Wase 22

Tatara Yani ena Loloma vei ira na Lewenilotu Vou kei ira na Luluqa Vakalotu

“Sa dodonu me da [dau] nanuma tiko na itavi vakaitamera ni veivakataukenitaki … vei ira era saumaki mai ki na Lotu, ka tatara yani ena loloma vei ira era … kalawa yani ki na butobuto ni luluqa vakalotu.”

Na Bula nei Gordon B. Hinckley

E dua na ulutaga e dau vakabibitaka o Peresitedi Hinckley ena nona gauna taucoko ni veiqaravi vaka-Peresitedi ni Lotu na bibi ni noda tarai ira yani na saumaki vou mai kei ira era luluqa tu ena Lotu. A wasea e vuqa sara na ivakaraitaki ni nona sasaga yadua ena vuku ni ka oqo, e dua vei ira a vakamacalataka ena yalorarawa ni “dua vei ira na nona druka.” A vakamacalataka o koya:

“Ni veiqaravi tiko vakadaukaulotu mai Peritania, keirau a vakavulica kei na noqu itokani, ka qai ka dokai meu papitaisotaka e dua na cauravou. E vuli vinaka o koya. Sa vakasavasavataki. Dau vuli vagumatua. Sa dua na ka noqu cibitaka nona curu mai ki na Lotu na cauravou oqo. Au vakila ni sa tu vua na veika kece me na yaco ena dua na siga me veiliutaki vei ira na noda.

“Sa vakayacora tiko na veisau levu mai na saumaki mai ki na lewenilotu. Ena dua na gauna lekaleka ni bera noqu vagalalataki mai, a noqu na madigi meu nona itokani. Oti au sa vagalalataki meu lesu tale ki vale. A soli vua e dua na itavi lailai ena tabana oya mai Lodoni. E sega ni kila e dua na ka me baleta na veika e namaki vua. A cakava e dua na cala. Na iliuliu ni soqosoqo a veiqaravi kina e dua na turaga au rawa ni vakamacalataka vakavinaka sara me lailai na nona loloma ka dau kaukauwa ena veivakacacani. Ena sala sega kina na loloma, a vosataka na noqu itokani ka a cakava e dua na cala lailai.

“A biuta mai na neitou olo saumi na cauravou oqo ena bogi ko ya ena mosiniyalo kei na rarawa. … A kaya e yalona, ‘Kevaka era mataqali tamata vaka tu oya, au na sega ni lesu tale kina.’

“Sa mai luluqa yani vakalotu. Sa sivi e vica na yabaki. … Niu tiko voli [tale] mai Igiladi, au a tovolea vagumatua meu kunei koya. … Au lesu mai vale, qai yaco ni oti e dua na vakasaqaqara balavu, a rawa niu kunei koya.

“Au volavola vua. A sauma mai ia e sega ni tukuna e dua na ka me baleta na kosipeli.

“Ena gauna ka tarava niu tiko voli mai Lodoni, au a vakasaqarai koya tale. Ena siga meu sa biubiu mai kina, au qai kunei koya. Au qiriti koya, ka keirau qai sota ena siteseni e lomaniqele. A mokoti au e ligana kau vakayacora vakakina vua. Sa vo lailai sara vei au na gauna meu toboka noqu waqavuka, ia keirau veitalanoa vakalekaleka ena ivakarau au vakabauta ni veikauwaitaki dina. A mokoti au tale ni se bera niu lako. Au sa vakatulewataka me na kakua tale ni yali mai mataqu. …

“Sa sivi yani na veiyabaki. Au sa qase cake me vakataki koya. Sa cegu mai na nona cakacaka ka toki ki Suitisaladi. Ena dua na gauna niu tiko voli mai Sutisaladi, au biuta toka na ka au laki cakava meu vaqara na koro e tiko kina. Keitou a tiko vata ena dua na iwase levu ni siga ko ya—o koya, na watina, na watiqu, kei au. A gauna taleitaki vei keitou, ia e kunevotu ni sa boko makawa sara na buka ni vakabauta. Au tovolea na sala kece au kila, ia au sega ni kunea rawa e dua na sala meu vakawaqaca tale kina. Au tomana tiko noqu veitaratara vata kaya. Au vakauta vua na ivola, mekasini, katokatoni ni Matasere ni Tabernacle, kei na veika tale eso ka vakaraitaka kina na nona vakavinavinaka.

