Sauniga o le Malumalu

Sa matuai malosi pea le faateleina o sauaga ma le manaomia ona tuua Navu e le Au Paia, ao galue pea Peresitene Polika Iaga i le malumalu, ina ia faamanuiaina le Au Paia i sauniga paia ae latou te lei malaga ese. Na ia faamaumauina e faapea, i se tasi aso, “E selau fasefulutolu tagata na mauaina o latou lava faaeega paia i le Malumalu… .O lena le naunautaiga e pei ona molimauina e le Au Paia ina ia maua sauniga, ma o lo matou naunautaiga foi lena ia i matou, ina ia faataunuuina ia sauniga mo i latou; o lea sa ou tuuina atu ai a’u atoa i le galuega a le Alii i le Malumalu i le po ma le ao, e le sili atu i le fa itula e moe ai, i lona averesi, i le aso, ma alu i le fale faatasi i le vaiaso” (HC, 7:567). Ina ua taunuu atu o ia i sisifo, na filifili loa lava e Peresitene Iaga se nofoaga mo se malumalu fou. Na ia faatonutonuina le fausiaina o malumalu e fa i Utah—i le Aai o Sate Leki, o St. George, o Manti, ma Logan; ae peitai, e na o le Malumalu o St. George na faamaeaina i le taimi ao soifua o ia. I le aso 1 o Ianuari 1877, faatasi ai ma ona vae ua matuai vaivai lava, sa siiina atu ai o ia i totonu o le potu i luga o se nofoa, na ia lauga atu i le faapotopo- toga na faatasi atu ai iina, ina ia faapaiaina le vaega pito i lalo o le Malumalu o St. George ma faapea atu: “Ua tatou olioli i avanoa e le o mafai e se tasi i luga o le fogaeleele ona olioli i ai… . Pe a ou mafaufau atu i ai i lenei mataupu, ou te manao i laulaufaiva o faititili e fitu, ina ia fafaguina i luga tagata” (DNSW, 16 Jan. 1877, 1).

Aoaoga a Polika Iaga

O malumalu o maota ia o le Alii lea o loo faataunuuina ai i totonu sauniga paia ina ia saunia ai le Au Paia mo le faaeaga.

A tonu o le a fesiligia pe aisea tatou te fausia ai malumalu. Tatou te fausia malumalu aua e leai se fale o i luga o le fogaeleele atoa o loo tauaveina ai le suafa o le Atua lea o le a tatou faatusatusa i ai ma lona uiga, ma o le a mafai ona ia tauina pea o lona maota. E i ai nofoaga i le lalolagi e mafai ona afio mai le Alii ma nofo ai, pe afai e finagalo i ai. Atonu e mafai ona maua i tumutumu o mauga maualuluga, po o ni ana po o nofoaga e lei solia lava e vae o ni tagata agasala (DBY, 393–94).

Na te manaomiaina ana auauna, ina ia fausia se fale mo ia, lea e mafai ona afio mai i ai ma faailoa mai ai lona finagalo (DBY, 394).

“Pe manaomia ea e le Alii lo tatou fausiaina o le Malumalu i o tatou lima?” E mafai ona ou faapea atu, o loo ia matuai manaomia lava e pei lava ona ia manaomia ona fausia i soo se mea. Afai e tatau ona e fesili, “Le Uso e Polika, e i ai ea sou malamalamaaga e faatatau i lenei mea; pe na e mauaina ea se faaaliga mai le lagi e faatatau i ai?” E mafai ona ou tali atu ma le moni, ua leva ona i ai se faaaliga i lo’u mafaufau i taimi uma (DBY, 411).

O le a tatou fausia lava malumalu. O lenei tulafono, ua tuuina atu i le fanau a tagata (DBY, 393).

E le mafai … ona tatou tuuina atu isi sauniga a le Atua i lona atoatoa faaletulafono i tagata, … seiloga ua i ai so tatou malumalu e fausiaina mo lena faamoemoega (DBY, 394–95).

O nisi e faapea mai, “Ou te le manao e fai, aua e lei mafai lava ona tatou amataina ona fausia se malumalu, e aunoa ma le tatagi mai o logo o seoli.” Ou te manao foi e toe faalogo atu o tatagi mai (DBY, 410).

