Wase 1

Na Vakalesui Mai ni Kosipeli—Kida Mai na Siga Rarama Cake

“A vakatikori mai na kosipeli lagilagi oqo ena nodrau a rairai mai na Tamana kei na Luvena vua na cauravou o Josefa.”

Na Bula nei Gordon B. Hinckley

Ena nona bula taucoko, a dau vakamatautaki koya o Peresitedi Gordon B. Hinckley me rokovi ira vakatitobu na tamata kei na vanua era a vakayagataki ena kena vakalesui mai na kosipeli. E vakavinavinaka vakacecere sara vei Josefa Simici kei na nona itavi ena Veivakalesui mai, ka kaya ni “sa dau guta na yalona me vakadinadinataka ni sa vakalou na Turaga kei na ilesilesi nei Parofita Josefa Simici.”¹

Ena 1935, ena gauna sa lesu tiko kina o Gordon mai Igiladi ena kaulotu, a laki sikova vata kei na so tale na daukaulotu oti na Veikau Tabu kei na Delana o Kumora. E ratou a mai raica talega na Valeniveivesu e Carthage, na vanua rau a vakamatei kina ena vuku ni vakabauta o Parofita Josefa Simici kei Hyrum Smith. E ratou taubaletaka na gaunisala kuvu e Nauvoo, na vanua lolobo e liu era sa mai vukica na Yalododonu era cemuri mai me dua na siti totoka. Sega ni vakabekataki, na nona vakasamataka vakabibi o Gordon na nodra vakatovolei kei na qaqa na Yalododonu taumada ena nona sa mai tu ena veivanua oqo ka tomana yani ena ra ni nodra ilakolako na painia ki Salt Lake City.

A dau lesuva o Gordon B. Hinckley na veivanua tabu ni Veivakalesui Mai ena vuqa na gauna ni veiyatini na yabaki e tarava. Ena Lotu ni Siganisucu ni Mataveiliutaki Taumada enai ka 3 ni Tiseba, 2000, a tukuna kina o koya na nona a sikova na Veikau Tabu.

“Ena vica na yabaki sa oti au a lesi ki na koniferedi ni iTeki o Rochester New York. Ena siga Vakarauwai au a kaya vei ira na veitacini era a tiko vata kei au, ‘Me da sa na yadra vakamataka lailai, ni Siga Tabu, ka meda gole ki na Veikau Tabu ni bera na koniferedi.’ Era a duavata kina. Sa yaco sara, ena mataka lailai ni Siga ni Vakacecegu ni vula itubutubu, au a gole vata kei peresitedi ni kaulotu, peresitedi ni iteki, kei koya na mata ni iwasewase ki Palmyra ka curuma yani na veikau tabu. A sega tale ni dua a tu e kea. A vakanomodi vinaka ka totoka. A tau toka na uca ena bogi. Era buroro mai na draunikau vovou ena veivunikau.

“Keitou a veivosaki toka ga e ra. Keitou sa qai tekiduru ena qele suasua ka masu. Keitou a sega ni rogoca e dua na voqa ni domo. Keitou a sega ni raica e dua na raivotu. Ia a tukuni ena neitou vakasama ena sala e sega ni vakamacalataki rawa, vei keitou yadua, ni dina, a yaco sara ga eke me vaka ga a kaya o Josefa. Eke sara ga a rairai mai kina na Kalou na Tamada Tawamudu kei na Luvena Daulomani, na Turaga o Jisu Karisito sa tucaketale, vua na cauravou yabaki 14 ka vosa vua. A cilavi cauravou na nodrau rarama sega ni vakatauvatani rawa, ka vakasalataki ena veika me na cakava.

