Kapitulo 8

Ang Pagsunod Kanila nga Gitawag sa Dios sa Pagdumala

Kita makasuporta sa mga kadagkoan sa Simbahan pinaagi sa pag-ampo alang kanila, pagsunod sa ilang dinasig nga tambag, ug sa pagpaluyo kanila sa ilang mga kahago.

Gikan sa Kinabuhi ni Heber J. Grant

Dihang si Elder Heber J. Grant nagsugod sa iyang pag-alagad sa Korum sa Napulog Duha ka mga Apostoles, iya kining gihimo sa bug-os nga pagkamatinud-anon ngadto sa Presidente sa Simbahan. Human pa lang gayud makadawat sa iyang balaang tawag, iyang gisulatan ang iyang ig-agaw nga si Anthony W. Ivins, “Makasulti gayud ako sa tinuoray nga wala pa gayud mahitabo sa akong kinabuhi nga adunay panahon nga dili ko andam sa pag-usab sa akong giplano nga buhaton sa akto nga sugoon ako sa mga alagad sa Dios.”¹

Isip sakop sa Korum sa Napulog Duha, si Elder Grant adunay daghang mga kasinatian nga nakapalig-on sa iyang pagpamatuod sa Presidente sa Simbahan isip tigpama-ba sa Ginoo dinhi sa yuta. Sa kadugayan, dihang siya na mismo ang Presidente sa Simbahan, siya miasoy sa usa niini nga kasinatian, diin iyang nakita ang pagdasig sa Ginoo ngadto ni Presidente Wilford Woodruff. Niadtong 1890 si Presidente Woodruff mipahibalo nga maoy kabubut-on sa Ginoo nga ang mga Santos magtukod og negosyo sa paghimo og asukar nga remulatsa sa Utah. Si Elder Grant nag-alagad sa komitiba nga gimugna “sa pag-usisa mahitungod niining butanga.” Human sa makuti nga pag-usisa, ang komitiba nagkahiusa sa pagduso sa sugyot nga kalimtan sa Simbahan ang maong ideya.

Bisan pa niana, miasoy si Presidente Grant, “Si Presidente Woodruff wala makontento. Laing komitiba ang gipili. Naapil ako sa unang komitiba ug iya akong giapil sa ikaduha nga komitiba. Mihangyo ako nga dili iapil, tungod kay nakahukom na ako sa akong opinyon, nakapirma na sa akong pangalan sa taho, apan wala siya maminaw sa akong hangyo nga dili iapil. Among gitun-an pag-usab ang maong butang, sa masangkaron ug mainampingon nga paagi, ug ang ikaduhang komitiba mihatag og sukwahi nga taho. Si Presidente Woodruff miingon: ‘Ayaw hunahunaa ang taho. Ang inspirasyon ngari kanako mao nga tukoron ang industriya sa asukal.’ ”

Matinud-anon sa pahimangno sa propeta sa Ginoo, si Presidente Grant ug ang uban nagbuhat og plano sa pagtukod og buhatan sa paggama og asukal nga remulatsa. Apan, ang tibuok nasud nga krisis sa panalapi naghatag og kalisud sa pagtigum og salapi aron matukod ang buhatan. Sa gihapon usa ka pundok sa sinati nga mga negosyante misugyot nga dili maalamon alang sa Simbahan ang pagpadayon sa maong gimbuhaton. Nahinumduman ni Presidente Grant ang tubag sa iyang pangulo sa mao nga sugyot:

“Sa dihang ang sugyot gipresentar, ang tubag ni Wilford Woodruff mao kini: ‘Sukad sa adlaw nga ako nakadawat og kahibalo sa kabalaan sa ebanghelyo ni Jesukristo nga gipahayag pinaagi ni propeta Joseph Smith, gikan sa adlaw nga ako milakaw isip uyamot nga priest aron magsangyaw sa ebanghelyo, bisan tuod daw kamatayon kadto sa akong pagtan-aw, kon ang dalan sa katungdanan nga gipangayo sa ebanghelyo nga akong latason motawag kanako sa pag-atubang sa kamatayon, wala mahitabo nga mitipas ako sa tuo o sa wala; ug karon ang inspirasyon sa Ginoo ngari kanako mao ang pagtukod niini nga buhatan. Sa matag higayon nga maghunahuna ako sa paghikalimot niini, adunay kangitngit; ug sa matag higayon nga maghunahuna ako sa pagtukod niini, adunay kahayag. Atong tukoron ang buhatan bisan kon kini makaparot sa panalapi sa Simbahan.’ ”

“Amo kadtong gitukod, ” si Presidente Grant sa kadugayan miingon, “ug wala kadto makaparot sa Simbahan.” Gani, ang Simbahan sa kadugayan nagtukod usab og laing mga buhatan, nag-establisar og industriya nga nakahatag og kaayohan sa tibuok Simbahan ug sa tinagsa nga mga Santos sa Ulahing mga Adlaw.²

Sa mga katuigan nga misunod, si Presidente Heber J. Grant midalit niining yano nga tambag aron sa paggiya sa mga kinabuhi sa mga Santos sa Ulahing mga Adlaw: “Wala akoy laing nahibaloan nga sa akong pagbati mas bililhon kaayo kaysa pagkamasulundon sa tambag ug pahimangno sa Ginoo, ug sa Iyang mga alagad niini karon sa atong panahon.”³

Mga Pagtulun-an ni Heber J. Grant

Ang Ginoo nagtawag sa Iyang mga propeta ug naggiya kanila pinaagi sa inspirasyon.

Ako nagtinguha niini nga okasyon, ug sa tanan nga mga okasyon, sa paghatag og pagsaksi sa tibuok kaligdong ug sa tanang kamapainubsanon mahitungod sa pagkabalaan sa misyon ni Propeta Joseph Smith, ug sa balaan nga misyon sa matag usa sa tanan nga mga tawo nga nagsunod kaniya.⁴

Dili kamo kinahanglang mahadlok, minahal kong mga kaigsoonan, kay walay tawo nga mobarug sa ulohan sa Simbahan ni Jesukristo gawas nga siya ipahiluna diha sa kagustohan sa Langitnong Amahan.⁵

Makasulti ako nga ang mga panalangin sa Ginoo gibu-bu sa buhong nga kaabunda sa matag tawo nga mibarug sa ulohan niini nga Simbahan, tungod kay silang tanan maangayong nangayo sa inspirasyon sa Espiritu sa Dios aron mogiya kanila sa tanan nila nga gipanghimo nga buhaton.⁶

Akong nasinati si Young dihang gamay pa akong bata nga nagedad og sais anyos…. Makahatag ko og pagpamatuod sa iyang pagkamabination, sa iyang gugma ngari kanako isip usa ka tawo, sa iyang gugma sa Dios ug sa inspirasyon sa Ginoo nga miabut kaniya samtang siya nagbarug sa akong gibarugan karon, dihang may kahigayunan ako sa pagtambong ug pagpaminaw sa iyang makadasig nga mga pulong.

Gitawag ako ngadto sa Konseho sa Napulog Duha ka mga Apostoles pinaagi sa pagpadayag sa Ginoo ngadto ni Presidente John Taylor, ug gikan sa panahon nga ako misulod sa Konseho sa Napulog Duha, duha ka tuig human si John Taylor nahimong Presidente sa Simbahan, hangtud sa adlaw nga siya namatay, nakighimamat ako kaniya, matag semana nga molabay … ako nasayud nga siya sulugoon sa buhing Dios, ako nasayud nga ang inspirasyon sa Ginoo miabut ngadto kaniya; ug ako nasayud niana sa tanan nga mga okasyon, sa matag higayon nga siya moingon: “Mao kini ang gitinguha sa Ginoo, ” ug ang iyang mga kauban sa konseho sa mga apostoles mipaluyo niana nga baruganan, ug sa matag higayon siya namatud-an nga ensakto ug ang inspirasyon sa Ginoo ngadto kaniya mipakita nga ang iyang kaalam pinaagi sa gahum sa Dios, kanunay nga mas labaw kay sa kaalam sa ubang tawo.

