Wase 24

Na Veisorovaki i Jisu Karisito Rabailevu na Kena iYalayala, Vakatamata Yadua na Kena Yaga

“Au vakadinadinataka na Veisorovaki ni Turaga o Jisu Karisito. Kevaka a sega ena sega ni vakaibalebale na bula. Sai koya na vatuidola ni noda mai tu eke.”

Na Bula nei Gordon B. Hinckley

Ena 1 ni Janueri, 2000, a liutaki iratou na Mataveiliutaki Taumada kei na Kuoramu ni iApositolo Le Tinikarua o Peresitedi Gordon B Hinckley me tabaki na nodratou ivakadinadina cokovata baleta na iVakabula. Ena itukutuku oqo, ka vakatokai “Na Karisito Bula,” eratou tukuna kina: “Keitou tukuna na neitou ivakadinadina ena dina ni Nona bula sega ni vakatauvatani rawa ka tawayalani na savasava ni Nona isoro cecere ni veivakaduavatataki. E sega tale ni dua me cecere cake na nona veivakauqeti vei ira kece era sa mai bula kei ira era na qai mai bula e vuravura.”¹

Ena dua nona vosa ena koniferedi raraba ni oti e tolu na vula, a vakadinadinataka kina o Peresitedi Hinckley na veivakayarayarataki matata ni iVakabula ena nona bula. A malumu na itautau ni nona vosa ka tukuna na ka e baleti koya, ka so na gauna e curuoso na lomana ena luluvu:

“Ena veika kece au vakavinavinakataka ena mataka nikua, e dua e bibi duadua. Sai koya na ivakadinadina bula kei Jisu Karisito, na Luve ni Kalou Kaukauwa, na Ravouvou ni Sautu, o Koya sa Savasava sara. …

“O Jisu na noqu itokani. E sega tale ni dua me solia vakalevu cake vei au na ka. “Sa sega na nona loloma e dua na tamata me uasivi cake ena ka oqo, me solia na nona bula ena vukudra na wekana” (Joni 15:13). A solia na Nona bula ena vukuqu. E dolava na sala ki na bula tawamudu. Na Kalou ga e rawa ni cakava qo. Au nuitaka ni rawa niu kilikili meu Nona itokani.

“O Koya na noqu ivakaraitaki. Na Nona ivakarau ni bula, na nona itovo sega vakadua ni nanumi koya ga, na Nona dau tarai ira yani era vakaleqai tu, na Nona iotioti ni solibula era tu taucoko me ivakaraitaki vei au. Au sega ni rawa ni yacova sara yani vakavinaka, ia au rawa ni tovolea. …

“O Koya na noqu dauveivakabulai Au tu ka qoroya na Nona cakacaka mana uasivi. Ia au kila ni ra a yaco dina. Au ciqoma na dina ni veika oqo baleta niu kila ni sai Koya na Daulewa ni bula kei na mate. Na cakacaka mana ni Nona veiqaravi e vakaraitaka na yalololoma, na loloma, kei na vakasama vakatamata e vakasakiti ni da raica.

“O Koya na noqu iliuliu. E ka dokai niu bau dua ena kedra iyatuni balavu o ira era lomani Koya ka ra sa muri Koya voli mai ena rua na mileniumi sa mai sivi mai na gauna a sucu kina. …

“O Koya na noqu iVakabula ka noqu Dauveisereki. Ena nona solia Nona bula ena mosi kei na vakararawataki sega ni tukuni rawa, sa dolele sobu mai kina ka laveti au kei keda yadua kei ira kece na luvena tagane kei na yalewa na Kalou mai na qakilo ni butobuto tawamudu ni oti na mate. Sa vakarautaka o Koya e dua na ka vinaka cake--e dua na imulo rarama kei na kilaka, na tubu kei na totoka me da toso kina ki liu ena sala sa basika ki na bula tawamudu. E sega ni yalani na noqu vakavinavinaka. E sega ni mudu na noqu vakavinavinaka vua na noqu Turaga.

“O Koya na noqu Kalou ka noqu Tui. Ni sa sega ni tubu ka sega ni mudu, ena dabe ka veiliutaki me nodra Tui na Tui ka nodra Turaga na Turaga. Na Nona lewa ena sega na kena icavacava. Na Nona lagilagi ena sega kina na bogi.

