Wase 8
Eda Rai vei Karisito
“Eda vakabauti Karisito. Eda vakavulici Karisito. Eda rai vei Karisito. O Koya na noda Dauveivueti, noda Turaga, ka noda iVakabula.”
Na Bula nei Gordon B. Hinckley
Ena koniferedi raraba ni Epereli 1975, a cauraka kina vaqo o Elder Gordon B. Hinckley, ni a se lewe tiko ni Kuoramu ni iApositolo Le Tinikarua:
“Se qai oti toka ga oqo na kena dolavi raraba na Valetabu e [Mesa] Arizona. Ni oti na kena vakavinakataki taucoko na valelevu o ya, e volekata ni milioni na tamata era a laki raica na veika totoka e loma. Ena imatai ni siga ni kena dolavi, era a sureti kina na veiliuliu ni lotu tale eso mera vulagi dokai, ka drau era a yaco mai. A noqu madigi meu vosa vei ira ka sauma na nodra taro ni sa oti na nodra sarasara. Au a kaya vei ira ni keimami na marautaka na sauma na nodra vakatataro eso. A vuqa na taro. E dua vei ira na taro a taroga e dua na italatala ni Protestant.
“A kaya: ‘Au sa curuma kece sara na valelevu oqo, ka vakaraitaki tu ena mata ni valetabu oqo na yaca i Jisu Karisito, ia au sega ni raica ena dua na vanua na ivakatakarakara ni kauveilatai, na ivakatakilakila ni Lotu Va-Karisito. Au sa raica talega ena nomuni veivalenilotu ena veivanua ni sega vakakina na kauveilatai. Na cava na vuna e vakakina oqo ni kemuni kaya ko ni vakabauti Jisu Karisito?’
“Au a sauma: ‘Au sega ni via vakacudruya e dua na taciqu lotu va-Karisito era vakayagataka tiko na kauveilatai ena ulu ni nodra valenilotu kei na icabocabo ni soro ena nodra valenisoqoni, era dara ena nodra isulu ni lotu, ka vola ena nodra ivola kei na itukutuku tale eso. Ia kivei keimami, na kauveilatai sa ivakatakilakila ni nona mate na Karisito, kei na neimami itukutuku sa vakaraitaka raraba ni sa bula tiko na Karisito.’
“A qai taroga: ‘Kevaka ni sega ni vakayagataka na kauveilatai, sa qai cava na ivakatakilakila ni nomuni lotu?’
“Au a qai sauma ni neimami bula sa dodonu me ivakaraitaki bibi ni neimami vakabauta, ka sa yaco oqo, me ivakatakilakila ni neimami sokalou. …
“… E sega na ivakatakilakila, cakacaka ni liga, sega na ituvaki cava ga me matataka rawa na vakamacalataki ni lagilagi kei na veivakurabuitaki ni Karisito sa Bula Tiko. A kaya vei keda ni sa ivakatakilakila ga na ka e kaya, ‘Kevaka dou sa lomani au, dou talairawarawa ki na noqu vunau.’ (Joni 14:15.)
“Ni da sa muri Koya, eda na sega ni cakava e dua na ka e ca se lolovira se sega ni loloma ka da na sega ni vakacacana kina na kena ituvaki. Se sega ni cakava e dua na ka vinaka ena loloma ena cakacaka ni lomasoli ka meda qai sega ni vakararamataka vakalevu cake na kena ivakatakilakila eda sa taura vei keda na yacana.
“Ka me sa qai yaco na noda bula me dua na ivakaraitaki vakaibalebale cake, na ivakatakilakila ni noda vakaraitaka na noda ivakadinadina baleta na Karisito sa Bula Tiko, na Luvena Tawamudu na Kalou sa Bula Tiko.
