa Paril sa Berlin. Dayag lang, kaming tanan nalipay nga nabungkag ang paril, nagrepresentar kini sa bag-ong nakaplagan nga kagawasan. … Kon atong sulayan og sabot ang diwa sa pagsinabtanay nga milukop sa tibuok kalibutan ug sa paghatag og kahulugan niini diha sa ebanghelyo, angay nga mangutana kita sa atong kaugalingon: Dili ba kaha kini kamot sa Ginoo nga mitangtang sa mga politikanhong babag ug naghatag og mga kahigayunan nga kaniadto daw dili posible?”²

Si Presidente Hunter mibati nga kini nga mga kausaban naghatag og importanting responsibilidad sa mga miyembro sa Simbahan. Samtang nagkadaghan ang nasud nga giablihan alang sa misyonaryo nga buhat, miingon siya, mas daghang misyonaryo ang gikinahanglan aron matuman ang tahas sa pagsangyaw sa ebanghelyo sa tibuok kalibutan.³

Ang kadasig ni Presidente Hunter nga matabangan ang tanang anak sa Dios, bisan unsay ilang nasyunalidad o gituohan, napamatud-an sa iyang buhat didto sa Middle East. Ang Unang Kapangulohan mihatag niya og mahinungdanong buluhaton sa Jerusalem, lakip ang pagdumala sa konstruksyon sa Orson Hyde Memorial Garden ug sa Brigham Young University Jerusalem Center alang sa Near Eastern Studies. Bisan og ang pag-proselyte wala itugot niana nga rehiyon, si Presidente Hunter nakahimo og malungtarong pakighigala ngadto sa iyang mga gikatrabaho, mga Judeo ug mga Arabo. “Ang katuyoan sa ebanghelyo ni Jesukristo mao ang pagdala og gugma, kahiusahan, ug panag-igsoonay sa pinakataas nga han-ay,” miingon siya.⁴

Sa iyang buluhaton uban sa mga anak sa Dios sa tibuok kalibutan, ang mensahe ni Presidente Hunter mao ra gihapon: “Kami inyong mga igsoon—walay nasud o nasyunalidad nga among giisip nga second-class nga mga tawo. Gidapit namo ang tanan … sa pagsusi sa among mensahe ug pagdawat sa among pakigdait.”⁵

“Ang ebanghelyo ni Jesukristo … usa ka malukpanon nga tinuohan nga ang mensahe para sa tanan.”

Mga Pagtulun-an ni Howard W. Hunter

Ang gipahiuli nga ebanghelyo para sa tanang tawo, basi sa kombiksyon nga ang tanan mga anak sa sama nga Dios.

Ang ebanghelyo ni Jesukristo, ang ebanghelyo nga atong gitudlo ug mga ordinansa niini nga atong gipahigayon, usa ka malukpanon nga tinuohan nga ang mensahe para sa tanan. Wala kini malimitahi ni mipabor ni nag-agad sa kasaysayan o uso. Ang pinakaimportanting bahin sa katinuod niini malukpanon ug walay utlanan. Ang mensahe niini para sa tibuok kalibutan, gipahiuli niining ulahing mga adlaw aron makab-ot ang mahinungdanong mga panginahanglan sa matag nasud, kaliwatan, pinulongan ug katawhan sa kalibutan. Gitukod kini pag-usab sama sa pagkatukod niini sa sinugdanan—aron mapalambo ang panag-igsoonay, mapreserbar ang kamatuoran, ug magluwas og mga kalag. …

Sa mensahe sa ebanghelyo, ang tanang kaliwatan usa ra ka pamilya nga gikan sa sama ra nga Dios. Ang tanang katawhan wala lamang magbaton og pisikal nga sumpay sa kaliwatan balik kang Adan ug ni Eva, nga ilang unang yutan-ong mga ginikanan, apan usa usab ka espirituhanong panulundon nga magsumpay balik sa Dios nga Mahangturong Amahan. Sa ingon, ang tanang tawo sa kalibutan sa tinuoray managsoon sa pamilya sa Dios.