“E sega tale e rawa ni sosomitaki Koya. E sega tale ni dua ena rawa. Sega ni dua na kena ca ka sega ni dua nona cala, sai Koya na Lami ni Kalou, vei Koya au cuva kina ena vukuna au na tacake vei Tamaqu mai Lomalagi. …

“Ena vakavinavinaka, kei na loloma e sega ni oti rawa, au vakadinadinataka na veika oqo ena Yacana Tabu.”²

“Na veika kece sa vakatau Vua--na Nona isoro ni veivakaduavatataki. … Oqori na vatuidola ena vucu ni ituvatuva cecere [ni] Tamana.”

iVakavuvuli nei Gordon B. Hinckley,

E vakaraitaki na loloma nei Tamada Vakalomalagi ena isolisoli ni Luvena e Duabau Ga.

E vakamalumalumutaki na yaloqu niu vakasamataka na cecere ni nona loloma na Tamaqu Vakalomalagi. Au sa vakavinavinaka kina vakalevu ni lomani keda na Kalou. Na titobu sega ni tukuni rawa ni loloma oya e vakavotukanataki ena isolisoli ni nona lako mai ki vuravura na Luvena e Duabau Ga me kauta mai na inuinui ki yaloda, me kauta mai na yalovinaka kei na veikauwaitaki vei keda, ka kena ilutua me vakabulai keda mai na noda ivalavala ca ka tuberi keda ena salatu sa basika ki na bula tawamudu.³

Na veiqaravi ni iVakabula ena bula taumada

Na Tamada kecega, ena nona lomani keda, na Luvena, sa solia kina e dua na …ituvatuva ena soli kina vei keda na galala me da digitaka na sala me da muria ena noda bula. Na Nona Ulumatua Tagane, na Tuakada, sai koya na idola ni ituvatuva oya. Ena soli vua na tamata na galala ni digidigi, ia ena sala vata kei na galala ni digidigi oqori na tukunika. Ena lakova na tamata na sala vakavuravura ka ivalavala ca ka tarabe. Ia na Luve ni Kalou ena mai vakayago ka sorovaki Koya me vosoti kina na ivalavala ca ni tamata kecega. Ena veivakararawataki sega ni tukuni rawa ena yaco ko Koya me Dauveisereki cecere, na iVakabula ni kawatamata.⁴

Na veiqaravi ni iVakabula e vuravura

Ena itukutuku makawa taucoko e sega ni dua na vakaturaga me vaka na Nona vakaturaga. O Koya, na Jiova qaqa, a lako sobu mai me mai sucu ena bula oqo ena dua na valenimanumanu mai Peceliema. A tubu cake me dua na gonetagane mai Nasareci ka : “tubu cake … ena vuku kei na yagona talega, a sa vinakati koya vakalevu cake tikoga na Kalou kei ira talega na tamata” (Luke 2:52).

A papitaisotaki mai vei Joni ena wai ko Joritani, “ka raica sa qai wase rua vua na lomalagi, a sa raica ko koya na Yalo ni Kalou ni sa lako sobu mai me vaka na ruve, ka sa mai ro toka vua:

“Ka raica sa dua na domo mai lomalagi, sa kaya, “O koya oqo na noqu Gone ni toko, au sa dau vinakata vakalevu.” (Maci. 3:16–17).

Ena tolu na yabaki ni Nona veiqaravi e vuravura, a cakava na ka e se bera vakadua ni dua me sa bau cakava; a veivakavulici o Koya me vaka e se bera ni bau cakava vakadua e dua.

Sa qai yaco mai na gauna me soli yani. A yaco tiko na vakayakavi ena Rumu e Cake, na kena iotioti vua ena bula oqo vata kei iratou na Tinikarua. Ni vuya na yavadratou ko Koya, a vakavulica e dua na lesoni ena yalomalumalumu kei na veiqaravi era na sega vakadua ni guilecava.⁵

Vakararawataki ena Were o Kecisemani

Qai tarava mai na vakararawataki mai Kecisemani, ka kaya kina, “Raica koi au na Kalou sa kaukauwa sara, au sa sautaninini ena mosi ni veivakararawataki ko ya; au a bunotaka na dra ka sa yaluma sara kina na yagoqu kei na yaloqu.”(V&V 19:18).⁶

