Wase 14

Vakayagataki Keda ena Nodra Qaravi Tale E So

“Me sa curuma na lomada na ibalebale dina ni kosipeli me rawa ni da kila ni noda bula, ka soli vei keda mai vua na Kalou na Tamada, sa dodonu me vakayagataki ena nodra qaravi tale e so.”

Na Bula nei Gordon B. Hinckley

A sasaga dredre o Elder Gordon B. Hinckley gone ena nona imatai ni vica na macawa vakadaukaulotu tudei e Igiladi. A tauvimate o koya ena nona yaco yani, kei na nona sasaga me vunautaka na kosipeli a sega ni vakadonui vakaveitaravi. Donuya na gauna dredre oya, a vakalougatataki o koya ena ka a vakatoka emuri me nona “siga ni vakatulewa”—e dua na ka a sotava taumada ka vakayarayarataka na nona veiqaravi ena vo ni nona bula.

“Au a yalolailai,” a nanuma lesu o koya. Au a vola e dua na ivola i vale kivua na tamaqu vinaka ka kaya ni vaka au sa vakawalena voli na noqu gauna kei na nona ilavo. E a tamaqu o koya ka noqu peresitedi ni iteki, ka sa dua na turaga yalomatua ka dauvakauqeti. A vola o koya e dua na ivola lekaleka vei au ka kaya, ‘Gordon lomani, sa tiko vei au na nomu ivola. E dua tikoga na noqu itatau: guilecavi iko ka laki cakacaka.’ Ena mataka lailai oya ena neirau kalasi ni ivolanikalou a wilika na noqu itokani kei au na veivosa oqo ni Turaga: ‘Ia ko koya yadua sa via maroroya na nona bula ena vakayalia; ia ko koya yadua ena vakayalia na nona bula ena vukuqu kei na itukutuku vinaka ena maroroya.‘ (Marika 8:35.)

“Na vosa oya ni Vakavuvuli, ka salamuria na ivola i tamaqu kei na nona ivakasala meu guilecavi au ka laki cakacaka, a curuma saraga na yagoqu. Ena ivola i tamaqu ena ligaqu, au curuma na neirau rumu ni moce ena vale ena 15 Wadham Rd, keirau a vakaitikotiko kina, ka tekiduru ka cakava e dua na bubului vata kei na Turaga. Au yalataka niu na tovolea meu guilecavi au ka vakayagataki au ena Nona veiqaravi.

“Na siga oya ena Julai ni 1933 e sa siga ni noqu vakatulewa. A curuma na noqu bula e dua na rarama vou kei na dua na reki vou ena lomaqu.”¹

A sega ni biuta na bula nei Gordon B. Hinckley na rarama oya. Mai na siga oya, a soli koya vakaoti o koya kivua na Turaga ena nodra qaravi tale e so. Ena veibulu nei Peresitedi Hinckley, a lisitaka o Peresitedi Henry B. Eyring e so na cau nei Peresitedi Hinckley: na tarai ni valetabu e vuravura taucoko, na tauyavutaki ni valetabu lalai me vakatotolotaka na cakacaka ni valetabu, na tauyavutaki ni iLavovure ni Lotu, kei na tarai ni Vale ni Koniferedi. Qai kaya o koya:

“Na kena idivi e levu cake sara mai na lisi lekaleka oya kei na noqu kaukauwa meu vakamacalataka. Ia na veika a rawata o koya e tiko kina e dua na ka kilai vakamatata. Ena nodra dau vakalougatataki tu ga na tamata ena madigi. Ka dau vakasamataki ira tu ga ka lailai sara na nodra madigi, na tamata ka sasaga dredre voli me ra-wa na veidredre ni bula e veisiga kei na bolebole ni kena bulataki na kosipeli i Jisu Karisito. Vica na gauna a tabaka o koya na nona iqaqalo ena serequ niu cakava e dua na vakatutu ka kaya, ‘Hal, o sa bau nanuma li na tamata e sasaga dredre voli?’”²

“Au sa vakanuinui meu duri ka laki cakava,” a kaya o Peresitedi Hinckley. “Au sa vakanuinui meu sotava na siga yadua ena navunavuci kei na nakinaki. Au sa vakanuinui meu vakayagataka na veiaua ni yadra meu veivakayaloqaqataki, meu vakalougatataki ira ka bibi tu na nodra icolacola, meu taracake na vakabauta ka vaqaqacotaka na ivakadinadina.”³

“Kevaka eda na kaya ni da sokalou ka muria na Vakavuvuli, e sega li ni dodonu meda saga meda vakatatamuria na nona bula ni veiqaravi?”

iVakavuvuli nei Gordon B. Hinckley,

Na noda bula e sa isolisoli mai vua na Kalou ka me na dau vakayagataki ena nodra qaravi tale e so.

