Pasiuna
Ang Unang Kapangulohan ug ang Korum sa Napulog Duha ka mga Apostoles miugmad sa mga nagsunod-sunod nga Mga Pagtulun-an sa mga Presidente sa Simbahan aron sa pagtabang sa mga sakop sa Simbahan nga mapalawman ang ilang mga pagsabut sa doktrina sa ebanghelyo ug mahiduol ngadto kang Jesukristo pinaagi sa mga pagtulun-an sa mga propeta niini nga dispensasyon. Kini nga libro nagpahayag sa mga pagtulun-an ni Presidente Heber J. Grant, kinsa mialagad isip Presidente sa Ang Simbahan ni Jesukristo sa Mga Santos sa Ulahing mga Adlaw gikan niadtong Nobyembre 1918 hangtud pagka Mayo 1945.
Ang mga Santos sa Ulahing mga Adlaw mapanalanginan samtang sila mogamit sa mga pagtulun-an ni Presidente Grant sa ilang mga kinabuhi. Siya mipasabut og maayo nga: “Walay bisan unsang kahibalo, sa inspirasyon ug pagpamatuod ingon kabalaan sa buhat sa Dios nga makahatag og kaayohan ngari kanato gawas kon ang kahibalo atong gamiton sa aktwal nga inadlaw-adlaw nga lakat sa kinabuhi. Dili ang gidak-on sa nahibaloan ni bisan kinsang tawo ang makahatag kaniya og kaayohan ug sa iyang isig ka tawo; kondili ang praktikal nga paggamit sa maong kahibalo”1
Unsaon sa Paggamit Niini nga Libro
Ang matag kapitulo niini nga libro naglangkob sa upat ka mga seksyon: (1) Ang pangbukas nga pamahayag nga daklit nga nagpaila sa tumong sa kapitulo; (2) Ang “Gikan sa Kinabuhi ni Heber J. Grant, ” nga naglarawan sa mensahe sa maong kapitulo pinaagi sa pagsaysay og usa o daghang mga panghitabo gikan sa kinabuhi ni Presidente Grant; (3) Ang “Mga Pagtulun-an ni Heber J. Grant, ” nga nagpresentar sa mga doktrina gikan sa mga wali ug mga sinulat ni Presidente Grant ug gikan sa mga mensahe nga gihatag sa Unang Kapangulohan samtang Presidente pa siya sa Simbahan; ug (4) Ang “Mga Sugyot alang sa Pagtuon ug Panaghisgutan, ” nga naglangkob sa mga pangutana aron sa pag-awhag og mga personal nga mga pagribyu ug pagpakisusi, sa paggamit sa mga baruganan sa ebanghelyo, ug sa paghisgut-hisgut sa panimalay ug sa simbahan. Ang pagbasa sa mga pangutana sa dili pa tun-an ang mga pulong ni Presidente Grant mahimong makahatag og dugang pagtulun-an sa iyang mga panudlo.
Ang libro maoy gamiton sa mosunod nga mga sitwasyon:
Personal ug pangpamilya nga pagtuon. Pinaagi sa mainampoon ug mahunahunaon nga pagtuon, ang tagsa-tagsa mahimong makadawat og personal nga saksi sa mga kamatuoran nga gitudlo ni Presidente Grant. Kini nga basahon modugang sa librarya sa ebanghelyo sa matag sakop ug magsilbing usa ka importante nga kapanguhaan sa pagtudlo ug pagtuon sa pamilya sulod sa panimalay.
Panaghisgut sa mga miting sa Domingo. Kini nga libro mao ang teksto alang sa mga miting sa Domingo diha sa mga grupo sa mga high priest, mga korum sa mga elder, ug sa Relief Society, kasagaran diha sa ikaduha ug ikatulo nga mga Domingo sa matag bulan. Kini nga mga miting sa Domingo kinahanglan nagpunting sa mga panaghisgutan sa mga doktrina ug mga baruganan sa ebanghelyo. Ang mga magtutudlo kinahanglan mopukos sa sulod sa libro ug motabang sa mga sakop nga mogamit niining pagtulun- an sa ilang mga kinabuhi. Sila mahimong mokuha og mga pangutana sa katapusan sa matag kapitulo aron pag-awhag og panaghisgutan sa klase. Kon angay, ang mga sakop kinahanglan mohatag og pagpamatuod ug mopakigbahin sa mga ehemplo nga may kalabutan ngadto sa mga leksyon. Sa higayon nga ang mga magtutudlo mapainubsanon nga mangita sa Espiritu sa pagpangandam ug paghimo sa mga leksyon, ang tanang moapil mapalig- on sa ilang kahibalo sa kamatuoran.
Ang mga lider ug mga magtutudlo kinahanglang moawhag sa mga sakop sa pagbasa sa mga kapitulo sa pag-andam alang sa mga miting sa Domingo ug sa pagdala sa libro sa simbahan. Sila kinahanglan mopasidungog sa ingon nga pagpangandam pinaagi sa pagtudlo sa mga pulong ni Presidente Grant. Kon ang mga sakop nakabasa pag-una sa mga kapitulo, sila mahimong andam nga motudlo ug mohatag og kaayohan sa usag-usa.
Wala kinahanglana o girekomendar nga ang mga sakop mopalit og dugang pang mga komentaryo o pakisayran nga mga teksto aron sa pagdugang sa materyal sa libro. Ang mga sakop giawhag sa pag-abli sa mga kasulatan alang sa dugang pang pagtuon sa doktrina.
Tungod kay kini nga libro gituyo alang sa personal nga pagtuon ug pakisayran sa ebanghelyo, daghang mga kapitulo naglakip og dugang pang materyal nga magamit sa mga miting sa Domingo. Busa, ang tagsa tagsa kinahanglan magtuon diha sa panimalay aron sa hingpit mahatagan og kaayohan gikan sa mga pagtulun-an ni Presidente Grant.
Mga Tinubdan nga Gikutlo Niini nga Libro
Ang mga pagtulun-an ni Presidente Grant niini nga libro mao ang direkta nga mga kinutlo gikan sa nagkadaiyang mga tinubdan. Ang mga kinutlo mipabilin sa mga panuldok, panitik, ug pagkapital sa orihinal nga mga tinubdan gawas lang sa editoryal o topograpiko nga kinahanglan usbon aron mabasa pag-ayo. Tungod niini nga katarungan, ang mga magbabasa mahimong makakita og ginagmay nga pagkausab-usab sa mga pulong sa teksto.