Kapitulo 21

Ang Pagsunod sa Pulong Sa Kaalam

Ang Ginoo mihatag kanato sa Pulong sa Kaalam alang sa atong temporal ug espiritwal nga kaluwasan.

Gikan sa Kinabuhi ni Heber J. Grant

Sa panahon nga si Presidente Heber J. Grant nangalagad isip usa ka Apostol ug isip Presidente sa Simbahan, siya ug ang ubang mga General Authority, sa kanunay gidasig sa pagpamulong sa mga Santos kalabut sa Pulong sa Kaalam, usa ka pagpadayag nga makita sa Doktrina ug mga Pakigsaad 89. Dinhi niini nga pagpadayag, ang Ginoo nagdili kanato sa paggamit sa alkohol, tabako, ug mainit nga mga ilimnon, diin ang mga propeta sa ulahing mga adlaw mipasabut nga mao ang tsa ug kape (tan-awa sa D&P 89:5–9). Ang Ginoo usab miingon nga ang makaayo sa lawas nga hilbas, lugas ug mga bunga “gitugot alang sa paggamit sa tawo, ” uban sa unod sa kahayopan diin “gamiton sa pagdaginot” (tanawa sa D&P 89:10–17). Agi og dugang ngadto sa mga pag-awhag sa mga Santos sa pagsunod niini nga tambag, si Presidente Grant ug ang ubang mga Presidente sa Simbahan misulti batok sa makadaot ug makapaanad nga mga butang sama sa gidili nga mga druga. Si Presidente Grant miingon, “Ang Ginoo dili buot kaninyo nga mogamit sa bisan unsa nga druga nga makapahinam.”¹

Daghan sa mga pag-awhag ni Presidente Grant alang sa pagsangyaw sa Pulong sa Kaalam miabut tungod kay duna siyay higala kansang kinabuhi nadaut tungod sa sigarilyo ug ilimnon. Kining batan-on nga lalaki miundang sa pagpanigarilyo aron siya makapangalagad sa misyon, apan siya misugod sa pagpanigarilyo human dayon giluwat sa fulltime nga pangalagad sa misyon. Ang pagpanigarilyo misangput ngadto sa pag-inom og alak, ug ang pag-inom og alak misangput ngadto sa pagkawala sa hiyas ug ngadto sa pagkahimulag gikan sa Simbahan. Siya namatay sa batan- on nga edad, ug si Heber J. Grant mibisita sa iyang lubong. “Samtang ako nagbarug sa iyang lubnganan, ” si Presidente Grant miasoy, “mihangad ako sa langit ug misaaad sa akong Dios nga ang ilimnon nga makahubog ug tabako ako nang kaaway ug ako makig-away sa tanang kasarang nga gihatag sa Dios hangtud sa adlaw sa akong kamatayon.”²

Pipila ka mga sakop sa Simbahan sa panahon ni Presidente Grant ang misaway mahitungud sa daghang mga wali nga ilang nadungog kabahin sa Pulong sa Kaalam. Si Presidente Grant misulti, “panagsa ra ang komperensya diin walay tawo nga mangahas sa pagsulti kanamo nga: ‘Palihug ayaw na paghisgut mahitungod sa Pulong sa Kaalam. Sige na mi og kadungog ana, gipul-an na mi ana.’” Si Presidente Grant mitubag niana nga mulo pinaagi sa pagingon: “Walay mortal kinsa Santos sa Ulahing mga Adlaw ug nagtuman sa Pulong sa Kaalam ang sukad gisakitan ug gipul-an sa pagpaminaw niana. Kon ang tawo mobiya sa tigum ug moingon … ‘wala ba silay laing makita nga hisgutan gawas sa Pulong sa Kaalam, gipul-an na ko ana’—tinuod gipul-an siya tungod kay daghan siya og bisyo nga nahisupak sa Pulong sa Kaalam.”³

Gikan sa kaugalingon nga kasinatian, si Presidente Grant nasayud nga kadtong mituman sa Pulong sa Kaalam dili mapanalipdan gikan sa sakit. Siya miangkon nga tungod kay gipanalanginan wala magpasabut nga gawasnon sa mga kagulanan ug mga kalisdanan sa kinabuhi.”⁴ Hinoon, siya makanunayong mipamatuod nga kon ang mga Santos sa Ulahing mga Adlaw motuman sa Pulong sa Kaalam, sila makadawat og panalangin sa kahimsog, kauswagan, ug espirituhanon nga kalig-on nga dili nila madawat kon dili sila motuman niini nga balaod.

