Kapitulo 10

Ang Gahum sa Ehemplo

Pinaagi sa pagtuman sa atong mga tinuohan sa inadlaw adlaw nga kinabuhi, kita makatabang sa pagpalig-on sa maayong ngalan sa Simbahan ug makadasig sa uban sa pagsunod sa ebanghelyo.

Gikan sa Kinabuhi ni Heber J. Grant

Sa usa ka pagpasidungog ngadto ni Presidente Heber J. Grant, si Elder John A. Widtsoe sa Korum sa Napulog Duha ka mga Apostoles misulat, “Ang iyang kinabuhi usa ka pagtulun-an sa tanan.”¹ Si Elder Samuel O. Bennion sa Seventy namulong usab mahitungod sa mga ehemplo nga gipakita ni Presidente Grant: “Siya matinguhaon nga miapil sa usa ka maayo nga katuyoan sa Ginoo; siya gisugo lamang sa Dios, ug siya nagpakita og tukma nga ehemplo ngadto sa mga tawo, ug isip sangputanan ang buluhaton nahimong mas maanindot ug labaw nga mahimayaon.”²

Dugang sa iya mismong paghatag og maayong ehemplo, si Presidente Grant nagtudlo nga ang matag sakop sa Simbahan mahimong magpuyo sa paagi nga makadala og dungog ug himaya ngadto sa buhat sa Dios. Siya miingon, “Ang pinakamaayo ug pinakamaanindot nga tigsangyaw diha sa mga Santos sa Ulahing mga Adlaw mao ang lalaki o babaye nga nagsunod sa ebanghelyo ni Ginoong Jesukristo.”³

Samtang nag-alagad isip sakop sa Korum sa Napulog Duha ka mga Apostoles, si Elder Heber J. Grant nakadawat og sulat gikan sa usa ka higala nga dili sakop sa Simbahan. Atol sa usa ka pakigpulong sa kinatibuk-ang komperensya, si Elder Grant mibasa og mga kabahin sa sulat aron sa paghatag og gibug-aton sa panginahanglan sa mga Santos sa Ulahing mga Adlaw nga mohatag og maayong ehemplo:

“ ‘Minahal kong Heber:

“ ‘… Nasayud ka, nga gawas sa dugay na ug sa suod nga personal natong panaghigala, kanunay akong nakadayeg pag-ayo sa katim-us ug sinseridad sa mga relihiyoso nga pagbati sa mga kalalakin- an ug kababayenhan nga naghupot sa inyong pagtuo. Sa daghang higayon ug sa kasagaran ako miingon, diha sa pagpakighinabi, nga ang bugtong relihiyoso nga mga tawo nga akong nailhan nga nagsunod sa ilang gitudlo, mao ang mga Mormon sa Utah. Ug tinuod kini.’ ”

Human mobasa niini nga kinutlo, si Elder Grant mikomentaryo: “Ako mapasalamaton gayud kaayo nga ang akong higala wala makakita og lista sa dili tigbayad og ikapulo, … tungod kay dako kaayo ang akong pagduda nga kon kana nahitabo makasulti ba kaha siya “nga ang bugtong relihiyoso nga mga tawo nga nagsunod sa ilang gitudlo, mao ang mga Mormon sa Utah.’ Gikalipay nako nga ang mga Mormon kinsa nasuod niining tawhana dili lang mga Mormon sa pangalan, apan sila tinuod nga mga Santos sa Ulahing mga Adlaw. Nakakuha siya og opinyon mahitungod sa tanang mga ‘Mormon’ pinaagi niadtong iyang nasuod; ug kadaghan na nako masulti sa publiko nga akong giisip nga katungdanan sa matag Santos sa Ulahing mga Adlaw ang pagpahimutang sa ilang mga kinabuhi aron nga ang iyang gawi makahatag og inspirasyon sa tanang tawo nga adunay pagtahud kaniya, ug niana makapasiugda og pagtahud sa tibuok katawhan. Nahisubay sa mga pagtulun-an sa Manluluwas ang pagpasiga sa atong kahayag, aron ang mga tawo, nga makakita sa atong maayong mga buhat, mohimaya sa Dios ug matudloan ngadto sa pagsagop sa Ebanghelyo ni Jesukristo.”