Ena Were mai Kecisemani, a vakararawataki kina vakalevu sara ka bunotaka kina na dra ni vakatakekere vei Tamana. Ia oqo kece e tiki ni Nona isoro cecere ni veivakaduavatataki.⁷

[Au a dabe ena dua na gauna] ena ruku ni dua na vuniolive makawa [ena Were ko Kecisemani] ka wilika na nona veiqalisominiwai rerevaki oya na Luve ni Kalou ni sa vakarau me sotava na gauna sega ni daro sa voleka mai, bunotaka na dra ka masuta na Tamana ke rawa ni kau tani vua na bilo oya—ia qai kaya ga, me yaco ga me vaka na lomamuni, me kua na lomaqu. … Au vakila e dua na yalo vakadrukai ni sega ni vakatakekere tiko, ni sega ni sotava tiko na gauna dredre oya me vaka na mosi vakayago sa vakarau me sotava, na veivakamatei rerevaki ka vakadomobula ena kauveilatai. Oya e dua na tikina, au kila. Ia ena dua na kena ivakarau levu, au vakabauta, ni nona nanuma na Nona itavi ena Nona ilesilesi ena vuku ni nodra tiko vinaka tawamudu o ira kece na luvena tagane kei na yalewa na Kalou, ena veitabagauna kece.

Na veika kece sa vakatau Vua--na Nona isoro ni veivakaduavatataki. Oqori na idola. Sai koya oqori na vatuidola ena vucu ni ituvatuva cecere sa vakarautaka na Tamada me baleta nodra bula tawamudu na Luvena tagane kei na yalewa. E vakarerevaki me sotavi, ka tarabi me da kila, a sotava o Koya, a vakaotia o Koya, ka sa dua na ka talei ka vakasakiti. Au vakabauta ni sivia na veika eda rawa ni vakasamataka. Ia, eda na kila vakalailai ka dodonu me da vulica me da vakavinavinakataka vakalevu cake tikoga.⁸

Vesu, vakoti ena kauveilatai, ka mate

A tauri Koya na liga kaukauwa ka voravora, ia ena bogi, ni cala tu vakalawa, a kau mai vei Anasa, oti qai kau vei Kaiafa, na nodra vakailesilesi qaseqase lawakica na Sanedrini. E kea ena mataka caca ka tarava erau se baci kau tale yani ena ikarua ni gauna vua na tamata ivadica, ivalavala rerevaki oya. Oti sa qai kau yani vei Pailato, na kovana mai Roma, o koya ka a vakasalataki koya na watina, “Me kakua e dua na ka mo cakava vua na tamata dodonu ko ya” (Maci. 27:19). Ni via levea na kai Roma oya na itavi, a talai Koya yani vei Eroti na kovana tawadodonu, ivalavala vakasisila, ka daucakaca ni Kaleli. A vakalolomataki ka vakanakuitataki na Karisito. A vakaisalataki na uluna ena wavakavotona gagata ka tali; ka ubi na dakuna mavoa ena dua na icurucurubalavu lokaloka ni veivakalialiai. Se baci kau tale vei Pailato, ka ra kailavaka tiko vua na dauvakacaca, “Vakota ki na kauveilatai, Vakota ki na kauveilatai” (Luke 23:21).

Ena ikalawa tataivatia a taubale yani ki Kolikoca ko koya, ka laki vakoti kina ki na kauveilatai na yagona vakamavoataki ena ivalavala sega ni vakatamata ka mosi duadua ni veivakamatei beka vakatamata e rawa ni vakasamataka e dua e tu vinaka nona vakasama.

Ia e qai kailavaka ga, “I Tamaqu, kakua ni cudruvi ira ni ra sa sega ni kila na ka era sa kitaka” (Luke 23:34).⁹

E sega beka na iyaloyalo rarawataki ena itukutuku makawa me vaka na Jisu e Kecisemani kei na kauveilatai walega: na Dauveisereki ni kawatamata, na iVakabula kei vuravura, nona vakayacora na Veisorovaki.

