Kapitulo 2

Ang Misyon ni Propeta Joseph Smith

Ang Simbahan ni Jesukristo sa mga Santos sa Ulahing mga Adlaw ligdong nga misalig sa mga padayag sa Dios nga gihatag pinaagi ni Propeta Joseph Smith.

Gikan sa Kinabuhi ni Heber J. Grant

Ang pagpamatuod ni Heber J. Grant mahitungod ni Propeta Joseph Smith nagsugod sa sayo nga pangidaron samtang ang iyang mama ug ang iyang higala nga si Eliza R. Snow misulti kaniya sa ilang personal nga mga kasinatian uban sa Propeta. Ang iyang pagpamatuod mahitungod sa Propeta naimpluwensya usab sa mga pagpamatuod nila ni Presidente Brigham Young, John Taylor, Wilford Woodruff, Lorenzo Snow, ug ni Joseph F. Smith—mga tawo nga personal nga nakaila ni Joseph Smith. Si Presidente Grant miingon, “Gumikan sa pagpamatuod sa akong mama ug sa gatusan pa kinsa nakaila kang Propeta Joseph, ingon man usab pinaagi sa mga padayag sa Espiritu sa Dios ngari kanako, nahibalo ko nga si Joseph Smith usa ka Propeta sa Dios.”¹

Sa tibuok niyang pangalagad isip usa ka Apostol ug isip Presidente sa Simbahan, si Heber J. Grant ganahan nga mopamatuod mahitungod ni Propeta Joseph Smith ug sa pagpahiuli sa ebanghelyo. Siya namahayag: “Wala pay tawo nga dunay mas tinuod nga kalipay sa pagpamatuod sa iyang kahibalo nga ang Dios Buhi ug si Jesus mao ang Kristo, ug nga si Joseph Smith mao ang Propeta sa Dios, nga ako aduna usab niana. Ako nagmaya niini.”²

Samtang si Elder Grant nag-alagad diha sa Korum sa Napulog Duha ka mga Apostoles, ang iyang pagpamatuod mahitungod ni Propeta Joseph nakatampo sa pagkakabig sa iyang igsoon sa gawas nga si Fred, “kinsa linga, lain og batasan, ug badlungon, ug kinsa nagpakita nga dili interesado sa ebanghelyo ni Jesukristo.”³ Si Elder Grant didto sa Tabernakulo sa Salt Lake usa ka adlaw, nagandam sa paghatag og pakigmulong, sa dihang iyang nakita si Fred nga misulod sa bilding. Siya miasoy:

“Sa dihang … akong nakita si Fred sa unang higayon sulod sa Tabernakulo, ug nakaamgo nga siya nagtinguha sa kahayag sa Dios ug nahibalo mahitungod sa kabalaan niini nga buhat, ako miduko ug nag-ampo nga kon ako hangyoon sa pagpamulong ngadto sa nanambong, ang Ginoo modasig kanako pinaagi sa pagpadayag sa Iyang Espiritu, sa pagpamulong nga sa ingon ang akong igsoon mahimong makaila nga ako namulong labaw pa sa natural nga abilidad, nga ako gidasig sa Ginoo. Ako nakaamgo nga kon siya mohimo nianang pagkompisal, nan ako mahimong motumbok ngadto kaniya nga ang Dios naghatag kaniya sa usa ka pagpamatuod sa kabalaan niini nga buhat.”

Sa dihang iya nang turno sa pagpamulong, si Elder Grant miadto sa pulpito ug miabli sa libro aron makagiya kaniya sa pakigpulong nga iyang giandam. Dayon siya miingon ngadto sa kongregasyon, “ako dili makasulti kaninyo kon ngano, apan wala pa gayud masukad sa akong kinabuhi nga ako nagtinguha og ingon kadako nga pagdasig sa Ginoo sama sa akong pagtinguha niini karon.” Siya “mihangyo sa mga tawo alang sa ilang hugot nga pagtuo ug mga pag-ampo” ug mipadayon uban sa iyang hilum nga pangamuyo alang sa inspirasyon. Human sa pakigpulong sulod sa 30 ka minuto, siya mibalik aron molingkod sa iyang lingkuranan. Siya sa kaulahian misaysay:

“Sa dihang ako milingkod human sa akong pagsulti, ako nahinumdom nga ang akong libro nag-abli lang gihapon didto sa pulpito. “Si Presidente George Q. Cannon [Unang Magtatambag sa Unang Kapanguluhan] naglingkod diha gayud sa luyo nako…, ug akong nadunggan nga siya miingon sa iyang kaugalingon: ‘Salamat Dios sa gahum niana nga pagpamatuod!’ sa dihang ako nakadungog niini, ako nakahinumdom nga akong nalimtan ang sermon nga ako untang isulti, ug ang mga luha midagayday sa akong mga mata sama sa ulan, ug akong gitukod ang akong mga siko sa akong mga tuhod ug gibutang ang akong mga kamot sa akong nawong, aron nga ang mga tawo nga naa sa akong duol dili makakita nga naghilak ako sama sa usa ka bata. Ako nasayud sa dihang akong nadunggan kadtong mga pulong ni George Q. Cannon nga ang Dios nakadungog ug mitubag sa akong pag-ampo. Nakahibalo ako nga natandog ang kasingkasing sa akong igsoon.

“Akong gihatag ang akong hapit tanang traynta ka minuto sa usa ka pagpamatuod sa akong kahibalo nga ang Dios buhi, nga si Jesus mao ang Kristo, ug sa maanindot ug talagsaon nga kahago ni Propeta Joseph Smith, naghatag og pagsaksi sa kahibalo sa Dios nga gihatag kanako nga si Joseph Smith usa gayud ka propeta sa tinuod ug buhi nga Dios.

“Pagkasunod buntag, ang akong igsoon misulod sa akong opisina ug miingon, ‘Heber, didto ko sa miting gahapon ug nakadungog ko nimo nga nagsangyaw.’

“Ako miiingon, ‘Ang unang higayon nga imo gayud nga nadungog ang imong igsoon nga nagsangyaw, di ba?’

“ ‘Dili oy, ’ siya miingon, ‘ako nakadungog na nimo sa daghan nang higayon. Kadaghanan maulahi kong moabut ug modayon ko sa balkonahe. Kanunay kong mogawas sa dili pa mahuman ang miting. Apan wala ka makapamulong sukad sama sa imong gihimo gahapon. Namulong ka labaw pa sa imong natural nga abilidad. Gidasig ka sa Ginoo.’ Kini ang mga pulong nga akong gilitok sa miaging adlaw, diha sa akong pag-ampo ngadto sa Ginoo!

“Ako miingon ngadto kaniya, ‘nag-ampo ka ba gihapon alang sa usa ka pagpamatuod sa ebanghelyo?’

“Siya miingon, ‘O, ug hapit nako mapuno sa kahigawad.’

“Nangutana ko, ‘Mahitungod man sa unsa ang akong gisangyaw kagahapon?’

“Siya mitubag, ‘kahibalo ka ba mahitungod sa unsa ang imong gisangyaw.’

“Miingon ko, ‘sultihi ko.’

“ ‘Imong gitudlo ang balaan nga misyon ni Propeta Joseph Smith.’

“Ako mitubag, ‘Ug ako nadasig labaw pa sa akong natural nga abilidad; wala ka makadungog nako nga namulong sama kagahapon. Nagpaabut ka ba nga ang Ginoo mokuhag puspus ug mohampak nimo? Unsa pa may labaw sa pagpamatuod nga imong gusto sa ebanghelyo ni Jesukristo kaysa gipamulong sa tawo lapas sa iyang natural nga abilidad ug ubos sa inspirasyon sa Dios, diin siya mipamatuod sa balaan nga misyon ni Propeta Joseph Smith?’

“Pagkasunod nga Igpapahulay siya misulti kanako nga magpabunyag.’⁴

Mga Pagtulun-an ni Heber J. Grant

Ang Dios mipahiuli sa kahingpitan sa ebanghelyo pinaagi ni Propeta Joseph Smith.