“Sa mai mate ena vica na vula sa oti. A volavola mai vei au na watina me tukuna mai. A kaya mai, ‘O iko na nona itokani vinaka duadua.’

“A drodrova sobu na baluqu na wainimata niu wilika na ivola oya. Au kila niu a druka. E rairai keu a tiko beka e kea meu tomiki koya cake ena imatai ni gauna a vakabalei kina, ke a duatani beka na ka e rawa ni cakava baleta nona bula. Au vakabauta ke a rawa niu vukei koya ena gauna ko ya. Au vakabauta keu a rawa ni vakamamacataka na mavoa a sotava. E dua ga na ka au logavinaka kina: Au a tovolea. E dua ga na noqu rarawa: Au a druka.

“Na bolebole ena gauna oqo sa levu cake sara mai na veigauna kecega baleta na iwiliwili ni saumaki mai sa levu cake sara mai na veigauna eda kila sa oti yani. … O ira kece na saumaki mai era sa ka talei. O ira yadua na saumaki mai era luvena tagane se yalewa na Kalou. O ira yadua na saumaki mai era itavi cecere ka bibi.”¹

Na nona kauwai o Peresitedi Hinckley baleti ira na saumaki vou mai kei ira na lewenilotu luluqa e vua ni nona kila na veivakalougatataki ni kosipeli ki na bula. A tarogi koya ena dua na gauna e dua na daunitukutuku, “Na cava e kauta mai vei iko na vakacegu levu duadua ni o raica na cakacaka ni Lotu nikua?” E sauma o Peresitedi Hinckley:

“Na ka veivakamamautaki duadua au sotava sai koya na noqu raica na veika e cakava na kosipeli vei ira na tamata. E solia vei ira e dua na ivakarau vou ni rai me baleta na bula. E solia vei ira e dua na rai era se bera vakadua ni vakila ena dua na gauna. E laveta cake nodra rai ki na veika vakaturaga ka vakalou. E yaco vei ira e dua na ka veivakurabuitaki ni da raica. Era rai vei Karisito ka bula mai.”²

“E biuta tu na Turaga na ciwasagavulu kaciwa me vaqara na sipi lakosese.”

iVakavuvuli nei Gordon B. Hinckley

Sa dua noda itavi cecere me da qaravi ira na tamata yadua.

Sa dodonu me da raici ira na tamata yadua. E dau vosa na Karisito me baleti ira na tamata yadua. A vakabulai ira na tauvimate, yadudua. A vosa ena Nona vosa vakatautauvata ni tamata yadua. Na Lotu e kauwaitaka na tamata yadua, veitalia na keda iwiliwili. Se ra lewe 6 se 10 se 12 se 50 na milioni, me kakua ni yali vei keda ni sa ka bibi na tamata yadua.³

Eda sa yaco tiko me isoqosoqo ni vuravura raraba. Ia na noda nanamaki kei na kauwai me tikoga ena tamata yadua. Na lewe yadua ni lotu oqo e tagane se yalewa, gonetagane se goneyalewa yadua. Na noda itavi cecere me da raica ni ra “dausikovi ka vakavulici ena ivakavuvuli ni Kalou” na tamata yadua (Moro. 6:4), ni tu vei ira na madigi me ra tubu ka vakauqeti ka tuberi ena sala ni Turaga, me kakua ni dua e sega vua na veika ni bula, me sotavi nodra gagadre na dravudravua, me vakayaloqaqataki na lewenilotu yadua, tuberi, kei na madigi me toso ki liu ena sala ni tawamate rawa kei na bula tawamudu. …

Na cakacaka oqo e baleta na tamata, ni luvena tagane se yalewa yadua na Kalou. Ni vakamacalataki na veika sa rawati eda tukuna na iwiliwili, ia na noda sasaga kece me vagolei vakatabakidua ki na vakatorocaketaki ni tamata yadua.⁴