Au nanuma na neirau a tiko kei Peresitedi Harold B. Lee … ena were mai Kecisemani e Jerusalemi. Keirau vakila, ke vakalailai walega, na veiqalisominiwai vakarerevaki a vakayacori e kea, e dua na veiqalisominiwai kaukauwa, ni veiqaliqali duadua o Jisu ena yalo, ka turu mai kina ena qara kecega ni yagona na dra (raica Luke 22:44; V&V 19:18). Keirau nanuma lesu na nona soli yani mai vua e dua sa kacivi ki na dua na itutu ni veivakabauti. Keirau nanuma lesu nodra taura na Luve ni Kalou ena liga ni veivakararawataki na tamata ca. Keirau nanuma lesu na tamata galili oya ena kauveilatai, ka kailavaka ena yaluma, “Noqu Kalou, noqu Kalou, ko sa biuti au ena vuku ni cava?” (Maci. 27:46). Ia, ena yaloqaqa, a toso ki liu na iVakabula ni vuravura me vakayacora na Veisorovaki ena vukuda.¹⁰

E sivi na veiauwa ni ologi koto na Nona bula ena mosi. A sakure na vuravura, kasei na ilati ni valenisoro. E lako mai na tebenigusuna mamaca na vosa, “I Tamaqu, au sa solia na yaloqu ki na ligamuni: ia ni sa vosa oti vakakoya, sa qai ciba” (Luke 23:46).

Sa oti. Sa oti nona bula vakayago oqo. Sa solia ko Koya me keda ivoli na tamata kecega. Sa yali na nodra inuinui o ira era lomani Koya. Sa guilecavi na yalayala eso a vakayacora ko Koya. A kau yani vakatotolo ka laki biu vakamalua na yagona ena dua na ibulubulu kerei ena yakavi ni nodra Siga ni Vakacecegu na Jiu.¹¹

Tucaketale

Ena mataka caca ni Sigatabu, eratou sa lako yani ki na ibulubulu o Meri na Yalewa ni Makitala kei na yalewa tale kadua. Era vakataroga ni ra vakusakusa yani se na vaqiqici tani vakacava na vatu mai na katuba ni ibulubulu. Ni ra yaco yani, era raica e dua na agilosi ka vosa mai vei ira: “Ni kau sa kila drau sa vakasaqarai Jisu, ko koya ka lauvako ki na kauveilatai.

“Sa sega eke ko koya: sa tucake tale, me vaka na nona vosa” (Maci. 28:5–6).

E sega vakadua ni se bau yaco. Sa isaunitaro ni veitabayabaki na ibulubulu lala. A kaya beka o Paula: “Ko iko mate, sa evei na nomu bati gaga? Ko iko bulubulu, sa evei na nomu gumatua?” (1 Kori. 15:55).¹²

“Sa sega eke ko Koya: sa tucaketale, me vaka na nona vosa” (Maciu 28:6).

Ena nona isoro ni veivueti na iVakabula, ena tucake kina mai na bulubulu na tamata kecega.

Na cakamana ni imatai ni tucaketale oya … sa cakamana me baleta na kawatamata kece. Sai koya na cakamana ni kaukauwa ni Kalou, o koya ka solia na Luvena Daulomani na Nona bula me sorovaka na ivalavala ca ni tamata kecega, e dua na isoro ni loloma me baleta na luvena tagane kei na yalewa yadua na Kalou. Ni vakayacora vakakina sa sereka na ivau ni mate.¹³

E sega ni dua na ka raraba cake vakalevu me vaka na mate, ka sega ni dua na ka e serau cake na kena inuinui kei na vakabauta mai na veivakadeitaki ni tawamate rawa. Na yaluma bibi e dau salavata mai kei mate, na vakaloloku e muria mai nona sa takali e dua e daulomani e kena ivakamalumu ga na veivakadeitaki ni sa Tucaketale mai na Mate na Luve ni Kalou. …

Ena veigauna kece e tatara kina na ligana batabata o mate, ena serau mai na kabukabu kei na butobuto ni gauna oqori na bulaqaqa ni Turaga o Jisu Karisito, o Koya, na Luve ni Kalou, a vakamalumalumutaka na mate ena nona kaukauwa sega ni vakatauvatani rawa ka tawamudu. O Koya na Dauveisereki ni Vuravura. A solia na Nona bula ena vukuda yadua . A taura lesu tale sa yaco kina me kena imatai vei ira sa moce no. Me vaka ni nodra Tui na Tui, sa qaqa kina vei ira na tui tale eso. Sa tu iliu vei ira kecega na iliuliu o Koya, ni sai koya sa Kaukauwa Sara. Sai Koya ga na noda vakacegu, na noda vakacegu dina duadua ga, ni sa solegi keda mai na butobuto ni bogi vakavuravura ni sa biuta na yago na yalo.