“Na gauna cecere duadua o ya, na Matai ni Raivotu, a wasea rua na ilati ka curu mai na veivakalesui mai ki vuravura na Lotu i Karisito. A tadu mai ena lekutu ni butobuto, mai na kida ni veiyabaki ki na mataka lagilagi ni dua na siga vou. A tarava mai na iVola i Momani e dua tale na ivakadinadina ni Turaga o Jisu Karisito. A vakalesui mai na Nona matabete vakalou savasava mai na ligadra era a taura tu ena gauna makawa. A vakatikori na idola kei na kaukauwa vua na Parofita kei ira na nona itokani. Sa mai tiko tale na Lotu makawa e vuravura vata kei na kena veivakalougatataki, kaukauwa, vunau, idola, kei na ivakavuvuli taucoko ni veitabagauna taumada. Sai koya na Lotu [i Karisito]. E vakayacani Vua. E liutaki ena Nona matabete. E sega tale ni dua na yaca e tiko e ruku i lomalagi me na vakabulai kina na tamata. A yaco o Josefa Simici … me Nona dauniivakadinadina.”²

Sa tekivu ena Matai ni Raivotu “na iotioti ni wase ni nona lewa balavu ka tudei ni Kalou vei ira na tagane kei na yalewa e vuravura.”

iVakavuvuli nei Gordon B. Hinckley,

Ni oti Nona mate na iVakabula, sa mai vukitani na Lotu a tauyavutaka o Koya.

O [Jisu Karisito] ena gauna taumada kei na gauna oqo sa ivakaraitaki bula cecere ni itukutuku ni veigauna ni kawatamata, sa ka cecere duadua ni veigauna kei na ituvaki kecega ni tamata.

Ni bera Nona mate, a tabaki iratou na Nona iApositolo. A vakalailai ga na nodratou bula lako tiko kina. Sa mai vakarautaki kina na Nona Lotu.³

Ni oti Nona mate na iVakabula, sa mai vukitani na Lotu a tauyavutaka o Koya. A raica taumada na ituvaki oqo o Aisea na parofita, ka parofisaitaka, “Sa vakadukadukalitaki talega ko vuravura ena vuku ni lewena; ni ra sa talaidredre ki na ivunau, era sa vakatanitaka na ilesilesi, era sa vakacataka na veiyalayalati tawamudu” (Aisea 24:5).⁴

A veivakayaloqaqataki na voqa ni ivola nei Paula vei ira sa muria na Karisito, mera kakua ni lutu ki na nona sala na vu-ni-ca. Ia a qai mani yaco na yalo ni vukitani.⁵

Sa sivi yani na veisenitiuri. A ubia na vuravura taucoko e dua na o butobuto. A vakamacalataka kina o Aisea: “Io, raica na butobuto ena ubi vuravura, kei na butobuto loaloa na veimatanitu” (Aisea 60:2).

O ya e dua na gauna lomolomora kei na rarawa, vakatakilakilataki ena veicacati balavu ka butobuto. … E a gauna ni vakanuinuikara, a gauna ni veivakasaurarataki kei na bobula.

Sa mai sivi na imatai ni udolu na yabaki, ka cadra mai na ikarua ni mileniumi. Oqo na veisenitiuri taumada mai na kena tomani tiko na kena makawa. A gauna ni veilecayaki kei na rere kei na rarawa.⁶

A veivuke na Tekivu ni Vuli kei na Veivakavoui ki na sala ni vakalesui mai ni kosipeli.

Ia, ena gauna balavu o ya ni butobuto, a waqari kina e dua na cina. A kauta mai na gauna ni Tekivu ni Vuli na seraki mai ni vuli, cakacaka ni liga, kei na sainisi. A yaco mera lomavata na tagane kei na yalewa doudou ka yaloqaqa mera rai yani ki lomalagi mera kila na Kalou kei na Luvena sa vakalou. Eda vakatoka oqo me gauna ni Veivakavoui.⁷

Era cakacaka na dauveivakavoui rogo levu mera veisautaka na lotu [va-Karisito], me vakataki Luther, Melanchthon, Hus, Zwingli, kei Tyndale. O ira qo era tamata yaloqaqa sara, ka so vei ira era a vakamatei vakararawataki ena vuku ni nodra vakabauta. A cadra mai na lotu Protestant ena nona valataka me yaco na veivakavoui. Ni sa sega ni mana kina na veivakavoui oqo, era sa dui tauyavutaka na dauveivakavoui oqo na nodra dui lotu. Era a cakava ka sega kina na lewa ni matabete. Era sa gadreva ga mera kunea e dua na gauna vinaka mera na qarava kina na Kalou ni ra nanuma mena qaravi kina o Koya.