Au vinakata meu vakabibitaka ni sa yaco tiko e dua na tubu taleitaki ka vakasakiti ena Lotu. … Sa dodonu kina me da yaloqaqa. Ia ni dua na saumaki mai sa yaco me batabata na nona vakabauta sa na dua na leqa levu. Sa dodonu me kauwaitaki vakalevu ni dua na lewenilotu sa luluqa mai. A biuta tu na Turaga na ciwasagavulu kaciwa ka laki vakasaqara na sipi lakosese. Sa rui bibi na Nona kauwaitaka [na dua] sa vakayacora kina me ulutaga ni dua vei ira na Nona lesoni cecere [raica Luke 15:1–7]. E sega ni rawa ni da vakaweleweletaka. Sa dodonu me da vakayadrati ira tiko na vakailesilesi ni Lotu kei na lewenilotu raraba me baleta na itavi vakaitamera ni veivakabulabulataki ena kena ivakarau dina veivakatakatai ka vakasakiti vei ira kece sara era curu mai ki na Lotu ena saumaki, ka tatara yani ena loloma vei ira era sa kalawa yani ki na butobuto ni luluqa vakalotu ena vuku ni ulubale duidui eso. Sa tu na ivakadinadina ni rawa ni vakayacori ni tiko na kena yalo me vakayacori kina.⁵

O ira yadua na saumaki mai era ka talei ka ra itavi cecere ka bibi.

Sa yaco meu nanuma ni leqa levu duadua ena Lotu na nodra yali yani o ira era curu mai ki na Lotu ka qai lutu tale yani. Vakavo ga e vica wale sara na kisi vakaoqo na kena vo kece e sega ni dodonu me yaco. Au sa vakadeitaka ni voleka o ira kece era papitaisotaki mai vei ira na daukaulotu e vuravura raraba sa rauta na nodra vakavulici me ra ciqoma kina na kilaka kei na ivakadinadina e ganita me ra papitaiso kina. Ia e sega ni ka rawarawa na kena vakayacori na veisau ena kena mai leweni na Lotu oqo. E kena ibalebale na kena tamusuki na isema makawa. E kena ibalebale ni ra sa na biu na itokani. E rawa ni kena ibalebale na biu vakatikitiki ni veika eda dau vakamareqeta. Ena gadrevi beka kina na veisau ni itovo ka vakuwai na veika eda dau taleitaka na kania. Ena vuqa na gauna e kena ibalebale na galili kei na rerevaki ni veika tawakilai. Sa dodonu me susugi ka vaqaqacotaki o koya e saumaki mai ena gauna dredre oqo ni nona bula. Sa sauma e dua na isau levu ena nona mai tiko ena Lotu. Na nodra sasaga babalavu na daukaulotu kei na isau ni nodra mai veiqaravi, na tawasei mai na isema vakaveiwekani makawa kei na dredre e sotavi ena veika kece oqo sa dodonu kina me ra ciqomi ka marautaki na yalo taleitaki oqo, vakadeitaki, vukei ena nodra malumalumu, soli vei ira na itavi me ra vakaukauwataki kina ni ra qarava tiko, ka ra vakayaloqaqataki ka vakavinavinakataki ena veika kece era vakayacora.⁶

“Au sureti keda yadua na lewenilotu me da tatara yani ena veitokani kei na loloma vei ira era curu mai ena saumaki ki na Lotu.”

E sega ni dua na kena yaga na cakacaka ni kaulotu vakavo kevaka eda maroroya na vua ni sasaga oya. Me rau kakua vakadua ni veitawasei na rua oqo. Era sa rui ka talei na saumaki mai oqo. … O ira yadua na saumaki mai era itavi cecere ka bibi. Sa rui ka bibi sara me da maroroi ira era sa yaco oqo me ra tikida. …

Au a ciqoma ena siga yani kadua e dua na ivola taleitaki. E vola mai e dua na marama ka a lewena na Lotu ena dua na yabaki sa oti. E vola vaqo o koya:

“Na noqu ilakolako mai ki loma ni Lotu e duatani ka dredre toka. Na yabaki sa sivi oqo e yabaki dredre duadua au se qai bau donumaka ena noqu bula. Sa veivakaiyautaki sara vakalevu. Niu dua na lewenilotu vou, au dau bolei e veisiga.” …

E tukuna o koya o “ira na lewe ni Lotu era sega ni kila se vakacava tu me da lewe ni Lotu vou. O koya, e voleka kina ni sega ni rawa me ra kila na iwalewale me ra tokoni keimami kina.”