E wavutu baleta na kawatamata o Jisu Karisito.¹⁴

Au nanuma na noqu a vosa ena nona lotu ni veibulu e dua na turaga vinaka, dua noqu itokani ka a vakavuna na noqu tosocake vakalailai na nona vinaka. Ena loma ni veiyabaki au sa kila tu na nona dau matadredredre, nona vosavosa vinaka, na nona vakasama vakasakiti, na rabailevu ni nona veiqaravi ena vukudra na tani. Oti qai mate yani vakasauri o koya a dau serau ka cakavinaka. Au raica yani na yagona sa sega kina na bula. Sa sega na veikilai se na yavavala sega ni dua na vosa. …

Au raici iratou yani na yada kei iratou na gone ni ra tagi voli. Eratou kila, me vaka noqu kila, ni sa sega tale vakadua ni ratou na rogoca na domona ena bula oqo. Ia e dua na kamikamica malumu, sega ni vakamacalataki rawa, e kauta mai na vakacegu kei na veivakadeitaki. E vaka me kaya mai, “Dou tiko lo, mo dou kila niu sa Kalou” (Same 46:10).

E vaka me kaya talega mai, Dou kua ni leqa. Na ka kece oqo e tiki ni noqu ituvatuva. E sega ni dua e rawa ni drotaka na mate. Na Luvequ Daulomani mada ga a mate ena kauveilatai. Ia ni a kitaka vakakina sa yaco ko Koya me imatai ni Tucaketale lagilagi. E taura ko Koya mai vei mate na nona batigaga kei na gumatua nei ibulubulu.”

Au rawa ni rogoca ena noqu vakasama ni vosa tiko na Turaga vei Marica: “Oi au na vu ni tucake tale, kei na vu ni bula, ko koya sa vakabauti au kevaka sa mate ena bula ga: Ia ko koya yadua sa bula ka vakabauti au, ena sega sara ni mate” (Joni 11:25–26).¹⁵

Ena nona isoro ni veivakaduavatataki na iVakabula, sa soli kina vei keda na madigi ni bula vakacerecerei kei na bula tawamudu.

Me vakavinavinakataki ga o Koya sa Cecere Sara. Sa sereka na ivau ni mate na Luvena vakalagilagi, na qaqa cecere duadua. … Sai Koya na noda Turaga qaqa. Sai Koya na noda Dauveisereki, ka a sorovaka na noda ivalavala ca. Ena Nona isoro ni veivueti ena tucake kina mai na bulubulu na tamata kecega. Sa dolava ko Koya na sala me da rawata kina sega walega na tawamate rawa ia na bula tawamudu talega.¹⁶

Au vakila ena dua na ivakarau na ibalebale ni Nona Veisorovaki. Au sega ni rawa ni kila kece sara. Sa rui rabailevu na kena iyalayala ka rui vakatamata yadua na kena yaga e sega kina ni rawa ni kilai taucoko sara.¹⁷

Na rabailevu ni Veisorovaki e sega ni tu vei keda na kena kaukauwa me da kila taucoko. Au kila walega ni a yaco, ka baleti au vata kei iko. E vakaitamera na rarawa, titobu na yaluma, e sega kina ni dua vei keda e rawa ni kila vakavinaka na nona soli Koya na iVakabula me isau ni ivalavala ca ni kawatamata.

Ena Vukuna eda sa rawata kina na veivosoti. Ena Vukuna sa yaco mai kina na yalayala tudei ni na soli ki na kawatamata kecega na veivakalougatataki ni veivakabulai, kei na tucaketale mai na mate. Ena Vukuna kei na Nona ilutua ni soro sa soli kina vei keda na madigi ena noda talairawarawa na bula vakacerecerei kei na bula tawamudu.¹⁸

Eda sega li ni tagane ka yalewa cidroi kecega ka gadreva me veivutuni ka votai ena loloma cecere veivosoti ni Tamada Vakalomalagi ka muria na Nona ivakaraitaki?