Ena gauna sa yaco tiko kina na dui-ta-kena levu ena veilotu va-Karisito e vuravura, sa cakacaka tale tikoga na kaukauwa vakapolitiki. Sa qai yaco mai na iValu Levu kei Amerika, ka yaco kina me buli e dua na matanitu ka vakatikori ena kena Lawatu me kakua ni malele na lewa ni matanitu ki na veika e baleta na lotu. Sa mai cadra e dua na siga vou, e siga lagilagi. Sa sega tale ni dua na lotu me lewa mai na matanitu. Sa sega ni dua na lotu me uasivia e dua tale.

Ni oti na veisenitiuri butobuto kei na rarawa kei na dredre, sa kena gauna donu me vakalesui mai na kosipeli. Era sa parofisaitaka tu mai na parofita ni gauna makawa na siga namaki tu mai vakabalavu oqo.

Na itukutuku taucoko ni veigauna taumada sa dusia tiko na gauna oqo. Era sa yaco mai ka yali yani na veisenitiuri kei na kedra rarawa kei na inuinui taucoko sara. Sa qai yaco mai na siga sa mai lewa kina na Daunilewa Cecere Duadua ni veimatanitu, na Kalou sa Bula Tiko, na gauna era sa tukuna tiko mai na parofita. A raica taumada o Taniela e dua na vatu a ta mai na ulunivanua sega ena liga ka yaco me dua na ulunivanua cecere ka vakasinaita na vuravura [raica na Taniela 2:35, 44].⁸

Sa mai yaco na Veivakalesui Mai ena nodrau a rairai mai na Tamana kei na Luvena vei Josefa Simici.

Ni oti nodra lako voli e vuravura e vuqa na itabatamata—ka vuqa era veisei, veicacati, tiko butobuto, ka vakatevoro—sa yaco mai na siga cecere, vou ni Veivakalesui Mai. Sa qai yaco mai na kosipeli lagilagi oqo ena nodrau a rairai mai na Tamana kei na Luvena vua na cauravou o Josefa.⁹

Sa ka totoka dina na raivotu o ya ena yabaki 1820 ena nona a masu o Josefa ena veikau ka rau qai rairai mai na Tamana kei na Luvena. A sa kacivi koya e dua vei rau, dusi koya na kena ikarua ka kaya, “Oqo na Noqu Gone ni Toko. Mo Rogoci Koya!” (Josefa Simici—Ai Tukutuku 1:17).

Se bera mada vakadua me yaco e liu na ka vakaoqo. Sa na rawa me taroga kina e dua na vuna e bibi kina me rau rairai mai na Tamana kei na Luvena. Au nanuma ni baleta ni Rau sa mai vakayacora ena itabagauna ni taucoko ni gauna, na iotioti ka itinitini ni itabagauna ni kosipeli, mera na vakasokomuni vata mai kina vakadua na gacagaca ni veitabagauna taucoko taumada. Me yaco oqo me kena iotioti ni wase ni nona lewa balavu ka tudei ni Kalou vei ira na tagane kei na yalewa e vuravura.¹⁰

Na veika kece eda kaya eda cakava baleta na lewa vakalou, na dina taucoko eda cakava baleta na dina ni cakacaka oqo, sa vakayavutaki ga mai na Matai ni Raivotu nei parofita cauravou. Ke sega oqo ena sega soti na ka meda na kaya rawa. Sai koya oqo na itekitekivu cecere ni itabagauna ni taucoko ni gauna, sa yalataka mai na Kalou ni na vakalesua mai na kaukauwa, na isolisoli, na veivakalougatataki taucoko, ni itabagauna taucoko taumada.¹¹

Sa vakalesui mai na lewa kei na idola ni matabete.

Na vakalesui mai ni lewa kei na idola ni Matabete i Melikiseteki ki vuravura a tiki ni Veivakalesui Mai.