Au bolei kemuni kina na taciqu kei na ganequ, kevaka o ni sega ni kila se vakacava tu, tovolea mo raitayaloyalotaka se vakacava tu. E rawa ni rerevaki na kena galili. E rawa ni vakatuburarawa. E rawa talega ni veivakarerei. O keda ena Lotu oqo eda duidui sara vakalevu mai vei vuravura mai na kena ivakarau eda nanuma. E tomana na marama oqo:

“Ni da sa yaco me lewe ni Lotu o keda na vakadikeva tiko, eda kurabui ni da qai kila ni da sa curuma yani e dua na vuravura eda vulagi sara ga kina vakadua, e dua na vuravura ka tu na kena itovo tudei ni bula, ivalavala, kei na ivosavosa. Eda qai kila ni sega ni dua na tamata se dua na vanua ni veidusimaki e rawa ni da gole kina me da tuberi ena noda ilakolako ena vuravura vou oqo. Taumada eda nanamaki ena ilakolako, e vaka me lasa ni da cala, oti sa vaka me vakavu lomaleqa ka yaco sara, ni sa vuki na lomaleqa ki na cudru. Sai koya na ivakatagedegede oqo ni lomaleqa kei na cudru eda dau lako tani kina. Eda sa lesu tale ki na vuravura eda a lako mai kina, na vanua eda a kilai keda kina, na vanua eda dau cau kina, kei na vanua eda dau vosataka na kena ivosavosa.”⁷

Eso na tamata era a papitaisotaki walega, era se bera ni vakabulabulataki, ena rua ga se tolu na vula era sa vakamoce tale. Sa rui ka bibi kina, kemuni na taciqu kei na ganequ, me da raica ni ra sa saumakitaki [o ira na lewenilotu papitaiso vou], ni sa tu e yalodra e dua na ivakadinadina ni cakacaka cecere oqo. E sega ni ka walega ni vakasama. E ka ni yalo me tarai tiko ena Yalo Tabu me yacova ni ra sa kila ni dina na cakacaka oqo, ni o Josefa Simici e parofita vakaidina sara ni Kalou, ka ni bula tiko na Kalou ka bula tiko o Jisu Karisito ka ni rau a rairai vua na gonetagane o Josefa Simici, ni dina na iVola i Momani, ni sa tu oqo na matabete kei na kena isolisoli kei na veivakalougatataki kece sara. Au sega ni rawa ni vakabibitaka tale vakaukauwa cake na tikina oqo.⁸

O ira yadua na saumaki mai era gadreva na veitokani, e dua na itavi, kei na veivakani ena vosa ni Kalou.

“Ena iwiliwili ni curuvou ka sa tubu cake tikoga e veigauna, e dodonu me da cakava e dua na sasaga vakaitamera ni nodra vukei ena nodra vakasaqara na nodra gaunisala. O ira vakayadua era gadreva e tolu na ka: dua na itokani, dua na itavi, ka vakavulici ena “ivakavuvuli ni Kalou” (Moro. 6:4). Sa noda itavi ka noda madigi me da vakarautaka oqo.⁹

Veitokani

Era curu mai ki na Lotu na [saumaki mai] ena nanamaki ena veika era sa kunea. Sa dodonu me da cakacakataka na nanamaki oqori ena gauna vata ga oya. … Rogoci ira, tuberi ira, sauma nodra taro, ka tu mo veivuke ena ituvaki kece sara kei na ivakarau kecega. … Au sureta na lewenilotu yadua me ra tatara yani ena veitokani kei na loloma vei ira era na saumaki vou mai ki na Lotu.¹⁰

E vakaoqori na noda itavi vei ira era papitaiso mai ki na Lotu. E sega ni rawa ni da vakaweleweletaki ira. E sega ni rawa ni da laivi ira duadua tu. Era gadreva na veivuke ena nodra vakamatautaki ki na ivakarau kei na itovotudei ni Lotu oqo. Ka sa noda veivakalougatataki cecere kei na madigi me da vakarautaka na veivuke oqori. … Na matadredredre, na lululu ni veitokani, na vosa ni veivakayaloqaqataki ena veivakurabuitaki.¹¹

Me da tarai ira yani na tamata oqo! Me da vakaitokanitaki ira! Me da yalovinaka vei ira! Me da vakayaloqaqataki ira! Me da vakuria na nodra vakabauta kei na veika era sa kila me baleta na ka oqo, na cakacaka ni Turaga.¹²