Na tatou faamaeaina se malumalu i Katelani ma Navu; pe lei faalavelave ea le tiapolo i taimi uma sa tatou fausia ai? Ioe, o vaiaso uma, ma aso uma (DBY, 410).

Ua ou fuafua, e ala mai i le fesoasoani a le Alii ma nei tagata, ina ia fausia se fale mo ia. E mafai ona outou fesili, “Pe o le a ia nofo ai ea i totonu?” E mafai lava ona ia faia pe a ia finagalo i ai; e le o sa’u aia le faatonuina o le Alii. Ae o le a tatou fausia lava se fale mo ia, ma, afai e finagalo o ia e asiasi mai ia i tatou, o le a mafai ona i ai se nofoaga mo ia e afio ai, pe afai foi e tatau ai ona ia auina mai nisi o ana auauna, o le a mafai foi ona i ai ni apitaga talafeagai mo i latou. Ua ou fausia se fale mo au lava ia, ma e faapea foi i le toatele o outou, ae o lenei, pe le ua tatau ea ona tatou fausia se fale mo le Alii? (DBY, 411).

Pe tatou te manaomia ea se malumalu? Tatou te manaomia, ina ia saunia ai i tatou e ulu atu i le faitotoa o le aai lea o loo faapotopoto ai le Au Paia. O sauniga e manaomia e faia ai lea tulaga … e le mafai ona tuuina atu pe afai, e leai se nofoaga talafeagai faapea. Tatou te mananao i se malumalu, e le mo ni faapotopotoga lautele, ae mo le Perisitua, lea e faatulagaina ma fuafuaina atoatoa ai le Perisitua i lona faatulagaga ma ona vaega [Arona ma le Mekisateko], ina ia tuuina atu ai sauniga o le Perisitua i le Au Paia mo lo latou faaeaga (DBY, 394).

The temple will be for the endowments—for the organization and instruction of the Priesthood (DBY, 412).

Tatou te olioli i avanoa e ulu atu ai i totonu o se malumalu, ua fausia i le suafa o le Atua, ma mauaina sauniga o lona maota, faatasi ai ma ki ma faamanuiaga uma e sauniuni ai e ulu atu i “olaga” [vaai MFF 132:22]; tatou te olioli foi i le avanoa o le faia o sauniga mo o tatou tama ma tina, o o tatou tama matutua ma tina matutua, mo i latou o e na maliliu e aunoa ma le Talalelei (DBY, 394).

E na o i latou na ua latou fetufaai ma i tatou i totonu o le malumalu ia sauniga, ua latou iloaina le faamalieina o loo i ai, i le iloaina lea o i tatou moni lava, o ni tagata faigaluega faatasi ma lo tatou Alii ma le Faaola; ma o loo tatou tauaveina se vaega maualalo i lenei galuega sili o le faaolataga; ma ua tatou maua le avanoa o le mauaina ma le usiusitai i le upu moni, ma le faamautuina o le fiafia ia i tatou lava, lea e na o le Talalelei e mafai ona maua mai ai; ma e le gata i le faataunuuina o nei sauniga mo i tatou lava, ae mo le faia ai o galuega e talafeagai ai mo o tatou matua ma augatama o e na maliliu e aunoa ma le mauaina o le Talalelei, ina ia mafai foi ona latou tofo i le vai o le ola, ma ia faamasinoina e tusa ai ma tagata i la le tino [vaai 1 Peteru 4:6]. O se avanoa lenei, o se faamanuiaga, lea, e le mafai e se tasi ona iloaina, seiloga ua ia mauaina. Ua tatou fiafia ina ua tatou iloaina, e ala lea i lo tatou faatuatua ma lagona, e ala i le agaga o faaaliga o loo i totonu o i tatou, ua taliaina e le Alii a tatou galuega. Ua tatou matuai fiafia lava i a tatou fegalegaleaiga ma isi; o e matutua, o le autalavou ma le tupulaga ua latou olioli ma fiafia i lenei galuega mamalu (DBY, 419–20).

