Wase 17

Tomana Tiko na iWalewale Cecere ni Vuli

“Sa dodonu me toso tikoga noda tubu. Sa dodonu me da vuli tikoga. Sa ivakaro vakalou me da vakuria tikoga noda kila ka.”

Na Bula nei Gordon B. Hinckley

“Au dau taleitaka na vuli,” e kaya o Peresitedi Gordon B. Hinckley. “Au dau marautaka vakalevu na madigi meu rawata eso na kila ka. E dina taucoko, au vakabauta kau dau tokona sara vakaukauwa, ena noqu bula taucoko, na sasaga vakavuli—me baleti au kei ira na tani. … Mai na noqu rai, na vuli e ka ni cakacaka ka vakayalo talega.”¹

O ira na itokani dauveiqaravi nei Peresitedi Hinckley ena veiliutaki ni Lotu era dau qoroqoro ena nona isolisoli ni rawata na kilaka qai vakayagataka ena nona cakacaka. E dikeva o Elder Robert D. Hales ena Kuoramu ni iApositolo Le Tinikarua: “Au se bera vakadua ni sotava e dua na tamata e rawa ni yaco me levu sara na ka e kila mai na wilivola kei na nona veitaratara kei ira na tamata. Ni laki vakayakavi ena dua na bogi vata kei na dua, sa na rawata e dua na ka mai na veika e kenadau kina na tamata oya ena gauna e biubiu kina. A kaya talega o Elder Neal A. Maxwell (1926-2004) ena Kuoramu ni iApositolo Le Tinikarua: Na ka e duatani kina o Peresitedi Hinckley sai koya ni dau nanuma na veika sa wilika ka maroroya na ka e vinakata me maroroya. Na nona kilaka e rawa mai na vuqa sara na ivurevure. E rawa ni dreta mai na veika e kila tu me vakatauca kina na lewa matau.”²

Ena nona sasaga ni bula taucoko me vuli ka vakavinakataki koya cake, a muria o Peresitedi Hinckley na nodrau ivakaraitaki na nona itubutubu. A tukuna na italanoa oqo ni nona yalodina ena vuli nei tamana, o Bryant S. Hinckley:

“Ena gauna sa viavia tautauvata kei na noqu yabaki oqo o tamaqu, sa vakacegu sara vakavinaka. Ia e bulabula tu. A vakaitikotiko ena dua na vale rawarawa ga ia e logaloga vinaka ena taudaku ni koro levu. E tu wavoliti koya e dua na loga ni apolo ka dau taleitaka me veisoliyaka na vuana. Na lomanibai ni nona vale e okati kina e dua na katuva eso na kau lalai kei na vunikau. E dua na bai vatu rauta ni rua na fiti na kena cecere e wasea e dua na itagede mai na dua tale. Ni dau draki vinaka ena dabe toka ena bai, dua na isala makawa e uluna me vakaruruga na matana mai na matanisiga ni vulaikatakata. Ni keitou laki sikovi koya, au na dabe e yasana. Ni oti e dua na veivakauqeti lailai ena qai talanoataka na nona bula. …

“O koya e dua na qasenivuli. A daubisinisi qaqa. A liutaka na iteki levu duadua ena Lotu ka sivia na 15,000 na lewena. A veiqaravi vakaperesitedi ni kaulotu kei na vuqa tale na itutu. Ia oqo sa vakacegu, ka dabe toka ena bai. E dua o koya na dauwilivola ka dua nona valenivola vakasakiti. E vakasakiti ni dau vosa ka dauvolavola. Ni sa voleka sara yani ki na gauna ni nona mate, ni vo vakalailai me yacova na yabaki 94, a wiliwili ka volavola ka vakasamataka vakabibi na kilaka sa yaco mai vua.

“Au qai kila rawa ni gauna e dau dabe kina ena bai, vica na auwa ena dua na gauna ena siga katakata, ena dau vakasamataka lesu na veika sa wilika mai na nona valenivola.

