Kapitulo 11

Priesthood, “ang Gahum sa Buhing Dios”

Ang mga naghupot sa Priesthood nga nagsunod sa mga baruganan sa katarung mahimong mga instrumento sa mga kamot sa Ginoo diha sa pagpangalagad sa uban.

Gikan sa Kinabuhi ni Heber J. Grant

“Dili gayud nako hikalimtan ang okasyon, ” matud ni Presidente Heber J. Grant, “sa dihang ang usa ka amigo mihangyo kanako, sa pagkasayud nga ang doktor mipahibalo nga ang iyang anak nga babaye, nga gitakbuyan sa sakit nga diphteria, mahimong mamatay sa dili pa moabut ang buntag. Iya akong gihangyo sa pag-ampo alang nianang anak nga babaye, ug human mobiya sa iyang opisina ako nag-ampo sa tanang pangaliya sa akong kalag nga ang Dios moayo nianang batang babaye. Samtang nag-ampo, ang inspirasyon miabut kanako: ‘Ang gahum sa buhing Dios ania sa yuta. Ang priesthood ania. Pagdali! Pagdali!… Lakaw ug santaa ang gahum sa tiglaglag, ug ang batang babaye mabuhi.’

“Ang doktor nga nag-atiman niadtong batang babaye, miingon nga dili na siya maabtan og buntag; apan sa pag-abut sa kabuntagon siya mipasabut nga wala siya makatugkad niini, ug nga siya nagtuo nga ang batang babaye mamaayo. Dili siya makapugong sa pagpadayag sa iyang kahingangha sa kalit nga kausaban sa kondisyon sa batang babaye. Ang gahum sa buhing Dios misanta sa tiglaglag.”¹

Si Presidente Grant naglipay sa inspirasyon nga iyang nadawat niadtong gabhiona: “Ang gahum sa buhing Dios ania sa yuta. Ang Priesthood ania.” Sa iyang pakigpulong sa kinatibuk-ang komperensya, kanunay siyang nagtudlo sa mga Santos mahitungod sa mga panalangin nga mahimo nilang madawat pinaagi sa gahum ug katungod sa priesthood.

Mga Pagtulun-an ni Heber J. Grant

Ang mga yawe, katungod, mga ordinansa, ug mga gasa sa priesthood gipahiuli na.

Samtang ang paghubad sa [basahon ni Mormon] nagpadayon, si Joseph Smith nakakat-on nga ang doktrina sa bunyag gitudlo ug gisunod sa mga Nephite. Nagtinguha nga makat-on og dugang niini nga baruganan iyang gihimo ang iyang gibuhat sa una, miadto uban ni Oliver Cowdery, ang iyang tigsulat, taliwala sa kakahuyan, ug mihimo sa mapangamuyoon nga pag-ampo. Ang mosunod gikutlo gikan sa iyang kaugalingong mga pulong:

“Samtang kami nagbuhat sa ingon, nag-ampo ug nagtawag ngadto sa Ginoo, usa ka sulugoon nga gikan sa langit mikunsad sa usa ka panganod sa kahayag, ug samtang nagpandong sa iyang mga kamot kanamo, siya mi-orden kanamo, nag-ingon:

“ ‘Diha kaninyo akong kauban nga mga sulugoon, sa ngalan sa Mesiyas, ako motugyan sa Pagkapari ni Aaron, nga naghupot sa mga yawe sa pagpangalagad sa mga angel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala; ug kini dili na pagakuhaon pag-usab gikan sa yuta hangtud nga ang mga anak ni Levi maghalad pag-usab og halad ngadto sa Ginoo sa pagkamatarung.’

“Ang sinugo nga miduaw kanamo niini nga higayon mitugyan niini nga Pagkapari ngari kanamo, miingon nga ang iyang ngalan mao si Juan, kadto gihapon nga gitawag og Juan Bautista sa Bagong Tugon, ug nga siya nagbuhat ubos sa panudlo ni Pedro, Santiago ug Juan, kinsa naghupot sa mga yawe sa Pagkapari ni Melchizedek, diin nga Pagkapari, siya miingon, sa angay nga panahon itugyan ngari kanamo.” [Tan-awa sa Joseph Smith— Kasaysayan 1:68–69, 72.]