“E ka rawarawa sara, kemuni na taciqu kei na ganequ, ka sa bibi sara ka meda sa kakua ni guilecava o ya.”1
“Sa yavu tudei ni noda vakabauta o ya na noda ivakadinadina baleti Jisu Karisito ni sa Luve ni Kalou. … Sai Koya na vatu ivakadei ni lotu sa vakatikori kina na Yacana.”
iVakavuvuli nei Gordon B. Hinckley,
1
O Jisu Karisito na Luvena bula na Kalou bula.
“Sa yavu tudei ni noda vakabauta o ya na noda ivakadinadina baleti Jisu Karisito ni sa Luve ni Kalou. … Sai Koya na vatu ivakadei ni lotu sa vakatikori kina na Yacana.2
Eda vakabauti Karisito. Eda vakavulici Karisito. Eda rai vei Karisito. O Koya na noda Dauveivueti, noda Turaga, ka noda iVakabula.3
Cakacaka vakalotu e vuravura
O Koya na luve ni Kalou, na Luvena Duabau Ga, a biuta na itikotiko vakasilesitieli nei Tamana me mai bula e vuravura. Ni sa sucu, era a lagasere na agilosi ka ratou yaco mai na Tamata Vuku mera mai soli iloloma. A tubu cake me vakataki ira ga na cauravou tale eso ni Nasareci mai Kalili. E kea a “tubucake ko koya ena vuku kei na yagona talega a sa vinakati koya vakalevu cake tikoga na Kalou kei ira talega na tamata.” (Luke 2:52).
A lako vata kei Meri kei Josefa, ki Jerusalemi ni sa yabaki 12. Ni rau lesu tiko i nodratou itikotiko, rau a calati Koya. Rau sa qai lesu tale i Jerusalemi ka kunei Koya ena loma ni valetabu ni veivosaki tiko kei ira na tamata vuku. Ni sa cudruvi Koya o Meri ni a sega ni lako vata kei rau, a qai kaya mai, “Drau sa sega beka ni kila ni sa kilikili kei au meu tiko ena vale nei Tamaqu?” (Luke 2:49). Na Nona vosa sa vakaibalebaletaka na Nona cakacaka vakalotu ni veisiga ni mataka.
Na cakacaka vakalotu o ya a tekivu ena Nona a papitaisotaki ena uciwai na Joritani mai vei Joni na tavalena. Ni sa lamata mai na wai, sa lako sobu mai vua na Yalo Tabu me vaka na ruve, ka sa rogo mai na domo i Tamana, ka kaya, “O Koya oqo na noqu Gone ni Toko, au sa dau vinakata vakalevu” (Maciu 3:17.) Na vosa o ya sa mai yaco me vakadeitaka na Nona sa vakalou.
A lolo o koya me 40 na siga ka temaki Koya na tevoro, ena nona saga me tauri Koya tani mai na Nona ilesilesi vakalou. Mai na vosa veitemaki nei tevoro, a kaya, “Mo kakua ni vakatovolei Jiova na nomu Kalou” (Maciu 4:7), ka vakaraitaka tale ni sa Luve ni Kalou.
A lakova na gaunisala kuvu kei Palisitaina. A sega na Nona vale me rawa ni kaya ni Nona, sega na tikina me vakotora kina na uluna. Na Nona vosa sa itukutuku vinaka ni veisaututaki. Na Nona ivakavuvuli sa baleta na lomavinaka kei na loloma. “Ia kevaka e dua sa via kauti iko vei ira na mataveilewai, ka me kauta tani na nomu icurucuru, laiva ga me kauta tani talega na nomu itutuvi” (Maciu 5:40.)
A veivakavulici ena vosa vakatautauvata. A cakava na cakamana eso a se bera mada vakadua ni caka e liu se mai na gauna o ya. A vakabulai ira era sa tauvimate balavu tu mai. A cakava mera rai na mataboko, mera rogo na didivara, ka mera tucake na wamalai. A vakabulai ira na sa mate tu, ka ra bula tale mai mera vakacaucautaki Koya. Sa dina sara ni sega ni dua na tamata sa cakava vakaoqo e liu.