“Au vakabauta ni a totoka ka vakasakiti na nona sa qase cake mai. E tu vua na nona ivola kei na iyautalei era lewena tu na vakanananu ni veituraga kei na marama cecere ni veitabayabaki kece ni gauna. A sega ni mudu na nona vuli, ni dau dabe toka ena bai e dau vakasamataka vakatitobu na veika sa wilika ena bogi. …

“… Na cava beka meu tukuna tiko kina vei kemuni e dua na qase kei na bai e dau dabe tiko kina? Au tukuna tiko baleta ni dua na lesoni me baleti keda yadua e tiko kina. Me kakua sara ni mudu na noda vuli. Eda vakabauta na toso tiko ki na tawamudu vakakina ni bula oqo e tiki ni tawamudu me da vuavuai vinaka ena noda mai bula kina me yacova na ivakataotioti.”³

“Dou gumatua sara mo dou kila ka, io ena vuli kei na vakabauta” (V&V 88:118).

iVakavuvuli nei Gordon B. Hinckley,

E vinakata na Turaga me da vakavulici keda me rawa kina ni da tubu ka cau ki na kawatamata.

O lewena e dua na lotu ka vakavuvulitaka na bibi ni vuli. E dua na ivakaro mai vua na Turaga mo vakavulica na nomu vakasama kei na yalomu kei na ligamu. Sa kaya na Turaga, “ia mo dou gumatua sara ena veivakavulici … Ia mo dou vulica na veika mai lomalagi, kei vuravura kei na rukui vuravura; io na veika sa yaco oti, na veika sa tu oqo kei na veika ena qai muri mai; io na veika sa yaco tiko eke kei na veika ena veivanua tani; na nodra veivaluvaluti ka kidroa na veimatanitu, kei na veika rarawa sa yaco tiko ena vanua oqo; io mo dou kila talega na veivanua kei na veimatanitu—ia mo dou vakarautaki kemudou ena veika kecega” (V&V 88:78–80).⁴

O keda ena Lotu oqo sa soli vei keda e dua na yalayala vakasakiti mai vua na Turaga. E kaya kina o Koya: Na veika sa vu mai vua na Kalou e veivakararamataki; kei koya sa ciqoma na rarama, ka tudei tiko ga vua na Kalou, ena vakararamataki vakalevu; io ena tubu cake tiko ga na nona rarama me yacova na siga uasivi ko ya” (V&V 50:24).

E dua na iyatuvosa vakasakiti oya. Oqo e dua na noqu tiki ni volanikalou taleitaki. E tukuna na tubu, na vakatorocaketaki, kei na tayabe ka na kauti keda ki na bulavakalou. Erau veitauriliga kei na itukutuku cecere oqo: “Raica sa lagilagi ni Kalou na vuku, io sai koya na rarama kei na vu ni dina” (V&V 93:36); “Ia kevaka e dua na tamata sa levu na ka e vulica ka kila ena nona gugumatua ka talairawarawa, ena yaga vakalevu cake sara vua ena bula sa bera mai” (V&V 130:19). …

Sa dua na bolebole levu e kunei ena malanivosa vakasakiti oqo. Sa dodonu me toso tikoga noda tubu. Sa dodonu me da vuli tikoga. Sa ivakaro vakalou me da vakuria tikoga noda kila ka. …

… Sa kaya na Turaga vei iko kei au: “Dou gumatua sara mo dou veivakavulici vakai kemudou ena veika mo dou yalomatua kina; dou gumatua sara mo dou kila ka, io ena vuli kei na vakabauta. … Dou cokonaki kemudou. … Dou kakua ni dau vakawelewele” (V&V 88:118–119, 124).⁵

E vinakata na Turaga mo vakavulica nomu vakasama kei na ligamu, se cava ga na nomu cakacaka. Se ena ripeataki kato ni wai liliwa, se dauveisele vinaka, ka mo dau vuli tikoga. Vakasaqara na vuli vinaka duadua e tu. Yaco mo tamata cakacaka dokai ena vuravura e tu e matamu. … O na kauta mai na dokai ki na Lotu o na vakalougatataki vakalevu ena vuku ni vuli oqori.

E sega ni rawa vakadua ni vakabekataki, se cava ga, ni na saumi iko na vuli. Kakua ni vakawalena na kaukauwa e tu mo rawata kina na veika e dodonu mo rawata. Kevaka e vakakina, o na sauma vakavica vata.⁶

E sega ni rauta mo bula walega, mo bula tikoga mai na dua na siga ki na dua tale. Sa dodonu vei keda yadua me da vakarautaki keda me da cakava e dua na ka yaga ena noda bula—me da rawata vakalevu cake na rarama, me rawa ni vakararamataka kina e dua na vuravura butobuto na noda dui rarama. E rawa oqo mai na vuli, mai na noda vakavulici keda, mai na noda tosoi keda kei na noda vakatuburi keda ena vakasama kei na yalo.⁷

“Tekivu vakamataka ena nomu vakamatautaki ira na gone ki na ivola.”