E mo i tatou ina ia tatou faia na mea ua manaomia mai e le Alii mai ia i tatou, ae tuu atu ia te ia le taunuuga. E mo i tatou ina ia tatou galulue ma se naunautaiga fiafia; ma afai tatou te fausia se malumalu e faitau miliona lona tau, ma e manaomia ai o tatou taimi uma ma mea ua ia te i tatou, e tatau ona tatou tuua ma se loto fiafia, pe afai o le Alii na ia foaiina mai ua tau mai ia i tatou ina ia tatou faia faapea. Afai e faatagaina e le Alii o tatou fili ina ia tuliesea i tatou mai le malumalu, o lea e tatau ai ona tatou tuua ma se loto fiafia aua ua tatou olioli ai i se faamanuiaga. E leai se afaina ia i tatou po o le a le mea e faia e le Alii, pe faapefea foi ona ia faatulagaina galuega a ana auauna. Ae a ia poloai mai, e ao i ona tagata ona usiusitai. E tatau ona tatou matuai fiafia i le fausiaina o lenei malumalu, afai na tatou muai iloaina o le a tatou le ulu atu ai lava i totonu ina ua maea, e pei ona tatou mafaufauina o le a tatou ola ai iinei mo se afe tausaga e olioli ai (DBY, 411).

E tatau ona outou faia le galuega, a leai o le a le faia lava. Matou te le mananao i ni tagata e tomumumu i le mea o loo i ai lenei malumalu. Afai e le mafai ona outou amataina ma le loto fiafia, ma faia le galuega atoa ma le fiafia, ia toe foi atu loa i Kalefonia, ma o le vave ona foi atu, o le sili foi lea ona lelei. O e fai ai ni a outou povi auro, ma tapuai ai. Afai tou te popole mo sauniga o le faaolataga, mo outou lava, o outou aiga o loo ola ma e ua feoti, e le o le mea ea lea e faamuamua ma faasilisili i o outou loto, i a outou gaoioiga, ma mea uma tou te mauaina, o atu loa! Totogi a outou aitalafu, pe afai o i ai, ma o atu ia ma le filemu, ma faamaonia atu i luma o le Atua ma lana Au Paia uma, outou lava, e ala i a outou galuega DBY, 417–18).

O loo tatou … olioli nei i se avanoa, e leai so tatou malamalamaaga i ai i soo se tagata ua olioli i ai talu mai aso o Atamu, o le faamaeaina lea o se malumalu, lea e mafai ona tuuina atu ai sauniga uma o le maota o le Atua i ona tagata i totonu. Uso e ma tuafafine, pe tou te malamalama ea i le mea lenei? (DBY, 393).

O le faaeega paia, e mafai ai e i tatou, ona tatou toe foi atu i se aso i le afioaga o le Alii.

O sauniga

Sei ou tuuina atu lava se faamalamalamaga puupuu. O lou faaeega paia, o le mauaina uma lea o sauniga na, i le maota o le Alii, lea e talafeagai ai mo oe, pe a e tuua lenei olaga, ina ia mafai ai ona e toe savali atu i le afioaga o le Tama, e pasi atu i luma o agelu o loo tutu e fai ma leoleo faitotoa (DBY, 416).

O ai se tasi o i lenei faapotopotoga, ua ia mauaina, ma malamalama, i sea ituaiga faaeega paia? … O ki i nei faaeega paia, o loo ia te outou, ma e faitau afe ua latou mauaina, o lea e le mafai ai e le Tiapolo ma ana ‘au, ona faaleagaina le Perisitua mai le lalolagi, e ala lea i le fasiotia na o se vaega, aua e le mafai ona ia faia. Ua tuuina mai e le Alii lona aao, mo le taimi mulimuli, ina ia togiolaina ona tagata, o e ua faamaoni i le loto, ma e le mafai e Lusifelo ona faalavelave ia te ia (DBY, 416).

E matuai tatau lava i le Au Paia ona mauaina isi sauniga o le maota o le Atua, a o lei faamutaina lenei olaga puupuu, ina ia mafai ai ona saunia i latou, ina ia pasi atu ma le atoatoa i luma o leoleo faitotoa, e taitaiina atu ai i le malo selesitila, ma le afioaga o le Atua (DBY, 395).

O sauniga o le maota o le Atua, e mo le faaolataga o le aiga o tagata. Ua tatou … umia ki o le faaolataga, ua tuuina mai mo fanau a tagata mai le lagi e le Alii Silisiliese, ma e ao ia i latou o loo umia ia ki, ona faaaoga mo le faaolataga o le aiga o tagata. O le fausia o malumalu, o nofoaga o loo faia ai sauniga mo le faaolataga, ua alagatatau e faataunuu ai le fuafuaga o le togiola, ma o se mataupu mamalu e ao ona talai atu i le Au Paia (DBY, 396–97).