E vica wale era a muri Koya, ia e vuqa era a cati Koya. A vakatokai ira na vunivola kei na Farisi mera tamata dauveivakaisini, ka vaka na vale ni bulubulu sa boro vulavula. Era a bukiveretaki Koya. A cemuri ira na dauveisautaki ilavo mai na vale ni Turaga. Era sa qai to vata o ira oqo kei ira sa nakita mera vakamatei Koya. A sega vakadua ni bau lomaleqa kina o Koya. A sa “lako voli ka daucaka vinaka” (Cakacaka 10:38).
Sa sega beka ni koya kece oqo me sa tawamate rawa kina na Nona vakanananu? Sa sega beka ni koya kece oqo me rogovaki na Yacana ena kedra maliwa, se torocake sara, kei ira na tamata cecere rogolevu era mai bula tu e vuravura ka vakananumi tu ena veika era a kaya se cakava? Sa dina sara ni sa rawa me vakatautauvatataki kei ira na parofita cecere ni veigauna.
Ia na veika kece oqo e sega ni se rauti Koya na Luvena na Kalou Cecere Sara. E a itekitekivu ni veika cecere ena muri mai. Era a yaco mai ena sala e duatani ka vakatani.4
Vesuki, vakoti ena kauveilatai, ka mate.
A dabuitaki, vesu, lewai me vakamatei, ka mate ena rarawa bibi ni lauvako e kauveilatai. A lauvako na yagona ni se bula tu ki na dua na kau e veilatai. Ena mosi tawa vakamacalataki rawa, sa takali yani vakamalua na Nona bula. Ni se cegu tiko, a qai kailavaka yani, “I Tamaqu, kakua ni cudruvi ira ni ra sa sega ni kila na ka era sa kitaka.” (Luke 23:34).
E a yavavala na vanua ni sa takali yani na Yalona. A raica na ka oqo na turaga ni valu ka kaya ena vakarokoroko,“E dina ga sa luve ni Kalou ko koya oqo” (Maciu 27:54).
O ira a lomani Koya a qai tukuca sobu na yagona mai na kauveilatai. Era a vakasuluma ka vakatikora ki na dua na ibulubulu vou. …
Era a rairai tagi beka na Nona itokani. Era a tagi na iApositolo a lomana o Koya kei ira sa kaciva mera ivakadinadina ni sa vakalou o Koya. Era a tagi na marama era a lomani Koya. A sega ni dua a kila na ka a tukuna baleta na tucaketale ena ikatolu ni siga. Mera na kila beka vakacava? Oqo e se bera mada vakadua ni yaco. E ka vou dina sara ga. A sega vakadua ni vakabauti, vakakina vei ira.
E a rairai yaco e dua na yalo ni lolosi levu kei na vakanuinuikara kei na veilecayaki ni ra sa vakasamataka na nodra Turaga sa mai kauta tani o mate.5
Tucaketale
Ia a sega ni kena icavacava o ya. Ena mataka ni ikatolu ni siga, rau a lesu ki na ibulubulu o Meri Makitala kei Meri tale e dua. Rau sa kurabui sara vakalevu, ni sa vaqiqici laivi tu na vatu ka sa tadola tu na ibulubulu. Rau a rai yani i loma. Rau a dabe toka ena yadua na tutuni ibulubulu e rua na tamata sulu vulavula. A rairai mai vei rau e dua na agilosi ka kaya: “E na cava dou sa mai vakasaqarai koya sa bula e na kedra maliwa na mate?
“Sa sega eke ko koya, sa tucaketale: nanuma na nona vosa vei kemudou ni sa tiko kei kemudou mai Kalili,
“Ni sa kaya, Ena soli yani na Luve ni Tamata ki na ligadra na tamata ca, ka na vakoti ki na kauveilatai, ka na tu cake tale ena ikatolu ni siga” (Luke 24:5–7).