A yaco na vakalesui mai ni Matabete i Eroni, ena nona a tabaka o Joni na Daupapitaiso na buradelai Josefa Simici kei Oliver Cowdery ka kaya, “Oi kemudrau na noqu itokani, au sa lesi kemudrau e na yaca ni Mesaia ki na itutu ni bete vaka-Eroni, ka solia vei kemudrau na kaukauwa kei na lewa ni ilesilesi oqori, io na nodra cakacaka na agilosi dauveiqaravi, na vunautaki ni ivakavuvuli ni veivutuni kei na papitaiso e na tabadromuci e wai me bokoci kina na ivalavala ca” (V&V 13:1).¹²

A tarava oqo na nodratou rairai mai o Pita, Jemesa, kei Joni, e ratou iApositolo ni Turaga o Jisu Karisito, ka ratou mai vakatikora vei Josefa kei Oliver Cowdery na Matabete i Melikiseteki, ka ratou a taura na iApositolo oqo mai na liga sara ga ni Turaga Vakai Koya.¹³

E tolu vei ira na iApositolo [ni iVakabula]—o Pita, Jemesa, kei Joni—e ratou a rairai vei Josefa kei Oliver voleka “e na lekutu” e yasa ni Uciwai na Susquehanna (raica na V&V 128:20). E ratou a tabaka na buradeladrau ka vakatikora vei rau na lewa tabu oqo. …

Au sa rawa ni raica lesu na noqu matabete vakadodonu sara mai na veivakatikori oqo. E vakatoka oqo: A tabaki au o David O. McKay; ka a tabaki koya o Joseph F. Smith; ka a tabaki koya o Brigham Young; ka a tabaki koya o iratou na Le Tolu na iVakadinadina; ka a tabaki iratou o Josefa Simici Jr. kei Oliver Cowdery ; ka a tabaki rau o Pita, Jemesa, kei Joni; ka a tabaki iratou na Turaga o Jisu Karisito.

Sa vakakina vakaoqo vei ira [yadua na lewe ni Matabete i Melikiseteki]. Kivei kemuni yadua na veitacini sa tiko vua na matabete oqo o sa ciqoma talega mai ena veitarataravi vakadodonu mai na nodratou veivakatikori o Pita, Jemesa, kei Joni.¹⁴

Sa vakatakila mai kina na Turaga vei Josefa Simici na dina eda duidui kina maivei ira na veimatalotu tale eso.

Au kerea meu tukuna mada e vica na vuqa na vunau kei na ivakarau eda duidui kina mai vei ira na veimatalotu eso, ka ra yaco kece mai ena ivakatakila vei Parofita cauravou. Ko ni sa kila oti tu, ia e yaga me na tukuni tale ka vakasamataki.

Na Lewe Tolu Vakalou

Na kena imatai … sai koya na nodrau rairai mai na Kalou Vakai Koya kei na Luvena Daulomani, na Turaga o Jisu Karisito sa tucaketale. Au kaya, ni rairai mai e matanavotu cecere oqo, sa gauna taleitaki duadua vakatekivu mai na siga a sucu, bula, ka mate, ka Tucaketale kina na noda Turaga ena gauna cecere duadua.

Eda sega ni kila e dua tale na gauna vakaoqo me vakatauvatani vata kaya.

Ena veisenitiuri era soqoni vata na tamata ka veibataka na veika e baleta na Kalou. A vakasokomuni ira mai na vuku vakaivolatabu ni veivakabauta o Constantine e Nicaea ena yabaki 325. Ni oti e rua na vula ni veivosaki bibi, era sa muavata ki na dua na ibalebale ka yaco ki na veitabatamata me sa ivunau ena kedra maliwa na lotu va-Karisito me baleta na Lewe Tolu Vakalou.