Sa tiko … e levu na bula vakaloloma ka luluqa ena vuravura taucoko, sa levu na veivorati kei na veicacati, sa levu na tamata vakawelewele ka dukadukali, sa vuqa na itikotiko kavoro kei na matavuvale rusa, sa vuqa na tamata galili ka bulataka voli na bula veilecayaki ka sega na nodra inuinui, sa levu na lomaocaoca ena veivanua kecega.

Kau sa vakamasuti iko oqo. Au sa vakamasuti iko ena veika kece o na taura o na dau solisoli talega mo cakava kina na vuravura me vinaka cake vakalailai.⁴

Kevaka me na vakavinakataki na vuravura, na ivalavala ni loloma sa dodonu me vakavu veisau ena lomadra na tamata. Sa rawa ni vakakina ni da rai ulabaleti keda ka solia na noda loloma kivua na Kalou kei ira tale e so, ka cakava ena yaloda taucoko, ena lomada taucoko, kei na noda vakasama taucoko.

Sa vakadreta na Turaga ena ivakatakila ni gauna oqo, “Ia kevaka dou sa kitaka na ka kecega meu vakarokorokotaki kina, ena rarama na yagomudou taucoko ka sega na tikina sa butobuto.” (V&V 88:67.)

Ni da raica na Kalou ena loloma kei na vakavinavinaka, ni da qaravi koya ena vakarokoroko, sa takali mai vei keda na butobuto ni valavala ca, na butobuto ni kocokoco, na butobuto ni dokadoka. Sa na yaco me tosoicake na loloma me baleta na Tamada Tawamudu kei na Luvena Daulomani, na noda iVakabula ka noda Dauveivueti. Sa na yaco na vakasama levu cake ni veiqaravi kivei ira na wekada, lailai na noda nanumi keda voli ka levu cake na nodra tosovi yani e so tale.

Na ivakavuvuli ni loloma e sa usutu ni kosipeli i Jisu Karisito.⁵

Kevaka eda na kaya ni da sokalou ka muria na Vakavuvuli, e sega li ni dodonu meda saga meda vakatatamuria na nona bula ni veiqaravi? Sega ni dua vei keda e tiko vua na dodonu me kaya ni sa taukena na nona bula. Sa isolisoli mai vua na Kalou na noda bula. Eda lako mai ki vuravura sega ena lomada vakaikeda. Eda biubiu sega ena vakatautaki ni lomada. Sa wili tu na noda veisiga sega mai vei keda, ia e vakatau tiko ki na loma ni Kalou.

E vuqa vei keda e vakayagataka tiko na noda bula me vaka era sa noda vakaoti. Sa noda na digidigi meda vakawalena kevaka eda gadreva. Ia oya sa yaco me dua na veiveretaki ni veidinadinati levu ka tabu. Me vaka e sa vakamatatataka na Vakavuvuli, “Ia ko koya yadua sa via maroroya na nona bula ena vakayalia; ia ko koya yadua ena vakayalia na nona bula ena vukuqu kei na itukutuku vinaka ena maroroya.” (Marika 8:35.)⁶

Kemuni na taciqu kei na ganequ lomani, sa kalevu na bolebole. Sa tu wavoliti keda na madigi e so. Na Kalou sa vinakati keda meda cakava na Nona cakacaka—ka cakava ena mamakutu kei na yalomarau. Na cakacaka oya, me vaka e sa tuva tu o Koya, mo “vukei ira sa malumalumu, vakaukauwataka na liga sa wadamele, kei na duru sa malumalumu.” (V&V 81:5.)