Ou te lagonaina i nisi taimi e pei o loo o’u matuai aoaoina atu alii ma tamaitai o e ua ulu atu i feagaiga e aunoa ma lo latou iloaina o le natura o feagaiga ua latou osia, ma e ua latou faia na o sina taumafaiga e faataunuuina ai (DBY, 396).

O nisi Faifeautalai e o atu i atunuu ma talai atu ai le Talalelei o le ola ma le faaolataga, ma toe foi mai e aunoa ma se malamalama, i le aano moni o feagaiga. Ua tusia i le Tusi Paia faapea e tatau i tagata uma ona faia lana lava tautoga, e tusa lava pe tigaina ai [vaai Failauga 5:4–5]; o lenei auala o le a e faaali atu ai i tagata uma ma le Atua, o oe, ua e matuai faamaoni lava (DBY, 396).

O sauniga o le faamauga, e mafai ona faafesootai ai fanau amiotonu a Atamu e faavavau e ala lea, i le pule o le perisitua.

E tele sauniga o le maota o le Atua, lea, e tatau ona faatinoina i totonu o se malumalu, lea ua faatuina e faapitoa mo lea faamoemoega. E i ai isi sauniga e mafai ona tatou faataunuuina e aunoa ma se malumalu. Ua outou iloa, e i ai nisi o na sauniga, ua uma ona outou mauaina—papatisoga, o le faaee atu o lima mo le meaalofa o le Agaga Paia, … ma le tele o isi faamanuiaga ua tuuina atu i tagata, lea ua tatou maua le avanoa e mauaina ai e aunoa ma se malumalu. E i ai isi faamanuiaga, lea o le a le mauaina, ma sauniga na o le a le faataunuuina e tusa ai ma le tulafono lea ua faaalia mai e le Alii, e aunoa ma le faataunuuina i totonu o se malumalu ua saunia mo lena faamoemoega….Pe a tatou oo mai i … sauniga o le faamauga [mo e ua maliliu], o sauniga e faatatau i le Perisitua paia, e faafesootai ai le faasologa o le Perisitua mai le Tama o Atamu seia oo mai i le taimi nei, e ala lea i le faamauina o fanau i o latou matua, ua faamauina i o tatou augatama, ma isi, e le mafai ona faia e aunoa ma se malumalu. Afai e faataunuuina sauniga i totonu o malumalu ia o le a faatutuina, o le a faamauina [fanau] i o latou [matua], ma i latou ua leva ona maliliu, e tau atu lava i le Tama o Atamu. O le a faataunuuina lava lenei mea, aua o le faasologa o le Perisitua na motusia i luga o le fogaeleele. Na tuua e le Perisitua ia tagata, ae i le tulaga muamua lava, na tuua e tagata le Perisitua. Na latou solia tulafono, suia sauniga, ma solia le feagaiga e faavavau [vaai Isaia 24:5], ma ua tuua i latou e le Perisitua; ae seiloga lava ua latou tuua le Perisitua. O lenei Perisitua na toefuataiina mai, ma o lana pule, e tatau ai ona tatou fesootai atu i o tatou augatama, e ala i le sauniga o le faamauga, seia oo lava ina ua tatou faia se fesootaiga atoatoa mai le Tama o Atamu, e tau atu lava i le iuga o le lalolagi [vaai MFF 128:18]. O lenei sauniga, e le faataunuuina lava i se isi mea, ae na o totonu o se malumalu; e le mafai foi ona faamauina fanau i matua i se isi lava nofoaga e ese mai nai lo le malumalu… . Ma afai ua maea ona mauaina e matua o laua faaeega paia, ma ua faamauina mo le taimi nei ma le faavavau, ma e i ai nisi a laua fanau; o i latou e pele ma o le a fananau i totonu o le feagaiga, ma o i latou o ni suli moni i le malo, latou te umia ki o le malo. O fanau e fananau mai i matua, ao lei ulu atu i laua i le atoatoaga o feagaiga, e ao ona faamauina i o latou matua i totonu o se malumalu, ina ia avea ai ma ni suli faaletulafono o le Perisitua. E moni, e mafai ona latou mauaina sauniga, e mafai ona latou mauaina o latou lava faaeega paia, ma e faamanuiaina e pei o o latou matua; ae le mafai lava, ona avea i latou ma fanau a o latou matua i le tulafono ma le faavavau sei vagana ua faamauina i o latou matua. Ae peitai, o le a le mafai lava ona fesootai lenei faasologa, e aunoa ma le faataunuuina o lenei sauniga, o le faamauga (DBY, 399–401).