Anaa sa pagsabut ug pagdawat niining malukpanon nga pagkaamahan sa Dios nga ang tanang tawo makapasalamat sa kamahunahunaon sa Dios kanila ug sa ilang relasyon sa usag usa. Mensahe kini sa kinabuhi ug gugma nga mabinationg mobatok sa tanang kinaraan kaayong tradisyon basi sa kaliwat, pinulongan, sa ekonomikanhon o politikanhong kahimtang, sa edukasyon, o kultural nga kaagi, kay kitang tanan managsama ra og espirituhanong kagikan. Aduna kitay balaan nga kaliwatan; ang matag tawo usa ka espirituhanon nga anak sa Dios.

Niini nga talan-awon sa ebanghelyo walay luna alang sa gipamubo, gipagamyan, o gihukman daan nga talan-awon. Si propeta Joseph Smith miingon: “Ang gugma mao ang usa sa pinakahalangdong kinaiya sa Dios, ug angay ipakita niadtong naninguha nga mamahimong mga anak sa Dios. Usa ka tawo nga puno sa gugma sa Dios, dili kontento nga mopanalangin sa iyang pamilya lamang, apan molakip sa tibuok kalibutan, naghinam-hinam sa pagpanalangin sa tibuok kaliwatan sa tawo” [Mga Pagtulun-an sa mga Presidente sa Simbahan: Joseph Smith (2007), 400]. …

Ang gipahiuli nga ebanghelyo usa ka mensahe sa balaang paghigugma alang sa tanang tawo bisan asa, basi sa kombiksyon nga ang tanang tawo mga anak sa mao ra gihapon nga Dios. Kining nag-una nga relihiyusong mensahe matahum nga gipahayag diha sa pamahayag sa Unang Kapangulohan niadtong Pebrero 15, 1978, nga nag-ingon:

“Pinasikad sa karaan ug modernong pagpadayag, Ang Simbahan ni Jesukristo sa mga Santos sa Ulahing mga Adlaw malipayong motudlo ug mopahayag sa Kristohanong doktrina nga ang tanang tawo managsoon, dili lang sa kadugo nga relasyon gikan sa komon nga mortal nga kaliwatan apan sa pagkatinuod usab espiritung mga anak sa Mahangturong Amahan” [Statement of the First Presidency Regarding God’s Love for All Mankind, Peb. 15, 1978].

Ang mga Santos sa Ulahing mga Adlaw dunay positibo ug malukpanon nga paagi sa pagpakig-atubang sa uban kinsa dili sakop sa atong tinuohan. Mituo kita nga sila sa tinuod atong mga igsoon, nga kita mga anak sa usa ra ka Langitnong Amahan. Aduna kitay komon nga genealogy nga nagsumpay padulong sa Dios.⁶

Ang Simbahan adunay misyon sa pagtudlo sa ebanghelyo sa tanang kanasuran.

Ang Simbahan, isip gingharian sa Dios sa yuta, dunay misyon sa tanang kanasuran. “Busa panglakaw kamo ug himoa ninyong mga tinun-an ang tanang kanasuran, sa pagpamautismo kanila sa ngalan sa Amahan ug sa Anak ug sa Espiritu Santo:

“Nga magatudlo kanila sa pagtuman sa tanan nga akong gisugo kaninyo” (Mat. 28:19–20). Kining mga pulonga nga naggikan sa ba-ba sa Agalon walay giila nga mga nasudnong utlanan; wala kini limitahi ngadto sa bisan unsang kaliwat o kultura. Walay usa ka nasud nga labaw kay sa usa. Ang pahimangno klaro—“magatudlo sa tanang kanasuran.” …

Isip mga miyembro sa simbahan sa Ginoo, kinahanglan nga patas-an nato ang atong panan-aw lapas sa personal nga mga paghukom. Kinahanglan natong madiskubrihan ang pinakalabaw nga kamatuoran nga sa pagkatinuod ang atong Amahan walay pinalabi nga tawo. Usahay sa walay kaangayan atong masilo ang atong kaigsoonan sa ubang nasud pinaagi sa paghimo sa usa ka nasyonalidad sa katawhan nga labaw kay sa uban. …