Ni davo na ituvatuva ka vakaivakarau na bula, e rawa ni ra tara cake na itubutubu e dua na draki ni vuli ena nodra vuvale.

Sa dua na ka taleitaki ka vakasakiti sara me da sarava na vakasama gone ni vakadreti ka vaqaqacotaki. O au e dua au dau taleitaka na kena levu tu na parokaramu ni retioyaloyalo vivinaka. O au talega e dua ka dau saqata na vakaoti gauna levu kei na madigi ena nodra dau biu tu na gone ena veivale me ra sarava tu ena vica vata na auwa na veika e sega ni veivakararamataki se veivaqaqacotaki.

Niu se gonetagane keitou a vakaitikotiko ena dua na vale levu makawa. E dua na rumu e vakatokai me valenivola. E tu kina e dua na teveli wakakau kei na dua na cina vinaka, tolu se va na idabedabe dakoba kei na cina vinaka, kei na ivola ena kisi era tuvai tu e lalaga. E vuqa na ivola—erau vakasokumuna tu o tamaqu kei tinaqu ena loma ni vicavata na yabaki.

Keitou a sega vakadua ni vakasaurarataki me keitou wilika, ia era dau tu ga ena vanua era rawa ni kunei ka rawarawa ni keitou taura mai ena gauna keitou vinakata kina.

E tu na vakadigagalu ena rumu oya. E kilai ni vanua ni vuli.

Era tu talega kina na mekasini—na mekasini ni Lotu kei na rua se tolu tale na mekasini vivinaka. Era tu kina na ivola ni itukutuku makawa kei na italanoa, ivola ni lesoni ni cakacaka, na ivolavosa, e dua na enisaikolopidia, kei na dua na mape ni vuravura. Io, se bera na retioyaloyalo ena gauna oya. Qai yaco mai na retio niu sa tubu cake tiko. Ia e tu e dua na draki, e dua na draki ni vuli. Au sega ni vinakata mo ni nanuma ni o keitou na tamata vulivinaka. Ia dau vakarautaki vei keitou na ivola cecere, na vakanananu cecere mai vei ira na dauvakasama cecere, kei na nodra ivosavosa na turaga kei na marama era dau vakasama vakatitobu ka totoka ena volavola.

Ena vuqa na noda veivale nikua e sega ni rawa kina na valenivola vakaoqo. E vuqa na matavuvale sa curuoso sara ga. Ia kevaka e tuvai vakamatau e rawa ni dua na tutu, e rawa ni dua na vanua e yaco me ivunivuni mai na rorogo e vakavolivoliti keda ka rawa ni dua e dabe, wilivola, ka vakasama. E vakasakiti me toka e dua na desi se teveli, me rawarawa wale ga, ka tu kina na ivolayavu ni Lotu, vica na ivola vinaka, na mekasini dau solia na Lotu, kei na veika tale eso e yaga me da wilika.

Tekivu vakamataka ena nomu vakamatautaki ira na gone ki na ivola. Na tina e sega ni dau wilivola vei ira na luvena lalai sa veivakamavoataki vei ira na luvena ka veivakamavoataki tale ga vua. E taura na gauna, io, e levu sara. E taura na bula vakaivakarau yadua. E taura me cokonaki ka vakayagataki vakamatau na veiminiti kei na veiauwa ni dua na siga. Ia ena sega vakadua ni dragali ena nomu raica na vakasama gone ni sa yaco me ra kila na matanivola, ivakamacala, kei na vakasama. E rawa ni tarai e dua na yalo ni taleitaka na wilivola vinaka, ena yaga sara vakalevu ena cicibalavu mai na vuqa tale na itavi era dau vakayagataka kina nodra gauna na gone. …

Kemuni na itubutubu, … me ra vakamatautaki na luvemuni ki na veivakasama kei na vakanananu cecere, na dina tawamudu, kei na veika ena tara cake ka veivakauqeti ki na vinaka. … Tovolea mo bulia ena loma ni nomu vale e dua na draki ni vuli kei na tubu ka na yaco mai kina.⁸

Na vuli ena dolava na katuba ni madigi vei ira na itabagone kei na itabagone qase cake.