Sa pagpadayon sa sulat, si Elder Grant mibasa: “ ‘Mao kini ang makadasig og pagrespeto…. Ang inyong katawhan nagtuman sa ilang mga tinuohan sa ilang inadlaw adlaw nga kinabuhi, ug nagpakita pinaagi sa ilang mga lihok nga mahinungdanon kini….’ ”

Naghisgot pag-usab mahitungod sa sulat sa iyang higala, si Elder Grant dayon miingon:

“Karon kini ang hugpong sa mga pulong nga gusto nakong isilsil sa inyong hunahuna kanunay:

“ ‘Kon aduna may usa ka butang (ug ang akong higala nagbadlis og dakong itom nga linya ubos sa “usa ka butang”) sa usa ka tinuohan nga may kalabutan sa kamahangturon sa umaabot nga kinabuhi, anaa niini ang tanang butang (ug ang akong higala nagbadlis og laing itom nga linya ubos sa “tanang butang.”)’

“Kita ba isip mga Santos sa Ulahing mga Adlaw nagtuo niini? Nakadayeg ba kita sa gibug-aton sa gisulti sa akong higala? ‘Kon aduna may usa ka butang sa usa ka tinuohan nga may kalabutan sa kamahangturon sa umaabot nga kinabuhi, anaa niini ang tanang butang.’ Kombinsido ba kita nga anaa ang tanang butang niini nga tinuohan nga may kalabutan sa kamahangturon sa umaabot nga kinabuhi? Ug ato bang gibuhat, sama sa gisulti sa atong higala nga atong gihimo, ang pagtuman sa atong tinuohan sa atong inadlaw nga kinabuhi, ug nagpakita sa atong lihok nga mahinungdanon kini?”⁴

Mga Pagtulun-an ni Heber J. Grant

Atong gipas-an ang dungog sa Simbahan.

Kita karon nailhan na kon unsa kita—matarung, mahadlokon sa Dios nga katawhan; ug sama sa atong pagsunod sa Ebanghelyo, nasayud nga kini tinuod, kita magpadayon sa pagwagtang sa dili makiangayon nga pagtagad sa isig katawo, pag-ugmad og maayong kabubut-on, ug pagdala sa ubang mga tawo duol kanato.

Kini nga kahimtang misangpot tungod sa kamatuoran nga kita adunay kahibalo, ug nga daghan kaayo sa atong mga katawhan ang nagsunod niini. Ang matag usa sa atong katawhan nagpas-an diha sa iyang abaga sa dungog sa iyang Simbahan, ug samtang kamo ug ako magsunod sa Ebanghelyo ni Jesukristo, atong gihatagan og pasidungog ang buhat sa Ginoo nga gipabarug pag-usab ibabaw sa yuta niini nga dispensasyon.

Mapasalamaton kaayo ako nga mao kini ang kahimtang, ug ang akong kasingkasing puno sa pasalamat ngadto sa Ginoo sa talagsaon nga kausaban nga nahitabo, ug ako manghinaut nga ang matag lalaki ug babaye nga naghupot sa pagkasakop niini nga Simbahan madasig unta sa pag-usa sa ilang hunahuna aron nga sigon sa maabot sa ilang abilidad ug sa ilang kapasidad sila mosunod niini nga Ebanghelyo aron nga ang ilang mga kinabuhi makasangyaw sa kamatuoran niini.⁵