Hunahunaa ang amahan nga may daghang anak, matag usa lain-lain og kinaiya, abilidad, ug espirituhanong mga hiyas. Minus ba ang iyang paghigugma sa usa ka anak kay sa uban? Tingali ang anak nga minus og kadasig sa espirituhanong butang mas mahatagan sa amahan og atensyon, sa pag-ampo, ug pangamuyo labaw kay sa uban. Nagpasabut ba kana nga minus ang iyang paghigugma sa uban? Mahunahuna ba ninyo ang Langitnong Amahan nga nahigugma sa usa ka nasyonalidad sa iyang mga anak labaw kay sa uban? Isip mga miyembro sa Simbahan, angay kitang pahinumduman sa mahagiton nga pangutana ni Nephi: “Wala ba kamo masayud nga adunay labaw pa kay sa usa ka nasud?” (2 Ne. 29:7). …

Sa atong mga kaigsoonan sa tanang nasyonalidad: Mohatag kami sa balaang pagsaksi ug pagpamatuod nga ang Dios namulong sa atong adlaw ug panahon, nga ang langitnong mga mensahero gipadala, nga ang Dios mipadayag sa iyang hunahuna ug kabubut-on ngadto sa usa ka propeta, si Joseph Smith. …

Sama sa paghigugma sa atong Amahan sa tanan niyang mga anak, kinahanglang higugmaon nato ang tanang tawo—tanang kaliwat, kultura, ug nasyonalidad—ug tudloan sila sa mga baruganan sa ebanghelyo nga sila unta mohangop niini ug mahibalo sa kabalaan sa Manluluwas.⁷

Sa ubos natong paningkamot nga mapalambo ang pag-igsoonay ug pagtudlo sa gipadayag nga kamatuoran, sultihan nato ang katawhan sa kalibutan sa mapinanggaong sugyot ni Presidente George Albert Smith:

“Mianhi kami dili aron kuhaon gikan kaninyo ang kamatuoran ug hiyas nga anaa kaninyo. Mianhi kami dili aron sa pagpangita og sayop diha kaninyo o sa pagpanaway kaninyo. … Hupti ang tanang maayo nga anaa kaninyo, ug tuguti kami nga modala kaninyo og dugang pa nga maayo, aron kamo mahimong mas malipayon ug aron kamo maandam sa pagsulod sa presensya sa atong Langitnong Amahan.”⁸

Ania kita sa buhat sa pagluwas og mga kalag, sa pagdapit og mga tawo sa pagduol kang Kristo, sa pagdala kanila ngadto sa mga tubig sa pagbunyag subay sa dalan padulong sa kinabuhing dayon. Kini nga kalibutan nagkinahanglan sa ebanghelyo ni Jesukristo. Ang ebanghelyo naghatag sa bugtong paagi nga adunay kalinaw ang kalibutan.⁹

Isip mga miyembro sa Simbahan ni Jesukristo, nagtinguha kita nga magkatambayayong sa pagdala sa kamatuoran: Nagtinguha kita nga mas modako ang paghigugmaay ug pagsinabtanay sa tanang tawo sa kalibutan. Sa ingon tinguha namo nga maestablisar ang kalinaw ug kalipay, dili lang sulod sa Kristiyanismo apan sa tanang katawhan. …

Ang pag-establisar diin si Joseph [Smith] ang gihimong instrumento, gani Ang Simbahan ni Jesukristo sa mga Santos sa Ulahing Adlaw, usa na karon ka tibuok kalibutan nga relihiyon, dili lang tungod kay ang mga miyembro niini anaa na sa tibuok kalibutan, apan una sa tanan tungod kay kini adunay komprehinsibo ug malukpanon nga mensahe basi sa pagdawat sa tanang kamatuoran, nga gipahiuli aron makab-ot ang mga panginahanglan sa tanang katawhan.