Ang mensahe sa Ang Simbahan ni Jesukristo sa mga Santos sa Ulahing mga Adlaw ngadto sa kalibutan mao nga ang Dios buhi, nga si Jesukristo mao ang Iyang Anak, ug nga Sila mipakita ngadto sa bata nga si Joseph Smith, og misaad kaniya nga siya kinahanglan mahimong instrumento sa mga kamot sa Ginoo sa pagpahiuli sa tinuod nga ebanghelyo sa kalibutan.⁵

Human sa pagpalansang ni [Jesus] ug sa kamatayon sa mga apostoles nga iyang pinili, kinsa nahiagom sa pagkamartir diha sa mga kamot niadtong supak sa mga kamatuoran nga iyang gitudlo, nakita nga daw ang iyang misyon ug pangalagad napakyas; apan sa paglabay sa panahon, ug ang mga doktrina sa Kristianismo mas nasabtan na, ang mga manggihunahunaon nga mga kalalakin-an miduol ngadto kaniya isip ilang tinubdan sa kahayag ug kalig-on, ug niana nagpatunhay sa ilang pagtuo mahitungod sa iyang misyon ug pangalagad, ug tungod niana ang Kristiyanismo nahimong dominante nga impluwensya diha sa sibilisasyon ug sa kalamboan sa kalibutan.

Sa paglabay sa panahon ang panag-away nahitabo sa karaan nga simbahan. Ang mga balaod nga gitukod sa Manunubos, gibalewala, ang mga ordinansa, giusab, ang walay katapusan nga pakigsaad gibungkag [tan-awa sa Isaias 24:5]. Ang mga katawhan nagsugod sa pagtudlo sa doktrina nga hinimo lamang sa tawo [tan-awa sa Mateo 15:9]; usa ka pamaagi sa pagsimba gipasiugdahan nga gitawag og Kristiyanismo, apan walay gahum sa Dios sama sa karaan nga simbahan. Espirituhanon nga kangitngit mitabon sa yuta ug ang baga nga kangitngit mitabon sa hunahuna sa katawhan [tan-awa sa Isaias 60:2].

Dayon miabut ang laing mahinungdanon nga panahon sa kasaysayan sa kalibutan. Ang panahon miabut, ang gi-orden nang daan sa Ginoo, ug gipanagna sa iyang mga propeta, ang panahon nga ang laing dispensasyon sa ebanghelyo masugdan, sa panahon nga ang ebanghelyo sa gingharian ipahiuli ug isangyaw ngadto sa kalibutan, isip usa ka saksi ngadto sa tanan nga katawhan sa dili pa moabut ang katapusan.

Usab ang langit nagmaya, usab ang langitnong mga binuhat mihatud sa kabubut-on sa Amahan ngadto sa iyang mga anak kinsa anaa sa yuta, ug ang mga kalalakin-an nahinangup samtang ang Dispensasyon sa Kahingpitan sa Panahon gisugdan na.

Si Joseph Smith mao ang tawo kinsa nakita sa Ginoo nga angayang mosugod sa buhat sa ulahing mga adlaw. Mipakita ngadto kaniya ang Amahan ug ang Anak diha sa langitnong panan-awon, diha kaniya ang mga yawe sa walay katapusan nga priesthood gitugyan, inubanan sa katungod sa pagpasa niini ngadto sa uban, inubanan sa saad nga ang priesthood dili na gayud kuhaon pag-usab sa kalibutan, hangtud ang mga katuyoan sa Amahan matuman.⁶

Sa daghang mga dapit ako nakahimamat og mga tawo nga nagtuon sa atong pagtuo. Ang uban nila moingon: “Ako makadawat sa tanan ninyong gitudlo gawas lamang niining tawo nga si Joseph Smith. Kon inyo lang unta nang kuhaon!”