Na vosa rawarawa oqo—“Sa sega eke ko Koya, sa tucaketale”—sa yaco me itukutuku volai bibi duadua vei ira kece. Era sa tukuna na ibulubulu sa lala. Sa vakayacori kece kina na veika a kaya o Koya me baleta na tucaketale. Era sa itukutuku qaqa me isau ni nodra vakatataro na tagane, yalewa, kei na gone yadua e bau sucu mai ki vuravura.
“Na Nona vosa sa itukutuku vinaka ni veisaututaki. Na Nona ivakavuvuli sa baleta na lomavinaka kei na loloma.”
A vosa na Turaga sa tucaketale vei Meri, ka sauma mai o Meri. A sega ni yalo o Koya. Oqo e sega ni dua na tatadra. E bula dina tu, ka me vaka ga na Nona bula tu e liu. A sega ni vakadonui Meri me tarai Koya. Ni se bera ni lako cake vei Tamana mai Lomalagi. Ena yaco o ya ena dua na gauna lekaleka. Sa qai dua dina na sota tale cecere, me mokoti mai vei Tamana, e lomani Koya ka rairai a tagici Koya talega ena gauna ni Nona mosi rarawa.
A rairai vei rau e rua na tamata ena gaunisala ki Emeo. A veivosaki kei rau ka kana vata kei rau. A laki sotavi iratou vakatikitiki na Nona iApositolo ka vakavulici iratou. A sega ni tiko o Tomasi ena imatai ni gauna o ya. Ena ikarua ni gauna, a sureti koya na Turaga me laki tara na ligana kei na sarisarina. Ena kurabui a qai kaya, “Noqu Turaga, ka noqu Kalou” (Joni 20:28). A vosa vei ira e 500 ena [dua tale] na gauna. …
Ka sa tiko e dua tale na ivakadinadina. Na itokani vakaivolatabu oqo, na iVola i Momani, e vakadinadinataka ni a sega ni rairai walega vei ira mai na Vuravura Makawa ia sa vakakina vei ira mai na ka Vou. Ni a sega beka ni tukuna oqo ena dua na gauna, “Eso tani tale na noqu sipi, era sa sega ni tiko ena bai oqo; sa kilikili me’u kauti ira tale ga mai, a ra na rogoca na domoqu; ena qai duabau na qele ni sipi, ka duabau na ivakatawa.”? (Joni 10:16.).
Kivei ira ena tiki vuravura oqo a rairai kina ni oti Nona Tucaketale. Ni sa lako sobu mai ena o kei lomalagi, a rogo tale na domo ni Kalou na Tamada Tawamudu ena vosa sa vakalou: “Raica oqo na noqu Gone ni Toko, kau sa dau vinakata vakalevu, sai Koya sa vakacaucautaki kina na yacaqu—mo dou rogoci koya.” (3 Nifai 11:7). …
Ke se bera ni o koya taucoko oqo, sa tiko na ivakadinadina, e dina ka dei ka tawawasei, ni parofita cecere ni itabagauna oqo, o Josefa Simici. Ni se cauravou a gole ki na veikau me laki masu ka vakasaqara na rarama kei na kila-ka. A sa rairai vua e rua na Tamata, sa sega ni vakamacalataki rawa na kedrau iserau kei na lagilagi, e rau tucake tu e maliwa lala donumaki koya. A sa kacivi koya e dua vei rau, ena “yacana ka kaya, dusi koya na kena ikarua—Oqo na Noqu Gone ni Toko. Mo Rogoci Koya!” [Josefa Simici—Ai Tukutuku 1:17].