Au vakatakekere vei kemuni … ni ko ni na mokoti ira era curu mai ki na Lotu ka nodra itokani ka me ra vakila ni ra marautaki ka vakacegui ira ka da na raica na vuana vakasakiti. Ena vakalougatataki kemuni na Turaga mo ni veivuke ena iwalewale cecere oqo ni nodra maroroi na curuvou mai.¹³

iTavi

Na Lotu oqo e namaka e dua na ka vei ira na tamata. E cecere na kena ivakatagedegede. E kaukauwa na kena ivunau. E namaka na veiqaravi cecere mai vei ira na tamata. Era sega ni muri wale tu ga. Eda namaka me ra cakacaka. Era na kidava oqori na tamata. Era marautaka na madigi ni veiqaravi, ia ni ra vakayacora vakakina, ena levu cake na veika e rawa ni ra rawata, ena nodra kila ka, kei na nodra vakadonui me ra cakava na ka ia me ra cakava vakavinaka.¹⁴

Solia [vei ira na lewenilotu vou] e dua na ka me ra cakava. Era na sega ni kaukauwa cake ena nodra vakabauta ke sega na vakatovotovo. Na vakabauta kei na ivakadinadina e vaka na masela ni ligaqu. Kevaka au vakayagataka na masela oqori ka vakani ira, era na kaukauwa cake. Kevaka au vakarubeca tu na ligaqu ena dua na kena ililili ka laiva tu, sa na yaco me malumalumu ka sega ni yaga, sa vakakina na ivakadinadina.

Eso vei kemuni era kaya ni ra se bera ni vakarau me ra vakaitavi. Ia e sega ni dua vei keimami a sa vakarau tu ena gauna a kacivi kina. Au rawa ni tukuna oqori ena vukuqu. Ni nanuma beka niu a sa vakarau tu ki na veikacivi cecere ka bibi oqo? Au a vakila na noqu druka. Au a vakila na noqu sega ni veiganiti. Au se vakila tikoga na noqu druka. Au se vakila tu ga na noqu sega ni veiganiti. Ia au sa tovolea tiko meu toso ki liu, ka segata na veivakalougatataki ni Turaga ka tovolea me cakava na Lomana ka vakanuinui ka masu tiko me na ciqoma na noqu veiqaravi. Na imatai ni noqu itavi ena Lotu oqo na daunivakasala vua na peresitedi ni kuoramu ni dikoni niu yabaki tinikarua Au a sega ni vakila ni ganiti au. Au a vakila na noqu druka. Ia au a tovolea, me vaka ga o ni a cakava, ia ni oti oya sa yaco mai eso tale na itavi. E sega vakadua na yalo ni veiganiti, ia na yalo ga ni vakavinavinaka kei na lomasoli me tovolei.¹⁵

O ira vakayadua na saumaki mai ki na Lotu oqo e dodonu me dua nodra itavi ena gauna vata ga. Ena lailai wale beka, ia ena tukuna na duidui ena nona bula.¹⁶

E dina sara ena sega ni kila na veika kece o koya e saumaki vou mai. Ena rawa ni cakava eso na cala. Me vakacava kina? Eda dau cala kece. Na ka bibi duadua na tubu ena yaco mai ni da bulabula tiko vakalotu.¹⁷

E vakavuvulitaka o Peresitedi Hinckley ni ra gadreva na saumaki vou mai me ra ciqoma na madigi me ra veiqaravi ena Lotu.

Susugi cake ena vosa vinaka ni Kalou

Au vakabauta … ni o ira na saumaki mai oqo sa tu na nodra ivakadinadina ni kosipeli. Au vakabauta ni ra vakabauta na Turaga o Jisu Karisito ka kila ni Kalou dina. Au vakabauta ni ra sa veivutunitaka dina na nodra ivalavala ca ka sa lomadra dina me ra qarava na Turaga.

E tukuna vaqo o Moronai ena vukudra ni ra sa papitaiso oti: “Ia ni ra sa papitaisotaki oti, sa soli vei ira na isolisoli ka vakasavasavataki ena kaukauwa ni Yalo Tabu; era sa wili me lewe ni lotu i Karisito; a sa volai na yacadra, era sa dausikovi ka vakavulici ena ivakavuvuli ni Kalou, era sa tuberi ena sala dodonu, ka vakauqeti me ra dau masu tikoga ka vakararavi tabakidua ki na loloma i Karisito, o koya sa vakatekivuna ka sauma talega na nodra vakabauta” (Moro. 6:4).