Ang adlaw dili gayud moabut nga kami mobuhat niana. Sama ra nga kami misulay sa pagkuha ni Jesukristo, ang anak sa buhi nga Dios. Duha ray kapilian. Mahimong si Joseph Smith tinuod nga nakakita sa Dios ug tinuod nga nakig-istorya Kaniya, ug ang Dios Mismo tinuod nga mipaila ni Jesukristo ngadto sa batan-on nga si Joseph Smith, ug si Jesukristo tinuod nga misulti ni Joseph Smith nga siya mahimong instrumento sa mga kamot sa Dios sa pagtukod pag-usab sa tinuod nga ebanghelyo ni Jesukristo dinhi sa yuta—o kondili ang gitawag nga Mormonismo, usa lang ka tumo tumo. Ug ang Mormonismo dili usa ka tumo tumo! Mao kini ang gahum sa Dios ngadto sa kaluwasan. Mao kini ang Simbahan ni Jesukristo, gitukod ubos sa Iyang direksyon, ug ang tanang mga pagsupak sa kalibutan dili makausab sa katukoran nga mga sukaranan nga may kalabutan sa Simbahan ni Jesukristo sa mga Santos sa Ulahing mga Adlaw.

Ang matag Santos sa Ulahing mga Adlaw nagtuo nga ang Dios mipakita ngadto sa bata nga si Joseph Smith, ug matag Santos sa Ulahing mga Adlaw nagtuo nga ang Dios Mismo mipaila ni Jesukristo ngadto sa bata nga si Joseph Smith isip: “Akong pinalanggang Anak: paminawa Siya.” [Joseph Smith—Kasaysayan 1:17]⁷

Ang tibuok katukoran niining Simbahan lig-on nga gitukod pinaagi sa inspirasyon sa buhi nga Dios pinaagi ni Joseph Smith ang Propeta.⁸

Ang Unang Panan-awon ni Joseph Smith nagtimaan sa sinugdanan sa “usa ka kahibulongan nga buhat ug katingalahan.”

“Ang labing mahimayaon nga butang nga sukad nahitabo sa kasaysayan sa kalibutan sukad pa nga ang Manluluwas nagpuyo sa yuta, mao nga ang Dios mismo nakakita nga angay bisitahon ang yuta sa Iyang pinalangga, ang bugtong Anak, atong Manunubos ug Manluluwas, ug sa pagpakita ngadto sa batan-on nga si Joseph.⁹

Ang himaya sa Ginoo mipandong kang Joseph Smith, ug ang Dios mismo, diha sa himaya ug kaharianon sa iyang pagkatawo, uban sa iyang Bugtong nga Anak, nga si Jehova, mipakita sa iyang kaugalingon sa usa ka panan-awon, ug ang iyang tingog mitawag ni Joseph Smith aron mahimong instrumento sa pagsugod sa halangdon nga ebanghelyo sa dispensasyon sa tanan nga dispensasyon.

Walay pagpanghambog, pagpasikat; usa kadto ka yano, sagrado nga okasyon, tumang kamahimayaon ug dalaygon nga labaw pa sa tanang pagpadayag.

Ang tingog sa Ginoo, nga nagpakahilum sulod sa daghang dispensasyon, nadungog na pag-usab. Usab ang balaan nga mensahe, nga kanunayng gisubli, gipahayag: “Kini ang akong Pinalanggang Anak. Paminawa siya!” Ang pagkatawo sa Amahan ug sa iyang Bugtong nga Anak nabutyag na usab aron nga ang katawhan mahimong makaila sa ilang kaugalingon.¹⁰

Ang panghitabo timaan sa pagsugod sa “usa ka katingalahan nga buhat ug usa ka kahibulongan, ” nga gisulti ni Isaias ang Propeta [tan-awa sa Isaias 29:13–14], gikumpirma ni Daniel [tanawa sa Daniel 2;29–44], ug dugang nga gipanagna ni Juan ang Manalagna [tan-awa sa Pinadayag 14:6–7]. Ang personal nga pagduaw sa Amahan ug sa Anak, pagpili ni Joseph nga mamahimong pangulo sa Dispensasyon sa Kahingpitan sa mga Kapaigoan, timaan sa pagsugod niining buhat, ug kini inabagan sa pagduaw sa mga anghel ug uban pang balaan nga mga mensahero, nagtugyan ngadto kang Joseph sa mga gahum sa Priesthood, ang Awtoridad sa paglihok sa ngalan sa Dios—aron sa pagpaila sa ebanghelyo ni Jesukristo pinaagi sa balaan nga awtoridad ngadto sa katawhan, ug pinaagi sa direksyon sa pag-organisar sa tinuod nga Simbahan ni Jesukristo sa Ulahing mga Adlaw.¹¹