Sa ikoya mo qaravi ira na vakaleqai. Sa ikoya mo vakacegui ira na luluvu tu. Sa ikoya mo sikovi ira na yada kei na luveniyali ni ra sa rarawa. Sa ikoya mo vakani ira na viakana, mo vakasulumi ira na luvawale, mo vakavaletaki ira ka sega tu na doka e buradeladra. Sa ikoya mo cakava me vaka a cakava na Vakavuvuli, ka “lako voli ka daucaka vinaka.” (Cakacaka 10:38.)⁷

Na noqu itukutuku kivei kemuni edai … oya ni saga mo ni vakadeitaka e dua na tiki ni nomuni gauna, ni sa tuvai oti na cakacaka ni nomuni bula, kivei ira na lomabibi ka vakaleqai, ka sega na nanuma ni veisorosorovi. Sa gadrevi na nomu kila matai, se cava ga. Na nomu veivuke ena laveta cake e dua mai na vanua lolobo ni lomabibi. Na domomu matata ena veivakayaloqaqataki kivei ira e so ka na rawa ni yaco mera soro. Na nomu kila matai sa rawa ni veisautaka, ena dua na sala wananavu ka totoka, na nodra bula na vakaleqai tu. Ke sega oqo, ninaica? Ke sega ni o iko, o cei?⁸

Me sa curuma na lomada na ibalebale dina ni kosipeli me rawa ni da kila ni noda bula, ka soli vei keda mai vua na Kalou na Tamada, sa dodonu me vakayagataki ena nodra qaravi tale e so.”

Kevaka eda na vakayacora na veiqaravi vakaoya, ena vakatawani na noda veisiga ena reki kei na marau. Vakabibi sara, era na vakatabui kivua na noda Turaga ka iVakabula, o Jisu Karisito, kei na vakalougatataki taucoko ni nodra bula o ira eda a tara.⁹

Na veiqaravi sa wainimate vinaka ni vakalomalomanikoya, kocokoco, lomaleqa, kei na galili.

Au nanuma lesu na sikovi ni dua na koronivuli torocake kau a rogoca kina na ka vataga, na ulubale matau ni itabagone; na ulubale e baleta na veivaogai e koronivuli—me vaka e sa icolacola ka sega ni dua na madigi me rawati kina na kilaka ena veika ni vuravura—na ulubale me baleta na veivakavaletaki kei na kakana. …

Au vakasalataki ira na itabagone oya ni kevaka e sa rui bibi na veivakaogai e koronivuli, ke ra nanuma mera ulubaletaka na nodra vakavaletaki kei na kakana, au sa na rawa ni vakatututaka e dua na iwali ni nodra leqa. Au a vakatututaka mera biuta vakatikitiki toka na nodra ivola me vica na auwa, vagalala mai na rumu, ka laki sikova e dua ka sa qase ka galili, se dua ka tauvimate ka yalolailai. Vakataucoko, au sa mai raica ni kevaka eda vakaulubaletaka na bula, e sa baleta ni da vakasamataki keda tikoga.

Sa vuqa na yabaki na kena toka na ivakatakilakila ena lalaga ni sitoa ni ripea vava au dau sikova wasoma. E kaya, “Au vakaulubale baleta ni sega na noqu ivava me yacova niu raica e dua na turaga ka sega na yavana.” Na wainimate vakacakacakaikoya duadua me baleta na mate ni vakalomalomanikoya oya meda vakayagataki keda ena nodra qaravi tale e so.¹⁰

Au vakabauta e levu sara vei keda na wainimate vinaka duadua ni galili oya na cakacaka kei na veiqaravi ena vukudra tale e so. Au sega ni vakalailaitaka na nomu leqa, ia au sega ni vakasuka meu kaya ni sa tiko e vuqa tale ka sa bibi cake na nodra leqa mai na nomu. Sudra yani mo qaravi ira, mo vukei ira, mo vakayaloqaqataki ira. Sa vuqa sara na cauravou kei na goneyalewa era lutu e koronivuli ena kena vinakati mera bau nanumi toka ka vakayaloqaqataki. Sa vuqa sara na tamata qase ka bula voli ena vakaloloma na galili kei na rere e sa rawa ni kauta mai vei ira e dua na veivosaki rawarawa na ivakarau ni nuinui kei na rarama e so. …

Sa vuqa sara era mavoa tu ka sa gadreva e dua na kai Samaria vinaka me vadretitaka na nodra mavoa ka vukei ira ena nodra ilakolako. E dua na yalovinaka lailai sa rawa ni kauta mai e dua na veivakalougatataki levu ki na dua e lomabibi voli kei na vakanananu kamica kivua ka vukei koya.¹¹

Sa vuqa sara era tiko tani tu sa rawa ni o laveta cake na nodra icolacola. Sa ra tiko na tawavakavale, sa ra tiko na walokai, sa ra tiko na vakaloloma wavoliti keda taucoko. Sa ra tiko na qase sara ka galili voli ena veivale ni malumalumu. Sa ra tiko na gone tuvaki vakaca, kei na itabagone ena wainimate gaga, kei na tauvimate kei ira na lesu mai vale ka tagica tu na vosa vinaka. Kevaka o sega ni cakava, o cei ena cakava?