Sa pipila ka higayon mitambong ako og mga miting…, nasayud nga adunay usa ka butang nga hisgutan ug ang akong hunahuna nausa na ngadto sa usa ka posisyon mahitungod niana nga pangutana sa labing bug-os nga pag-usa sa hunahuna nga mahimo sa tawo…. Samtang ako miadto sa mga miting … nakahukom nang daan nga modapig sa usa ka tudling sa palisiya, ako mauyonon ug bukas nga mibotar sa tukmang katugbang niana nga palisiya, tungod sa inspirasyon sa Ginoo nga miabut kang John Taylor. Sa matag usa niini nga matang sa okasyon ang sulugoon sa Ginoo, nga si Presidente Taylor, gipamatud-an nga ensakto, ug ang iyang mas taas nga paghukom, pinaagi sa inspirasyon sa Ginoo, mipatigbabaw dapig sa mga butang nga labing maayo alang sa katawhan.

Ako makaasoy sa daghang mga panghitabo sa panahon nga ang mga apostoles gipadala sa paghimo og piho nga mga buluhaton ubos sa pagdasig sa Ginoo ngadto ni John Taylor, sa panahon nga sila nagtuo nga dili sila molampos sa ilang gimbuhaton. Sila mibalik ug nakahimo sa paghatag og pagpamatuod nga pinaagi ug tungod sa tabang sa Ginoo sila nakahimo sa pagtuman sa gimbuhaton nga gihatag kanila ni Presidente Taylor, ang Propeta sa Ginoo….

Ako makahatag sa akong pagsaksi nga si Wilford Woodruff sa labing tinuod usa ka sulugoon sa buhing Dios ug matuod nga Propeta sa Dios. Si Wilford Woodruff, usa ka mapaubsanon nga tawo, mikabig ug mibunyag og gatusan ka mga tawo sa pipila lang ka bulan didto sa Herefordshire, England…. Nagtuo ako nga walay laing tawo nga nakalakaw sa ibabaw sa yuta nga hilabihan kamaayo sa pagpangabig og mga kalag ngadto sa Ebanghelyo ni Jesukristo. Siya usa ka tawo nga adunay labing talagsaon ug makahingangha nga pagkamapainubsanon; usa ka tawo nga wala gayud makasulay sa pag-apil sa dagko nga mga pamatigayon, usa ka tawo nga migugol sa iyang kaugalingon sa pagpanguma, kinsa nalambigit sa pag-alima og mga prutas ug sa pag-ugmad sa yuta, usa ka mapaubsanon nga tawo, kang kinsa daghan akong nadunggan nga mga tawo nga nag-ingon nga siya kulangan sa abilidad sa pagdumala sa tibuok Simbahan ni Kristo. Apan buot ko nga mohatag og pagsaksi kaninyo nga, ubos sa pagdasig sa Ginoo, ug tungod sa pagkamapainubsanon niana nga tawo, tungod sa iyang diosnon nga kinabuhi ug tungod kay gihigugma siya sa Dios, siya gipanalanginan labaw sa usa lang ka okasyon sa kaalam nga labaw pa sa kaalam sa mga tawo nga adunay malantip nga salabutan sa panalapi sa Simbahan….