Tungod niini nga pag-orden, ug sa pagpahiuli sa Melchizedek Priesthood nga sa kadugayan gikumpirma sama sa gisaad, ang kahingpitan sa mga yawe ug ang katungod sa Priesthood sa Makagagahum nga Dios, nga sa gatusan ka mga katuigan nawala sa katawhan, gipahiuli ug nagpabilin sa Simbahan sa walay pagkaputol nga pagsunodsunod hangtud karong panahona.

Pinaagi sa pagpahiuli sa priesthood ang dalan giablihan alang sa pagsangyaw sa Ebanghelyo, sa pagpahigayon sa mga ordinansa nga may kalabutan niini, ug sa pag-organisar sa Simbahan.²

Ako nasayud nga walay mga gasa, walay mga grasya, walay katungod, nga gihuptan sa mga apostoles panahon sa Manluluwas nga wala hupti karon sa mga katawhan sa Dios.³

Ako mohatag sa akong pagsaksi kaninyo karong adlawa nga ania kanato ang kamatuoran, nga ang Dios nakigsulti pag-usab, ang matag gasa, matag grasya, matag gahum ug ang matag pagtuga nga miabut pinaagi sa balaan nga Priesthood sa buhing Dios sa panahon sa Manluluwas ania karon. Ako nagmalipayon pagkahibalo nga kining mga butanga nga kinahanglan matagamtaman— ang mga panalangin, ang makaayo nga gahum sa Dios nga Makagagahum, ang pagdasig sa Iyang Espiritu diin ang mga kalalakin- an ug mga kababayenhan nakadawat og mga panghimatuod gikan Kaniya, ang pagdasig sa Espiritu sa Dios nga pinaagi niini ang mga tawo nakasulti pinaagi sa bag-ong pinulongan ug nakadawat sa pagpanghubad niini, ug ang matag usa ug tanan nga grasya ug gasa—natagamtam karon sa mga Santos sa Ulahing mga Adlaw.⁴

Ang makaayo nga gahum sa priesthood ania dinhi sa Simbahan.

Ako nasayud nga ang makaayo nga gahum sa Makagagahum nga Dios ania niini nga Simbahan. Ako nasayud nga kondili pa tungod sa makaayo nga gahum sa Dios wala unta akoy kahigayunan nga mobarug sa inyong atubangan karong adlawa. Ako nasayud nga adunay buhi nga mga monumento sa makaayo nga gahum sa Dios dinhi niini nga katawhan. Kon duna pa unta kitay talaan sa tanang maanindot nga mga panalangin sa Ginoo nga miabut tungod sa Priesthood sukad sa pagtukod sa Simbahan ibabaw sa yuta, kini nga talaan mas baga pa unta kay sa Bag-ong Tugon.⁵

Atol sa usa ka okasyon sa dihang ang akong [igsoon sa gawas] nga si Joseph Hyrum Grant … maoy tigbantay sa kwadra sa kabayo…, pipila ka mga empleyado sa Z.C.M.I. nga buhatan sa sapatos naglingaw sa pagpanuroy sa gawas…. [Si Joseph, ] nga maoy gitugyanan sa mga sakyanan, mipahimangno kanila nga adunay umaabut nga unos, ug siya miawhag kanila sa pagpamauli, nagingon nga … piligro nga … matuwad sa bagyo ug sa kangitngit. Apan naghimo sila og kasabutan nga walay tulubagon ang taga opisina kon adunay aksidente nga mahitabo.

Sa pagpamauli taliwala sa kangitngit ang sakyanan natuwad ug pipila ka mga tawo nakaangkon og grabe nga samad. Usa sa mga babaye nabalian og ubay-ubay nga mga bukog ug isip resulta sa iyang mga samad ug pagkabantang sa unos, natakbuyan og pulmonya. Ang nag-atiman nga doktor mipahayag nga dili na siya mabuhi, ug mahimong mamatay sa dili pa mabuntag. [Si Joseph] nahasol kaayo mahitungod sa maong panghitabo, nga maoy nagmaniho sa sakyanan. Iya akong gihangyo sa pag-uban kaniya aron sa pagpangalagad nianang babaye, nag-ingon nga siya nakadawat og panghimatuod sa espiritu nga ang babaye dili mamatay.