Na iwali vinaka duadua au kila me baleta na lomaleqa oya na cakacaka. Na wainimate vinaka duadua me baleta na yalolailai oya na veiqaravi. Na veivakabulai vinaka duadua me baleta na lomaocaoca oya na bolebole ni nona vukei e dua ka sa oca vakalevu cake.¹²

Cava na vuna era dau marau kina na daukaulotu? Baleta ni ra vakayagataki ira ena nodra qaravi tale e so.

Cava na vuna era dau marau kina o ira na cakacaka ena valetabu? Baleta na nodra cakacaka ni loloma e sa veiraurau vinaka saraga vata kei na cakacaka levu vakaveisosomitaki ni iVakabula ni kawatamata. Era sega ni qaqa se namaka na vakavinavinaka ena ka era cakava. Vakalevu sara, era sega ni kila e levu tale mai na yaca ikoya era sa cakacaka ena vukuna.¹³

Vakatakila na gagadre dokai e tiko e lomamu mo sudra yani ka vakacegui, tokoni, ka tarai ira cake tale e so. Ni o cakava vakakina, ena biuti iko na paisoni veivakacacani ni yalokocokoco, ka na vakaisosomitaki ena dua na vakanananu kamica ka totoka ka sega ni rawa ni lako mai ena dua tale na sala.¹⁴

“Sa vuqa sara era tiko tani tu sa rawa ni o laveta cake na nodra icolacola.“

Ni da sudra yani ka vukei ira tale e so, eda kunea na keda ituvaki dina.

Dua na mataka ni Sigatabu ena vica na yabaki sa oti, au a tiko ena itikotiko ni dua na peresitedi ni iteki ena dua na tauni lailai e Idaho. Ni bera na masumasu ena mataka, a wilika vata na matavuvale e vica na tikina mai na ivolanikalou. A toka kina na veivosa i Jisu oqo me vaka e volai koto ena Joni 12:24: “E dina, e dina, au sa kaya vei kemudou, Kevaka ena sega ni mate na vua ni sila ni sa lutu ki na qele, sa tiko duaduaga: ia kevaka sa mate, sa vua vakalevu.”

Sega ni vakatitiqataki ni vakaibalebaletaka tiko na Vakavuvuli ki na nona mate ka roro tiko mai, ni cauraka voli kevaka e sega ni mate ena sega ni vakavotukana sara na nona ilesilesi ena bula oqo. Ia au raica ena veivosa oqo e dua tale na ibalebale. E vaka vei au ni sa tukuna tiko vei keda yadua na Turaga ni vakavo sara eda sa vakayagataki keda ena nodra qaravi tale e so, eda sa bula voli ena dua na bula e sa sega dina tu ni vakainaki, ka ni a tomana sara, “O koya sa lomana na nona bula ena vakayalia; ia ko koya sa cata na nona bula e vuravura oqo ena maroroya ki na bula tawamudu.” (Joni 12:25.) Se, me vaka e volai ena Luke, “O koya yadua sa segata me maroroya na nona bula ena vakayalia; ia ko koya yadua ena vakayalia ena maroroya.” (Luke 17:33.) Ena dua tale na kena ivosavosataki, o koya ka bula walega me baleti koya ena malai ka mate, ia o koya ka guilecavi koya ena nodra qaravi tale e so ena tubu ka kadre ena bula oqo kei na kena e tawamudu.