Ana leai faaaliga na faaalia mai e tusa ai ma sauniga o le faamauga, o fanau e fananau i fafo o le feagaiga, e le mafai ona faamauina i o latou matua (DBY, 397).

O le sauniga o le faamauga, e ao ona faia iinei… . seia atoatoa le filifili o augatupulaga i le sauniga o le faamauga agai i tua i le Tama o Atamu; o lea, ua poloaiina i tatou e faapotopoto faatasi i tatou lava, ina ia o ese mai Papelonia [vaai MFF 133:5, 7, 14], ma faapaiaina i tatou, ma atinaeina le Siona o lo tatou Atua, e ala i le atinaeina o nuu ma malumalu, faaolaina o atunuu mai le pogisa, seia faapaiaina le fogaeleele ma saunia ai mo le nonofo faatasi ma le Atua ma agelu (DBY, 407).

Fautuaga mo Suesuega

O malumalu, o maota ia o le Alii, lea o loo faataunuuina ai i totonu sauniga paia, ina ia saunia ai le Au Paia mo le faaeaga.

Aisea tatou te fausia ai malumalu? Aisea e mafua ai ona “tatagi logo o seoli,” pe a fausiaina malumalu”? O le a sou manatu, aisea na saunoa ai Peresitene Iaga faapea, “Ou te manao foi e toe faalogo atu o tatagi”?
O a ni auala e avea ai i tatou ma ni “tagata e galulue faatasi ma le Alii ma le Faaola i galuega faalemalumalu”? E mafai faapefea ona tatou iloa, o “a tatou galuega ua taliaina e le Alii”?
Na faapea mai Peresitene Iaga, “Matou te le manaomia ni tagata tomumumu i le lotoa o lenei malumalu.” Aisea e manaomia ai “se loto fiafia” ma le naunau e usiusitai mo le fausiaina o malumalu ma tapuaiga i le malumalu? O le a se mea ua e faia, ua fesoasoani ai ia te oe, ina ia aua nei e faitio e uiga i le fausiaina o malumalu ma tapuaiga i le malumalu? Aisea e tatau ai ona “faamuamua ma faasilisili” sauniga o le faaolataga i o tatou loto ma uiga?

O le faaeega paia e mafai ai e i tatou ona tatou toe foi atu i se aso i le afioaga o le Alii.

O le a le mea na aoao mai e Peresitene Iaga, e uiga i le faamoemoega o le faaeega paia, i le malumalu?
O a tulaga faigata o le osia o feagaiga, e aunoa ma le iloaina o lo latou natura paia? E mafai faapefea ona tatou malamalama, i le natura o a tatou feagaiga, ma faia se “taumafaiga ina ia faataunuuina ai”? E mafai faapefea ona tatou fesoasoani i a tatou fanau, ina ia malamalama i le natura paia o feagaiga e osia i le malumalu?

O sauniga o le faamauga e mafai ona faafesootai ai fanau amiotonu a Atamu e faavavau e ala lea i le pule o le perisitua.

O le a le uiga o le “fesootai atoatoa o le faasologa mai le Tama o Atamu e tau atu i le iuga o le lalolagi”? O le a lo tatou tiutetauave i le faafe- sootaiga o lenei faasologa? (Vaai MFF 128:18.)E mafai faapefea ona faamanuiaina i tatou ma o tatou aiga i le taimi nei ma le lumanai, ona o le faia o nei fesootaiga?
E faapefea ona fesoasoani le sauniga o le faamauga ia i tatou, “ina ua tatou o ese mai Papelonia, ma faapaiaina i tatou lava, ma fausia le Siona a lo tatou Atua”?
O le a se mea e mafai ona e faia, ina ia matuai aoga ai le sauniga o le faamauga i le malumalu i lou olaga? O le a sou lagona, pe a e iloaina, e mafai ona e faia ni sootaga faaleaiga e faavavau ma ou augatuaa, o lau fanau, ma lou lava aiga? E faapefea ona aafia ou lagona i le ola ai i le talalelei i aso taitasi i lou iloaina o lenei mea?