O Josefa vata ga oqo a kaya ena dua tale na gauna: “Io keirau sa raica na iserau ni Luvena, o koya sa tiko e na liga imatau i Tamana, ia keirau sa vakasinaiti kina; …
“Ia me ikuri ni itukutuku kece ka vakadinadinataki kina ko Koya, keirau sa tukuna oqo na kena iotioti me yacova edaidai: Sa bula dina tiko ko Koya!” (V&V 76:20, 22.)6
Kivei ira kece era vakatitiqa tiko beka, meu na tokaruataka tale na vosa vei Tomasi ni sa laki tara na mawe ni mavoa ena ligani Turaga: “Mo kakua ni vakatitiqa, mo vakadinata ga” [Joni 20:27]. Mo vakadinati Jisu Karisito, na Luve ni Kalou, na ivakaraitaki cecere duadua ni veigauna kei na tawamudu. Vakadinata ni nona bula tawa vakatauvatani rawa e lesu sara ni se bera ni buli ko vuravura. Vakadinata ni sai koya a Bulia na vuravura eda bula tiko kina. Vakadinata ni o koya na Jiova ni Veiyalayalati Makawa, ni sai koya na Mesaia ni Veiyalayalati Vou, ni a mate ka tucaketale, ka laki sikova na veivanua ena ra ka vakavulici ira na tamata eke, ka vakatikora mai na iotioti ni itabagauna ni kosipeli, ni sa bula dina tiko, na Luve ni Kalou sa bula tiko, na noda iVakabula ka Dauveivueti.7
2
Sa rawa vei keda yadua meda kila ni o Jisu Karisito sa Luve ni Kalou ka sa Dauveivueti kei vuravura, ka a tucaketale mai na ibulubulu.
Sa yaco tiko na… nodra valuti na tagane vakabauta, ia na ito ni veisaqa era sega soti ni … matata, vei ira mada ga na ito va-Karisito era tiko kina eso era rawa ni vakarusa na veika vakalou i Karisito o Koya era tukuna tiko na yacana. Era na rawa ni kau laivi ke sega ni veirawai na domodra, kevaka ena sega ni gugumatua yani na nodra veivakauqeti, kei na nodra inaki sa sega sara ni kaukauwa.
… Era na soqoni yani na lewevuqa ena udolu na veidelana mera kidavaka na mataka ni siga ni Mate ka me veivakananumi ni italanoa kei Karisito, era na marautaka kina na nona tucaketale. Ena vosa e totoka ka vakanuinuitaki, era na tukuna tale na dauvunau ni vuqa na lotu na ibulubulu sa mai lala. Kivei ira—kei iko—au taroga oqo: “O vakadinata dina sara?”
O vakadinata beka ni o Jisu sa Luvena na Kalou, sa luvena vakaidina na Tamada.
O vakadinata ni domo ni Kalou, na Tamada Tawamudu, a voqa ena dela ni wai o Joritani ka kaya, “Oqo na noqu Gone ni toko, kau sa dauvinakata vakalevu”? (Maciu 3:17.)
O vakadinata beka ni o Jisu vata ga oqo a cakamana voli, a vakabulai ira na tauvimate, a vakaukauwataki ira sa malumalumu, o koya sa solia na bula vei ira sa mate tu?
O vakadinata beka ni oti na Nona mate e delai Kalivari kei na nona bulu ena ibulubulu i Josefa, a bula tale mai ena ikatolu ni siga?
O vakadinata vakaidina beka ni sa bula tikoga o Koya—bula tiko, kaukauwa, ka vakai koya ga—ka na yaco tale mai me vaka rau a tukuna na agilosi ni sa lako cake?
O vakadinata dina beka na veika oqo? Kevaka sa vakakina, o sa qai tiki ni dua na ilawalawa sa lailai tikoga mai era sa dau vakadredrevaki mai vei ira na daunifilosofi, era sa dauvakacacani tikoga mai na so na tamata dauveituberi, ka tukuni tikoga ni ra sa “tamata makawa” mai vei ira eso na dauvunau ni lotu kei na daunicioloji veivakauqeti.