Niadtong Abril 1933 nga kinatibuk-ang komperensya, si Presidente Grant miingon nga tungod kay siya mituman sa Pulong sa Kaalam, ang Ginoo mitugot kaniya nga mabuhi aron matuman ang iyang misyon sa yuta. “Akong ibilin ang akong pagpamatuod kaninyo, ” siya miingon, “nga ako nagtuo sama ka ligon sa akong pagtuo sa bisan unsang butang dinhi niining kalibutana nga ako wala magbarug dinhi karon ug mamulong kaninyo kon wala pa ako motuman sa Pulong sa Kaalam. Sa dihang ang akong apendiks mibuto gitangtang kini ug dihay pagkahilo sa akong dugo, maoy ilang giingon, ug ang ikatulo ug katapusan nga hugna misugod na. Dihay siyam ka mga magtatambal nga mitambong ug ang walo miingon nga ako mamatay. Ang pangulo sa mga tigopera … miatubang ngadto ni Presidente Joseph F. Smith ug miingon: ‘Mr. Smith ayaw paghunahuna nga posible niining tawhana nga mabuhi. Kay ngano, kon siya mabuhi, mahimong milagro kana, ug karon dili na panahon sa mga milagro.’

“Mao kana ang mensahe nga gidala kanako ni Presidente Joseph F. Smith sa panahon sa iyang katapusang pagkasakit, ug siya miingon: ‘Ang atong higalang doktor nga miingon nga mahimong milagro, namatay na. Wala ko makakita kanimo nga labawng mahimsog kay sa akong pagkakita kanimo karon, Heber.’

Ako miingon ngadto sa nars kinsa misulti kanako mahitungod niining siyam ka mga doktor nga dili ko buot makigkita kanila, gawas niadtong usa nga mituo nga ako mabuhi. Siya miingon: ‘Siya ang doktor sa ospital, ako siyang tawagon.’

“Nangutana ako kaniya nganong wala siya mouyon sa uban, ug siya mipahiyum, … ug siya miingon: ‘Mister Grant, ako lang gitag-an, sir. Akong nabatyagan ang pulso, sir, sa liboan ka mga pasyente, isip doktor sa daghan na kaayong mga ospital, apan wala ako makabantay og pulso sama sa imo, sir. Ngano, abi nimo, sir, sa tanang pagsulay nga akong gihimo sulod sa usa ka oras og kap-atan ka minutos nga gioperahan ka ang imong kasingkasing wala gyud moundang bisan kausa ug ako nakahukom nga kana nga kasingkasing motabang kanimo nga mabuhi.’

“Unsang matang sa kasingkasing nga anaa ako? Ako adunay kasingkasing nga adunay limpyo nga dugo nga wala mahugawi sa tsa, kape o ilimnon nga makahubog. Mao nga ang hilo nga diha sa akong sistema nabuntog.”⁵

“Hinaut unta nga ang Dios motabang kaninyo ug kanako ug sa matag Santos sa Ulahing mga Adlaw sa pagsunod sa Pulong sa Kaalam.” Si Presidente Grant kausa nag-ampo, “nga kita adunay kahimsog ug tinago nga bahandi sa kahibalo, ug nga ang Dios motugot kanato nga mabuhi dinhi sa yuta hangtud nga atong matuman ang katuyoan sa atong pagkalalang.”⁶

Mga Pagtulun-an ni Heber J. Grant

Ang Pulong sa Kaalam mao ang balaod sa kinabuhi ug sa kahimsug sa mga Santos sa Ulahing mga Adlaw.

Akong nakita nga natala diha sa Doktrina ug mga Pakigsaad ang usa ka mubo kaayo nga tudling nga mabasa:

“Ako, ang Ginoo, mapugos sa pagtuman kon kamo mobuhat sa unsa nga ako misulti; apan kon kamo dili mobuhat sa unsa nga Ako misulti kamo dili makaangkon og saad. [D&C 82:10.]