Ang pagsulti batok sa Simbahan, ang pagkamatamayon ug ang mga pagpamakak mahitungod sa atong mga katawhan sa kinatibuk- an hapit na mapapas sa hingpit tungod kay ang mga tawo nasayud na sa mga tinguha sa atong mga kasingkasing, nga kita walay pagdumot bisan niadtong nanghimaraut kanato. Ang Dios nagtabang kanato sa daghan nga mga higayon aron mamahimong higala sa uban kinsa usa niana ka higayon atong mga kaaway. Sila nakakat-on nga ang matag tinuod nga Santos sa Ulahing mga Adlaw sulugoon sa Dios nga nagtinguha nga masayud unsa ang gusto sa Ginoo nga ilang buhaton, ug bisan kon ang ilang personal nga mga ambisyon lahi ra kaayo kay sa atong kaugalingon, sa gihapon ang mga tawo nagkat-on nga ang matuod, tinuoray nga Santos sa Ulahing mga Adlaw usa ka tawo nga masaligan sa tanang mga butang tungod kay siya nagtinguha nga masayud sa hunahuna ug kabubut-on sa Dios. Samtang gibati nila nga kita wala hisabti isip usa ka katawhan, sila nakamatngon sa atong pagkamatinud- anon ug kaligdong.⁶

Lakaw bisan asa nga inyong gusto uban sa mga elder sa Israel, biyahe gikan sa pikas tumoy sa Simbahan ngadto sa pikas, ug kamo makakaplag og makadasig nga pagpamatuod sulod sa mga kasingkasing sa mga Santos sa Ulahing mga Adlaw nga kini mao ang buhat sa Dios nga Makagagahum ug nga ang iyang Anak nga si Jesukristo mitukod niini. Makaplagan ninyo kini nga pagpamatuod, kamo makadungog nga ipaambit kini, apan kanunay ba natong gipuy-an ang kinabuhi sa mga Santos sa Ulahing mga Adlaw? Kita ba nagpakabuhi sama sa gikinahanglan, kon ikonsiderar ang talagsaon nga pagpamatuod nga gihatag kanato? Kita ba nagsunod sa Iyang mga kasugoan sama sa angay natong buhaton? Kita ang nagdala sa dungog, maingon nato, sa Simbahan, matag usa kanato.⁷

Hinaut nga ang Ginoo mopanalangin sa katawhan sa Zion. Hinaut nga atong sundon ang iyang mga kasugoan sa usa ka paagi nga ang tanang tawo, nga makakita sa atong maayong mga binuhatan, sa atong pagkamatinud-anon, sa atong kaligdong, mahimo nga sa kaulahian matudloan sa labing kubos sa pagrespeto kanato, motuo man sila o dili sa atong pagtuo.⁸

Mga Santos sa Ulahing mga Adlaw nga nagbuhat og sayop makahatag og bati nga dungog sa ilang kaugalingon ug sa kawsa sa kamatuoran.

Akong barugan nga ang Santos sa Ulahing mga Adlaw nga nagbuhat og sayop dili lamang himoon nga manubag niana nga sayop, apan usab sa kadaot nga iyang nahimo sa Simbahan. Kon ang usa ka tawo nga sakop sa Simbahan mahubog, lagmit adunay tawo nga makakita kaniya ug siya ang unang Mormon nga nahimamat. Siya mailhan nga Mormon, ug pinaagi kaniya ang tanan pagahusgahan. Siya nga makakita niini moingon, “Kon kana mao ang Mormonismo, dili ko gustong mahisakop niana, ” ug sa higayon nga siya makadungog og wali mahitungod sa Mormon nga isangyaw magpalayo siya. Busa adunay daghang mga sala nga makahimo sa pagsira sa mga kasingkasing sa mga tawo batok sa Gingharian sa Dios.⁹

Ang pagsangyaw ug paghisgot gamay ra kaayo og bili gawas kon ang atong mga kinabuhi gipuy-an sa hingpit nga pagkahiuyon sa atong gipangtudlo.¹⁰

Sa usa ka okasyon may usa ka tawo nga mihatag og talagsaon kaayo nga wali. Sa kaulahian usa sa iyang mga higala miingon: “Abi nimo, usa kadto ka maanindot kaayo nga wali, dalaygon kaayo, apan ang imong mga binuhatan lanog kaayo nga wala akoy nadunggan sa imong gisulti.”¹¹

Akong nadungog ang mahitungod sa usa ka tawo nga didto sa dako nga salosalo nakig-istorya sa laing tawo mahitungod sa pagtuo sa mga Santos sa Ulahing mga Adlaw. Siya miingon, “Tan-awa, ang mga tawo nga ‘Mormon’, kadtong nagsunod sa ilang relihiyon, dili moinom og tsaa, kape, tabako o bino.” Ang laing tawo miingon, “Dili ko motuo bisan gamay niana.” Ang tawo miingon, “Tinuod lagi na.”