Sa pagduol namo sa higdaanan, ako siyang gisultihan nga ang babaye himatyon na ug mamatay na sa dili pa namo kuhaon ang among kamot gikan sa iyang ulo. Nangluspad siya pag-ayo ug namahayag nga siya nakadawat og pagpamatuod gikan sa Ginoo, ug nga siya nasayud, sama nga ang ebanghelyo tinuod, nga kon siya mopanalangin kaniya siya maayo. Amo tuod siyang gipanalanginan, ug sa pagkumpirma ug sa pagdihog ako naaghat sa pagpanaad nga ang iyang mga bukog magtakdo, ug nga siya mamaayo ug makabalik sa pagmaniho sa iyang makina sa buhatan sa sapatos sa Z.C.M.I. Wala ako masayud nga nagmaniho diay siya og makina o kon unsa ang iyang trabaho. Nianang gabhiona nahimamat nako ang superintendente sa buhatan ug siya miingon: “Gikan pa lang ako sa panimalay ni Marie DeGray, ug himatyon na siya. Sa akong pagtuo patay na siya karon.” Ako miingon: “Brother Rowe, lakaw sa imong opisina ug lingkod ug isulat: ‘Si Marie DeGray wala mamatay. Si Marie DeGray dili mamatay, apan siya mamaayo ug makabalik ug makamaniho sa iyang makina sa buhatan.’ Kini gipanghimatuod ngari kanako sa espiritu sa buhing Dios.” Siya miingon: “Dili na ako kinahanglang mosulat niini, tungod kay sigon sa imong gisulti, ako nasayud nga siya mabuhi.”

Siya dayon miasoy kanako sa usa ka insidente nga nahitabo sa iyang kaugalingong pamilya. Miingon siya: “Didto sa London sa wala pa ako moanhi niini nga nasud, usa sa akong mga anak nga babaye nagmasakiton pag-ayo, ug ang nag-atiman nga doktor miingon nga dili na siya maabtan og buntag.” Iyang gipakuha, sigon sa akong nahinumduman, mga lima ka kilometros ang gilay-on latas sa bantugan nga siyudad sa London, si Junius F. Wellas ug ang iyang kauban aron sa pag-adto ug pagpangalagad sa iyang anak nga babaye, ug siya nahibalik sa kahimsug. “Sa sunod adlaw, ” miingon si Brother Rowe, “ang doktor miabut sa akong panimalay ug gihatagan niya ako og sinulat nga sertipiko, pinermahan na, nga nagpahayag nga ang akong anak nga babaye patay na. Ako siyang gidapit sulod sa lawak dawatanan ug gipahimamat siya sa ‘patay na kunohay nga lawas.’ Busa sa panahon nga ikaw moingon nga kining batang babaye mamaayo, dawaton nako ang imong pamahayag. Kay ako nasayud nga ang makaayo nga gahum sa Dios ania niini nga Simbahan, sama nga ako nasayud nga ako buhi.”⁶

Giniyahan sa mga baruganan sa katarung, ang mga naghupot sa priesthood mahimong makadawat sa mga gahum sa langit.

Dili usa ka yano nga butang ang paghupot sa Priesthood sa Dios—ang pag-angkon sa katungod sa pag-impluwensya sa mga gahum sa kalangitan alang sa kaayohan.⁷

Mahitungod sa katungod sa Priesthood sa Dios ug kon unsaon ang paggamit niini: Ang Propeta sa buhing Dios gibilanggo sulod sa prisohan sa Liberty ug daghang tawo ang gusto nga siya pasakaan og kaso ug pagasilutan; apan ang tanang mga pultahan sa prisohan wala makapugong sa pagpadayag sa hunahuna ug kabubut- on sa Dios nga moabut niadtong adunay katungod sa pagdawat niini; ug samtang didto sa prisohan sa Liberty si Propeta Joseph Smith nakadawat sa usa sa labing mahinungdanon sa tanang mahinungdanon nga mga pagpadayag gikan sa Dios nga nahisulat sa Doktrina ug mga Pakigsaad. Mobasa ako gikan sa Seksyon 121:

“Hangtud kanus-a magpabilin nga mahugaw ang tubig nga nagdagan? Unsa nga gahum ang makapugong sa langit? Maayo pa sa tawo nga molugway sa iyang walay kusog nga kamot sa pagpahunong sa sapa sa Missouri sa iyang walay pagkabalhin nga agianan, o sa pagpabalik niini, kay sa pagpugong sa Makagagahum sa pagbu-bu sa kahibalo gikan sa langit diha sa mga ulo sa mga Santos sa Ulahing mga Adlaw.