Ako manghinaut nga ang mga Santos sa Ulahing mga Adlaw mahinumdum niining pipila ka mga pulong. Akong pangandoy nga kini isilsil diha sa atong mga hunahuna ug diha sa atong mga kasingkasing, ug nga atong matino nga ang Dios mapugos sa pagtuman sa Iyang mga saad ngari kanato, kay kita nagtuman sa Iyang mga kasugoan. Adunay balaod nga dili mausab didto sa langit— mao ang gisulti kanato ni Joseph Smith—sa wala pa ang mga katukuran niini nga kalibutan, nga diha ang tanan nga mga panalangin gipasikad [tan-awa sa D&P 130:20–21]. Kon ikaw ug ako nagtinguha sa mga panalangin sa kinabuhi sa kahimsug, kalagsik sa lawas ug hunahuna; kon kita nagtinguha nga ang tiglaglag nga anghel mosaylo kanato sama sa panahon sa mga anak ni Israel, kita kinahanglang motuman sa Pulong sa Kaalam; dayon ang Dios mapugos ug ang mga panalangin moabut kanato.⁷

Human kita sultihi unsay maayo alang kanato [tan-awa sa D&P 89:10–17], ang Ginoo mihimo ug usa sa labing maanindot nga saad, usa sa labing makapabayaw ug makapadasig nga mga saad nga posibleng mahatag ngadto sa mortal nga tawo, Siya miingon:

“Ug ang tanan nga mga Santos kinsa mahinumdum sa pagsunod ug sa pagbuhat niini nga panultihon, maglakaw nga masulundon sa mga sugo, makadawat og maayo nga panglawas ug uyok sa ilang mga kabukogan;

“Ug makakita ug kaalam ug dagko nga mga bahandi sa kahibalo, gani ang mga tinago nga mga bahandi;

“Ug modagan nga dili maluya, ug molakaw nga dili makuyapan.

“Ug Ako, ang Ginoo mohatag ngadto kanila og usa ka saad, nga ang tiglaglag nga anghel mosaylo kanila, ingon sa mga anak sa Israel, ug dili mopatay kanila.” [D&P 89:18–21]…

Ang Ginoo misulti kanato pinaagi ni Propeta Joseph Smith:

“Ug kon ang usa ka tawo makakab-ot pa og dugang nga kahibalo ug salabutan dinhi niini nga kinabuhi pinaagi sa iyang kakugi ug pagkamasulundon kay sa uban nga tawo, siya adunay daghan nga kahigayunan didto sa kalibutan nga umaabot.” [D&P 130:19]

Walay tawo nga nagsupak sa Pulong Sa Kaalam nga makaangkon og sama ka gidaghanon nga kahibalo ug salabutan niini nga kalibutan kay sa tawo kinsa nagsunod sa balaod. Dili ko igsapayan kinsa siya o diin siya gikan, ang iyang hunahuna dili sama ka tin-aw, ug siya dili mouswag sama ka layo ug sama ka dali ug makapabilin sa iyang gahum sama sa iyang mahimo kon siya nagsunod sa Pulong sa Kaalam.⁸

Ang lain pa nga hinungdan nganong ako matinguhaon nga ang mga Santos sa Ulahing mga Adlaw kinahanglan nga motuman sa Pulong sa Kaalam mao nga ang Ginoo nag-ingon nga kini gihatag kanato alang sa atong temporal nga kaluwasan [tan-awa sa D&P 89:2]. Buot nakong mahibaloan ninyo nga kon kita isip usa ka katawhan dili gayud mogamit bisan gamay sa tsa o kape o sa tabako o ilimnon nga makahubog, kita mahimong labing adunahan nga tawo sa kalibutan. Ngano? Tungod kay kita mahimong makapalambo sa kalagsik sa atong lawas, makapalambo sa kalagsik sa atong panghunahuna; kita motubo sa pagka espirituhanon; kita makabaton ug direkta nga linya sa pagpakigsulti sa Dios, ang atong Langitnong Amahan, kita makahimo og mas daghan pa nga kalampusan….