Kining duha nga dili mga “Mormon” naglingkod atubangan sa usa sa mga lamesa niini nga salosalo. Miabut ang usa ka “Mormon.” Ang tawo nga midepensa sa mga “Mormon” miingon, “Niay miabut nga Mormon. Molingkud ni siya uban nato. Makigpustahanay ko nimo dili siya moinum og kape.” Ang pusta gidawat. Ang “Mormon” miinom sa kape! Sa ilang paglakaw ang tawo nga napildi sa pustahay miingon, “Dili na ako motuo nianang tawhana, nga nagpakaaron-ingnon nga nagtuo nga ang Dios mihatag og pagpadayag pinaagi ni Joseph Smith, nagtudlo sa mga tawo nga maglikay niining mga butanga, apan mianhi siya ug sa atubangan sa publiko misupak sa mga pagtulun-an sa iyang propeta. Misalig ko nianang tawhana kaniadto, apan dili na ako motuo niya.”¹²

Kon atong puy-an ang atong relihiyon, ang atong maayong ehemplo modan-ag sama sa kahayag ngadto sa kalibutan.

Ako gustong mosulti ngadto sa mga Santos sa Ulahing mga Adlaw nga kinahanglan kita, human makadawat og pagpamatuod sa kabalaan sa buhat nga atong giapilan, sa pagbutang sa atong mga kinabuhi sa kahan-ay sa matag adlaw aron nga ang himaya mahatag ngadto sa buhat sa Dios pinaagi sa maayong mga binuhatan nga atong gihimo, sa pagpasiga sa atong mga kahayag aron ang mga tawo, nga makakita sa atong maayong mga binuhatan, mohimaya sa Dios [tan-awa sa Mateo 5:16]. Walay katawhan sa ibabaw sa yuta nga sukad napanalanginan sama sa mga Santos sa Ulahing mga Adlaw; walay katawhan nga sukad nakadawat sa daghang mga pagpadayag sa kabuotan ug kaluoy ug kamainantuson sa Dios nga gihatag ngari kanato, ug moingon ako nga kita, labaw sa tanang mga kalalakin-an ug mga kababayenhan sa ibabaw sa yuta kinahanglang magpakabuhi sa Diosnon ug matarung nga mga kinabuhi.¹³

Gisultihan sa Manunubos ang Iyang mga sumusunod nga sila mao ang asin sa kalibutan, apan kon ang asin kawad-an sa iyang lami, kini dili na gayud magpulos sa bisan unsa, kondili angay na lamang kining isalibay sa gawas aron tunobtunoban sa mga tawo. Iya usab sila nga gisultihan nga sila mao ang kahayag alang sa kalibutan, ang siyudad nga nahimutang sa ibabaw sa bungtod dili gayud mahisalipdan. Iya silang gisultihan nga ang mga tawo dili modagkot og kandila aron ibutang kini sa ilalum sa gantangan, kondili sa ibabaw sa tongtonganan, nga kini magaiwag kanilang tanan nga anaa sa sulod sa balay. Ug Siya mitambag kanila sa pagpasiga sa ilang kahayag aron nga ang mga tawo nga makakita sa ilang maayong mga buhat modayeg sa Dios. [Tan-awa sa Mateo 5:13–16.]