… E matadra na tamata vuku oqo, sa italanoa walega na veika oqo—na sucu i Jisu na Luve ni Kalou era lagata na kena sere na agilosi mai na buca e Jutia, a cakava na cakamana ka vakabulai ira na tauvimate ka vakabulai ira sa mate tu, na Karisito sa tucaketale mai na ibulubulu, na ilakolako lesu kei na yalayala ni Nona lesu mai.
O ira na daunicioloji edaidai era sa kauta tani na nona itutu vakalou ka ra vakataroga na vuna era sega ni qaravi koya kina na tamata.
A lako vata na iVakabula kei na rua na tamata ena gaunisala ki Emeo.
O ira na vuku vakaivolatabu qaseqase oqo era sa taura mai vei Jisu na itutu vakalou ka biu tu me sa tamata ga. Era sa saga mera okati koya ki na nodra dui nanuma qiqo sara. Era sa butakoca na itutu ni sa luve ni Kalou ka kauta tani mai vei vuravura na kena Tui dina. …
… Sa noqu ivakadinadina vakalou oqo ni sega ni mate na Kalou, vakavo ga ke raici ena dua na vakadewa mate. …
… E gadrevi e dua na ka e levu cake mai na vakadinata walega vakarauta. E gadrevi me kilai vinaka na nona itutu cecere ka sega ni vakatauvatani rawa ni sa Dauveivueti vakalou kei na noda marautaki koya kei na nona itukutuku ni sa Luve ni Kalou.
Na kila vinaka kei na marau o ya ena nodra o ira kece era na sauma na kena isau. Era sa sega ni cokoti vata kei na vuli cecere, ia era na sega ni yaco mai ena kena wiliki walega na filosofi. Sega, era lako mai ena kena sala e rawarawa ga. Na veika ni Kalou ena rawa walega ni kilai ena Yalo ni Kalou. (1 Korinica 2:11.) Sa kaya vakakina na vosa ni ivakatakila.
Na kena kilai vinaka ka marautaki na Turaga e yaco mai ena kena vakamuri na ivakaro lalai. … Au gadreva meu vakatura e tolu, na ivakavuvuli rawarawa, ka dau cavuti vakalevu, ia era ka bibi ni ra vakayagataki ka vuavuai vinaka na kena macala. …
Na imatai na wiliwili—na wilika na vosa ni Turaga. … Mo wilika, mada, na Kosipeli i Joni mai na ivakatekivu ki na kena iotioti. Me na qai vosa ga vei iko na Turaga, ka na yaco na nona vosa me veivakauqeti vakamalua ka yaco nodra vosa na dauveivakacacani me sega ni vakaibalebale. Wilika talega na veiyalayalati kei Vuravura Vou, o ya na iVola i Momani, e yaco mai me ivakadinadina “ni ko Jisu na Karisito, na Kalou Tawamudu, sa vakatakilai Koya ki na veimatanitu kecega.” (draunipepa ni ulutaga ni iVola i Momani,)
Na ikarua o ya na veiqaravi—na veiqaravi ena cakacaka ni Turaga. … Na inaki i Karisito e sega ni gadrevi mo vakatitiqa; e gadreva na nomu kaukauwa kei na gauna kei na taledi; ni ko qai cakava oqo ena veiqaravi, ena tubu na nomu vakabauta ka na yali na nomu vakatitiqa. …
Na ikatolu o ya mo masu. Vosa vua na Tamamu Tawamudu ena yaca ni Luvena Daulomani. “Raica,” e kaya o koya, “Kau sa tu e mata ni katuba, ka tukituki: kevaka sa rogoca na domoqu e dua na tamata, ka dolava na katuba, au na curu vua.” (Ai Vakatakila 3:20.)