Sa dolele mai vei keda ena veivosoti kei na loloma cecere, na Luvena Daulomani, na noda Dauveivueti, ia ni kitaka vakakina sa vakarota me da veivutuni. … E kaya na Turaga—kau cavuvosa mai na dua na ivakatakila a soli vua na Parofita o Josefa:

“A ka oqo au sa vakarota kina mo dou veivutuni—mo veivutuni, deu na qai yaviti iko ena ititoko ni gusuqu, io, au na yaviti iko ena noqu cudru kei na noqu cudru waqawaqa, raica ko na rarawa vakalevu kina, ia ko na sega ni vosota rawa na kena bibi, na kena mosi kei na kena kaukauwa.

“Raica koi au na Kalou, au sa vosota oti na veika oqo, me ra bula kina ko ira era sa veivutuni;

“Ia kevaka era sa sega ni veivutuni era na vakararawataki me vakataki au;

“Raica koi au na Kalou sa kaukauwa sara, au sa sautaninini ena mosi ni veivakararawataki ko ya; au a bunotaka na dra ka sa yaluma sara kina na yagoqu kei na yaloqu. …

“Mo vuli vei au, ka muria na noqu vosa; mo vakarorogo vua na noqu Yalo Tabu mo rawata kina na noqu vakacegu.” (V&V 19: 15--18, 23.)¹⁹

Ni sa tukuni ka caka oti na ka kecega, ni sa raicilesu oti na itukutuku makawa taucoko, ni sa dikevi na vakasama titobu duadua vakatamata, e sega ni dua na ka e vakasakiti cake, e vakaturaga cake, e totoka cake mai na cakacaka ni loloma soliwale oqo ena nona solia na Nona bula ki na veika vakamadua kei na mosi na Luvei Koya sa Cecere Sara, na Ravouvou ni matavuvale vakatui nei Tamana, o Koya a vosa ena dua na gauna me vaka ni o Jiova, o Koya a siro sobu ena nona lako mai ki vuravura ka mai sucu vaka e dua na gonelailai mai Peceliema, me rawa kina vei ira na luvena tagane kei na yalewa na Kalou ena veitabatamata kecega ni gauna, ni ra na mate kecega, me ra na tucake tale ka bula tawamudu. A cakava o Koya kivei keda na ka eda sega ni rawa ni cakava vei keda. …

A tukuna na parofita o Aisea:

“E dina sa colata ko koya na noda rarawa, ka sa colata na rarawa ni lomada: …

“… sa vakamavoataki ko koya ena vuku ni noda talaidredre, ka sa qaqi ena vuku ni noda caka cala; sa tau vua na cudruvi sa vu ni noda veivinakati tale; ia ena we ni kena kuita eda sa vakabulai kina” (Ais.. 53:4–5).

Oqo na italanoa veivakurabuitaki ka dina ni Siganisucu. Sa kena ikau na sucu i Jisu mai Peceliema e Jutia. Sa kena ivakamacala na nona veiqaravi na iVakavuvuli. Na uto vakasakiti ni italanoa na Nona isoro, na ivalavala sega sara ga ni bau nanumi Koya ni nona mate na mosi ena kauveilatai mai Kalivari me isoro ni noda ivalavala ca kece.

Na kena itinitini na cakamana ni Tucaketale, ka kauta mai na veivakadeitaki ni “sa qai mate kecega ena vukui Atama, ena vakabulai kece talega ena vukui Karisito” (1 Kori. 15:22).

Ena sega na Siganisucu kevaka a sega na Siganimate. Na gonelailai o Jisu mai Peceliema ena dua walega na gone kevaka a sega na Karisito dauveivueti mai Kecisemani kei Kalivari, kei na qaqa ni Tucaketale.

Au vakabauta na Turaga o Jisu Karisito, na Luvena na Kalou Bula ka Tawamudu. E sega tale ni dua me tautauvata na nona cecere e sa mai bula e vuravura. E sega tale ni dua me sa bau cakava e dua na isoro se dua na veivakalougatataki e rawa ni vakatauvatani kaya. O Jisu Karisito na iVakabula kei na Dauveivueti kei vuravura. Au vakabauti Koya. Au cavuta na Nona vakalou kau sega ni vakataratututaka se dua na kena veiba. Au lomani Koya. Au cavuta na yacana ena vakarokoroko kei na qoroqoro. Au dau qaravi Koya me vaka na noqu qaravi Tamana, vakayalo kei na dina. Au vakavinavinaka Vua ka tekiduru vua na Luvena Lomani, a dolele mai ka tukuna vei keda yadua ena dua na gauna balavu sa oti, “Dou lako mai vei au, koi kemudou vakaadua ga sa oca ka colata na icolacola bibi, kau na vakacegui kemuodu” (Maci. 11:28).