Na mataka oya ena koniferedi ni iteki, a vagalalataki na peresitedi kau a tiko vata kaya ni oti e tinikatolu na yabaki ni veiqaravi yalodina. E a levu saraga na veisolevuti ni loloma kei na vakavinavinaka, sega ni baleta na nona iyau, sega ni baleta na nona itutu ena itikotiko vakabisinisi, ia sa baleta na veiqaravi levu e a vakayacora ena yalo ni veinanumi. Ni sega ni nanuma na veika e baleti koya, a draivataka o koya e tini vakacaca na udolu na maile ena veidraki kecega. A vakayagataka vakaidina o koya e udolu vakacaca na aua ena nodra qaravi tale e so. A drotaka o koya na veika e baleti koya me vukei ira ka gadreva tu na nona veivuke. Ena nona cakava vakakina e sa bulabula mai o koya ka sa yaco me tamata levu kivei ira a qarava.¹⁵

Ena vica na yabaki sa oti au a wilika na italanoa ni dua na goneyalewa ka a gole ki na dua na yasana vakoro vaka-qasenivuli. Ena loma ni nona kalasi a tiko kina e dua na yalewa ka a lutu eliu ka sa lutu tale [veitarogi]. A sega ni rawa ni wiliwili na gonevuli. A lako mai o koya ena dua na matavuvale ka sega tu vei iratou na ka me kau kina o koya ki na dua na siti levu cake me baleta na veitarogi ka sagai me kilai ke tiko vua e dua na leqa e rawa ni wali. Na kena vakilai ni rawa ni tiko na dredre ena matana na yalewa, a vakavakarau na qasenivuli gone me kauta na gonevuli, ena nona ilavo ga vakaikoya, me rawa ni vakatovolei na matana. A dikevi sara e dua na malumalumu ka rawa ni vakadodonutaki ena matailoilo. Sa mai tadola yani e dua na vuravura vou kivua na gonevuli. Ena imatai ni gauna ni nona bula, a raica vakamatata o koya na veivosa ka tu e matana. Na isau ni qasenivuli ena koro oya e lailai sara, ia mai na veika lalai a tu vua, a cakava o koya e dua na vakavureilavo ka veisautaka vakadua na bula ni dua na gonevuli lutulutu voli, ka ni sa yaco vakakina sa kunea o koya e dua na iwalewale vou ena nona bula vakaikoya.¹⁶

Ni ko sa veiqaravi vakakina, e dua na iwalewale vou ena vakuri ki na nomu bula. Ko na kunea na veimaliwai vou ka veivakauqeti. Ko na kunea na veitokani kei na veicuqeni. Ko na tubu ena kilaka kei na kila matata kei na yalomatua, kei na nomu igu mo cakava.¹⁷

Au vakadinadinataka mai na nomuni sudra yadua yani mo ni vukei ira tale e so, o ni na kunea na kemuni ituvaki dina ka vakalougatataka vakalevu na vuravura o ni bula kina.¹⁸

Sa vakarautaki ena Lotu e vuqa na madigi me baleta na veiqaravi tawakocokoco.

Kemuni na taciqu kei na ganequ, o ni na sega ni bula marau kevaka o ni lako curuma na bula ena nomuni vakasamataki kemuni duaduaga. Vakayali iko ena sasaga vinaka duadua e vuravura—na sasaga ni Turaga. Na cakacaka ni kuoramu, kei na veimataisoqosoqo, cakacaka ni valetabu, cakacaka ni veiqaravi ni welefea, kei na cakacaka ni kaulotu. Ko na vakalougatataka na nomu bula vakaiiko ni ko vakalougatataka na nodra bula tale e so.¹⁹

E sega tale na cakacaka e vuravura taucoko e vakavurea na bula marau me vakataka na cakacaka oqo. Ni sa matalia na bula marau. E basika ena nodra qaravi tale e so. E sa dina. E sa vakasakiti. E sa totoka.²⁰

“Ni ko … veiqaravi, e dua na iwalewale vou ena vakuri ki na nomu bula.”

Laiva na Lotu me nomu itokani lomani. Laiva me nomu itokani levu. Veiqaravi ena vanua cavaga o sa kacivi mo veiqaravi kina. Cakava na ka e tukuni vei iko. Na veitutu kece o taura ena vakuri ki na nomu rawaka. Au sa veiqaravi ena vuqa na itavi ena isoqosoqo levu oqo. Na veiqaravi yadua e kauta vata mai na kena isau.