Sa nona veisureti oqo, ka sa dina na kena yalayala. Ena sega beka ni ko na rogoca na domo mai lomalagi, ia ena yaco mai na veivakadeitaki talai mai lomalagi, e veivakacegui ka dina. …
… E rarama yani ki na veilecayaki ni veika vakafilosofi, e vakatokai tu me veivakacacani levu sara, ka yaco na cioloji cala me ivakadinadina ni Yalo Tabu ni o Jisu sa koya dina sara na Luve ni Kalou, a sucu vakatamata, na Dauveivueti kei vuravura sa tucaketale mai na ibulubulu, na Turaga ena yaco mai me mai nodra Tui na Tui. Sa nomu na madigi mo na kila vakakina. Sa nomu ilesilesi mo na vakasaqara.8
3
E gadrevi meda dau tarogi keda tikoga, “Na cava meda cakava vei Jisu sa vakatokai na Karisito?”
Au na taroga tale na taro nei Pailato ena rua na udolu na yabaki sa oti, “A cava meu kitaka vei Jisu, ko koya sa vakatokai na Karisito?” (Maciu 27:22). Sa dina sara, e gadrevi meda dau tarogi keda tikoga, “Na cava meda cakava vei Jisu sa vakatokai na Karisito?” Na cava meda cakava ki na nona ivakavuvuli, ka cakava vakacava me tiki tudei ni noda bula? …
… “Raica na Lami ni Kalou, ko koya sa kauta tani na nodra ivalavala ca na kai vuravura.” Joni 1:29 Sa na dravudravua dina na noda bula ni sega na veivakauqeti ni Nona ivakavuvuli kei na Nona ivakaraitaki sega ni vakatauvatani rawa. Na ivakavuvuli ni solia na ikarua ni balumu, lako ena ikarua ni maile, na lesu mai ni gone cidroi, kei na vuqa na ivakavuvuli sega ni vakatauvatani rawa sa curuma na veitabagauna me sa ivurevure ni kena yaco na caka vinaka kei na loloma veivueti mai na vuqa na veivakacacani ni tamata vua na tamata.
Ena tekivu na veiravuti ena vanua e yali kina na Karisito. Ena veiliutaki na caka vinaka kei na lewa matau ena vanua e kilai kina na Karisito ka vakamuri na Nona ivakavuvuli.
Na cava meda sa qai cakava vei Jisu sa vakatokai na Karisito? “Sa vakatakila oti vei iko, na tamata, na ka e vinaka; ia ka cava tale sa taroga mai vei iko ko Jiova, mo caka dodonu ga, ka mo vinakata na yalololoma, ka mo yalomalumalumu talega ni drau lako vata kaya na nomu Kalou?” (Maika 6:8.)
“Raica au sa kaya vei kemudou; mo dou veivosoti vakai kemudou; ia ko koya sa sega ni vosota na wekana ena nona cala, ena cudruvi koya na Turaga; raica sa ivalavala ca vakalevu cake ko koya.” (V&V 64:9.) …
Na cava meda sa qai cakava vei Jisu sa vakatokai na Karisito? “Ni kau a viakana, ka ni a solia mai vei au na kakana: Au a viagunu ka ni a vagunuvi au: Au a vulagi, ka ni a kauti au ki vale: luvawale, ka ni a vakasulumi au: Au a tauvimate, ka ni a mai raici au: Au a tiko ena vale ni veivesu, ka ni a lako mai vei au.” (Maciu 25:35-36). …
Na cava meda sa qai cakava vei Jisu sa vakatokai na Karisito?
Vuli mai vua. Vakasaqara na ivolanikalou ni sa tukuni au. Vakasamataka vakatitobu na cakamana ni nona bula kei na ilesilesi. Tovolea vagumatua cake mo muria na nona ivakaraitaki ka maroroya na nona ivakavuvuli.9
4
Eda rai vei Jisu Karisito ni sa vatu ni noda vakabulai, na noda kaukauwa, noda vakacegu, kei na mata ni noda vakabauta.