Ako nasayud nga si Lorenzo Snow Propeta sa Dios.… Si Lorenzo Snow nahimong sakop sa kapangulohan sa Simbahan dihang nag-edad siya og otsentay singko, ug ang iyang nahimo sulod sa misunod nga tulo ka mga tuig sa iyang kinabuhi yano lang nga makahingangha nga hunahunaon. Iyang gisakwat ang Simbahan…gikan sa halos maparot nga panalapi….Sulod sa tulo ka mubong mga tuig kining tawhana, nga milapas na sa edad sa kasarang sumala sa kalibutanong pagbanabana, kining tawhana nga wala makasinati sa mga kalihokan sa panalapi, kinsa migugol sa iyang kinabuhi sulod sa daghang katuigan sa paghago sulod sa Templo, midumala sa mga panalapi sa Simbahan ni Kristo, ubos sa pagdasig sa buhing Dios, ug nianang tulo ka mga tuig miusab sa tanan, kalabot sa panalapi, gikan sa kangitngit ngadto sa kahayag….

… Ako mosaksi kaninyo nga gikan pa sa sayong mga adlaw sa akong pagkabata, sa panahon nga dili pa nako hingpit nga matugkad ang mga pagtulun-an sa ebanghelyo, nga ako sa akong kaugalingon natandog, ug ang mga luha midagayday sa akong mga aping, ubos sa inspirasyon sa buhing Dios, samtang ako naminaw ni Joseph F. Smith nga nagtudlo sa ebanghelyo.… Sa kanunay iyang gipuno ang akong kaugalingon ug mibayaw kanako samtang ako naminaw kaniya nga nagsangyaw sa ebanghelyo ni Jesukristo. Ako mosaksi nga usa siya sa pinakahalangdon nga mga propeta sa Dios nga sukad nagpuyo sa yuta; nga ang Dios nag-uban kaniya sukad sa adlaw nga siya milakaw isip batan-ong lalaki nga nagedad og kinse, aron sa pagsangyaw sa ebanghelyo ni Jesukristo sa mga Isla sa Hawaii, hangtud sa adlaw nga, human sa paghatag og saysenta ka tuig sa iyang kinabuhi ngadto sa buluhaton sa Dios, iyang gitapos ang iyang kalibutanong gimbuhaton.⁷

Ako ang gisangunan, bisan tuod huyang kaayo, mapaubsanong instrumento sa mga kamot sa Ginoo, nga mosunod sa talagsaon nga mga tawo kinsa nagdumala sa tibuok Simbahan—si Propeta Joseph Smith, kinsa akong gituohan nga dili hilabwan ni bisan kinsang tawo nga sukad nagpuyo sa yuta; kanang makahingangha nga pioneer, si Brigham Young; kanang bantugan nga tigpanalipod sa kagawasan, si John Taylor; kanang talagsaon nga tigkabig sa katawhan ngadto sa ebanghelyo ni Jesuskristo, si Wilford Woodruff; si Lorenzo Snow, ang dili kasarangan nga otsentay singko anyos nga tawo, kinsa sulod sa tulo ka tuig mipalambo sa Simbahan … ngadto sa kahimtang sa pinansyal nga kalig-on; ug kanang tawo, nga gimahal sa tanan nga nakaila kaniya, usa sa pinakabangiitang mga tawo sa tanang kalibutan, si Joseph F. Smith, ang pinakamaayo nga tigsangyaw sa katarung nga akong nailhan.⁸

Wala pa gayud kini mohunong sa pagpahibulong kanako nga ako sa tinuoray nagrepresentar sa Ginoo dinhi sa kalibutan. Ang akong pagpakig-uban gikan pa sa pagkabata sa mga dalaygon ug talagsaong mga tawo nga akong gisundan maoy nakaingon nga daw dili katuohan ang paghunahuna nga ania na ako sa susama nga ang-ang kanila.

Ang katapusang mga pulong nga gipamulong ni Presidente Joseph F. Smith mao ang, dihang milamano siya nako—namatay siya nianang gabhiona—“Panalanginan ka sa Ginoo, dodong, panalanginan ka sa Ginoo, aduna kay dakung kaakohan. Hinumdumi kanunay nga buluhaton kini sa Ginoo ug dili sa tawo. Ang Ginoo mas labaw kay ni bisan kinsang tawo. Siya nasayud kinsa ang Iyang gusto nga mangulo sa Simbahan, ug dili gayud masayop. Panalanginan ka sa Ginoo.”⁹

Ang mga propeta makadawat og inspirasyon alang sa kaayohan sa Simbahan.