Oqo … ena gadreva na nomu makutu tawakocokoco, na nomu veidokai kei na vakabauta tawayavalati. Ko na veiqaravi ena vuqa na ilesilesi ni bera ni cava na nomu bula. So vei ira ena rairai lailai, ia e sega na veikacivi lailai se tawabibi ena Lotu oqo. Sa bibi na veikacivi kecega. Sa veiganiti na veikacivi kecega ki na tosoi iliu ni cakacaka. Kakua ni vakawalena e dua na itavi ena Lotu. …

Vagalalataka e dua na tikina me baleta na Lotu ena nomu bula. Raica me tubu na nomu kilaka ena ivunau. Raica me vakalevutaki na nomu kila vakamatata na kena isoqosoqo. Raica me vaqaqacotaki vakaoti na nomu loloma me baleta na kedra dina tawamudu.

Ena rairai kacivi iko na Lotu mo solibula. Ena rairai kacivi iko mo solia na ka vinaka duadua e tiko vei iko mo dolea. Ena sega na isau ena ka oqo, baleta ni ko na dikeva ni na yaco me dua na vakavureilavo ka na vuavuaivinaka vei iko se vakacava ga na balavu ni nomu bula. Na Lotu sa ivurevure levu ni dina tawamudu. Ciqoma ka taura matua.²¹

O vinakata li mo bula marau? Guilecavi iko ka yali yani ena sasaga levu oqo. Dolea na nomu sasaga ena nodra vukei na tamata. Vakabulabulataka e dua na yalo ni veivosoti ena lomamu mai vua e dua ka na rairai vakacalai iko. Rai kivua na Turaga ka bula ka cakacaka mo laveti ka qaravi ira na Luvena tagane kei na yalewa. O na qai mai kila na bula marau o se bera ni bau kila tu eliu kevaka o na cakava oya. Au sega ni kauwaitaka na nomu yabaki ni bula, na nomu gone, se cava tale. O rawa ni laveti ira cake na tamata ka vukei ira. Sa kila o lomalagi na oba vakaoba ni tamata ka gadreva tu na veivuke ena vuravura oqo. Io, sa oba saraga. Meda sa biuta tani mai na noda bula na veilawakitaki kei na itovo kocokoco, kemuni na taciqu kei na ganequ, ka duri vakabalavu vakalailai ka toso cake vakalailai ena veiqaravi kivei ira tale e so. … Duri vakabalavu, duri cere tu, laveti ira ka malumalumu na durudra, taura e cake na ligadra na wadamele. Bulataka na kosipeli i Jisu Karisito. Guilecavi iko.²²

Vakatutu ni Vuli kei na Veivakavulici

Taro

A vakatavulica o Peresitedi Hinckley ni noda bula e sa isolisoli mai vua na Kalou, me vakayagataki ena nodra qaravi tale e so (raica na iwasewase e 1). E rawa vakacava na vakayaco veiqaravi kivei ira tale e so me dua na sala ni bula? Na cava na kena ibalebale vei iko na veiqaravi me vakarokorokotaki kina na Kalou? E sa bau vakalougatataki iko vakacava na veiqaravi ni dua tale?
Cava na vuna e vukei keda kina na veiqaravi ena ulabaleti ni vakalomalomani keda, yalokocokoco, kei na galili? (Raica na iwasewase e 2.) E sa vakavure marau vakacava kivei iko na veiqaravi? Ni ko wilika na ivakamacala nei Peresitedi Hinckley me baleti ira na vakaleqai tu, navuca na iwalewale o rawa ni sudra yani kina mo veiqaravi vata kei na nomu matavuvale.
Cava na vuna e vukei keda kina na noda vakayali keda ena nodra qaravi tale e so meda “kunea na [keda] ituvaki dina”? (Raica na iwasewase e 3.) Na cava eda rawa ni vulica mai na italanoa e so ena iwasewase e 3?
A vakasalataka o Peresitedi Hinckley, “Vakayali iko ena sasaga vinaka duadua e vuravura—na sasaga ni Turaga“ (iwasewase e 4). Na veivakalougatataki cava soti e sa kauta mai ki na nomu bula na veiqaravi ena Lotu?

iVolanikalou Veisemati

Maciu 20:25–28; 25:34–40; Joni 13:35; Mosaia 2:16–18; 18:8–9; V&V 64:33

Veivuke ena Vuli

“Ni ko vuli tiko, vakarorogo vinaka sara ki na veika o vakasamataka kei na veika o vakila e yalomu”(Vunautaka na Noqu Kosipeli [2004], 20). Sa rawa mo vola na veika o vakila, kevaka mada ga era sega ni veisemati ki na vosa o wilika tiko. Era sa rawa ni veika saraga e vinakata vei iko na Turaga mo vulica.