Diha sa pagpaubos, ug sa hingpit nga kahibalo sa atong katungdanan, kita mosaksi ngadto sa mga tawo sa kalibutan nga ang pagpakita sa Amahan ug sa Anak ngadto ni Propeta Joseph Smith, niadtong kabuntagon sa tingpamulak sa 1820, ang talagsaon nga dispensasyon sa ebanghelyo sa tanang panahon nasugdan na, usa ka dispensasyon sa kahayag, misanag gikan sa Dios, naglamdag sa mga hunahuna sa mga tawo, nagpa-usbaw sa kaalam ug kahibalo, nga mao ang himaya sa Dios.¹²

Ang mga yawe sa priesthood gipahiuli pinaagi ni Propeta Joseph Smith.

“Kami nagtuo nga ang usa ka tawo kinahanglan gayud nga pagatawgon sa Dios, pinaagi sa panagna ug pinaagi sa pagpandong sa mga kamot niadto kinsa adunay pagtugot sa pagsangyaw sa ebanghelyo ug sa pagpangalagad sa mga ordinansa niini.” [Artikulo sa Hugot nga Pagtuo 1:5.]

Ug atong ipahayag ngadto sa tibuok kalibutan … nga kita adunay pagtugot. Atong ipahayag nga ang samang tawo nga nagbunyag sa Manluluwas sa kalibutan, nga giilang si Juan Bautista, mibalik niining yuta, mipandong sa iyang mga kamot sa ulo ni Joseph Smith ug ni Oliver Cowdery, ug iyang gihatag kanila ang Aaronic, o mas ubos nga Priesthood, diin maoy awtoridad sa pagbunyag. Human sa paghatag kanila niining ordinasyon, siya misugo kanila sa pagbunyag sa usag usa, ug iyang gisaad ngadto kanila nga sila si Pedro, Santiago, ug Juan, ang mga apostoles ni Ginoong Jesukristo, kinsa mibarug diha sa kapangulohan sa Simbahan human sa pagpalansang, kinahanglan nga mobisita kanila ug ihatag diha kanila ang pagka apostoles, ang Melchizedek, o ang mas taas nga Priesthood.

Atong ipahayag sa tibuok kalibutan nga sila miabut ug nga atong nadawat ang awtoridad, ug ang tanan nga pagsupak sa tibuok kalibutan dili makausab sa kamatuoran niadtong duha ka pagduaw, —niadtong duha ka ordinasyon. Kon kining mga butang maoy mga kamatuoran, ang pagsupak dili makausab niini. Ug atong ipahayag nga mao kini ang matuod.¹³

Ang mga bunga sa Pagpahiuli nagpamatuod sa misyon ni Joseph Smith.

Ang labing halangdon nga pagmatuod sa kabalaan sa unang panan- awon, ingon man sa mga pagduaw sa mga anghel ug ubang mga mensahero ngadto ni Joseph ang Propeta misunod sa unang panan-awon, mao ang mga praktikal nga mga resulta nga nahitabo gikan sa mensahe nga gihatud ug sa awtoridad nga gikumpirma. ang ebanghelyo diha sa kaputli niini gipahiuli na sa yuta. Ang maanindot nga talaan sa karaan nga mga tawo niining kontinente, ang Basahon ni Mormon, gipagawas gikan sa dapit nga gitipigan didto sa Bungtod sa Cumorah, naglangkob sa kahingpitan sa ebanghelyo sumala sa gitudlo sa Ginoo ug Manluluwas, si Jesukristo, dinhi niining konteninte sa Amerika. Ang Simbahan ni Jesukristo sa mga Santos sa Ulahing mga Adlaw giorganisar niadtong Abril, 1830, sa lungsod sa Fayette, Lalawigan sa Seneca, New York, ug milambo…, bisan pa sa mga pagpangukod ug mga babag nga kanunay nga gisagubang.¹⁴