Ena gauna oqo me vaka ena gauna ko ya, “era sa wili me lewe ni lotu i Karisito … na saumaki mai; [me] ra sa dausikovi ka vakavulici ena ivakavuvuli ni Kalou, era sa tuberi ena sala dodonu, ka vakauqeti me ra dau masu tikoga.” … Me da vukei ira ena nodra cavuta na imatai ni nodra ikalawa vakalewenilotu.¹⁸

Sa ka bibi sara [vei ira yadua na saumaki vou mai] me ra lewena e dua na kuoramu ni matabete se iSoqosoqo ni Veivukei, na Goneyalewa, na Cauravou, na Matawilivola ni Sigatabu, se na Lalai. Me na sureti mai ki na soqoni ni sakaramede me vakaivotavota ena sakaramede, me vakavouya na veiyalayalati sa cakava ena gauna ni papitaiso.¹⁹

Na veika kece eda na rawata ka sega ni dua na ka eda vakayalia ena noda lesu mai ki na Lotu.

E udolu vakaudolu e vuravura taucoko … era lewe tu ni Lotu ena yacana walega, ia era sa biuta, ka ra sa gadreva tu e yalodra ena gauna oqo me ra lesu mai, ia era sega ni kila me caka vakacava se ra sa rui rere ni tovolea. …

Vei kemuni, na taciqu kei na ganequ, ko ni sa taura na nomuni ivotavota vakayalo ka lako yani, ka o ni sa raica tu ena gauna oqo na lala ni nomuni bula, sa tadola tu na sala mo ni lesu mai. … Kevaka o ni na taura na imatai ni kalawa rerere ni lesu mai, o ni na kunea na liga ni dodo tu me ciqomi kemuni kei ira na itokani vinaka me ra kidavaki kemuni.

Au vakabauta niu kila na vuna era biubiu kina eso vei kemuni. A vakacudrui kemuni beka e dua na dau sega ni veinanumi ka vakamavoataki kemuni, o ni taura cala na nona ivalavala ni matataka na Lotu. Se ni toki beka mai na dua na vanua o ni kilai kina ki na dua na vanua o ni tu duadua kina, mai kea o ni qai tubu cake ena lailai ni kilaka me baleta na Lotu.

Se o ni sa vagolei beka ki na so na ilawalawa se itovo o ni nanuma ni sega ni veisotari kei na Lotu. Se o ni nanuma beka ni ko ni yalomatua cake ena vuku vakavuravura mai vei ira na nomu ilawalawa ena Lotu, kei na so beka na yalo vakalevulevui koya, o ni sa lako tani mai na nodra veitokani.

Au sega ni lako mai ke meu mai vaqara iulubale. Au nuitaka ni ko ni na sega ni vakakina. Ni vakanadakuya na ka sa oti. … Na veika kece eda na rawata ka sega ni dua na ka eda vakayalia. Ni lesu mai na noqu itokani. E levu cake na vakacegu ena kunei ena Lotu mai na veika o ni sa kila ena dua na gauna balavu. Era lewelevu era tu mo ni mai marautaka na nodra veitokani.²⁰

Kemuni na taciqu kei na ganequ o ni … sa goletani beka, e gadrevi kemuni na Lotu, ka o ni gadreva na Lotu. O ni na kunea e levu na daliga era na vakarorogo ena veiciqomi. Ena vuqa na liga me vukea nomu kunea na sala lesu mai. Era na tu na yalo me ragita na nomu. Ena drodro na wainimata, sega ni baleta na rarawa ia e baleta na reki.²¹

Baleti kemuni na Yalododonu Edaidai o ni sa lesu tale mai ki Lotu, ena logaloga vinaka ni da sa lesu tale mai ki vale.

Ena dua na Sigatabu au kunei au ena dua na siti mai California ena dua na koniferedi ni iteki. A tu ena niusipepa mai kea na yacaqu kei na kequ itaba. A taqiri na talevoni ena valenilotu ni iteki ni keirau curu yani kei na peresitedi ni iteki ena mataka oya. E noqu qiri oya, ka vakatakilai koya mai o koya a qiri yani. E vinakata me raici au. Au tataunaki au mai na bose meu qarava ena mataka oya ka kerea na peresitedi ni iteki me vakayacora ga. E dua na ka bibi cake meu cakava.