Nagpasalamat ako sa Ginoo sa akong suod nga pagpakig-uban, gikan pa sa pagkabata, nila ni Presidente Brigham Young, John Taylor, Wilford Woodruff, Lorenzo Snow, ug ni Presidente Joseph F. Smith. Nagpasalamat ako sa Ginoo nga wala akoy laing nasinati gawas lang sa maayo sa akong mga pagpakig-uban sulod sa singkwenta ka tuig niining mga tawhana…. Wala gayud akoy nadungog diha sa publiko o sa pribado gikan sa mga ba-ba sa mga sulogoon sa Dios, kinsa gipili sa pagbarug sa ulohan niini nga buhat, gawas sa mga butang nga makapabayaw ug makaayo sa katawhan sa Dios.¹⁰

Mapasalamaton kaayo ako sa tinuoray nga nasayud sa walay bisan gamay nga pagduhaduha pinaagi sa akong pagpakig-uban isip usa sa mga Apostoles ni Ginoong Jesukristo nga si John Taylor, Wilford Woodruff, Lorenzo Snow, ug Joseph F. Smith nagbutang sa ilang mga pagbati sa bug-os ug sa walay pagkausab sa paglihok alang sa kauswagan sa mga Santos sa Ulahing mga Adlaw, alang sa pagsangyaw sa ebanghelyo sa atong nasud ug sa gawas, ug sa pagkasayud nga ang labing dakong tinguha sa ilang mga kinabuhi mao ang kauswagan ug kalamboan sa ebanghelyo sa kinabuhi, ug alang sa kaluwasan sa mga Santos sa Ulahing mga Adlaw. Ako mapasalamaton nga nasayud sa bug-os nga … ang mga kasingkasing niini nga mga pangulo bug-os nga gitunong sa kaayohan ug sa kalamboan sa katawhan sa Dios, ug wala gayud nila idumili ang ilang mga kaugalingon sa mga paghago alang sa kaayohan sa katawhan, nga ang ilang inadlaw nga panghunahuna, mga pag-ampo, ug mga tinguha mao ang kauswagan sa katawhan. Ako tinuoray nga nasayud nga kadtong nagpaluyo niini nga mga tawo pinaagi sa ilang hugot nga pagtuo ug sa ilang mga pag-ampo, ug sa ilang maayong mgabuhat, gipanalanginan sa Dios, dili lang sa dugang nga pagtuo ug gugma sa Dios ug pagpamatuod sa kabalaan sa buluhaton sa Ebanghelyo nga ilang giapilan, apan gipanalanginan diha sa ilang mga panudlanan sa pagkaon, sa ilang pundohanan, nga ang ilang kayutaan gipanalanginan, ug nga sila gipanalanginan sa kaalam sulod sa ilang mga pamilya, sa pagbansay kanila diha sa pagmatuto ug mga pagpahimatngon sa Dios.¹¹

Ako wala gayuy laing tinguha sa akong kasingkasing sa pagbarug atubangan sa mga Santos sa Ulahing mga Adlaw gawas nga ako unta makasulti og mga butang nga makaayo kanila, alang sa ilang kabulahanan; ug kanang gipinsar sa kinaiyahan niini nga makaaghat kanila, ug sa pagbutang diha sa ilang kasingkasing og tinguha ug determinasyon nga mas magmatinuoron, mas makugihon, mas madasigon sa paglihok sa mga katungdanan nga moabut kanila sa umaabot sa ilang mga kinabuhi kay sa ilang nahimo sa nangagi.¹²

Kita mapanalanginan samtang kita motahud ug mosunod niadtong nagdumala kanato.