Oqo na veisiga cecere ni madigi vei kemuni na tamata gone, na gauna vakasakiti me da tu e vuravura. O ni sa tu ena dela ni veitabayabaki kece sa oti. Sa tu mo ni vulica na nodra ivakavuvuli na tamata kece sara era sa bula oti e vuravura, na ivakavuvuli oqori sa wasewasei ki na veitabana ni vuli ka na rawa ni o ni rawata mai kina na kilaka ena dua na gauna lekaleka, na veika a dredre me ra vulica ena veisenijiuri sa oti. Kakua ni beci iko. Kakua ni vakawalena na nomu madigi cecere. Lakova, cakacakataka, vuli vagumatua.⁹

Sa rui bibi sara kina vei kemuni na cauravou kei kemuni na goneyalewa mo ni rawata na vuli kece sara o ni rawa ni rawata. … Na vuli sai koya na idola ena dolava na katuba ni madigi vei iko. E ganita me da solibula kina. E ganita me da cakacakataka, kevaka o ni vakavulica na nomuni vakasama kei na ligamuni, ena rawa ni dua na nomu cau levu ki na kawatamata o wili kina, o na boroya kina e dua na iyaloyalo dokai ni Lotu o lewena. Kemuni na taciqu kei na ganequ gone, ni vakayagataka vinaka na madigi kece sara vakavuli o ni rawa ni rawata, kei kemuni na tama kei na tina, vakauqeti ira na luvemuni tagane kei na yalewa me ra rawata e dua na vuli ka na vakalougatataka na nodra bula.¹⁰

E sega beka ni tu vei iko na ilavo kece sara o gadreva mo rawata kina na vuli kece sara o na gadreva. Vakayagataka nomu ilavo me yacova na vanua e rawa ni kauti iko kina, ka qai vakayagataka na sikolasivi, na isolisoli, kei na dinau e rawa ni o sauma lesu.¹¹

Au sega ni kauwaitaka na cava o na vinakata mo cakava ia me ka dokai. Mekeniki ni motoka, dau tuva buloko, matai ni wai, daunilivaliva, vuniwai, loya, dauveivoli, me kua ga ni daubutako. Se cava ga o iko, taura na madigi mo vulica ka vakayagataka sara vakavinaka na madigi oqori. Ena saumi iko na tamata me vaka na ka o rawata me vaka ni ganita na isau oya. Oqo na siga cecere ni vakavakarau vei kemuni yadua. Kevaka e kena ibalebale na solibula, io solibula. Na solibula oqori ena yaco me vakatubuilavo vinaka duadua o se qai bau cakava, ni ko na dau rawata mai na kena suka ena veisiga kece ni nomu bula.¹²

Au vakauqeti kemuni yadua na goneyalewa mo ni vuli ena kena levu duadua o ni rawa ni rawata. O ni na gadreva me baleta na vuravura o ni sa vakarau toso yani kina. Sa toso cake tikoga na veisisivi ena bula oqo. … Sa veisau na vuravura, ka sa rui bibi sara me da vakaiyaragitaki keda me da toso vata kei na veisau oya. Ia e dua na yasana ramase cake na veika kece oqo. E sega tale ni dua na itabatamata ena itukutuku makawa taucoko sa bau solia vei ira na marama e levu na madigi. Na imatai ni nomuni sasaga e dodonu me dua na bula vakawati mamarau, vauci ena valetabu ni Turaga, ka muria na kena susugi cake e dua na matavuvale. Na vuli e rawa ni vakaiyaragitaki iko vakavinaka ena kena rawati na veika talei oqori.¹³

E vakaitamera na nodra itavi na marama ena Lotu vakakina ena itikotiko ka salavata ka duavata vakavinaka sara kei na vakamau, bula vakatina, kei na nodra susugi cake na gone vinaka ka kaukauwa.¹⁴

Na sasaga kece sara vakatamata sa tadola tu ena gauna oqo vei ira na marama. E sega ni dua na ka o na sega ni rawa ni cakava kevaka o biuta kina na nomu vakasama. E rawa ni o okata ena nomu tatadra na marama o vinakata mo kena ivakatayaloyalo vakadonui me veiqaravi ki na kawatamata ka cau vakalevu ki na vuravura ena lewena.¹⁵