Au sureti kemuni mo ni wilika na ibalebale o ya ka vakatauvatana kei na itukutuku nei cauravou Josefa. A kaya o koya ni sa tucake tu e matana na Kalou ka vosa mai vua. A raici Koya o Josefa ka rogoci Koya rawa. Na kena ituvaki e tamata, e vakayagona. E tucake tu e yasana na Turaga sa tucaketale, e tamata vakai koya ga, ka tukuna mai na Kalou ni sai Koya na Luvena Daulomani ka vosa talega mai vei Josefa.

Au kaya ni gauna lekaleka o ya ni raivotu cecere a kila vakalevu cake o Josefa na veika e baleta na Kalou ni vakatauvatani na nodra kila o ira taucoko na vuku vakaivolatabu kei na vunivola ni veigauna sa oti.

Ena ivakatakila vakalou oqo sa yaco na veivakadeitaki sega ni vakatitiqataki ni a yaco dina na Tucaketale ni Turaga o Jisu Karisito.

Na kila oqo baleta na Kalou, a vunitaki tu mai na vuravura ena veisenitiuri, sa imatai ni ka cecere e vakatakila mai na Kalou vei ira na Nona italai digitaki.¹⁵

Na iVola i Momani sa itokani ivakadinadina vata kei na iVolatabu

“Na iVola i Momani … sa vosa mai na kuvu ni soso me vakadinadinataka na Luve ni Kalou.”

Au na tukuna e dua tale na ka e bibi sara sa vakatakila mai na Kalou.

Era sa ciqoma na lotu va-Karisito e vuravura ni iVola Tabu sa vosa ni Kalou. E vuqa era sega ni kila a yaco vakacava mai vei keda.

Au se qai wilika tasevu oti ga e dua na ivola tabaki vou ni dua na tamata vuku vakaivolatabu rogo. E laurai mai na veika e tukuna o koya ni ivola kece ena iVola Tabu era a vakasoqoni vata mai ena dua na sala e vaka me sega tu ni tuvai vakavinaka. Ena so na vanua, era a sega ni tabaki vakaivola na itukutuku me yacova e dua na gauna balavu ni oti na veika a yaco era tukuna tiko. Ena rawa kina me dua e taroga, “E dina beka na iVola Tabu? E vosa dina beka ni Kalou?”

Eda qai sauma ni dina, kevaka ga sa vakadewataki vakadodonu. Sa cakacaka kina na liga ni Turaga. Ia sa sega ni tu taudua ena gauna oqo. Sa tiko tale e dua na ivakadinadina baleta na veika bibi ka dina sa tu kina.

E kaya na ivolanikalou “ena vakadinadinataki na vosa kecega ena gusu ni vakadinadina e lewe rua se lewe tolu.” (2 Korinica 13:1).

Sa yaco mai na iVola i Momani ena isolisoli kei na kaukauwa ni Kalou. Sa vosa mai na kuvu ni soso me vakadinadinataka na Luve ni Kalou. E tukuna na Nona sucu, na Nona cakacaka vakalotu, na Nona Mate e Kauveilatai kei na Tucaketale, kei na Nona rairai kivei ira na yalododonu ena vanua o Bountiful e Amerika.

E ka vakayago ka rawa meda taura e ligada, ka wiliki, ka rawa ni da vakatovolea. Sa tu kina e loma na yalayala ni sa vakalou na kena itekitekivu. E milioni era sa vakatovolea ka raica ni sa ka dina ka itukutuku tabu. …

Me vaka ni sa vakadinadinataka na iVola Tabu na Veigauna Makawa, na iVola i Momani sa ivakadinadina ni gauna Vou. E rau duavata ena kena vakaraitaki ni ko Jisu sa Luvena na Tamana. …

Na ivolatabu oqo, sa ivakatakila mai vua na Kalou Cecere, sa dua tale na ivakadinadina ni sa vakalou na Turaga.¹⁶

Lewa ni Matabete kei na vakayavutaki ni Lotu

Na matabete sai koya na lewa meda cakacaka ena yaca ni Kalou. … Au se qai wilika oti ga e [dua] na ivola [a] baleta na Vukitani ni Lotu taumada. Kevaka sa yali na lewa mai na Lotu o ya, me sa na qai vakaisosomitaki beka vakacava?