Sa higayon nga kita mamalandong sa katingalahan nga buhat nga gihimo sa Propeta, usahay ako matingala kon mahitabo ba kaha nga ang usa ka intelehenting tawo motan-aw sa kinabuhi ning tawhana, nga masayud bahin sa iyang pagkabilanggo, sa mga pagpanghingilin, sa pagbutang og alkitran ug balhibo diha sa iyang lawas, sa sentensya nga kamatayon nga gipahamtang kaniya, ug unya makabasa sa maanindot nga mga butang diha sa Doktrina ug mga Pakigsaad, nga dili makamatikod sa inspirasyon sa Ginoo diha sa iyang mga kalampusan.

Ako dili makatuo nganong adunay pila ka intelehenting mga tawo nga maghunahuna nga adunay makahimo sa Basahon ni Mormon nga walay tabang gikan sa Ginoo, nga sukad sa una hangtud karon sulod sa gatusan na ka tuig ug pabilin nga mibarug batok sa pagsulay sa tanang panahon, bisan pa sa mga pagpanaway batok niini, sa nagkalainlain nga mga hinungdan. Karon kana nga basahon, gihubad ni Joseph Smith isip instrumento sa Ginoo, nagpabilin nga halangdon. Mao kini karon ang talagsaon nga misyonaryo nga anaa kanato alang sa pagsangyaw sa ebanghelyo; walay nay lain pang ikatandi niini.¹⁵

Kini nga Simbahan mao ang … usa ka katingalahan ug kahibulongan nga buhat. Walay sama niiini sa tibuok kalibutan, tungod kay si Jesukristo, ang Anak sa Dios mitukod niini, ug maoy pangulo niini; tungod kay si Jesukristo mipakita sa iyang kaugalingon ngadto sa Propeta ug ni Oliver Cowdery, ug sa uban; ug tungod ang Dios, agig tubag sa pag-ampo, naghatag sa mga tawo sa tibuok kalibutan diin nawala ang Ebanghelyo, sa indibidwal nga kahibalo ug pagpamatuod mahitungod sa kabalaan sa buhat nga atong giapilan.¹⁶

Ang bukid sa balay sa Ginoo pagatukoron sa tumoy sa kabukiran, ug ang mga tawo gikan sa tanan nga kanasuran magaganayan ngadto niini [tan-awa sa Isaias 2:2]. Pinaagi sa mga panalangin sa Ginoo diha sa ilang mga kahago ang disyerto nabuntog ug namulak sama sa rosas. Ang mga mingaw nga mga dapit mahimong sadya tungod niini. [tan-awa sa Isaias 35:1.] mga Dakbayan pagatukoron, mga tinubdan sa tubig nabuksan nga kini nakahatag og kinabuhi sa ugang yuta, musika, ug mga tingog sa mga bata madungog sa mga kadalanan diin ang kamingaw ug kahilum naghari sulod sa dugay nga panahon.

Ang mga templo natukod diin ang buluhaton sa pagtubos gihimo alang sa dili maihap nga mga buhi ug sa mga patay.…

Ang pagtuon mahitungod sa unang pag-organisar sa Simbahan, nga nahitabo sa labing ubos ug, alang sa kalibutan, walay klaro nga mga kahimtang, ug sa pagsunod sa kasaysayan niini kalabut sa pagpanggukod, kawad-on, ug kalisud, ikalimud ba nga ang talagsaon ug kahibulongan nga buhat natuman, nga ang mga saad sa Ginoo natuman, ug ang iyang gahum sa pagpatuman sa butang nga iyang gitakda nga buhaton [karon] gipamatud- an na?