Kini nga pahimangno alang usab kanato. Kita mga kahayag sa kalibutan. Nakaangkon kita sa inspirasyon sa Dios nga Makagagahum. Nakadawat kita og pagpamatuod sa ebanghelyo, ug kita sa tinuoray nasayud nga ang Dios buhi, nga si Jesus mao ang Kristo, nga si Joseph Smith usa ka propeta sa Dios…. Matag matinud-anon nga Santos sa Ulahing mga Adlaw adunay pagpamatuod nga mainiton sulod sa iyang kasingkasing. Karon, kita ba nagpakabuhi nga ang maayong mga binuhatan nga atong gihimo mohatag og maayong dungog ngadto sa buhat sa Dios? Ang atong mga ehemplo angayan ba nga sundon sa tanang mga tawo? Ato bang gipakita pinaagi sa ehemplo nga kita adunay hugot nga pagtuo sa ebanghelyo?¹⁴

Akong barugan nga maoy tinuod nga katungdanan sa matag sakop sa Simbahan ni Jesukristo sa mga Santos sa Ulahing mga Adlaw ang pagpahimutang sa iyang kinabuhi diha sa kahan-ay aron ang iyang mga ehemplo mamahimong angayan nga sundon sa tanang tawo, sa ingon mohatag og maayong dungog ug mga panalangin sa iyang kaugalingon ug sa iyang kaliwatan ug usab makakaplag og mga higala alang sa buhat sa Ginoo. Kini kinahanglan mao gayud ang kinatas-ang ambisyon sa matag Santos sa Ulahing mga Adlaw.¹⁵

Nga ang Dios ang atong langitnong Amahan motabang unta kanato nga magmaunongon ug magmatinuoron ngadto kaniya ug nga kita unta sa kanunay mopakita pinaagi sa atong pagkamatinumanon, sa atong pagkamatinuoron pinaagi sa atong pagkamasulundon sa mga kalalakin-an ug kababayenhan, ug pinaagi sa pagkamatarung sa atong mga kinabuhi nga kita sa tinuoray mga sulugoon nga mga lalaki ug sulugoon nga mga babaye sa buhi nga Dios, nga naningkamot sa pagsangyaw sa Ebanghelyo ni Jesukristo, mao ang akong matinguhaon nga pag-ampo.¹⁶

Ang atong maayo nga mga ehemplo makadasig sa uban sa pagpakisusi sa plano sa kinabuhi ug sa kaluwasan.

Hinaut nga ang matag usa ug ang tanan nga mga Santos sa Ulahing mga Adlaw mosunod sa ebanghelyo aron nga ang kamatuoran niini masangyaw pinaagi sa iyang mga ehemplo.¹⁷

Ang pinakamaayo ug pinakamaanindot nga magsasangyaw sa mga Santos sa Ulahing mga Adlaw mao ang lalaki og babaye nga nagsunod sa ebanghelyo ni Jesukristo. “Ipakita kanako ang imong pagtuo pinaaagi sa imong mga binuhatan” mao ang mahinungdanon. Si Santiago miingon nga siya mopakita sa iyang pagtuo pinaagi sa iyang mga binuhatan, ug nga ang pagtuo nga walay binuhatan patay. Kini sama sa lawas nga walay espiritu. [Tan-awa sa Santiago 2:17–18, 26.]… Pinaagi lamang sa atong mga binuhatan, sa atong kakugi, sa atong pagkamatinud-anon, sa atong kusog, nga kita makasangyaw niining ebanghelyo. Ang katawhan sa kalibutan nagsugod na sa pagkamatngon, sa pagkasayud ug sa pagtugkad sa kamatuoran nga ang mga bunga sa ebanghelyo ni Jesukristo, ingon sa gitudlo sa mga Santos sa Ulahing mga Adlaw, maayo nga mga bunga…. Ang usa ka dakong sumbanan nga gipahiluna sa Manluluwas sa kalibutan mao ang, “Maila ninyo sila pinaagi sa ilang mga bunga.” [Mateo 7:20.] Sa kalipay sulod sa ilang mga panimalay, sa katagbawan, sa kabulahanan, kaligdong sa pagnegosyo, kamalinawon, sa pagsunod sa mga balaod sa Dios ug sa tawo, akong hagiton ang kalibutan sa pagpangita og mga tawo nga molabaw pa sa mga Santos sa Ulahing mga Adlaw. Wala ako karon maghisgot mahitungod sa mga Mormon nga wala magsunod sa mga kasugoan sa Dios.¹⁸