A lako mai, noqu itokani oqo, ena rere ka vaka e via domobula. Sa dede nona yali tu. Keirau veimokomoko me vaka na veitacini sa balavu nodrau sega tu ni sota. Taumada a tatao vakalailai na veivosaki, ia sega ni dede sa taladrodro ni keirau veitalanoataka na neirau a tu vata mai Igiladi ena vica vata na yabaki sa oti. E tonawanawa na matana na turaga kaukauwa oqo ni tukuna na veika me baleta na Lotu a dua tu na lewena vinaka, qai tukuna na veiyabaki babalavu lala a tarava. E talanoataka toka me vaka nona talanoataka e dua na tamata e dua na tadra ca. Ni sa vakamacalataka na veiyabaki vakamaumautaki oya, keirau veivosakitaka na nona lesu mai. E nanuma o koya ni na dredre, ni na vakamadua, ia a vakadonuya me tovolea.

Au a [taura] e dua na nona ivola ena dua na gauna lekaleka sa oti. Kaya mai o koya, “Au sa lesu mai. Au sa lesu mai, ka sa dua na ka na kena vakasakiti noqu sa mai tu tale e vale.”

Ia vei kemuni na noqu itokani, me vakataki koya, o ni sa vinakata tu mo ni lesu mai ia via dredre toka nomuni cavuta na imatai ni kalawa, tovolea mada. Laiva me keimami sotavi iko ena vanua o tu kina oqo, ka taura na ligamu ka vukei iko. Au yalataka vei iko ni na logavinaka na lesu tale mai ki vale.²²

Vakatutu ni Vuli kei na Veivakavulici

Taro

Na cava na vuna “me vakanamata toka ga kina vua na dua … na noda kauwai,” ena dua sara mada ga na lotu ni vuravura raraba? (Raica na iwasewase e 1.) Na gauna cava beka o sa vakalougatataki kina mai vua e dua a taleitaki iko? Na cava eso na sala e rawa ni da yadrava me da raici ira tiko na tamata yadua?
Na cava e rawa ni da vulica ka vakayagataka mai na ivola a wasea o Peresitedi Hinckley ena wasewase e 2? Vakasamataka vakatitobu na ka e rawa ni o cakava mo vaqaqacotaki ira kina era cakacaka tiko vagumatua me ra tara cake nodra vakabauta.
Na cava na vuna era gadreva kina na saumaki mai na veitokani, e dua na itavi, kei na veivakani ena vosa ni Kalou. (Raica na iwasewase e 3.) Na cava eso na sala eda rawa ni vakaitokanitaki ira kina na saumaki vou mai? E rawa vakacava ni da tokoni ira na saumaki vou mai ena nodra itavi ena Lotu? E rawa vakacava ni da vukei ira na saumaki vou mai me ra “vakavulici ena ivakavuvuli ni Kalou”?
Na cava na vuna e dau dredre kina ena so na gauna vei ira na lewenilotu me ra lesu tale mai ki Lotu (Raica na iwasewase e 4.) Eda na vukei ira vakacava na tamata me ra lesu mai? Na gauna cava beka o sa sotava se vakadinadinataka kina na reki e salavata mai kei na lesu tale mai ki Lotu?
Na cava e rawa ni da vulica mai na italanoa e wasea o Peresitedi Hinckley ena wasewase e 5? Vakasamataka na ivakarau e rawa ni o tatara yani kina mo vukea e dua ka luluqa tu ena Lotu me “lesu tale mai ki vale.”

iVolanikalou Veisemati

Luke 15; Joni 10:1–16, 26–28; 13:34–35; Mosaia 18:8–10; Ilamani 6:3; 3 Nifai 18:32; Moronai 6:4–6; V&V 38:24

Veivuke ena Vuli

“E lewe levu era sa kunea ni gauna vinaka duadua ni vuli ena mataka lailai ni ra sa yadra mai na moce. … E so tale era tukuna ni gauna vinaka ni sa vagagalu na loma ni vale ni sa mai cava na qaravi itavi ni dua na siga. … Na ka e bibi me sa vakadeitaki me dua na kena gauna ni vuli me sa vakatikitikitaki me kena gauna tudei ni vuli” (Howard W. Hunter, “Reading the Scriptures,” Ensign, Nove. 1979, 64).