Tuguti nga ang himaya ug gahum ug dungog ug kusog ipasidungog ngadto sa Dios ang atong Amahan, pinaagi ni Jesukristo, nga iyang Anak, hangtud sa kahangturan, tungod kay siya ang tigpasiugda niining tanan.¹⁷

Kining ebanghelyo ni Jesukristo nga akong natagamtaman ug inyong natagamtaman mao gayud ang tinuod nga plano sa kinabuhi ug kaluwasan nga gipadayag na usab sa yuta. Sama kini sa ebanghelyo nga gisangyaw sa atong Ginoo ug Magtutudlo nga si Jesukristo.…

Ako nasayud nga ang Dios buhi. Ako nasayud nga si Jesukristo mao ang Kristo. Ako nasayud nga si Joseph Smith usa ka Propeta sa Dios. Akong gitunol ang akong kamot. Ako nakapupo na sa mga bunga sa ebanghelyo. Ako nakatagamtam na niini, ug tamis kini, oo, labaw pa sa tanang katam-is. Ako nasayud nga ang Dios mipili sa Iyang Propeta nga si Joseph Smith ug mihatag kaniya og mga panudlo ug Awtoridad alang sa pag-ugmad niining buhat, nga ang gahum ug ang impluwensya ni Joseph Smith, karon mabati sumala sa gisaad na sa anghel nga si [Moroni]. Ang iyang ngalan gigamit sa maayo ug dautan sa tanan nga kanasuran [tan-awa sa Joseph Smith—Kasaysayan 1:33], apan dautan alang niadtong nagbutangbutang kaniya. Kadtong mga nakaila kaniya, kadtong nasayud nga ang iyang mga pagtulun-an, nasayud nga ang iyang kinabuhi nga putli ug ang iyang mga pagtulun-an tinuod gayud nga mga balaod sa Ginoo.…

Usab ako moiingon: Mao gihapon kini ang ebanghelyo nga gisangyaw sa atong Ginoo ug Magtutudlo nga si Jesukristo, diin Siya mihatag sa Iyang kinabuhi agig pagpamatuod, ug nga ang mga kinabuhi sa atong mga Propeta ug Patriyarka [si Joseph ug Hyrum Smith] gihatag isip mga saksi ngadto sa kabalaan sa buhat nga diin kita naapil. Ang gitawag nga, Mormonismo, mao gayud ang tinuod nga ebanghelyo sa Ginoo nga si Jesukristo. Ang Dios naghatag kanako og pagsaksi niining mga butanga.¹⁸

Mga Sugyot alang sa Pagtuon ug Panaghisgutan

Nganong ang pagpamatuod ni Propeta Joseph Smith mahinungdanon man nga bahin sa ebanghelyo?
Unsaon nato sa pag-angkon og usa ka kinaugalingon nga pagpamatuod sa kabalaan sa misyon ni Joseph Smith? Unsay nakapalig- on sa imong pagpamatuod ni Propeta Joseph Smith?
Unsay kalainan niini diha sa atong mga kinabuhi nga makaangkon og pagpamatuod ni Propeta Joseph Smith?
Unsa pay uban nga mga kamatuoran nga imong nakat-onan mahitungod sa Langitnong Amahan ug ni Jesukristo samtang ikaw namalandong sa mga panghitabo sa Unang Panan-awon? (Tan-awa sa Joseph Smith—Kasaysayan 1:11–20.) Sa unsa nga paagi nga kini nakatabang kanimo nga masayud nga ang “Dios Mismo nakita nga angayan bisitahon ang yuta sa Iyang pinalangga, bugtong nga Anak”?
Sa unsa nga paagi nga ang ulahing mga adlaw “usa ka dispensasyon sa kahayag”? Unsa nga mga pagmatuod sa kahayag nga imong nakita dinhi sa kalibutan karon?
Nganong gikinahanglan nga mapahiuli ang priesthood? Unsa ang mga panalangin nga mahimo natong matagamtaman karon gumikan sa pagpahiuli sa priesthood?
Sa unsa nga paagi nga ang mensahe sa Pagpahiuli nagtanyag kanato og paglaum samtang kita nagpuyo niining masamok nga kalibutan?