“Tan-awa, adunay daghan nga gitawag, apan pipila lamang ang gipili. Ug ngano nga wala sila mapili?

“Tungod kay ang ilang mga kasingkasing gipahimutang diha sa mga butang niini nga kalibutan, ug naninguha sa mga pasidungog sa mga tawo, nga sila wala makakat-on niining usa ka pagtulun-an—

“Nga ang katungod sa pagkapari dili mabulag gikan sa mga gahum sa langit, ug nga ang mga gahum sa langit dili madumala ni madala gawas lamang diha sa mga baruganan sa pagkamatarung.

“Aron sila ikatugyan ngari kanato, tinuod kini; apan kon kita mosulay sa pagtabon sa atong mga sala, o sa pagtagbaw sa atong garbo, sa atong walay kapuslanan nga pangandoy, o sa paggamit sa gahum o kamandoan o pagpugos sa mga pagbati sa mga katawhan, bisan unsa nga matang sa pagkadili matarung, tan-awa, ang langit sa ilang mga kaugalingon mobiya; ang Espiritu sa Ginoo maguol ug kon kini mobiya, Amen sa pagkapari o sa pagtugot niana nga tawo.

“Tan-awa, sa dili pa siya masayud, siya gipasagdan ngadto sa iyang kaugalingon, sa pagpatid batok sa mga tunokon, sa pagpanggukod sa mga santos, ug pagpakig-away batok sa Dios.

“Kita nakakat-on pinaagi sa makapasubo nga kasinatian nga kini mao ang kinaiyahan ug pamaagi sa hapit tanan nga mga tawo, sa diha nga sila makakuha og gamay nga pagtugot, ingon sa ilang gituohan, sila dayon mosugod sa paghimo og dili matarung nga kamandoan.

“Tungod niini daghan ang gitawag, apan pipila lamang ang mga gipili.” [D&P 121:33–40.]

Karon, gusto nakong hatagan og gibug-aton ang nahibilin niini nga pagpadayag, nga gihatag sulod sa prisohan. Sa tanang gahum sa usa ka Estado nga naningkamot sa pagkuha sa kagawasan ni Joseph Smith, wala sila makapugong sa pagpakigsulti niini nga propeta sa kalangitan, ug siya nakadawat sa mosunod nga dinasig nga mga pulong nga kinahanglan dili hikalimtan ni bisan kinsa nga bishop o ni bisan kinsa nga presidente sa stake, o ni bisan kinsa nga apostoles, o ni bisan kinsa nga presidente sa Simbahan samtang sila naghupot og katungdanan niini nga Simbahan:

“Walay gahum o impluwensya nga makahimo o angay gayud nga magpadayon pinaagi sa hiyas sa pagkapari, gawas lamang sa pagdani, sa pagkamainantuson, sa kalumo ug kaaghup, ug sa tiunay nga paghigugma;

“Pinaagi sa pagkamabination, ug putli nga kahibalo, diin makapadugang sa hilabihan sa kalag nga walay pagpakaaron-ingnon, ug walay pagpanglimbong—

“Pagpanton sa tukma nga panahon uban ang tuman nga kahigpit, kon gidasig sa Espiritu Santo; ug dayon mopakita pagkahuman og dugang nga paghigugma ngadto kaniya kinsa inyong gipanton, basin pa unya siya moisip kanimo nga iyang kaaway;

“Aron siya masayud nga ang inyong pagkamatinud-anon labaw pa nga malig-on kay sa higot sa kamatayon.

“Himoa usab ang inyong mga kasingkasing nga mapuno sa gugma nga putli ngadto sa tanan nga mga tawo, ug ngadto sa mga sakop sa pagtuo, ug himoa ang hiyas nga modayandayan sa inyong mga hunahuna nga walay paghunong; unya ang imong pagsalig mosamot pagkalig-on diha sa atubangan sa Dios; ug ang doktrina sa pagkapari motuhop diha sa imong kalag ingon sa mga yamog nga gikan sa langit.