… Gipadala nato kini nga mensahe sa gugma ug paglaum sa tibuok kalibutan. Duol ngadto sa Dios sa tanang kamatuoran, kinsa padayon nga makigsulti sa Iyang mga anak pinaagi sa mga propeta. Paminawa ang mensahe gikan Kaniya kinsa padayon nga mipadala sa Iyang mga sulugoon sa pagsangyaw sa mahangturong ebanghelyo ngadto sa matag nasud, kaliwat, pinulongan, ug katawhan. Dali ug pagbusog sa lamesa nga giandam alang kaninyo sa Ang Simbahan ni Jesukristo sa mga Santos sa Ulahing mga Adlaw. Apil kanamo samtang naningkamot kami sa pagsunod sa Maayong Tigbalantay kinsa mihatag niini.¹⁰

“Ania kita sa buhat sa pagluwas og mga kalag.”

Kadtong mga nakasinati sa mga panalangin sa Pag-ula ni Jesukristo adunay katungdanan sa paghatag og pagpamatuod Kaniya.

Unsay kalabutan sa Pag-ula ngadto sa misyonaryo nga buhat? Bisan kanus-a makasinati kita sa mga panalangin sa Pag-ula sa atong kinabuhi, dili kapugngan nga maghunahuna kita alang sa kaayohan sa [uban].

Daghang mga ehemplo diha sa Basahon ni Mormon ang naghulagway niini nga baruganan. Dihang mikaon si Lehi sa bunga sa kahoy, nga simbolo bahin sa pag-ambit sa Pag-ula, siya miingon, “ako mitinguha nga ang akong banay mokaon usab niini” (1 Nephi 8:12). Dihang nasinati ni Enos ang iyang pagkakabig ug nakadawat sa kapasayloan sa iyang sala, tungod sa iyang pagtuo kang Jesukristo siya miingon, “ako misugod sa pagbati og usa ka tinguha alang sa kaayohan sa akong mga kaigsoonan, ang mga Nephite” (Enos 1:9). Dayon nag-ampo siya alang sa mga Lamanite, sa bangis nga mga kaaway sa mga Nephite. Dayon anaa ang ehemplo sa upat ka mga anak ni Mosiah—si Ammon, Aaron, Omner, ug Himni—kinsa nakadawat og kapasayloan sa mga sala pinaagi sa Pag-ula ug dayon naghago sulod sa katuigan sa mga Lamanite sa pagdala kanila ngadto kang Kristo. Ang rekord nag-ingon nga sila dili makatugot nga bisan usa ka kalag sa tawo malaglag (Mosiah 28:3).

Kining talagsaon nga ehemplo sa tawo sa pakigsaad nga nagtinguha sa pagpakigbahin sa ebanghelyo ngadto sa uban maayo nga pagkahulagway diha sa ehemplo ni Alma nga Batan-on. Gusto nakong basahon diha kaninyo ang iyang pagpamatuod. …

“… Sukad niana nga panahon gani hangtud karon, ako naghago sa walay paghunong, nga ako makakabig og mga kalag ngadto sa paghinulsol; nga ako makadala kanila sa pagtilaw sa hilabihan nga kalipay diin ako mitilaw; nga sila unta usab matawo sa Dios ug mapuno sa Espiritu Santo” [Alma 36:24; tan-awa usab sa Alma 36:12–23].

Ang usa ka dakong timailhan sa personal nga pagkakabig sa usa ka tawo mao ang tinguha sa pagpakigbahin sa ebanghelyo ngadto sa uban. Niini nga hinungdan ang Ginoo mihatag og katungdanan sa matag miyembro sa Simbahan sa pagkamisyonaryo.

Paminawa ang pakigsaad nga gidala sa usa ka tawo sa iyang kaugalingon dihang bunyagan siya sa Simbahan:

“Ingon nga kamo mga matinguhaon sa pag-ipon ngadto sa panon sa Dios, ug pagatawgon nga iyang mga katawhan, ug andam sa pagtambayayong sa usag usa nga mga alantuson, nga sila mahimo nga magaan;

Oo, ug mga andam sa pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan, ug mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga kamo mahimo nga maanaa, bisan hangtud sa kamatayon, nga kamo mahimo nga matubos sa Dios, ug malakip uban niadto nga diha sa unang pagkabanhaw, nga kamo makabaton og kinabuhi nga dayon” (Mosiah 18:8–9).