E soli mai na lewa ni matabete mai na vanua duadua ga e dodonu me lako mai kina, o ya mai lomalagi. A vakatikori mai na ligadra o ira era a taura tu ena gauna a tiko voli kina na iVakabula e vuravura. …

Sa ka totoka dina na kena sa cereki na ituvatuva ni veivakalesui mai ka sa tauyavutaki kina na Lotu ena yabaki 1830. … Na yaca sara mada ga ni Lotu a vakatakilai mai lomalagi. E lotu nei cei? E nei Josefa Simici beka? E nei Oliver Cowdery beka? Sega, sa Lotu i Jisu Karisito sa vakalesui mai ki vuravura ena siga edaidai.¹⁷

Na matavuvale

E dua tale na ivakatakila cecere vakai koya ga a soli vua na Parofita sai koya na ituvatuva ni kena bula tawamudu na matavuvale.

Na matavuvale sa bulia na Kalou sa Cecere. E matataka na isema vakamatavuvale e cecere vakalou duadua. E matataka na ilesilesi bibi duadua vei ira taucoko. Sai koya na yavu cecere duadua ni tamata.

Mai na ivakatakila ni Kalou kivua na Nona Parofita sa tadu mai kina na vunau kei na lewa sa kovuti tiko kina na vauci vata ni matavuvale sega ni baleta walega na bula oqo ia ki na veigauna tawamudu.¹⁸

Nodra sega ni cala na gonelalai.

Na nodra sega ni cala na gonelalai sa dua tale na ivakatakila sa solia mai na Kalou ki na ilesilesi nei Parofita Josefa. Sa dau vakayacori tiko mai na nodra daupapitaisotaki na gone lalai me kauta tani na revurevu e dau vakatokai tiko me nodrau ivalavala ca o Atama kei Ivi. Ena vunau ni Veivakalesui Mai, na papitaiso sai koya na vakabokoci ni nona ivalavala ca e dua vakai koya. Sa yaco me dua na veiyalayalati ni Kalou kei na tamata. E vakayacori oqo ena yabaki ni tauri ilesilesi, ni ra sa yalomatua na tamata mera kila na cala mai na dodonu. Sai koya na tabadromuci ena wai, ka sa ivakatakarakara ni mate kei na bula i Jisu Karisito kei na Nona sa Tucaketale Mai.¹⁹

Nodra vakabulai na mate.

Au na vakamacalataka e dua tale na dina sa vakatakilai mai. Sa tukuni tiko ni Kalou sa sega ni dau digitaki ira vakailoa na tamata, ia, e sega tale ni dua na Lotu au kila, sa tiko kina na veivakarautaki baleti ira sa tiko ena daku ni ilati ni mate mera na ciqoma na veivakalougatataki taucoko e yaco vei ira na bula tiko. Na vunau cecere ni nodra vakabulai na mate sa ka cecere ki na Lotu oqo. … Sa soli talega vei ira sa mate tu na madigi vata ga kei ira era bula tiko. Vakadua tale, sa dua na veivakarautaki lagilagi ka totoka sa cakava na Kalou sa Cecere mai na Nona ivakatakila vei Nona Parofita.²⁰

Na ituvaki, inaki, kei na nodra icavacava na luveni Kalou.

Sa vakatakilai mai na ituvaki tawamudu ni tamata. Eda sa luvena tagane kei na yalewa na Kalou. Na Kalou sa Tama ni yaloda. Eda a bula taumada tu mai ni bera noda gole mai ke. Eda a vakaituvaki yadua. Eda a sucu mai ki na bula oqo ena dua na ituvatuva vakalou. Eda mai tiko oqo meda vakatovolea noda bula kilikili, ka bula tiko ena galala sa solia mai na Kalou. Ni da mate eda na bula tikoga. E wase tolu tiko na noda bula tawamudu: dua, na noda bula taumada; rua, noda bula tiko oqo; kei na ka tolu, na noda bula e tarava. Ni da mate eda mate ena vuravura oqo ka kalawa yani ki na ilati ki na vuravura eda sa kilikili kaya meda curu kina. Oqo, me vakadua tale, sa vunau, e cecere, vakai koya ga, ka talei sara ni Lotu oqo e yaco mai ena ivakatakila.²¹