Daghang mga tawo ang nagpaila nga Santos sa Ulahing mga Adlaw nga sa panahon sa kalisud nawad-an sa panimalay nga masilongan sa ilang asawa ug mga anak kinsa kon mituman lang unta sa Pulong sa Kaalam, makahimo unta sa pagsalbar niini. Ang kalapasan sa Pulong sa Kaalam nagpasabut sa kalainan tali sa kapakyasan ug kalampusan. Pinaagi sa pagsunod sa Pulong sa Kaalam, aduna untay igong kwarta nga ibayad sa binulan nga datahan, inubanan sa dugang tabang alang sa pag-amuma sa iyang pamilya ug umahan.⁹

Dili ko buot manghilabot sa katungod ni bisan kinsang tawo o mga prebilihiyo. Dili ko buot nga momando ni bisan kinsang tawo. Apan kon ang Ginoo mohatag og pagpadayag ug nagsulti nako kon unsa ang akong pinansyal nga kaayohan ug pinansyal nga kaayohan alang niini nga katawhan, tungod sa “dautan ug sa mga laraw nga anaa ug motungha diha sa mga kasingkasing sa dautan nga mga tawo sa katapusan nga mga adlaw, ” [D&P 89:4] ako naghunahuna nga bisan man lamang unta ang mga Santos sa Ulahing mga Adlaw maminaw sa isulti sa Ginoo.¹⁰

Walay lalaki o babaye nga nagsunod sa Pulong sa Kaalam nga makakita og sayop niini. Ngano? Tungod kay sila nasayud sa kahimsog nga ilang natagamtam, sila nasayud sa kalinaw, sa hingpit nga kalipay, sa kahupayan, sa katagbawan nga moabut sa ilang kasingkasing kon sila mohimo sa unsay buot sa Ginoo nga ilang buhaton.¹¹

Hingpit nga walay kaayohan nga makuha ni bisan kinsa nga tawo gikan sa pagsupak sa Pulong sa Kaalam, apan anaa ang tanang kaayohan kaniya sa pagkamoral, sa salabutan, sa pisikal, ug sa espirituhanon nga paagi, diha sa pagsunod niini.¹²

Ang balaod sa kinabuhi ug kahimsog ngadto sa mga Santos sa Ulahing mga Adlaw mao ang pagsunod sa Pulong sa Kaalam.¹³

Kadtong nagsupak sa Pulong sa Kaalam maluya sa pisikal ug espirituhanon nga paagi.

Mogahin ba kita og panahon sa paghunahuna nga ang Tiglalang sa langit ug yuta, ang tigbuhat sa tanan nga atong makita niining dako nga kawanangan, ang Amahan sa atong mga espiritu, ang Amahan sa atong Ginoong Jesukristo sa espiritu ug sa unod, makigsulti kanato, nga siya mihatag kanato ug pahimangno sa ingon nga modala kanato balik ngadto sa iyang atubangan, nga maghatag kanato og kalagsik sa lawas ug hunahuna?

Apan sa gihapon adunay gatusan, adunay liboan ka mga Santos sa Ulahing mga Adlaw ngadto kinsa ang Ginoong Dios nga Makagagahum mihatag og pagpamatuod ug kahibalo nga siya buhi, kahibalo nga si Jesus mao ang Kristo, kasayuran nga si Joseph Smith propeta sa tinuod ug buhi nga Dios, ug kinsa makahimo sa paghatag niana nga saksi ug pagpamatuod dinhi sa atong nasud o sa gawas kinsa, sa panahon nga ang Ginoong Dios nga Makagagahum, ang Tiglalang sa langit ug yuta, mosulti kanila unsa ang maayo alang kanila mahitungod sa pisikal ug espirituhanon nga butang, ug mosulat niini, dili mohatag og pagtagad niini. Ako maguol nga mosulti nga karon daghan ang anak nga mga lalaki ug babaye sa mga Santos sa Ulahing mga Adlaw—pipila sa anak nga mga lalaki ug babaye sa nag-unang mga lalaki ug babaye niini nga Simbahan kinsa naghimo og sosyal nga mga panagtigum ug kinsa naghunahuna nga pag-inom sa ilang tsa ug kape ug pagdala og baraha ug ang paghimo sa mga butang nga gitudlo kanato dili maayo alang kanato. Mobasa ako kaninyo og usa ka sulat gikan sa Ginoo ngadto sa mga Santos sa Ulahing mga Adlaw. [Human mosulti niini nga pahayag si Presidente Grant mibasa sa Doktrina ug mga Pakigsaad 89].¹⁴