Kinahanglan nga mobarug kita nga mga saksi sa Dios sa tanang panahon [ug] sa tanang dapit, bisan hangtud sa kamatayon. Atong bag-uhon kana nga pakigsaad panahon sa sakrament kon kita makigsaad sa pagdala sa ngalan ni Kristo dinhi kanato.

Ang misyonaryo nga pagserbisyo usa ka importante nga paagi diin kita makadala sa atong kaugalingon sa iyang ngalan. Miingon ang Manluluwas nga kon magtinguha kita sa pagdala dinhi kanato sa iyang ngalan, uban sa hingpit nga katuyoan sa kasingkasing, gitawag kita sa pag-adto sa tibuok kalibutan ug pagsangyaw sa iyang ebanghelyo sa matag nilalang (tan-awa sa D&P 18:28). …

Ang uban kanato kinsa nakaambit sa Pag-ula ubos sa katungdanan sa paghatag og matinud-anong pagpamatuod bahin sa atong Ginoo ug Manluluwas. … Ang tawag sa pagpakigbahin sa ebanghelyo ngadto sa uban nagrepresentar sa atong dakong gugma alang sa mga anak sa atong Langitnong Amahan ingon man alang sa atong Manluluwas ug sa unsay iyang gihimo alang kanato.¹¹

Uban sa tabang sa Ginoo, atong mabuntog ang tanang babag sa pagpakigbahin sa ebanghelyo.

Samtang ang mga paril sa Eastern Europe … ug sa daghang bahin sa kalibutan nabungkag, ang katugbang nga panginahanglan og dugang nga mga misyonaryo aron matuman ang balaang sugo sa pagdala sa ebanghelyo sa tibuok kalibutan sigurado nga molambo! Andam ba kita niana nga panginahanglan?

Aron matuman ang bag-ong mga buluhaton nga gihatag kanato niining talagsaong misyonaryo nga buhat sa katapusang mga adlaw, tingali ang uban nato (ilabi na ang mas magulang nga henerasyon nga napadako na ang pamilya) kinahanglang motimbang-timbang sa pagdeterminar kon ang “mga paril” nga atong gitukod diha sa atong mga hunahuna dili ba angayan nga bungkagon.

Sama pananglit, kining gitawag og “paril sa kakulang sa tinguha” nga nagpugong sa daghang magtiayon ug mga single nga magmisyon? Kining gitawag og “paril sa pinansyal” sa mga utang nga sa ubang miyembro usa ka babag sa pagmisyon, o ang “paril sa mga apo,” o ang “paril sa panglawas,” o ang “paril sa kakulang sa pagsalig sa kaugalingon,” o ang “paril sa katagbawan sa kaugalingon,” o ang “paril sa kalapasan,” o ang mga paril sa kahadlok, pagduha-duha, o kagarbuso? Ang usa ka tawo kinahanglan pa bang magduha-duha nga uban sa tabang sa Ginoo siya makahimo sa pagbungkag niana nga mga paril?

Atoa ang kahigayunan nga matawo niining ulahing mga adlaw, lahi sa ubang nag-una nga dispensasyon, sa pagtabang nga masangyaw ang ebanghelyo sa tibuok kalibutan. Walay mas labaw pa nga calling niini dinhi sa kinabuhi. Kon kontento ra kita nga magpahipi luyo sa kaugalingon natong hinimo nga mga paril, atong gisalikway ang mga panalangin nga para unta kanato. Ang Ginoo diha sa modernong pagpadayag mipasabut sa dakong panginahanglan:

“Kay tan-awa ang umahan puti ug andam na sa pag-ani; ug tan-awa, siya nga mogalab sa iyang sanggot uban sa iyang kusog, sama ra nga nagtigum og panalangin nga siya dili mahanaw, apan magdala og kaluwasan ngadto sa iyang kalag.” (D&P 4:4.)