Au vakavinavinaka ni sa soli vei ira na marama nikua na madigi vata e nodra na [turaga] me vulica na vakadidike, me baleta na cakacaka, kei na veitiki kece tale ni kilaka vakatamata. Tu talega na nomuni galala me baleta na Yalo i Karisito, ka na vakararamataka na tagane kei na yalewa kecega era lako mai ki vuravura. (Raica na V&V 84:46.) Vakaliuca na vakamau kei na matavuvale, ia segata talega na parokaramu ni vuli ka na rawa kina na cakacaka veivakacegui ka vuavuai vinaka de na mani sega ni o vakamau, se me da vakadeitaki kina ka vakataucokotaki kevaka eda sa vakamau.¹⁶

O kemuni [na cauravou] e levu na nomuni bolebole era tu mai liu. O ni sa torova tiko yani e dua na vuravura ni veisisivi kaukauwa. Mo na taura taucoko na vulika o rawa ni rawata. Sa vakaroti keda na Turaga me baleta na bibi ni vuli. Ena vakadonui iko ki na veimadigi cecere cake. Ena vakaiyaragitaki iko mo cakava e dua na ka yaga ena vuravura cecere ni madigi e tu e matada. Kevaka e rawa ni o lako ki na koliji ka sai koya qori na nomu gagadre, lako sara. Kevaka e sega ni nomu gagadre mo lako ki na koliji, ia lako ki na dua na koronivuli ni vuli cakacaka se bisinisi me vakavinakataki cake kina na nomu maqosa ka vakalevutaki cake nomu kila.¹⁷

Au nuitaka ni ko ni na raica na [itabatamata gone] na nomuni madigi vakavuli me veivakalougatataki cecere. Au kila ni na balavu. Au kila ni na dredre. Au kila ni ko ni na yalolailai ena so na gauna. Au kila ni so na gauna o na taroga se cava o cakava tiko kina. Ia toso tikoga, kitaka tikoga, ka vuli tikoga. O na sega vakadua ni veivutunitaka ena nomu bula taucoko ia o na wilika me nomu veivakalougatataki.¹⁸

Na vakavulici ni yalo e tautauvata na kena bibi, kevaka e sega beka ni levu cake, mai na vakavulici ni vakasama.

Au dau qoroya na veikilaka cecere e dau vakaraitaki ena noda gauna. Se bera vakadua ni dua na gauna me ra vuli kina e lewelevu ena vuli ni vuravura. Sa dua na kaukauwa—nodra vuli vakalevu e dua na iwase levu ni itabagone e vuravura, ka ra dau sota e veisiga e yavadra na qasenivuli me rawati na kilaka mai na itabayabaki taucoko vakatamata.

Na rabailevu ni kilaka oqori e vakaiyanaqa. E yacova na veikalokalo ni maliwalala, na veika e rukui vuravura, na itukutuku ni veimatanitu, na itovo kei na ivosavosa ni tamata, na cicivaki ni matanitu, na lawa ni veivoli, na itovo ni atomi, na cakacaka ni yago, kei na vakasakiti ni vakasama.

Ena levu ni kilaka sa tu, ena nanuma beka e dua ni sa volekata yani na vuravura na kena ituvaki uasivi sara. Ia sa dau vagolei na noda vakasama ki na yasa kadua ni ilavokaukamea—ena tauvimate ni kawatamata, ena veiqati kei na leqaleqa ka dau kauta mai na yaluma ki na nodra bula na milioni vakamilioni.

Ena veisiga yadua sa dau vakabasikati vakalevu cake vei keda na dina ni bula e levu cake sara mai na vakadidike kei na fika, levu cake mai na itukutuku makawa kei na volavola. E gadrevi e dua tale na mataqali vuli, kevaka e sega ena rawa ni kauti keda ga ki na rusa na yaga ni vuli vakayago. Au tukuna tiko na vakavulici ni yalo, ni lewaeloma, ni itovonibula, ni yaloda—na veitikida sega ni vakamacalataki rawa ka vakadeitaka vakavinaka se na cava o keda kei na veika eda dau cakava ena keda isema vakaveiwekani.