Ang makauulaw nga pagkadautan niini nga panahon mao ang kakulang sa hiyas. Usa lang ang sumbanan sa moralidad dinhi sa Simbahan ni Kristo. Kita gitudloan, liboan kantao nga nagdako dinhi niining Simbahan gikan pa sa atong pagkabata, nga ikaduha lang sa pagpatay ang pagkawala sa kaputli; ug buot ko nga mosulti ngadto sa mga amahan ug inahan, ug ngadto sa mga anak nga lalaki ug babaye, diha sa atong Primary, sa atong Mutual Improvement Association [Asosasyon sa Mutwal nga Pag-uswag], diha sa atong mga seminary ug mga institute, diha sa Sunday School, diha sa Relief Society ug sa atong tanang Korum sa Priesthood—buot nakong masabtan ninyo nga ang paggamit sa ilimnon nga makahubog ug tabako mao ang nagunang paagi sa kaaway diin siya mophisalaag sa mga batan-ong lalaki ug babaye gikan sa kaputli.

Hapit kanunay kadtong kinsa nawad-an sa ilang kaputli unang miambit niadtong mga butang nga makapapukaw sa ilang kahinam sulod kanila o makapakunhod sa ilang kusog sa pagbatok o makapalibog sa ilang mga hunahuna…. Ang batan-ong mga lalaki ug babaye karon kinsa naghunahuna nga sila maantigo pinaagi sa pagbutang og gamayng alak o ilimnon nga makahubog sulod sa ilang mga panimalay, ug paghimo sa mga butang nga giingon sa Ginoo nga dili nila buhaton, naghimo ug tukuran nga magdala kanila sa inanay nga kalaglagan. Sila dili mahimong magpadayon sa pagsupak sa mga kasugoan sa Ginoo nga dili madala sa makusog nga agos sa suba. Ug unsa ang makusog nga agos sa suba? Ang makusog nga agos sa suba sa ginagmay nga pag-inom [kanunay]nga mosangput ngadto sa sobra nga paginom, ug ang sobra nga pag-inom mosangput ngadto sa kalaglagan sa lawas ug sa hunahuna ug sa hugot nga pagtuo.¹⁵

Kon ang sakit moatake sa tawo kinsang lawas puno sa tabako ug puno sa ilimnon nga makahubog, o kinsa sad-an sa paghinubra ug mga pag-abuso sa bisan haing bahin sa kinabuhi, nan, wala siyay maangkon niini nga mga saad [nagpasabut sa D&P 89:18–21].¹⁶

Uban sa tabang sa Ginoo, ang matag Santos sa Ulahing mga Adlaw makatuman sa Pulong sa Kaalam.

Ang Ginoo mangita og taho kon giunsa nako paggamit ang akong nadawat nga gasa, gahum, abilidad, ug talento; ug iyang gitugahan ang matag lalaki, babaye ug bata sa mga Santos sa Ulahing mga Adlaw sa kasarang sa Pagtuman sa Pulong sa Kaalam.¹⁷

“Usa ka Pulong sa Kaalam, alang sa kaayohan sa konseho sa mga high priest, nga nagmiting sa Kirtland, ug sa Simbahan, ug usab sa mga Santos sa Zion—

“Ipadala nga katahuran; nga dili pinaagi sa sugo o pagpugos—”

Pipila ang miingon, “O, mao kana ang akong pagsabut niana. Kini wala ihatag pinaagi sa sugo o pagpugos.”Unsa man diay kana? Sultihan ko kamo unsa kana—

“apan pinaagi sa pagpadayag ug sa pulong sa kaalam, nagpakita sa han-ay ug kabubut-on sa Dios.” [D&P 89:1–2.]

Kon ang Ginoo nagpakita sa iyang sugo ug iyang kabubut-on ayaw sulayi paghupay ang inyong konsiyensya, bisan kinsa kaninyo nga nagsupak sa Pulong sa Kaalam.¹⁸

Usa ka Domingo ako miapil sa usa ka pangbuntag nga miting sa puasa, ug usa sa panghapon. Usa sa mga mamumulong sa ulahi nga tigum mao sa Sister Anna Snow….