iVakatakila ena gauna oqo

Au mai tukuna tiko vakalekaleka na kena sa mai sovaraki vakayauyau tiko na kila-ka kei na lewa ni Kalou vua na Nona Parofita. … Sa vo tale e dua meu na vakamacalataka. Sai koya na ivakavuvuli ni ivakatakila ena gauna oqo. E vakaoqo na yavu ni vakabauta e vola na Parofita:

“Keimami vakabauta na veika sa vakatakila oti na Kalou, na veika sa vakatakilai mai oqo, ka keimami vakabauta ni na levu tale na ka ena qai vakatakilai mai me baleta tiko ga na Matanitu ni Kalou” (Yavu ni Vakabauta 1:9).

Na lotu sa tubu cake tiko, na lotu sa tete tiko yani ki vuravura taucoko ena veigauna dredre oqo, ena gadrevi me yaco tikoga mai kina na ivakatakila mai na itikotiko vakalomalagi mena dusimaka ka tosoya yani ki liu.

Ena masumasu kei na vakasaqarai dina na lewa ni Turaga, eda vakadinadinataka ni sa ciqomi na ivakasala, ni sa yaco mai na ivakatakila, ka sa vakalougatataka na Nona Lotu na Turaga ena kena sa mua tiko ena kena salatu ni kena icavacava.

Mai na yavu tudei ni sa kacivi vakalou na Parofita Josefa Simici kei na ivakatakila ni Kalou, e yaco vua, eda sa toso kina ki liu.²²

Niu mai tu enai ka 15 ni itutu mai vei Josefa Simici kau sa taura tu na itutu vakaparofita ka tadu mai vua, sa noqu ivakadinadina vakalou ni sa ka dina na itukutuku nei Parofita Josefa Simici [na itukutuku ni Veivakalesui Mai], ni Tamana … sa vakadinadinataka vakalou na Luvena, ni a vakasalataka na parofita cauravou na Luvena, ka sa mani yaco na veika eso ka mua yani ki na kena tauyavutaki na “lotu dina duadua ga e vuravura” [V&V 1:30]²³

Vakatutu ni Vuli kei na Veivakavulici

Taro

Na cava e gadreva kina o vuravura na Lotu kei na kosipeli i Jisu Karisito me vakalesui mai? (Raica na iwasewase e 1.) Na cava eso na sala a vakarautaka na Turaga me vakalesui mai kina na kosipeli? (Raica na iwasewase e 2.)
Vakasamataka mada na ivakavuvuli nei Peresitedi HInckley me baleta na iMatai ni Raivotu (raica na iwasewase 3). Ena sala cava sa vakauqeti iko kina na nomu ivakadinadina ni iMatai ni Raivotu?
Na cava a bibi kina me vakalesui mai na matabete mai vei ira na italai mai lomalagi? (Raica na iwasewase e 4.) Na cava e bibi kina vei ira na lewe ni Matabete i Melikiseteki mera dikeva lesu na nodra lewa ni matabete me yaco sara vei Jisu Karisito?
Ena iwasewase e 5, raica na ivakaleka ni so na dina a yaco mai ena ivakatakila vua na Parofita Josefa Simici. Era sa vakalougatataka vakacava na nomu bula na veika dina oqo? Eda na vukei ira vakacava na gonelalai mera kila vinaka ka marautaka na dina oqo?

iVolanikalou Veisemati

Aisea 2:1-3; Cakacaka 3:19-21; iVakatakila 14:6-7; 2 Nifai 25:17-18; V&V 128:19-21

Veivuke ena Vuli

“Ena gumatua sara na nomu vuli ni ko vakavulici mai vua na Yalo Tabu. Dau tekivuna nomu vulica na kosipeli ena nomu masuta na veivuke ni Yalo Tabu” (Vunautaka na Noqu Kosipeli [2004], 20).