Pag-ampo alang sa mga kadagkoan sa Simbahan, ug dayon paluyohi sila sa tanang paningkamot ug sa tanan nga ilang gipasalig nga buhaton.¹³

Sa akong kaugalingong kasinatian, ako nasayud nga sulod sa mga panimalay sa mga Santos sa Ulahing mga Adlaw, gikan sa panahon nila ni Presidente Brigham Young, John Taylor, Wilford Woodruff, Lorenzo Snow ug Joseph F. Smith, hangtud karong panahona, adunay midangat sa kahitas-an, sa matag adlaw nga molabay, nga mapangamuyoon ug kinasingkasing nga mga pag-ampo ngadto sa Dios alang sa inspirasyon sa Ginoo nga ihatag sa mga tawo nga nagbarug sa kapangulohan sa Simbahan, sa mga apostoles ug sa ubang mga general athority; nga sila unta, tanan tanan, dasigon sa Ginoo sa pagtuman sa mga butang nga maoy labing maayo alang sa Iyang mga anak ug sa pagsangyaw sa Ebanghelyo ni Jesukristo sa tibuok kalibutan. Nasayud ako, human sa … daghang katuigan nga mga kasinatian, nga ang mga tawo nga naghupot niini nga mga posisyon sa atong panahon isip mga apostoles ni Ginoong Jesukristo gitugahan sa espiritu sa buhi nga Dios.¹⁴

Ang hugot nga pagtuo usa ka gasa gikan sa Dios, ug sa panahon nga ang mga tawo adunay hugot nga pagtuo sa pagsunod sa ebanghelyo, ug sa pagpaminaw sa tambag niadtong nagdumala sa mga ward ug mga stake ug sa General Authorities sa Simbahan, maoy akong nasinati nga sila gipanalanginan sa Ginoo sa dakong kabuhong, ug nga daghan kanila ang nakalatas sa mabug-at nga pinansyal ug laing mga kalisdanan sa milagroso ug katingalahan nga paagi.¹⁵

Kinahanglan andam kita ug mauyonon nga mosunod sa atong mga pangulo, ug magpaluyo kanila…. Ikaw kanunay nga mapanalanginan ug makabenepisyo sa pagsunod sa mga pahimangno ug tambag niadtong gipili sa Dios sa pagdumala sa Simbahan. Pinaagi sa pagtahud sa tawo nga gipili sa Dios, ang Dios motahud ug mopanalangin kaninyo, ug samtang kamo sa inyong kaugalingon mismo mobuhat sa inyong mga kaakohan, kamo motubo ug molambo diha sa kahayag ug sa inspirasyon sa Espiritu sa Dios. Samtang kita motubo ug molambo sa ato mismong kaugalingon, ang Simbahan usab motubo ug molambo…. Kini mao ang buluhaton sa Dios. Si Joseph Smith usa ka propeta sa Dios; kinahanglan ato kanang hinumduman. Kinahanglan atong “unahon pagpangita ang gingharian sa Dios ug ang Iyang pagkamatarung, ” dayon ang ubang tanang mga butang igadugang ra [[tan-awa sa Mateo 6:33]. Ang kinabuhing dayon maoy atong gipaningkamutan. Ayaw tugoti ang kaalam, ang mga bahandi o ang edukasyon sa kalibutan, o bisan unsang butang, nga motabon sa inyong mga mata sa kamatuoran nga kini buhat sa Dios, ug nga ang tigpamaba sa Dios ania sa kalibutan; sa higayon nga siya mosulti, kinahanglan andam kita ug masugtanon, pinaagi sa atong panahon, sa atong mga talento sa tanan nga gihatag ngari kanato, sa pagkugi sa pagtuman sa unsay gusto sa Dios. Sulltihan ko kamo, ang Dios molaban sa Iyang tigpama-ba.¹⁶