Eda sega ni kila na veika sa tu mai liu. Eda sega ni kila na cava ena kauta mai na veisiga ni mataka. Eda bula tiko oqo ena vuravura e veivukiyaki. Kivei ira eso, era na kune-ka vakalevu sara. Vei ira eso, na rarawa. Vei ira eso, ena levu na nodra reki kei na marau, bulabula vinaka, kei na bula ena loloma. Ki na so, era na rairai tauvimate kei na gauna ni rarawa. Eda sega ni kila. Ia e dua na ka eda kila. Me vakataka na kalokalo pola e lomalagi, se cava sara ena kauta mai na siga ni mataka, sa tu oqo na Dauveivueti kei vuravura, na Luve ni Kalou, e dina ka dei ni sa iyaqa ni noda bula tawayalani. Sa ikoya na vatu ni noda vakabulai, na noda kaukauwa, noda vakacegu, kei na mata ni noda vakabauta.
Ena rarama kei na butobuto eda sa rai Vua, ka sa tu o Koya me vakadeitaki keda ka matamarau mai.10
Sa bula noda Tui Sau,
Na noda iVakabula ga,
Na iVakabula duabau,
Vosota mate ena kau.
Sa bula noqu vatu dei,
Sa inuinui ni bula eke,
Ai dusidusi ki kea,
Botea na ilati ko ya,
Vakatutu ni Vuli kei na Veivakavulici
Taro
-
Raicalesu na vosa ivakadinadina nei Peresitedi Hinckley ena iwasewase 1, ka taura e dua na gauna mo vakasamataka vakatitobu na nomu ivakadinadina baleti Jisu Karisito. Na cava o sa vakavinavinakataka kina na cakacaka vakalotu kei na Veisorovaki ni iVakabula? Na itukutuku kei na ivakavuvuli cava mai na bula ni iVakabula e vakaibalebale cake vei iko?
-
Tarogi iko ena veitaro yadua ena iwasewase 2. E veivakauqeti vakacava na isau ni nomu taro ena nomu bula ena veisiga? Ena iwasewase vata ga, raicalesu na “sala rawarawa” me kilai vinaka kina “na veika ni Kalou.” E sa vukei iko vakacava na ivakavuvuli oqo me titobu kina na nomu kila vakayalo?
-
E dau taroga tikoga o Peresitedi Hinckley, “Na cava meda cakava vei Jisu sa vakatokai na Karisito?” (iwasewase e 3). Na cava e rawa ni da vulica mai na nona isau ni taro? Raica na sala o na sauma kina na taro oqo. E rawa ni na duidui vakacava na nomu bula kevaka mo sega tu ni kila na ivakavuvuli kei na ivakaraitaki ni iVakabula?
-
E vakamatatataka o Peresitedi Hinckley ni o Jisu Karisito sa noda iyaqa ena dua na vuravura sa veivukiyaki (raica na iwasewase 4). Ena gauna cava o sa bau vakila kina na kaukauwa kei na veivakacegui ni iVakabula ena gauna ni leqa? Vakasamataka vakatitobu na laini yadua ni sere ni lotu nei Peresitedi Hinckley ena iwasewase 4. Ena sala cava sa noda “inuinui ni bula eke”? Sa yaco vakacava o Koya me noda “idusidusi ki kea”?
iVolanikalou Veisemati
Luke 24:36–39; Joni 1:1–14; Cakacaka 4:10–12; 2 Nifai 2:8; 25:26; Alama 5:48; V&V 110:3–4
Veivuke ena Vuli
“Dau navuca na veitaviqaravi ni vuli ka na tara cake na nomu vakabauta na iVakabula” (Vunautaka na Noqu Kosipeli [2004], 24). Me vakataka, ni ko sa vulica, sa rawa mo tarogi iko ena veitaro vakaoqo: Ena vukei au vakacava na ivakavuvuli oqo me vakalevutaki kina na noqu kila vinaka na veisorovaki i Jisu Karisito? Ena vukei au vakacava na veivakavuvuli oqo meu yaco me vakataka vakalevu cake na iVakabula?”