Siya gikan sa Scandinavia ug gikan sa iyang pagkabata naanad na sa paggamit og kape, ug naghunahuna nga siya dili mabuhi kon wala kini. Apan sa katapusan, human moabut sa pangidaron nga otsenta y dos, siya nakahunahuna nga siya napakyas sa paghimo sa iyang katungdanan kalabut niana ug nakahukom, sa iyang ika otsentay tres nga adlawng natawhan nga siya motuman sa Pulong sa Kaalam sa dugang kahingpit ug mohunong sa paginom og kape. Hapit kini mopatay kaniya apan sa katapusan siya milampos sa pagbuntog sa bisyo. Ug siya mibarug nga mapaubsanon sa atubangan sa katawhan nagkumpisal sa iyang kapakyasan sa wala pagtuman sa Pulong sa Kaalam ug mipahayag sa iyang pagpasalamat sa Ginoo sa paghatag kaniya og abilidad, bisan pa man sa iyang pangidaron, sa pagbuntog sa iyang kapakyasan. Ug siya mipamatuod sa kaayohan nga iyang nadawat tungod sa kauswagan sa iyang kahimsog pinaagi sa pagtuman niini nga balaod sa Dios.

Ako nakadayeg kaayo sa iyang talagsaon nga pagpamatuod. Akong gipangandoy nga unta ang matag usa sa atong maayong mga igsoong babaye, ug usab sa igsoong mga lalaki kinsa, matag tuig, nagsupak niining yano nga kasugoan sa Ginoo, didto unta ug naminaw sa iyang pagmatuod.

Ako nasayud sa daghang mga tawo nga nakadungog sa mga wali sa Pulong sa Kaalam sa daghang mga katuigan nga wala makahatag og kausaban ngadto kanila. Wala ko masayud unsaon nato nga makatandog sa ubang tawo. Nasayud ako nga daghang mga tawo kinsa gihagoan pagtabang sa pribado, ug usab diha sa publiko nga pagtudlo ug pag-awhag. Apan kini nga mga paghago walay epekto kanila. Akong gibati sa akong kasingkasing nga akong katungdanan ang pagkaplag sa mga huyang nga dapit sa akong kinaiyahan ug dayon mag-ampo sa Ginoo nga tabangan ako sa pagbuntog niini. Sa akong pagbasa sa Pulong sa Kaalam, akong nakat- onan nga kini gipahiangay sa mga huyang sa tanang huyang nga may purohan nga tawagong Santos [tan-awa sa D&P 89:3]. Ug ako nagtuo nga usa ka maanindot nga tabang alang sa kauswagan sa gingharian sa Dios kon ang mga Santos sa Ulahing mga Adlaw motuman niining yano nga mga kasugoan sa Ginoo. Sa akong pagpaminaw niining tigulang nga igsoong babaye nga mipamatuod nga diha sa iyang katigulangon siya nakabuntog, ako nangandoy nga ang tanang Israel makadungog unta niana nga pagpamatuod ug matandog unta niana.¹⁹

Walay usa ka lalaki o usa ka babaye sa tanang mga Santos sa Ulahing mga Adlaw nga dili makatuman sa Pulong sa Kaalam kon sila moluhod … ug mag-ampo ngadto sa Dios alang sa tabang.²⁰

Mga Sugyot alang sa Pagtuon ug Panaghisgutan

Sa unsa nga paagi ang atong pagtuman o pagkulang sa pagtuman sa Pulong sa Kaalam makaimpluwensya sa atong pagpangita sa kahibalo? sa atong kasarang sa pagdawat og kaugalingong pagpadayag? sa atong katakus sa pagsulod sa templo? sa atong pisikal nga kahimsog?
Sa unsa nga paagi ang atong pagtuman sa Pulong sa Kaalam mopauswag sa atong kalamboan temporal man o espiritwal? Nganong imposible alang sa usa ka tawo nga mahimong tinuod nga mauswagon kon sila mosalikway sa mga kamatuoran diha sa Pulong sa Kaalam?
Sa unsa nga paagi ang kapakyasan sa pagtuman sa Pulong sa Kaalam mosangput sa pagkawala sa kaputli?
Kon ang usa ka tawo sa pagka karon adunay kalisdanan sa pagtuman sa Pulong sa Kaalam, unsa ang iyang mahimong buhaton aron makabaton og kusog sa pagtuman niini nga kasugoan?