Ako manghinaut ug mag-ampo nga ang mga santos mosunod sa Ebanghelyo ni Jesukristo. Ako manghinaut nga sila maminaw sa mga panudlo sa mga presidente sa mga stake ug sa mga bishop sa mga ward. Buot kong mosulti nga gilauman namo ang matag presidente sa usa ka stake ug matag bishop sa usa ka ward sa pagtudlo sa mga tawo sa kamatuoran. Gusto namo nga sultihan nila ang mga tawo nga sila gilauman nga mosunod sa Pulong sa Kaalam, nga mahimong matinud-anon nga magbabayad sa ikapulo, sa paghinumdom sa mga pakigsaad nga ilang gihimo sulod sa mga templo sa Dios, …ug nga amo silang gilauman nga mobuhat sa ilang mga katungdanan isip mga santos, ug mosangyaw sa Ebanghelyo pinaagi sa pagsunod niini.¹⁷

Daghang mga tawo kinsa, kon ang mga sulugoon sa Ginoo mosangyaw ngadto kanila sa matag tuig nga molabay, unsa man ang gipanulti walay epekto diha kanila. Apan ang mao gihapon nga mga tawo, kon sila makadawat og tambag gikan sa mga tawo sa kalibutanong kaalam, dihadiha dayon mosunod niini. Nakahinumdom ko … nga nagsangyaw og wali mahitungod sa Pulong sa Kaalam. Human niana nakadungog ko nga usa ka buotang igsoong babaye kinsa nakadungog sa akong wali nagkasakit ug mipadalag telegrama sa usa ka doktor aron paanhion sa Dakbayan sa Salt Lake, sakay sa espesyal nga tren, ug nakagasto siya og gatusan ka mga dolyares aron masayud nga nanubra ang iyang pag-inom og tsaa, ug kondili siya mohunong, sigurado gayud nga mamatay. Iyang gidawat ang pahimangno ug naayo. Kon naminaw pa lang unta siya sa akong tambag wala unta siyay bayranan, nakadaginot unta siya og gatusan ka mga dolyares, ug siya unta hingpit nga mahiuyon sa mga pagtulun-an sa Ginoo, sama sa gipadayag diha sa Pulong sa Kaalam.¹⁸

Kita mokanta ug kanunay nga naghimo niini, “Salamat, O Dios, sa Propeta nga mogiya namo karon.” [Mga Himno, no. 19.]

Adunay daghan kaayo kinsa … modugang niana ug moingon: “Kana kon siya mogiya kanato pinasubay sa ato mismo nga mga gusto ug mga hunahuna.”

Ang mga propeta sa Dios, gikan ni Joseph Smith hangtud karong mga adlawa, naggiya kanato ug sila naggiya kanato sa ensakto, sa panahon nga kita naminaw niana nga giya. Ang mga sayop nga nahimo nanghitabo tungod sa atong kapakyasan sa pagpaminaw sa propeta kinsa adunay katungod sa paggiya sa mga tawo sa Dios….

Ako nasayud nga ang dalan sa kahilwasan alang sa mga Santos sa Ulahing mga Adlaw dili lang mao ang pagkanta sa, “Salamat, O Dios, sa Propeta, nga mogiya namo karon, apan ang pagkaandam ug pagkamauyonon ug pagkamatinguhaon nga magiyahan.¹⁹

Mga Sugyot alang sa Pagtuon ug Panaghisgutan

Unsa may ipasabut sa pagpaluyo ug pagsunod niadtong gitawag sa pagdumala kanato?
Unsa may mahimo sa mga ginikanan aron matudloan ang ilang mga anak sa pagpaluyo sa mga lider sa Simbahan?
Unsa ang mga panalangin nga nadawat ninyo ug sa mga sakop sa inyong pamilya samtang kamo nagsunod sa mga tambag sa mga lider sa Simbahan? Sa unsang mga paagi nga ang maong mga kasinatian nakadugang sa inyong hugot nga pagtuo ug pagpamatuod?
Unsa nga tambag ang bag-ohay lang natong nadawat gikan sa buhing propeta? Unsa may laing piho nga mga butang nga inyong mahimo aron magpakabuhi sumala sa mga pagtulun-an sa mga propeta?