Ang Ginoo mipadayon sa pagpasabut nianang mao gihapon nga pagpadayag sa mga kwalipikasyon nga atong gikinahanglan sa pagkahimong maayong mga misyonaryo. Hingpit nga nahibalo sa atong mga kahuyang ug sa nagpugong nga mga kahimtang samtang nag-atubang kita sa kaugalingon natong hinimo nga dakong paril, siya mipaniguro nato nga ang balaanong tabang sa pagbuntog sa mga babag moabut kon buhaton lamang nato ang atong bahin, uban sa yano nga saad: “Pangayo, ug ikaw makadawat; tuktok, ug kini pagabuksan diha kaninyo.” (D&P 4:7.)

Unta panalanginan kita sa Ginoo nga ang mga paril sa atong mga hunahuna dili mobabag sa mga panalangin nga para sa atoa.¹²

Pabalik-balik diha sa iyang mortal nga pangalagad, ang atong Ginoo nanawagan isip usa ka pagdapit ug usa ka paghagit. Ngadto kang Pedro ug kang Andres, si Kristo miingon, “Sumunod kamo kanako, ug himoon ko kamong mga mangingisdag tawo” (Mat. 4:19). …

Ang nag-una nga mga propeta mitudlo nga ang matag takus nga batan-ong lalaki kinahanglang moserbisyo og full-time nga misyon. Hatagan usab nako og emphasis kana sa karon. Kita usab karon may dakong panginahanglan sa makahimo, hingkod nga mga magtiayon sa pagserbisyo og misyon. Si Jesus misulti sa iyang mga disipulo, “Daghan unta ang anihon, apan diyutay ra ang mga mamumoo; busa pangamuyo kamo sa Ginoo sa anihon nga makapadala unta siyag mga mamumoo ngadto sa iyang anihon” (Lucas 10:2).¹³

Mga Sugyot alang sa Pagtuon ug Pagtudlo

Mga Pangutana

Pamalandungi ang mga pagtulun-an ni Presidente Hunter mahitungod sa ebanghelyo nga alang sa tanang katawhan, pinasikad sa kamatuoran nga tanan kita mga anak sa Dios (tan-awa sa seksyon 1). Samtang mopakigbahin kita sa ebanghelyo, unsay ikatabang niini kanato sa paghinumdom nga ang matag tawo sa tinuoray atong mga igsoon?
Unsa ang atong makat-unan gikan sa mga pagtulun-an ni Presidente Hunter sa seksyon 2 mahitungod sa pagbati sa Langitnong Amahan sa Iyang mga anak? Unsay inyong mahimo aron labaw pa ninyong higugmaon ang tanang tawo ug mopakigbahin sa ebanghelyo ngadto kanila?
Unsaon ninyo sa pagtubag ang pangutana ni Presidente Hunter “Unsay kalabutan sa Pag-ula ngadto sa misyonaryo nga buhat?” (Tan-awa sa seksyon 3.) Sa unsang paagi ninyo mapalambo ang inyong tinguha sa pagpakigbahin sa ebanghelyo ngadto sa uban? Unsang mga panalangin ang miabut dihang gipakigbahin ninyo ang ebanghelyo ngadto sa uban—o sa dihang gipakigbahin kini sa uban diha kaninyo?
Human sa pagtuon sa seksyon 4, hunahunaa ang “mga paril” nga nagpugong kaninyo nga makadawat sa mga panalangin sa misyonaryo nga buhat. Hisguti ang mga paagi sa pagbuntog niana nga mga babag.

May Kalabutan nga mga Kasulatan

Amos 9:9; 2 Nephi 2:6–8; Mosiah 28:1–3; Alma 26:37; D&P 18:10–16; 58:64; 68:8; 88:81; 90:11; 123:12; Joseph Smith—Mateo 1:31

Tabang sa Pagtudlo

“Ang Espiritu Santo mahimong moaghat sa usa o labaw pa niadtong imong gitudloan sa pagsalmot og mga panghunahuna nga kinahanglang madunggan sa uban. Pagmabinantayon sa mga pag-aghat ngaimong madawat sa pagtawag og piho nga mga tawo. Mahimong mobati ka nga hangyoon ang usa ka tawo nga wala moboluntaryo sa paghatag sa iyang mga ideya” (Pagtudlo, Walay Labaw ka Mahinungdanon nga Tawag [1999], 63).