… Niu veiqaravi voli vakadaukaulotu mai Igiladi, au a lako ki na London Central YMCA. Au vakabauta ni sa yali makawa sara na vale makawa oya, ia au sega ni rawa ni guilecava na vosa era dau raica na vulagi ena veigauna yadua era curu yani kina. Na vosa nei Solomoni: “Ia na ka kece ko sa rawata mo rawata vata kei na yalomatua.” (Na Vakaibalebale. 4:7.)

Yalomatua ni cava? Yalomatua me baleti keda, na inaki ni bula, na noda veiwekani kei na Kalou, o Koya na Tamada, na ivakavuvuli cecere soli vakalou sa dau vakarautaka ena veisenijiuri na igu dina ni toso ni tamata! …

Ni da saga tiko na noda vuli vakayago, me da vakuria talega ki na noda bula na vakabulabulataki ni Yalo. Kevaka eda vakayacora vakakina, ena vakalougatataki keda na Kalou ena vakacegu oya ka na lako duadua ga mai Vua.¹⁹

“Ena noda vuli taucoko sara, eda na gadreva me da saga me da kila na iVakavuvuli.”

A kaya o Jisu: “Vuli vei au. “Ni sa rawarawa na noqui vua, ka mamada na noqui colacola.” (Maci. 11:29–30.)

Au vinakata meu vakatura me da muria na ivakaro mai vua na Luve ni Kalou. Ena noda vuli taucoko, me da vulici koya talega. Ena noda vulika taucoko, eda na gadreva me da vakasaqara me da kila na iVakavuvuli. Na kilaka oqori ena vakasakiti na kena vakaikuritaka na noda vuli vakayago ka na solia vei keda na itovo kei na taucoko ni bula ka sega tale ni dua na sala ena yaco mai kina vei keda.²⁰

Au bolei kemuni mo ni kakua ni guilecava ni vakavulici ni yalo e tautauvata na kena bibi, kevaka e sega beka ni levu cake, mai na vakavulici ni vakasama.²¹

Sa toso tiko ki liu na noda parokaramu cecere ni vuli ena Lotu. Sa dau vakarabailevutaki tiko ena veigauna eso na nodra vakavulici na gonevuli ena parokaramu ni semineri kei na inisitute. … O kemuni o ni sa vakaitavi oti ena parokaramu oqo o ni kila na kena yaga vakaivua. Eda vakayaloqaqataki ira kece e rawa ni ra vakaitavi kina me ra vakayagataka. Keimami sega ni vakataratutu me keimami yalataka ni na vakalevutaki cake na nomuni kila na kosipeli, ena vaqaqacotaki na nomuni vakabauta, ka taracake na veitokani vakasakiti.²²

Me da taura na yaca ni Turaga ka lako yani ena vakabauta mo wasea vakavinaka na veika ena tara na nodra bula na kawatamata ka kauta mai na vakacegu kei na reki ki vuravura. E gadreva ko vuravura e dua na itabatamata ni tagane kei na yalewa vuli vinaka ka dauveivakayarayarataki vinaka e rawa ka ra na wavutu ena yalodina ka sega ni wereubiubi ena nodra tukuna ni bula tiko na Kalou ka ni Karisito o Jisu.²³

Veitalia ni da sa qase, eda se rawa ni rawata na kilaka, sokumuna na yalomatua, ka tubu tikoga.

Sa dua na ka vakasakiti na vuli, na iwalewale e vakalekalekataki ka tauvuloni kina na kilaka a soqoni voli mai ena veisenijiuri me rawa ni da vulica ena dua na gauna lekaleka na veika a vulici taumada ena veigauna ni vakadidike babalavu kei na vakatovotovo kei na cala.

Na vuli sai koya na iwalewale cecere ni veisau ka na yaga kina vakalevu na kilaka vakaivola kei na cakacaka vuavuai. Oqo e dua na ka me na kakua sara ni mudu. Se sa mani vakacava sara na keda qase, e rawa ni da rawata na kilaka ka vakayagataka. E rawa ni da sokumuna na yalomatua ka rawaka mai kina. E rawa ni da vakamarautaki mai na cakamana ni wilivola ka vakamatautaki ena cakacaka ni liga ka vakuria na veivakalougatataki kei na vakataucokotaki ni bula. Ena noqu sa qase cake tiko, au sa qai rekitaka tikoga vakalevu na nodra vosa na dauvolavola vuku, ena veigauna makawa kei na gauna oqo, kei na maleka ni veika era vola.²⁴