“Ang Espiritu Santo mao ang inyong kauban sa kanunay, ” Labaw pa ka bililhon kay sa tanang mga bahandi sa tibuok kalibutan mao ang pagbaton sa Espiritu Santo isip atong kanunay nga kauban.

“ug ang inyong pagmando usa ka dili mausabon nga pagmando sa pagkamatarung ug kamatuoran; ug ang inyong kamandoan mao ang usa ka walay katapusan nga kamdoan, ug walay pagpugos nga paagi kini mokanap nganha kanimo hangtud sa kahangturan.” [D&P 121:41–46.]⁸

Sa pagpakighinabi sa mga Santos sa Ulahing mga Adlaw, walay pagpadayag diha sa tibuok nga Doktrina ug mga Pakigsaad nga akong gikutlo sa makadaghan kay sa nianang nahisulat sa Seksyon 121 … nga “Walay gahum o impluwensya nga makahimo o angay gayud nga magpadayon pinaagi sa hiyas sa pagkapari, gawas lamang sa pagdani, sa pagkamainantuson, sa kalumo ug kaaghop, ug sa tiunay nga paghigugma.”

Walay makuyaw mahitungod sa Pagkapari niini nga matang— kalumo, ug kaaghup, ug tiunay nga gugma. Apan kon kita mogamit sa gahum, o kamandoan o pagpugos sa mga pagbati sa mga katawhan, sa bisan unsa nga matang sa pagkadili matarung, tanawa, ang mga langit sa ilang mga kaugalingon mobiya. Ang Espiritu sa Ginoo maguol; ug kon kini mobiya, Amen sa pagkapari o sa pagtugot niana nga tawo.” Kini ang mga pulong sa Dios.⁹

Mangil-ad ba ang paggamit sa Priesthood sa buhing Dios sa pamaagi nga gibaod sa Ginoo: “Pinaagi sa kalumo ug kaaghup”? Mao kana ang bugtong paagi, ug gawas nga gamiton kini nianang paagiha, Amen sa pagkapari o sa pagtugot niadto kinsa naghupot sa priesthood sa Simbahan ni Jesukristo.¹⁰

Ang mga kalalakin-an nga naghupot sa Priesthood kinahanglan nga dili mogamit niini alang sa ilang kaugalingong kabulahanan…. Kon ila kining buhaton mawala kanila ang espiritu sa Ginoo ug magtinguha sa mga butang niini nga kalibutan kay sa mga butang sa Dios.¹¹

Wala kitay mahimo, sama sa nahisulat niana nga pagpadayag, gawas lamang kon kita mopakita og gugma ug gugmang putli ug pagkamabination—tiunay nga paghigugma. Dinuyogan sa tabang sa Ginoo ako mangalagad sa ingon gayud niana nga pamaagi, sa tibuok nakong abilidad, sa Priesthood sa Dios nga akong naangkon.¹²

Mga Sugyot alang sa Pagtuon ug Panaghisgutan

Sa unsa nga pamaagi nga kamo ug ang inyong pamilya napanalanginan tungod sa paggamit sa priesthood?
Unsaon man nato sa pagpakita og pagtahud sa priesthood? Unsaon man nato pagtabang ang mga sakop sa pamilya sa pagrespeto sa priesthood?
Unsa may naagian ninyo nga mga kasinatian nga nakapalig-on sa inyong mga pagpamatuod mahitungod sa makaayo nga gahum sa priesthood? Sa panahon sa pagmasakiton o laing mga kasakit, unsa may atong mahimo aron makaila sa kalainan sa atong mga tinguha gikan sa kabubut-on sa Ginoo?
Unsa may inyong nakat-unan gikan sa pagpadayag diha sa Doktrina ug mga Pakigsaad 121:33–46? Nganong kinahanglan man gayud nga ang mga naghupot sa priesthood mosunod sa mga baruganan niini nga pagpadayag aron makahimo sa pagbuhat pinaagi sa ngalan sa Ginoo? Sa unsang mga paagi nga magamit kini nga mga baruganan sa tanan natong pagpakigrelasyon sa uban?
Sa unsang paagi nga ang mga panalangin sa priesthood matagamtam niadtong walay mga naghupot sa Melchizedek Priesthood sa ilang mga panimalay?