Hinaut nga ang matag usa ug tanan kaninyo panalanginan sa Dios. Hinaut nga ang matag usa kanato kinsa adunay pagpamatuod sa kabalaan sa buhat nga atong ginahimo, mopahimutang sa atong mga kinabuhi aron kadtong wala masayud sa kamatuoran, nga nakakita sa atong kakugi, sa atong hugot nga pagtuo, sa atong pagkamapaubsanon, ug sa atong tinguha sa pag-alagad sa Dios, mahimong maaghat sa pagpakisusi sa kamatuoran nga kinahanglan atong ipaambit ngadto kanila. Kini mao ang akong pag-ampo ug tinguha.¹⁹

Ang Dios buhi; si Jesus mao ang Kristo; si Joseph Smith usa ka propeta sa buhing Dios; ania kanato ang kamatuoran; ug hinaut nga kadtong nasayud niini, magpakabuhi aron kadtong wala masayud niini mopakigsusi sa plano sa kinabuhi ug sa kaluwasan ug makaangkon og kinabuhing dayon, ang labing mahinungdanon sa tanang mga gasa sa Dios ngadto sa tawo.²⁰

Mag-ampo ako nga ang mga panalangin sa Dios nga Makagagahum magauban unta ug magpabilin uban sa tanang mga sakop niini nga Simbahan, sa matag matinud-anon, makugihon nga mga Santos sa Ulahing mga Adlaw. Hinaut nga kita makahimo sa pagsangyaw sa Ebanghelyo ni Jesukristo pinaagi sa pagkamatinud-anon, pagkamatarung ug pagkamatinuoron sa atong mga kinabuhi. Kon ato kining buhaton, makasiguro kita sa katapusan nga kadaugan.²¹

Ako mapasalamaton labaw pa sa tanang gahum ug abilidad nga gihatag sa Dios ngari kanako sa pagpadayag sa akong kaugalingon sa kahibalo nga siya buhi, nga ang Dios atong Amahan, ug nga si Jesukristo atong Manunubos ug Manluluwas.

Hinaut nga ang Ginoo motabang kaninyo ug kanako ug sa matag kalag nga aduna niana nga kahibalo sa pagpanglimbasog sa tanan nga abilidad nga atong gihuptan aron sa pagdala sa uban sa susama nga kahibalo, pinaagi sa atong mga ehemplo. O, mapasalamaton kaayo ako sa atong Langitnong Amahan nga iyang nakita nga angayang pilion si Joseph Smith nga maoy instrumento sa iyang kamot sa pagtukod pag-usab sa plano sa kinabuhi ug sa kaluwasan sa ibabaw sa yuta. Hinaut nga ang Ginoo mopanalangin sa matag usa ug kaninyong tanan, ug mopanalangin sa matag matinud- anon nga kalag ibabaw sa yuta, ug motabang sa matag Santos sa Ulahing mga Adlaw nga magpakabuhi aron nga ang iyang ehemplo modan-ag ug nga kini motabang sa pagdala sa uban ngadto sa kahibalo sa kamatuoran.²²

Mga Sugyot alang sa Pagtuon ug Panaghisgutan

Ngano nga ang ehemplo usa ka makusganon nga impluwensya?
Unsa may ipasabut sa pagpas-an sa dungog sa Simbahan?
Unsaon nato nga mamahimong mas maayo nga mga ehemplo sa mga sakop sa atong pamilya, mga sakop sa ward o branch, ug mga silingan?
Kinsa ang ubang mga tawo kansang mga ehemplo nakaimpluwensya kaninyo? Ngano nga kining mga tawhana nakahatag man og impluwensya sa inyong kinabuhi?
Unsa may ubang mga panghitabo diin ang maayong mga binuhatan sa Santos sa Ulahing mga Adlaw nakadasig sa uban sa pagsusi sa ebanghelyo?