E sega ni dua vei keda … e sa rauta na ka e kila. Na iwalewale ni vuli e dua na iwalewale sega ni oti rawa. Sa dodonu me da wilivola, sa dodonu me da vakadikeva, sa dodonu me da kila vakavinaka, ka dodonu me da vakasamataka vakatitobu na veika eda vagoleya kina na noda vakasama. … Au vakabauta na noda vakavinakataki cake. Au vakabauta na tubu. …

Ni tubu tikoga, kemuni na taciqu kei na ganequ, se o ni sa tolusagavulu se o ni sa vitusagavulu. Na nomuni gumatuataka ena vakavuna me tasiri totolo cake na yabaki mai na ka o nanuma, ia era na vakasinaiti ena gagadre kamica ka vakasakiti ka na vakaisaluwakitaka na nomu bula ka mana na nomu veivakavulici.²⁵

E koto ena tokalau ni [Brigham Young University e Provo, Utah] e dua na ulunivanua. [E levu], au vakabauta, era sa raica cake na ulunivanua oya ka vakasamataka, “Kevaka e rawa niu kaba ki delana ena talei me da raica na bucabuca ena yasana kadua.” Ia vei kemuni na sa kabata oti o ni sa raica ni bucabuca e dua walega na qakilo vovodea, era sa veitaravi tale yani na veiulunivanua cecere me ra kabati.

Au nuitaka ni o ni na nanuma tiko. … O ni na vakadinadinataka ni [dina beka] ni a cecere na nomuni gauna ni vulika, e levu cake sara na madigi cecere kei na bolebole era tu mai liu. Vakuria na nomuni ivakasokumuni ni itukutuku, vakalevutaka nomu kilaka, tomana tiko na iwalewale cecere ni vuli.²⁶

Vakatutu ni Vuli kei na Veivakavulici

Taro

Na cava e bibi kina me da “rawata vakalevu cake na rarama” ena vuli? (Raica na iwasewase e 1.) E rawa ni vukei keda vakacava na vuli ena toso yadudua? E rawa ni vukei keda vakacava na vuli me da “vakararamataka e dua na vuravura butobuto”?
Railesuva na italanoa nei Peresitedi Hinckley ena nodrau tara na nona itubutubu e dua na draki ni vuli ena nodratou itikotiko (raica na iwasewase 2). Ena rawa vakacava ni da vukei ira na gone me ra taleitaka na vuli? E rawa ni da vukei ira vakacava na gone me ra segata na vuli mai na ivurevure e veivakararamataki ka veiuqeti ki na vinaka?
E rawa vakacava ki na vuli me dolava na katuba ni madigi vei ira na itabagone kei na itabagone qase cake? (Raica na iwasewase 3.) E rawa vakacava vei ira na itabagone kei na itabagone qase cake me ra kilaka vakalevu ena nodra vakayagataka vakavinaka na madigi eso ni vuli?
O na vakamacalataka beka vakacava na ibalebale ni malanivosa “na vakavulici ni yalo”? (Raica na iwasewase 4.) E rawa vakacava ni da vakavulica na lomada, itovonibula, kei na yalo? Ena nomu bula erau sa dau veivukei beka vakacava na nomu vuli vakayalo kei na vuli vakayago?
Na cava na vuna me da tomana tikoga kina na vuli ena noda bula taucoko? (Raica na iwasewase 5.) Eda na rawa beka vakacava ni taleitaka tikoga na vuli ena noda bula taucoko? Na cava beka o se qai vulica wale toka ga qo sa yaga vakalevu sara vei iko?

iVolanikalou Veisemati

iVola ni Vakaibalebale 1:5; 2 Pita 1:1–8; 2 Nifai 9:28–29; 28:29–30; V&V 6:7; 90:15; 131:6; 136:32–33

Veivuke ena Vuli

E dua na vakasama me vakayaloqaqataki kina na veivosakitaki ni ivakavuvuli nei Peresitedi Hinckley sai koya me da kerei ira na vakaitavi me ra wasea na veika era sa vulica mai na nodra vulica yadua na iwase (raica na tabana vi–vii ena ivola oqo me baleta na ikuri ni vakasama).