… Au diva me baleti kemuni yadua e dua na gauna, ke dua mada ga na auwa, me gauna ni vakasama vakatitobu ena vakadigagalu kei na railesu ena vakasakiti kei na vakaturaga ni ka oqo, na Luve ni Kalou.²⁰

Au vakadinadinataka na Veisorovaki ni Turaga o Jisu Karisito. Kevaka a sega ena sega ni vakaibalebale na bula. Sai koya na vatuidola ni noda mai tu eke. E vakadeitaka ni da a bula tu ni se bera na noda sucu mai ena bula oqo. Na bula oqo e dua ga na ikabakaba ki na dua na ituvaki vinaka cake ena veisiga ni mataka. Ena vakamalumutaka na yaluma e kauta mai ko mate na yalayala ni Tucaketale.²¹

O Jisu na Karisito, na Luve ni Kalou tabaki taumada ka a siro sobu me lako mai ki vuravura, o Koya a sucu ena dua na vale ni manumanu, ena dua na vanua rawai ena kedra maliwa e dua na matatamata lewai, na Luve ni Kalou, na Le Duabau Ga nei Tamana ena yago, na Ulumatua nei Tamana ka Vakatekivuna na noda vakabulai. O Koya na Dauveivueti, noda iVakabula, ena nona Veisorovaki sa na rawa kina na bula tawamudu vei ira kece era na talairawarawa ki na Nona ivakavuvuli.²²

Vakatutu ni Vuli kei na Veivakavulici

Taro

Na cava e solia kina vei keda o Tamada Vakalomalagi na “isolisoli ni Luvena e Duabau Ga”? (Raica na iwasewase e 1.) Na cava o na cakava mo vakaraitaka na nomu vakavinavinakataka na isolisoli oqo? Na cava na nomu nanuma kei na ka o vakila ni o wilika na ivakaleka nei Peresitedi Hinckley ena veika sa cakava ena vukuda na iVakabula?
Ena iwasewase e 2, veidutaitaka na vosa e vakayagataka o Peresitedi Hinckley me vakamacalataka kina na mate kei na vosa e vakayagataka me vakamacalataka kina na tucaketale. Na cava o vulica rawa mai na duidui ni veivosa oqo? E tara vakacava na nomu bula na nomu ivakadinadina baleta nona tucaketale na iVakabula?
Na cava o vulica rawa mai na ivakadinadina nei Peresitedi Hinckley ni Veisorovaki i Jisu Karisito? (Raica na iwasewase e 3.) Sa vakalougatataki iko vakacava na Veisorovaki? Na cava na nomu nanuma ni ko vakasamataka na nona solibula na iVakabula ena vukumu? Tuvalaka me dua na gauna ni “vakanananu titobu ena vakadigagalu kei na railesu” me baleta na iVakabula.

iVolanikalou Veisemati

Aisea 53; Joni 3:16; 11:25; 2 Nifai 9:6–13; Alama 7:11–13; 34:8–10; Ilamani 14:13–19; V&V 18:10–12

Veivuke ena Vuli

“Ni o masu ka vakavakarau tiko mo veivakavulici o na vakauqeti ena so na gauna mo vakabibitaka e so na ivakavuvuli. Ena rawa talega ni soli vei iko e so na vakasama ni kena vakavulici e so na ivakavuvuli. O na raica talega e so na ivakaraitaki, se ena so na iyaya mo vakayagataka e na lesoni, na italanoa e dau veivakauqeti kei na ogavata rawarawa tale e so. O na vakauqeti beka mo sureta mai e dua na tamata me mai vukei iko e na kena vakarautaki se vakavulici na lesoni. Ena rairai votu tale mai vei iko eso na veika o sa sotava oti mai ka rawa ni wasea vei ira na lewe ni kalasi” (Veituberi Me iLutua Ni Noda Bula [1999], 54).